كحل عرب

السلام عليكم

قبل لنبلش القصة
.... دا اوضح الكم كم نقطة

المحفوظ و الگليط و الجبير و المعزوز  كل هاي القاب ريفية تطلق على شيخ العشيرة .

السركال ... هذه كانت مكانة او وضيفة بزمن الاقطاعيين وهو المساعد للشيخ العام للعشيرة و النائب عنه في أمور الأقطاع
انتهى دور السركال تقريبا  بزمن الزعيم عبد الكريم قاسم لما اباد النظام الأقطاعي الظالم.

اكثر كلمة ممكن تتردد ( احنا بالجنوب بس منحجي هيج )

اولا الجنوب مو كله ريف .. هو مكون من ولاية وريف
الولاية صح حجيها بال (جا) بس كلامهم عادي عامي

اما الريف فكلامهم مختلف تماما عن الولاية
وطبعا مو لهجة وحدة بالريف، بالمحافظة الوحدة تلكة لهجة تختلف عن لهجة

جنوب العراق بحر من اللهجات و الكلمات و اغلب كلماته هي حضارية من حضارة سومر و بابل
لهذا تلكه الكلام الجنوبي هو الاول بعد اللغة العربية من حيث الوزن و القافية في الشعر و القصيدة .. لإنه لهجة حضارية

لكن للأسف هواية نشوف يقللون منها وما يفتخرون بيها .. وبسببهم هذه اللهجة بدت تندثر وما نلكاها غير عند جداتنا و اجدادنا .. احنا الجيل الإن ما نستخدمها

لهذا اسمحولي اسرد بيها
لكن اوعدكم راح اخفف .. مثال ( الغصة قصة .. اتضكر اتذكر ) و حسهلها الكم ان شاءالله

اما الاسماء
فلو سألتكم شنو اسماء اجدادكم راح الكا اسماء القصة كلها عد اجدادكم .. لا اصلا اسماء بعد اغرب
... واساسا اني اختاريتها من اسماء اجدادكم

فهل من الانصاف ان اكتب عن الزمن القديم  بأسماء اليوم

(حيدر و مصطفى و كرار ) صح هذه اسماء دينية معروفة ، بس هذه الاسماء جانت جدا قليلة و اشتهرت بالثمانينات .. اغلب اسماء اهل كبل غريبة ريفية

لهذا الاسماء لازم انطيها حقها، فيما بعد لما تجي الاجيال الجديدة .. راح تتغير وتعاصر الزمن
وطبيعي كلشي بالبداية صعب بعدين تتعودون عليهم

اكو تعليق جذبني وضحكني بنفس الوقت يكول ( من قريت و شفت الاسماء حسيت اهل الكبور كعدوا من كبورهم ) يعني الاسماء جدا مهمة حتى ارجعكم للزمن الجميل ونعيش قصصهم .

ووضحت السالوفة حجتها (هدية ) و هي مواليد ستينات ، ولنا حجت عن السالفة كالت ( كان يا ما كان في قديم الزمان ) .. يعني اقدم من مواليدها طبعا
تقريبا ببدايات ١٩٠٠

تكلمت بالمقدمة عن العشيرة شلون انفصلت و من انفصالهم حتجري القصة .

فقط حبيت اوضح هالنقاط
و عليكم السلام ورحمة الله و بركاته ❤