علاقات زائفة

البارت الثالث والستون

محسيت اله راشدي اجاني من جراح ، محجيت ولا بجيت ، اخذت جنطتي وطلعت رجعت للبيت الطريق كله رجلي ترجف كل شويه واكول راح اندعم

وصلت اريد انزل ما اكدر ارجف وابجي ، ورة ربع ساعه نزلت كبل لبيت عمي ردت اشوف بنان وحضها المصخم شصاير بيها هسه ، اني توقعت شغله غيره ودلال من بنان لهذا ضجت منها ولمتها ومسألت عنها لان زعلتها صارت ويه زواجي ...

دكيت الباب فتحوه ،، مشفت منو ولا سلمت الدموع متجمعه بعيني والقهره براسي صعدتلها اركض فتحت الباب لكيتها متمدده وتباوع بالموبايل ودموعها تجري رحت عليها لزمتها من جتفها وكومتها كعدتها وكعدت كبالها ..

روند : تبجين عليه حبيبتي هااا تبجين على الجلب ابو النسوان لج ردت احركهم لج بغرفتج جانت فووك جايبها بنص بيتكم وعيالج العار عادي متقبليها ..

بنان : ليش تزوجها؟
حجيتها واختنكت ..

روند: والله حبيبتي ملحكت اسأل وابارك ، لان انصدمت وانتي ليش ما حجيتي نبهتيني هيج تخليني انصدم والله زين منشليت ...

بنان : خوما سويتي مشكله وياهم جان عفتي وطلعتي..

روند : لا والله صدك تحجين اخ يا برود اعصابج لج الموقف ميخصني ومتت ضربتها وهنتها وهنت رجلج العار وعمج وحتى جراح طيحت حضهم وطلعت شلون انتي كاعده وساكته ماعرف ..

بنان : عزة بعيني اني صوجي دزيتج ولج شسوة جراح ، اعرف بيه عصبي وميسكت ..

روند: يا فدوة عصبي همه العراقيين كلهم بيهم خيط اعصاب منو منهم هادئ وبعدين و اذا عصبي يغلط ونسكتله والله عصبي ، حجيت اللي ملاه عليه ضميري صح انضربت منه بس بردت كلبي..

بنان : لا عفيه ليش هيج وصلت بينكم لا روند ولج فوك همي زيدتيني هم..

روند: هاي شبيج بابا هو هيج هيج خربانه هاي الزواجه اخذ حقي وحقج واطلع ولا اضل اندب بحضي واشد راسي مثلج ...

بنان : وشنو تردين تبطلين يعني ؟؟
حجيتها وباوعتلها بقلق..

روند: طبعا لعد تردين نصير جناين اني وياها بنفس البيت ..

بنان : باعي جراح خوش جراح معليج انتي بصميم واهله اني عشت وياه سنين انسان مثالي والله ..

روند : عوفج مني تعاي شكو ناصبه مناحه ومكابله الموبايل شنو تباوعين لصورة لو لمسجاته لو هم مكابله الستوريات مالته شنزل وشمانزل .

بنان : لا هذا موبايله ..

روند : موبايل منو ؟؟

بنان : صميم ..

باوعتلها وفتحت عيني كلها...

روند : شو خلي اشوف شنو بيه ..

بنان : تعاي اقري القهر مالتي ..