علاقات زائفة

البارت الواحد والسبعون

كعدت بصف بنان واخذت ايات منها كمت العبها وماما التهت بالسوالف ويه عمتي والبنات ويه حنى وزها ..

همستلي بنان..

بنان : ضايجه من سالفه مسرة مو؟؟

هزيت راسي ب اي.

بنان : ميخالف بعدها متعرفج من تتعرف عليج راح تحبج.

روند : اذا حبتني واذا محبتني عيشتي عليها اصلا بعد بوجها ما اباوع..

بنان : ماعرف شكلج ..

روند: لتكولين شي،، عوفيها على خرابها..

سكتنه وبنان طلعت ظرف من جنطتها خلته بحضني..
باوعتلها..

روند : شنو هذا؟؟

بنان : حسن دزة بيدي وكال سلميلي على روند وبوسيها عني.

روند : فدوة حسوني ، فتحت الظرف والتفتت على بنان ،،، هاي هواي خطيه.

بنان : هو كال ما اعرف شنو تحتاج هاي فلوس وهيه تشتري..

روند : عاشت ايده ..

بنان : وهاي مني ومن بناتي هههه..

روند : رجعيهن انتي منيلج ..

بنان : عندي خير من الله ابويه واخواني ممقصرين وصميم يدز كل شهر الي وللبنات..

روند : زين طلع شي بيه حظ بصميم ...

بنان : من البدايه هو ممقصر علينه .

روند : اي الله يوفقه وين ما كان..

وراها ماما لبستني كلاده ذهب كالت هاي مني ومن ابوج ، والبنات كل وحده نطتني ظرف بيه مبلغ وراحو..

ضليت كاعده يم عمتي والبنات حنى وزها ، مسرة بعد الغده منزلت ولا شفتها..

صار المغرب الكل كام للصلاه اني هم صعدت توضيت وصليت ..

كعدت شنو اسوي ملل هاي بدايتها وهيج باوعت موبايلي ، لا اكو مسج ولا اتصال من جراح نفس توقعي ...على شنو زعلان ما اعرف وشنو الذنب اللي سويته هم ما اعرف ..

مشت الايام واني اروح للدوام وارجع اسوي واجباتي واصعد فوك طلبت من عمي يتسوكلي لان ما الحك عليهم بالغده صح يتركولي اكل على صفحه بس اني مو كلشي احب اكل يعني اكو اكلات معينه احب اكلها ، خطيه عمي مكال شي وراح تسوك وصعدته فوك. جراح جايب كم شغله نساتل على فواكه شغلات ريوك بس مو مخضر ولحم لان اكلنه جوة ويه اهله...

غسلت المسواك ورتبته بالسلات وخليته بالثلاجه بعد ما وشل من المي ، بعدها رحت كويت ملابسي مال دوام ، وسويت عشا تعشيت ونمت من وقت جانت ساعه ٨ لان الظهر منمت ، ثاني يوم كعدت بدلت وطلعت للدوام وصلت باب الشارع توني افتحهة اجاني صوت جراح ، هاي اول مره اشوفه من بعد اسبوع ، لان من يجي اني فوك ومن هو طالع انزل جوة ...