علاقات زائفة

البارت الحادي عشر

من بعد الانقطاع البينه رجعنه سوة وبقوة ..

صرت ام لصميم مو بس حبيبة ..

ردت احتويه بقلب ام ، مو بقلب حبيبة

قلب الأم كبير ويسع الكل ، يتحمل الخطأ والصواب

يعفو عن المسيء ويحاول يصلحة وبنفس الوقت

يعلمة ويوعيه على الصح ...

قلب الام يسامح وينسى ويعفو ...

اما قلب الحبيبة يكون قلب اناني

ضيق ، يسع شخص واحد .

يريده بس اله ، ميسامح وميعفو بسهوله ..

تضل الكلمه والموقف يحفر بالقلب وبصعوبة ينسى.

صح يحاول يصلح اخطاء حبيبه

بس مو دائما ..

قلب الحبيبه يحتاج للتجديد الدائم يحتاج للكلام المعسول بين فترة وفترة حتى يتجدد نشاطة ويرجع يشتغل صح ..

بينما قلب الام ، لو شكد ما تعوفه وترجعله تلكاه مثل ماهو متغير ...

لهذا قررت احب صميم بقلب أم ...

_____

وبيوم كعدت الصبح ونزلت جوة كالعاده الروتين اليومي المستمر ينعاد من شغل وطبخ ....

صاحني بابا راد اجيبله الجنسيه مالته من الكنتور ..

رحت لغرفتهم ، فتحت الكنتور اكو علبه حمرة يخلون بيها كل المستمسكات والاوراق المهمه ...

اني وادور على الجنسيه شفت ورقه مطبوكه بس مبين شويه منها صورة صميم .

سحبتها فتحتها طلع العقد مالتنه ...

اني منتبهت شكد سجلو الحاضر والغايب ولا سألت لان مو بعيني اني اهم شي عندي اتزوج رجال ويحبني.مو مهم فلوسه ...

قريت وانصدم ..

الغايب ذهب بقيمه ٣٥ مليون ...

والحاضر خمس ملايين ،

زين ليش وشنو هالمبالغه بالغايب ، وشمعنى الحاضر قليل ...

اخذت جنسيه بابا ورحتله كلت اسأله لان من حقي اعرف...

بنان : بابا صميم شكد سجلي حاضر وغايب ..

رفع راسه ابتسم ورجع يكتب ، بالورقه ماعرف مال شنو بس مبينه استمارة ...

سالم : هههه كمتي تدورين حقوق بنونه خلص وكت الحب اجينه للجد ...

رحت كعدت بصفه ..

بنان : بابا تعرف اني مو بعيني لا فلوس ولا ذهب والدليل صارلي شهر من كطعت مهر لا طالبت بذهب ولا بهدايا ولا فلوس اكتفيت بالحلقه والسوار الجابهم صميم ، بس هسه بالصدفه طلعلي العقد وانصدمت من قريته ، شمعنى الغايب هوواي كسران ضهر والحاضر قليل ...