#كحل_عرب
(بيت بيوت )(((بقلم زينب ماجد )))
الحلقة -3-
(الأنتحار )ياروحي من روحج جزعتي
انه انه وانتي انتي
لو اراويج الصبر
لو بيج اجي اعنايه اعله ذلتي
مدري شمضيعه بخَلگ بيهم
سبع موتات متي
لــِ عريان السيد خلف🖤كواغد : انا امج يهدوة البت وينها يمممه
خنجر: موش طلعت ويا البت دشوفوها خافنها جاية وما تدرون .
ايمان : بس على كيفكم خل ندورها
كواغد تثغب و تلطم و خنجر خبص الدنيا بصياحه ، طلعت الناس اعلى حس الهوسة تنشد (شني و شكو ) وعد ما عرفوا بنية بعمر ٩ سنين مامش ويا فزعوا ويا خنجر يدورون اعلى مواصفات البنية .
الاسم امنية فلاح ناصر
العمر ٩ سنوات ... الناس تمشي و تصيح
شارع الداخل وكف اعلى حيله ، ناس لا تعرفها ولا تعرفك كامت تدور وياك و تصيح باسم البنية و مواصفاتها .ناس راحت للمدرسة تفتشها صف صف
وناس ادور بالفروع القريبة على مدرسة عبد القادر الجزائري .. وناس مشت اعلى الجوامع و تطي مواصفاتها .والجامع يصيح ( انتباه انتباه فقدت طفلة بعمر ٩ سنوات اسمها امنية فلاح ناصر ترتدي الزي المدرسي قميص ابيض و صدرية نيلية على من يعثر على مواصفات البنت جلبها الجامع وله الأجر و الثواب )
خنجر روحه طلعت من زياكه و هو ما خله فرع ولة دربونه ما مرها و دورها بسيارته ومامون ومروان وياه .
و كواغد بعبايتها تمشي بلا وعي ادورها و تصيح : مت عيني عليج هديوووووة يمه .
(بيت سرحان )
دخلوا هدوة جايبة للبيت و شادة راسها ومتتجيتها لالة وشايله الولد ، تلكتها جمارة:- ها الحمد لله على السلامة دية
حبيتها و تجيتها من ايدها الاخرى و خذيناها انا و لالة للحجرة وهي تون و تبجي من الالم .انا مجهزتلها فراشها ووفراش الفر*خ ومرتبة البيت و طابخة الغدا و متانية احد منهم يجي ، الجهال تاخروا بجيتهم و هدوة دشت كبلهم .
نوميناها انا ولالة و كلت الها : شلونها جايبتج
ما جاوبتني تون ، و لالة ردت عنها : خايبة لعبن بيها جولة و سرحان تعارك غاد و سواها سودة مصخمة اعليهم
- يااا عليش ؟
- ولج المرة ماتت و هن هاداتها ولا دايراتلها بال ، يابة المرة تطلك الجاهل راح يطلع محد تعاين عليج ليما طلعت كل السرحان تعارك وياهم وكال الهم اطوني المرة والا اكاومك ، يلا ذيج الساعة كلهن التمن عليها و جيبنها .
- جا ما خذيتوها لغير مستشفى ؟
- خية ماي الراس طك و الجاهل راسه واصل و هن ولا عدالهن بشر ينوح مدري اشايلات بكلوبهن .. ليما طلعت و حاجيته تولاهم .
أنت تقرأ
كحل عرب
General Fictionجيل بعد جيل .. يولد حبا جديد يواري خبث العادات و التقاليد بين نهوة و فصلية هدية و دية اولاد ضحية وشيوخ ظالمة لا تجد للإمور حلاً غير السلاح .. من العراق وعلى ارض السماوة اقدم لكم (كحل عرب )