علاقات زائفة

البارت الخمسون

احترم كلمتك

اذا كنت رجلآ نبيلآ  ...
لكنك تفتقر لمصداقيتك ، تقول ما لاتعنيه
لا تقلق من قول امر قد يجرح او يحبط المقابل 
تقطع عهدا و لم تفي به
لم تندم بعد الخطيئة
لم تكن امينآ على الحبيبة ،
مسئولياتك تستغنى عنها للغير ،
قولك لا يدل على الصدق بتاتآ ..
كلامك شيء وافعالك اشياء
فما فائده نبلك اذن ..

_________
بنان

انا الصبيت حيلي ودفرو الماعون ..

تخبلت ليش يدفر بالباب صدك جذب وليش يصيح خابص الدنيا ، اسمعه يكول خلي تجيب موبايلها اذا متصدكوني ، بسرعه لزمت الموبايل فتحته والكى حور ثابرة الدنيا ثبر مكالمات ومسجات ، من ادخل اقره كاتبتلي غبيه انتي وينج شنو دازة هاي اللغوة بالكروب شلون اذا وصلت لرجلج مو يملخج تملخ ، وحجي هواي ، ايدي كامت ترجف بسرعه دخلت للكروب مسحت المحادثه ورجعت مسحت المحادثه بيني وبين حور ، واللي بيني وبين حسن ، بس الثول نسيت امسح اللي بالواتساب ، امنت انو هاهيه انمسح كلشي ، الحجي عادي مابيه شي  بس هو يتخبل من حسن ..

ورة جر وعر انفتح الباب فات جراح وراه صميم ينكط الشر من عيونه ..

راد يحجي اشرله جراح بيده يعني اسكت ..

صميم راح على موبايلي اخذه وخلاه كبالي  وحجه بصوت عالي ..

صميم : فتحي الرمز ..

مديت ايدي فتحته اله وراح يم جراح ..

يقره ويسوي حلووو عفيه كلش زين ...التفت لجراح وكله

صميم : ها يابه ترضاها احجييييي جراح لا اموتها هاي اللي تدافع عنها ...

جراح صح هادئ وياخذ الامور بعقل ، بس هلمرة جان عصبي ..

حجه بنبرة غضب ..

جراح : شوفي يابه انه لا من النوع اللي احب ادور ب اشياء الخاصه لاي انسان ولا اتدخل بحياتو ، ولا احب اقره مسجات وهاي السوالف التعبانه والنفاق واتخبل من سوالف النسوان وما احب اتدخل بيهن لا من قريب ولا من بعيد والج سنه يمنه وعرفتيني زين ،،،فد من توصل شغله تمس شرفنه وغيرتنه انه تلكيني اول واحد واكف بوجهج ، اخويه غلط وياج وانه ما جاي ابريه ولا انطيه الحك ، فد مادام انتي بعدج على ذمتو قانونا وكاعده ابيتنه ، ما ارضالج السويتيه..

اباوع عليهم متت بدمي من الفشله موقف ما انحسد عليه ابد ..

بنان : ابو صكر حجي عادي اني وابن عمي وين الاشكال يعني اذا حجيت وياه ..

جراح : جيب موبايلك صميم ..
حجاها بنتره ..

نطاه الموبايل وفتحله الرمز .اجه تقرب يمي وخلاه بحضني وكال  ..

جراح : اقري بويه ، ابوج عمامج جبيركم يرضى بهذا الكلام على زوجج ، ورجال يشرحلج مشاعرو بهالطريقه وانتي على بعدج على ذمه زلمتج .