أحببته في أصعب الظروف

26

#احببته_في_أصعب_الظروف
#الحلقة26
وقعدت يوم كامل ف غيبوبه وقعدت انا ولؤي معاها وانا مشيت بنجيبله حاجه ياكلها لانه من انس ماكلينا شي
وانا راجع تلاقيت مع الدكتور وقالي: المريضه صحت من الغيبوبه
انا فرحت ومشيت نجري وكيف بندخل للغرفه سمعت صوتها وكانت تبكي وتقول: نبي أمي انا يالؤي نبي نمشيلها بالله عليها ارفعني ليها بالله عليك💔 نبي نشوفها انا
لؤي بصوت مخنوق ويحاول يكتم بكاه: خ خلاص يارغد ماتزيدينيش بالله عليك ومانقدرش نخليك تمشي بروحك وانا مانقدرش نمشي
انا لما سمعتهم رجعت طلعت من العياده ومشيت....
رغد🌸
أول مافتحت عيوني  شفتت الغرفه عرفت روحي ف المستشفى ولقيت جنبي لؤي تحركت وجاني وتفكرت اللي صار وقعدت نبكي ونقوله نبي نمشي لماما وبعدها دخل الدكتور وعطاني حقنة مهدئة ورجعت رقدت
ولؤي طلع يدور ف مراد واتصل بيه: الو
مراد: ايوه
لؤي: تي وين مشيت ياراجل رغد فاقت
مراد: والله مشوار ع السريع وراجع شن حالها توا
لؤي: والله احرف من قبل عطاها الدكتور مهدئ وخلاص غر تعالا بسرعه باش نمشي نشوف الشركه ضروري
مراد: باهي تمام مشوار الطريق وجاي
بعد نص ساعه✨
مراد دخل للغرفه ولقي لؤي مقعمز وانا راقده
مراد يتكلم بالشويه: كيف حالها توا
لؤي : كويسه تعالا نطلعو برا خير
مراد: تمام ...وطلعو
لؤي: انا بكري كلمت نسرين وقلتلها ع رغد وطبعا هيا سامعه بحالة أمي وتوا بتجي للحوش لاني بنطلع رغد
مراد: احسن اصلا مفروض قلتلها من البدايه وعلاس بتطلع رغد
لؤي: هيا تعبانه اصلا والمستشفى تزيد فيها وانا سألت الدكتور وقالي عادي
مراد: باهي عادي مايصيرلها شي ف الطياره
لؤي استغرب: طيارة شن ياراجل
مراد: بكري لما فاقت سمعتها تبي تمشي لأمها ومشيت خديت الجوازات وعطيتهم لواحد يدورلي حجز اليومين هادو وكان هكي بنحجز لتونس ومن تونس نطلع طول لألمانيا

" طبعا الجواز بتعي كان عند مراد ع خاطر الفاتحه وقعد عنده لأي حاجه طارئة زي توا"

