🌺#اليتيمة🌺هيا 1700 تعليق تنزل لي بعدها😘
🌺الحلقة الثالثة والأربعون🌺
________________________________ ✨
وكيف بنخش لي حوشهم ... يزن كيف طالع
اني: صباح الخير
يزن: صباح النور الحمدلله ع سلامه
اني: الله يسلمك شن أخبارك
يزن: والله الحمدلله
وواقفه اني وياه في الشارع نهدرزو .... علي جية #اماني وتشوفنا
اماني:😳 هادي مش ميرال اي والله هي 😍.... واقفة وتهدرز مع ولد ...هه عليك فرصه ولقيتها .... وخدت فونها وصورتنا "طبعا مع التاريخ في الصورة " ... يس 😍 جت في وقتها ... وكملت طريقها ✨
~
~
يزن: نرجس تستنا فيك
اني: تمام خاشتلها
يزن: سلام نتلاقو
اني: سلام
ركب يزن في سيارته ... واني طقيت الباب ...
نرجس: اهلا اهلا الحمدلله ع السلامه
اني: الله يسلمك حييتي
نرجس: شن أخبارك وأخبار ليبيا
اني: نفس الأوضاع الضيء هارب وسيولة مافيش وأمن مش تابت والحمدلله ع كل حال
نرجس: امت هالبلاد تتسقم بس والله تعبو الناس وتعبنا
اني: اهو حال الدنيا يوم هكي ويوم هكي ... انتي أحكيلي شن جديدك
نرجس: مافيش جديد اهو قاعدة في هالحوش وخلاص
اني: به علاش ماتشتغليش
نرجس: انتي عارفة ماعنديش شهادة ومبطله من تالته عدادي
اني: شهادة التمريض يمكن تفيدك
نرجس: هو بيني وبينك كرهت الشغل علي قد ماتعبت وتمرمدت زمان ... وتوا يزن يصرف والحال مستور هكي أريحلي
اني: لكن والله ملل اقل شيء تشوفي الناس تطلعي وتتعرفي ع ناس جدد
نرجس: مرة مرة نطلع ندهور في هالبلاد ونغير جوي.... اني كان نلقا نرجع لي ليبيا بس يزن مايبيش
اني: قصدك يزن ناوي يقعد هني حتى بعد مايكمل
نرجس: للأسف ايه 💔
اني: علي خاطري ماهو😔
نرجس شبحتلي: ميرال انتي مش برانيه وعارفة علينا كل شيء ... نبيك تخدميني في خدمه
اني: اكيد يانرجس لو نقدر مش حانقصر
نرجس: يزن خوي يحبك هلبا ومش مفكر يرتبط او حتي يشبح لي بنت غيرك .... وانتي خلاص تزوجتي ... علي قد ماحاولت نقنعه وانسيه فيك بس ماقدرتش .... مهما يكون اني أخته ومش حانقدر .... لكن لو خشت بنت في حياته يمكن يحبها وتخليه ينساك ....
اني: به واني شن نقدر اندير ؟
نرجس: هدرزي معاه حسيسيه انك صديقته اقنعيه يمكن يسمع منك
اني: انتي متوقعه يسمع ويقتنع مني
نرجس: مش عارفة .... بس والله من حرقتي عليه نبي ندير اي حاجه
اني: انشالله حاندير كل الي نقدر عليه
نرجس: ياريت والله ... مش حاننسالك هالمعروف
اني: مش بيناتنا ولو ....
وقعدنا نهدرزو ✨
.
.
.
.
.
~
.
.
.
.
.
.
~
أماني : تأخرت عليك
قيس: لالا مزال ع الإجتماع اصلا
اماني: به كويس ... قيس بنسألك
قيس وهو منزل راسه ويقرا في أوراق قدامه : تفضلي
اماني: ماعندكمش حد في باريس وله ... قصدي ميرال ماعندهاش أقارب عايشين هني
قيس قام عيونه وشبحلها: لالا ...علاش؟
اماني: ااا لالا شيء قصدي ميرال حسيتها مش عارفة ديما خاشه بعضها ...ماتملش تو تقعد هكي في الشقه ديما وماتطلعش
قيس: ومن قالك ماتطلعش ... هي تقرا وتوا عطلتها ... وتعرفت ع ناس وعندها أصدقاء ....
