▪ لعنة مخالب القمر | مكتملة .

• الفصل الثامن •

و الدبدوب الوردي جالس هو الاخر جنبو ..

و هي جالسة قدامهم ضامة نفسها في كومة صغيرة من لحم و عظام و شعر قصير ..

كاتشوف في هدايا داك الرجل بحال اذا ماعارفاش اشنو تصنع بيهم ..

شعور غريب ، مافاهماهش ، ماعارفاش فين تحطو !

كايشبه لخوف ، و في نفس الوقت تقريبا بحال شي حماس ..

المهم شي حاجة ماتخلي قلبها مامطمنش و ماشي على طبعه ..

واش غير كادو صغير و شوية اهتمام قدروا يحسن مزاجها ؟

لا ،لا ..

وقفات مجفلة من مكانها ، كاتشوف في الكادوات بعيون واسعة ..

بعدت خطوة تم خطوة اخرى بحال اذا خايفاهم ينقزوا عليها ..

مدات يديها لقدامها كاتبلع ريقها "" لا ، هادشي كايخوف ، اهتمامه كايخوف ، العالم اللي تولدت و عشت فيه انا حتى احن النساء منهم ماقادراش تقدم غير شوية من هاد الاهتمام ""

وقفات تما كاتحاول تفكر اشنو اللي غايخلي هاد الرجل المفيوزي القاسي يدير تصرفات فحال هذه ..

لكن عقلها ماقدر يجيب حتى تفسير من غير انه ليه نوايا غريبة هي ماعارفاهاش ..

لكن عطاها وعد شرف انها في امان و ماغايآذيها حتى واحد ، حتى داك التركي المدعو ايرتان لمح ليها باش تتيق في عشيرتها ..

و جلال لحد الأن تبت ليها هادشي ..

اذا اشنو ..؟

رمشت عينيها كاتفكر ، فطرأت بعقلها لحظة مرت بينهم بزوج ..

لحظة كانت مريرة بالنسبة لريم ، لحظة ضعف باحت فيها باللي جال في عقلها و قلبها ..

غمضت عينيها و هي كاتقول بهمس "" الشفقة ""

حلات عينيها و لقات باب غرفتها بيديها و تسندت عليه كاتشوف مباشرة في شرفتها المفتوحة بعيون فارغة و هي مازال كاتهمس "" الشفقة كاتوريك شحال انت صغير ، شحال انت قليل ، شحال انت ضعيف ، شحال انت ... ناقص ""

رمشت عينها و الخدر كايجلدها من جديد وجديد ..

و كأنه فاتها !

وقفات تما هادئة سطحيا ، لكن بركان نار شعل داخلها ..

انتابها شعور عارم باش تخرج النار اللي فيها ، تشعل في شي حاجة قدام عينيها و تخرج صهدها للوجود ..

ممكن شي واحد يحس بصهدها من غيرها هي ..

كارهة هاد السطح الضعيف اللي كلشي شافوا ..

كاتغضب بشكل كبير كلما تذكرت ان هداك شكلها قدامهم .. هادشي علاش بزاف تجاوزوا حدودهم معاها ..

ماتعاملتش مع هادشي ، الآن انضافت الشفقة باش تكمل عليها ..

و ماشي من اي شخص ، من هذاك الرجل اللي ماعندها باش تنعتو من غير مميز ليها ..