علاقات زائفة

البارت الثالث والسبعون

بنان : اني اريد ولد.

حسن : ليش يعني؟

بنان : لان عندي بنات..

صفن عليه ماعرف حسيته شويه ضاج لو اني متوهمه تاهت عليه جر نفس وكال..

حسن : بناتج هنه بناتي واذا اجتنه بنيه تصير اخت الهن واذا ولد يصيرلهن سند ، لتفكرين زايد كلشي بوكته حلو..

بلشنه نصبغ هو بجهة واني بجهة..جريت نفس قوي وزفرته حس بيه ، صاح.

حسن: شنو هالحسرة يمعوده من يمي كلبي انقبض تفائلي شويه..

شمرت الفرجة من ايدي وكعدت بالكاع خليت ايدي على وجهي كمت ابجي اجه يركض ،كعد يمي جرني لحضنه وارتاج على الحايط..

حسن : ليش حبيبتي ليش يعني تمردين كلبي كوة اله تأذيني يلا ترتاحين..

بنان : ميعوفنه والله وشوف اذا ما انكسرنه ثنينه كول كالت بنان..

حسن : والله ميكدر يسوي شي بس فهميني من شنو خايفه..

بنان : تتذكر من طلكني ذيج المره واهلي كلهم ضده ، بمكالمه وحده منه گلب اهلي عليه وسحبني للأنبار بدون ميكلف نفسه ويتعبها ويتعنى لهنا ، ابسط شي المحكمه مو كدامك صارت ، فكرنه بشي وصدمنه بشي ثاني من كله للقاضي زوجتي مخبله ، اني عشت وياه سنين وما حزرته ، صميم غامض ومتعرف شنو يدور براسه والله يستر من الجاي.

حسن : لحالج خايفه وتبجين صدكيني ميكدر لنفرض اجه وخيرج بين بناتج وبيني شنو راح تختارين..

رفعت راسي وباوعتله مسحت دموعي وحسيت بده الصدك..

بنان : ماعرف بناتي اموت بلياهن واموت اذا رجعت لصميم واموت اذا عفتك انت حلها ..

حسن : انتي ضلي مصره على موقفج ولتبينين ضعفج وخوفج كدامه صيري قويه شنو يسوي وبشنو يهدد لتهتمين اعتبري كلامه مجرد رماد بريح لتاخذيه على محمل الجد..

بنان : ماعرف بس احس بيه راح يرجع والمقال مالته بيه هواي اشياء مبطنه وتهديد صريح ، يعني حبي وتعلقي واعرف شلون ارجعج الي..

حسن : خرب بيه لتخليني اسبه كومي نشتغل تره كلبي كام يفور يعني جنه مرتاحين اله تضوجينه بسيرته ، باعي كومي سويلنه كهوة وراح اروح اجيب دونات وكرزات علمود تصير عندج طاقه ونكمل شغل بسرعه..

ضحكت.

بنان : بعدك تتذكر شنو احب.

حسن : اني ما انسى اي شي تحبيه واي تفصيله تخصج كلها مطبوعه بالذاكره.

بنان : ماشي ابو ذاكره راح انزل.

نزلنه سوه هو طلع واني رحت للمطبخ ، طحنت الكهوة لان نحبها حبات مو مطحونه ورتبت صينيه خليت بيها كوبين ومي وماعون فارغ علمود اخلي بيه دونات ..