لؤي: مليح بكل اقل حاجه تمشي غادي وتشوفها ماتدريش ع الظروف💔  وانا كنت شايل همه الموضوع بارك الله فيك يامراد بجد يعني مش عارف شن نقول وقفتك معانا مش ح ننساهالك
مراد: معاش تقول هكي هيا مرتي وانت خوي ونسيبي ياراجل وبعدين انا مادرت شي يعني وخليك شاد حيلك ولازم تقوي روحك قدام اختك لان هيا توا محتاجاتك ومحتاجه دعمك وهبا ح تكون قويه لما تشوفك انت قوي وديما طمنها باش هيا معاش تخاف
لؤي: بارك الله فيك بجد يعني ونعم الراجل ومش ح نلقى خير منك لأختي و قطع عليهم صوت هاتف مراد
مراد: لحظة وبس ..و رد  الوو
: ...
مراد:ايه
:...تمام بكل
:...
مراد:اوكي بعد شويه نمر عليك
:...
مراد: بارك الله فيك سلام  ..ويكر
لؤي: شن في ان شاءالله خير
مراد: حصل حجز بعد غدوه والطيارة الساعة 6 الصبح
لؤي:ميه ف الميه خلي نقول لنسرين توتيلها الشنطة من توا لان توا الساعة 9 ف الليل يادوبك نروح بيها وتتريح وغدوه اكيد بيجو العيله وهكي وانتو المفروض تكونو الساعه4 الفجر ف المطار
مراد: باهي تمام ان شاءالله خير وانا خلي نمشي للدكتور ونزيد نشوفه ع حالتها
عند سهى
مشت لبنت جيرانها وقعدت تهدرز وهكي وبعدين اتصلت بمراد وقاللها ع اللي صار لرغد وسكرت منه وبعتت رسالة للؤي اتطمنت عليه وهكي وف الليل حست انه عطل زادت اتصلت بمراد ورد عليها
سهى: الوو
مراد: ايوه اهلا
سهى: اهلين شن صار فيك وكيف حال رغد توا
مراد: والله ان شاءالله خير وتوا حجزت ليا انا وياها بنمشو لألمانيا بعد غدوه وانتي جهزي روحك باش نرفعك لخالتي لان مانقدرش نخليك بروحك وبعد شويه بنجي نروح بيك باش تجهزيلي شنطتي حتى انا
سهى وووه مانبيش نقعد عند خالتي توا لؤي يديرلي قصه وهوا اصلا مش ناقص : باهي تمام غر تعالا وبعدين ساهل
مراد: تمام سلام توا
سهى: سلام وسكرت ..اوووف
لمار"بنت جيرانهم م96 مخطوبة": خيرك
سهى:مراد بيسافر ويبي يخليني عند خالتي وانا مانبيش
لمار: علاش ماتبيش باه
سهى: ماهو قتلك ع بنت خالتي والقصة اللي صارت و ولد خالتي حتى هوا
لمار: عليك حاله باهي شوفي حد من عيلة بوك
سهى: والله ماني عارفه بعدين ساهل
عندنا حني
وصلنا ولقيت نسرين قدامي وأسيل ورنيم وحلا ورنا وجوني كلهم حضنوني وحاولو يغيرولي جوي وركبت لداري بدلت واستريحت وبعدنا جوني البنات فوق وطبعا كلهم بايتين ومراد قاللهم يبي يشوفني وانا قلتلهم تعبانه ومانبيش وقاللهم بنركبلها وطلعو البنات وانا درت روحي بنرقد وتعبانه ودخل
مراد🍁
جيتهم وقلت،نبي نشوفها وقالو تعبانه وانا عارفها هيا ماتبيش تشوفني ومش فاهم علاش كارهتني لهالدرجه المهم قلتلهم بنركبلها ف النهاية انا راجلها وبنشوفها ومايمنعني حد حتى لو كانت هيا وطلعو البنات من عندها وانا دخلتلها كانت مغمضه عيونها وواضح عليها التعب وجيت بجنبها وشديت ايدها فجأة سحبتها وفتحت عيونها وقعمزت وتكلمت هيا ضاغطه ع سنونها: لو سمحت معاش تمسني
انا نشوفلها ومش فاهم شيرغد :معاش تشوفلي هكي
انا بهزوه: ع فكرة انا شديت ايدك مابستكش وبعدين نشةفلك كيف مانبي مرررتي وانا حر
رغد: مابردك شن تبي هي 😠
انا بجدية وبصوت حاد شويه: انا مانلعبش هني تمام ومفروض تحترمي اني راجلك وقاري فيك الفاتحه واسلوبك هذا معاش تتعاملي بيه معاي فاهمه والا
رغد بعناد : لا ماليكش علاقه بيا لما نبدا معاك ف حوش واحد تحكم فيا اما توا ماتدخلش فيا او ف اسلوبي وتعاملي 😠
انا: تعرفي تسكتي بعدين هانت شن مازال توا تجي عندي ونعرف كيف نتعامل معاك
رغد : ده بُعدك غير احلم بس
انا تنرفزت بجد بس حاولت نهدي روحي تنفست بقوه: خلينا ف الموضوع الاساسي انتي مش تبي تمشي تشوفي امك
رغدتفكرت عيونها دمعو وخنقتنها العبره وتحاول تكتمها : ....
انا وجعتني وتكلمت بحنية: اووس خلاص بعد غدوة الصبح بنمشولها انا وياك وتسوفيها وبإذن الله ح ترجع احسن من قبل ..وحطيت ايدي ع كتفها وهيا على طول بدت تبكي
انا حضتنها طول: اووسس خلاص عاد معاش تبكي واتعبي روحك
رغد وهيا تشهق وكلامها بالسيف نفهم فيه: اا انا خاايفه عليها مانبيش تمشي وتسيبنيي 😭 ..ولفت ايديها عليا
انا زدت ضغطت عليها وشديتها ليا اكتر : اووسس خلاص حبيبتي امك مش ح تسيبك اكيد ومش ح تخليك بروحك وبعدين انا معاك وقاعد بجنبك طول العمر مش مخليك بروحك ابدا بس خلاص معاش تيكي وتقطعي فيا معاك
رغد ودموعها ينزلو بعدت شويه وشافتلي فوق: اانت مشش ح حتسيبني ص صح
انا نشوفلها ونمسحلها ف دموعها وع شعرها بايد والتانيه شادها بيها : اكيد ياعمري في شخص يسيب روحه هوا والله نحبك انا ونموت فيك ومانبي نشوف دموعك وبعد يوم واحد بس نمشو لأمك وتشوفيها باهي
رغد وهيا قعده تشوفلي فوق هزت براسها: به
انا كان منظرها يهبل وهيا تشوفلي فوق زي البيبي خطيت راسها ع صدري وبستها عليه وقلتلها: وتوا ارقدي هني بس واستريحي ياروحي ..وقعدت نمشي ف ايدي ع شعرها وقريت عليها قرآن وبعد شويه حسيت ان انفاسها انتظمت ولما شفتها لقيتها راقده وشاده ف التيشيرت بتعي بايدها ومنظرها زي البيبي❤ ساويتها ع سريرها وغطيتها وبستها ع جبهتها : ربي يخليك ليا ياحبيبتي ونشوفك فرحانه وربي يجمعني بيك ف حوش واحد وتكوني ليا طول العمر انا نحبك وربي نموت فيك لو تحسي بيا بس وتعامليني زي قبل اااه وخلاص ونضت  وسكرت الضي والباب وطلعت