اماني في خاطرها قالك أصدقاء قال تي مدايراتك بي قرونك انت : اها ايه وحتي حكينا كم مرة عمرها ماكلمتني علي خواتها او عيلتها
قيس : ميرال ماعندهاش خوات
اماني: ااه حسيت حتي اني
قيس: شن حسيتي هادي ؟
اماني: قصدي يعني ماعندهاش خلطه هلبا تحسها هكي متعقدة
قيس شبحلها مع قيمه حاجب : ماتحبش تخالط اي حد فهمتي كيف يعني مش اي حد يعجبها .... وتوا هيا الإجتماع بدي ... وطلع وخلاها
اماني: مصحه😳 هدا يقصدني ... شن يحسابني ماننفعش ولا كيف ... خيره تغير بعد ماسافر هكي ... اوووف 😣
وساوت شعرها وبخت برفانها ولحقاته ....
.
.
.
.
.
~
.
.
.
.
~
فراس: أمنه
امنه: ها
فراس: عصا 😒
امنه: علي ضهرك
فراس: مش رايقلك كان هدا وريتك العصا كيف شكلها
امنه: تحسابني ملوحه .. وحسام حايرضى😁
فراس: هاهاهاها ع اساس تزوجتي وحتي راجلي ... نوضي نضربك انتي وياه
امه: شن هالكلام ياولد شن تضرب راجل أختك 😒
امنه: ههههههه خليه ياماما خليه
فراس: غير اسمعي
امنه: نعمين
فراس بالشويا: تسنيم لاها سبوع معش مشت للجامعه ماتعرفيش خيرها ؟
امنه: وقفت قيدها
فراس: 😳 شنو
امنه: اي لانه الإمتحانات حايجو في السفرة .... لي هدا وقفت قيدها وبتقرا غادي
فراس: بتسافر خلاص 💔
امنه: فراس الي درته كبير راهو وكبير هلبا .... وتسنيم قداش لاها تتحمل فيك ... من اول علاقتكم وانت بمشاكلك وديما مزعلها وظالمها .... وكله بسبب الهم سجود ... خلاص لي أمت بتقعد متحملاتك ... لي أمت بتصبر عليك
فراس: باهي باهي ... راني خوك مش هي😒
امنه: اني نقول في الحق ...
فراس: باهي شن اندير والله حرت ومعش عرفت كيف نراضاها
امنه: خلاها علي راحتها توا ... وعطاها فرصه تفكر ... وقبل ماتسافر بيوم امشيلها ...
فراس: من عقلك انتي ... شن قبل ماتسافر بيوم باش تريح مني مرة وحدة ..
امنه: ها وتقعد هكي وهي تردك .... هكي تمل انت وهي ... وانت في كل مرة بتكحلها تعماها وتزيد الطين بله ....
والله خلاها الفترة هادي من غيرك تستاحشك وتعرف قيمتك .... وقبل ماتسافر بيوم امشي وخيرها ياأنت يالسفر ...
فراس: وكان ختارت السفر ...
امنه: كان ختارت السفر ... ماعندك مادير أرضى بوضعك فراس: تي مستحيل نعيش من غيرها
امنه: تحمل نتيجة غلطتك
فراس: باهي باهي يصير خير ..
وناض وخلاها ✨
امها: خيره شن كان يوشوشلك
أمنه: علي نفس الموضوع
امه: تسنيم
امنه: ايه ... يحبو بعضهم وكل واحد يكابر
امها: والله كان مش بنت أختي ... ماعاد ناخدهاله رداته هكي قدام الناس 😒
امنه: ماما ماتقوليش هكي ... فراس هو الغالط ومادارش فاها شويا ولانسيتي العار الي داره في عرسي
امها: الرجاله كلهم هكي ... اكيدة مش حايشوف صور مرته ويسكت
امنه: خلاص يتحمل الي جاه ... باش مرة تانيه مايتسرعش ويظلم البنت
امها: خلاص اسكتي ... وانتي تقول هي أختك مش هو
امنه: بنت خالتي وزي أختي ولا نسيتي بنت أختك وكنتي بتموتي فاها 😒
امها: ماقلت شيء ولي توا نباها ... لكن لقطتها يومها كرهتني فاها ... خلت ولدي مايسواش قدام عمامك
امنه: هدا الي صار ... كل واحد يظلم في التاني
امها: الله غالب .... نوضي ديري الغدي تو راجلك قريب يجي
امنه: باهي ..
.
.
.
.
.
~
.
.
.
.
.
~
نرجس: كان تزيدي شوي
اني: هداكا هو حتي قيس قريب يروح
نرجس: عاوداها
اني: الجايه عليك
نرجس: ههههه انشالله
اني: خلاص نستنا فيك ... سلام
نرجس: سلام
وطلعت وهي خشت ... مشيت للشقه سكرتها وسكرت رواشنها كنت مخليتها تتهوى .... وخشيت للدار بدلت ومشيت للمطبخ ... فتحت التلاجه فاضيه ماعنديش شن نطيب ... وسمعت فوني يشرين ... شفته لقيته قيس ...
