علاقات زائفة

البارت الواحد والسبعون

كتلها لا تعالو هله بيكم ، نزلت بلغت عمتي ورحت وياها وكفت بالمطبخ ، مقبلت كالت بعدج عروس وميصير كتلها صارلي ٨ ايام كافي اني هم ضجت..سكتت ، سويت وياها الاكل وحضرت الزلاطة وزها غسلت المواعين.

هدى : يمه خابرتي اختج وحامها فد نوب وانه بالي يمها.

زها : هسه هو وحام شو حبلنه وجبنه ومحد يدري بينه هالعيارة شكو .

هدى: ابتلي افك حلكي وياج بحجايه تردين عشره..

زها : اي قابل حاجيه جذب..

هدى : زيحي من وجهي مابيج نفع فد لغوه.

باوعت على عمتي ضايجه وزها تباوع صفح ، يعني حتى ويه امج تختلقين المشاكل ..

كملت شغلي بسرعه وصعدت فوك من صار وكت الغده صاحتني حنى كتلها ما اشتهي اتقصدت ما انزل لان جراح موجود ..

رجعت صعدتلي ..

حنى : يكول جراح خلي تنزل تتغده .

روند : ما اشتهي والله.

حنى : لخاطري والله رجلي راحت مابيه اصعدلج لان هم يدزني ..

روند : هسه اغير ملابسي وانزل..

رحت للحمام سبحت لان ملابسي كلها ريحه طبخ ، وبدلت خليت مكياج ورتبت شعري ونزلت .

لكيتهم كلهم كاعدين على السفره حتى مسرة بس جراح كاعد يم عمي مو يمها..

رحت كعدت بطارف السفره..

موسى : تعاي عمي كعدي هنا عليش مبتعده غاد

رحت كعدت بصفه بدون كلام.

تغدينه ورفعنه السفره رحت غسلت المواعين وحنى نظفت الطباخ والكاونترات ومسحت الارضيه واني رحت نظفت البيت وطلعت غسلت الطرمه ، الكل جان نايم همه طبيعتهم ينامون وقت الظهر ماعدهم واحد يضل كاعد ، طبعا اني اشتغلت من ذاتي محد كلي ولا احد وجهني وقسم الشغل بينه ، لان بيت اهلي جان كله عليه عدا الطبخ على ماما والعشا اساعدها بيه لهذا ايدي ماخذه على شغل..

كملت وصعدت سبحت مره ثانيه وبدلت كلبيه وشسورت شعري وخليت مكياج وكعدت انتظر جيه اهلي..

صارت ساعه خمسه ونص صاحتني عمتي ، كمت قفلت الباب ونزلت محد كلي قفلي بس اني اخذت حذر عندي هسه الكل اعداء ولازم اتعامل وياهم بمبدأ الحيطة والحذر ماعرف منو ويايه ومنو عليه..

نزلت لكيت ماما وبنان ورفل ورفاه وزينه ورانيه وطبعا اطفالهم هم ، سلمت عليهم وبوستهم واكثر وحده ماما جلبت بيها حضنتني وهمست..

جنان : ممرتاحه مو؟

هيه هيج كالت واني اشهك وابجي ، الكل استغرب وصار توتر اخر شي تلافيت الموقف، مسحت دموعي وكتلها..

روند : مشتاقتلكم وممتعلمه هلكد ابتعد..

ماما باوعتلي بنظرة ممصدكتني ،،تقراني وتعرفني اذا اكذب بس اني اصريت على نفس كلامي..