(كل عام وأنتم بخير وينعاد عليكم هالشهر الجميل وتقبل الله منا ومنكم صالح الاعمال ورمضان كريم علينا وعليكم🌙♥)
الجـــزء 26
الفصل الثاني
-------------------------
أشرقت شمس يومهم الخامـس والأخير.. من رحلتهم اللي حملت كثير من اللحظات والتفاصيل ،!
طلع تركي من الخيمة وهو يتمغّط بقووة والكشرة على وجهه من النوم .. ثم نفض راسه يطيّر ذرات النوم الأخيرة وهو يحاول يفتح عيونه المتكاسلة ..
مشى لناحية الجلسة وهو يلبس جكيته اللي كان بيده من غير لا يعدّل الياقة اللي كانت منعفسة وماله خلقها.. كل اللي يبيه قهوة تعدّل مزااجه !!
كان أول من صحى من الشباب .. وقابل ابو خالد توّه يجلس مع ابو محمد اللي حطّ الدلة على النار عشان قهوة الصبحية الخاصة فيهم !
قال بكسـل يوم وصل : صباح الخير !
ابتسم ابو محمد ومعه ابو خالد : صباح النور.. اقدع تقهوى يا وليد !
تلفّت تركي وهو يجلس : وينه عمي ابو راهي اجل ؟
ابو خالد : توّه صحى دقايق ويجي... عسى استانست يا وليد عقب هالكم يوم ؟ أذكر إنّك قلت لي إنها أول مرة لك تطلع مثل هالطلعة في البر ولخمس أيام ؟؟
ابتسم بكسل وكذب كالعادة : ايه أول مرة بحياتي..عمي وعياله مافيهم حيل تدري انت عمي مريض ولا فيه شدّة.. تبي الصدق وش زينها يا عمي الجمعة معكم ونيسة وقريبة للقلب !
ابو خالد : ان شاء الله نكررها السنة الجاية وانت معنا !
تركي ( يصير خير ) : ... أكيد ! (وابتسم )
جا أبو محمد وهو شايل الدلة اللي كانت فايحة .. وقال : الا اليوم وشو ؟؟ راسي دايخ من طلعنا من الرياض ؟؟
قال تركي : اليوم الأحد يا عمي
ابو محمد : ايه ما عاد الا الخير .. لولا الدوامات والبنات اللي وراهم جامعات كان جلسنا بعد زود يومين !
ضحك ابو خالد : مب هم لحالهم حتى احنا ورانا اشغال.. خمس ايام كلها بركة
صبوا القهوة بفناجيل .. وتوّه تركي بيشرب فنجانه لأنه مصدددع وهو عادةً تجيه حالات يقوم من النوم ونفسيته بخشمه ..ويحتاج شي يمخمخ عليه زي القهوة..رن جواله بجيب جكيته ..
نزّل الفنجال باستغراب لأن توّها الساعة 6 ونص الصبح .. وشاف الشاشة ..ليلقى إن "البيت" يتصّل عليه..
قام واقف وهو يحطّه سايلنت .. وترك ابو خالد وابو محمد اللي خذتهم سوالف الصبحيات مع جلسة القهوة والرطب !
مشى بعيد وهو يفتح الخط : هلا !
جاه صوتهـا يعاااتب..
"هذا النصاب اللي بيكلّمني ؟؟؟؟"
ضحك من نغمتها الطفولية الطبيعية : وش جايبك الحين ؟..المفروض انتي راكبه الباص ومصطفله عالمدرسة ! ..(وهو يناظر ساعة يده ويمشي )
قالت : توّني مخلصه فطوري.. والباص تأخّر ..قلت أدق عليك أستغلّ دقايق الانتظار أشوف ليش ساحب علي !!
قال : ما سحبت عليك.. وبعدين انا قلت لك اني برا الرياض لـ شغل !
جنى : ومتى بترجع ؟؟ لي فترة ما شفتك من طلعت من البيت !
ابتسم بحنيـة : برجع اليوم ان شاء الله ..
قالت بلهفـة : بترجع للبيت يعني؟؟
( ضااق صدره ) : لا ما رح أرجع .. قلت لك إني مشغول هالفترة ولا أدري متى أخلص..