قيس: ها حبيبتي روحتي
اني: اي ياعمري كيف وصلت
قيس: تمام بنقولك ماطيبيش غدي شويا وطالع من الشركه تو نجيب معاي
اني: ع اساس التلاجه فاها حاجه باش نطيبها😑
قيس: ههههه به امت وصلنا حني ... واني مروح تو نخطم نجيب ..
اني: لالا خلاها العشيه نطلع معاك
قيس: باهي حاضر ... خلاص سكري عندي شويه أوراق نكملهم ونروح ...
اني: به انحبك
قيس: حتي اني
اني: حتي انت شنو
قيس: مش بروحي
اني: هههه به حبيبي تعرف الطرف الأسود الي شريتهولي
قيس: لما نروح
اني: لبسته وحي كان تشوفه
قيس: في الحوش نتفاهمو
اني: والروج الي تحبه مدايرة منه
قيس: نحسبلك قاعد
اني: هههههه خلاص سكر
قيس: بعد شنو بنروح معش فاها
اني: ههههه هدا الي نبيه
قيس: خلاص نتفاهمو ... وسكر
قيس: اني شن مقايل معش يخش حد من غير مايستأدن😠
السكرتيرة: اسفة أستاد مانحسابكش مش فاضي
قيس: به شن تبي
السكرتيرة: الأنسه اماني قتلي نعطيك الملفات هادم
قيس: تمام حطيهم
السكرتيرة: اوكي أستاد .... وحطتهم وطلعت ✨
.
.
.
.
~
.
.
.
.
~
خشيت للدار فتحت النت لقيت سجي باعتتلي صورها هي ووليد ...
اني: ياوخيتي محلاكم ... ههههه محلاه وليد باين مش متعقد
سجي: ههههه غير تشوفي فيه هكي .. والله مايخليني نطلع من الدار لين يشوف بالحاجه شن لابسه وشن مدايرة
اني: ههههه من أيامات العلاقه وهو هكي
سجي: وتوا زاد
اني: قوليلي حلوة تركيا
سجي: قعدة في باريس وتسألي ع تركيا
اني: من زمان خاطري نمشيلها وفرحت لما قيس قال باهي
سجي: وشن غير رايكم
اني: جاه شغل مهم يالله مرة تانيه
سجي: انشالله .... قوليلي شن جو سيمو ليا مدة علاها
اني: بوها بيسافر ومعش بيرجع وهي بتمشي معاه
سجي:😳 بالحق كيف هكي وفراس
اني: ماهو علي خاطر فراس هي بتسافر معش تبي تشوفه ...
سجي: ييييي والله حرام ومايستاهلو
اني: الله غالب انتي عارفتاها تسنيم ادس ادس وبعدها تنفجر
سجي: انتي سافرتي وقيس معاك ... وتوا سيمو .. بنقعد بروحي
اني: ياخيه معاك وليد شن تبي فينا
سجي: مش زي كنت عابيه بنديرو المشروع مع بعض وحفله تخرجنا ... لما نمشي لي حوشنا نلقاك انتي وقيس ... لما نتعارك مع وليد نحكيلك انتي وسيمو ...
اني: بالله ماتزيداها عليا ... قبل مانرجعو نكدت علي قيس ..ووعدني يدير جهده باش نرجعو
سجي: ياريت والله
اني: وليد وين
سجي: مشي للمطار بيحجز
اني: علاش مروحين
سجي: اي قال بيشوف اقرب رحله
اني: باهي توصلو بخير
سجي: انشاءلله
قيس: حبيبتي ويينك
اني: قيس جي نحكو بعدين
سجي: سلميلي عليه
اني: يوصل
قيس: ليا ساعه إنادي
اني: كنت نحكي مع سجى تسلم عليك
قيس: سلمها ... وسلب دجاكته وجاني ... حبيبي كان تشوف الطرف الأسود ... حبيبي مدايرة من الروج الي تحبه "وقعد يقلد فيا "
اني: ههههههههه بعد كنت نبصر عليك
شدني من خصري وقربني ليه : والله مافاها بعد ... فرحت امت كملت الي في إيدي وجيت ...
لفيت يديا علي رقبته وحركت خشمي علي خشمه : به حيعانه اني
قيس: خلينا وانتي ديما بطنك قاصه علينا
اني: ههههه توا وليت هكي
قيس: قلتيلي الروج وووو باسني علي ،،،،
اني: اول ماكلمتني قتلي حبيبتي بعدها من خش عليك
قيس: السكرتيرة
اني: وتخش عليك هكي من غير ماتستأدن
قيس: وعادي شن فاها
اني: شن شن فاها المفروض تستأدن
قيس: ديما نقلها بس هي تحساها غبيه هكي
