الجــــــزء 7 ...
اسفه على التأخير كنت مسافره ثلاث مدن بس لاتخافون طول ماني بالطياره كنت اكتب البارتات ^-^فبليز سامحوني♡♡
___________________
ضحى يوم الجمعة ،، كانت سحر جالسة مع ابوها
اللي بهالوقت كالعادة يتصفح الجريدة وفنجال القهوة العربية عالطاولة عنده.. اما هي معها كوب قهوة تركية وتفكر ودها تسأل ابوها
عن السؤال اللي شاغل بالها ... وودها تشكي له فضاضة اخلاقه
اللي لمستها منه فالتلفون ، وعند الشركه ، وأمس عند باب البيت ...
سحر : اقوووول ...!
ابوها وهو لابس نظارة القراءة ويقرأ في مقال : اهمممم ..؟
سحر وهي تناظر بالقهوة الغامقة : انت عندك احد يشتغل اسمه وليد؟؟
رفع نظره لها باهتمام : وليد؟؟..إيه ليش السؤال ؟
سحر : لا مجرد فضووول... امس وانا راجعه مع بنات عمي
شفته عند الباب يسأل عنك..
ابوها وهو شكله ناسي انه طالب وليد أمس يمر عليه .. والحين تذكر :
أوووه وانا ابوك نسييييته راح من بالي !!... انا طالبه يجيني امس
سحر : شفته واقف ينتظر وسأل عنك قلت له اكيد نمت
لأن الوقت تعدى وقت نومك..
ابو خالد : وعسى ما انتظر واجد ؟
سحر : مدري عنه يوم وصلت مبين عليه له فترة كان ينتظر...
وأخلاقه زفت !!
استغرب من كلمتها وعاتبها :عيب وانا ابووك تتكلمين عن الرجال كذا..
بدت تفرغ حرتها : يبه منهو هالانسان اللي كل مرة اخلاقه واصله معه..
ابو خالد استغرب : كل مرة ؟؟... ليش انتي وين شفتيه ؟
ارتبكت : هااا... لا اقصد عن امس
ابو خالد : بالعكس وليد هذا ولد حلاااال تحطينه على يمناك..
واذا هو كان متنرفز امس فأنا بعذره لأني نسيته وخليته ينتظر...
سحر جتها الفرصة تسأل عن قصته :منهو وليد هذا طيب ؟؟
شكله غريب يبه يقول انه يعاااااني.. من متى وهو عندك ؟
ابو خالد : ماله كم اسبووع ..
سحر : ليش وش جابه عندك ؟؟
ابو خالد : الحاجة وانا ابوك...الولد يتيم ماله احد يبي يعين نفسه بنفسه .
سحر : ماله أهل ؟؟؟؟
ابو خالد : لا اللي اعرفه انه كان عند عمه والحين انفصل ويبي يشتغل... والظاهر ان الدنيا حرمته حتى دراسة سنعة ما درس.
انصدمممت من قلب..هذيك العـزة اللي لمحتها تحت هيئة الذل
اللي هو عليها .. معقولة يكون حتى دراسة ما نالها !!!
عورها قلبها وحبت تعرف عنها أكثر : وهو وش يشتغل الحين ؟؟
وشلون قادر يشتغل ؟
ابو خالد ابتسم وهو يتذكر جده وحرصه : لا ما شاء الله ...ذكـااء
هالولد مو طبيعي ذكاءه بيغنيه عن الدراسة... تعلم اصول الشغل بسرعة
انا ما توقعتها .. اهم شي انه يعرف القراءة والكتابة والباقي
يتكفله الوقت يقدر يطور نفسه بنفسه..
سحر مبهورة : يبه كل هذا لاحظته عليه ؟؟؟
ابوها بابتسامة حنونة : ايه ابوك عنده نظرة ثاقبة ، نسيتي اني انا اللي اكتشفت مهارة ولد عمك محمد .. ووليد ان شاءلله بيتعلم أكثر مع الوقت
وبتتغير ظروفه للأحسن... والولد صاااابر ويبي يتعلم ويتطور،
شكله يبي يصير شي هالولد عيني عليه باردة.
سحر وحست ان ابوها مهتم كثير بوليد هذا : يبه شكلك مهتم فيه بزيادة..
ابوها ابتسم : صدقتي وانا ابوك.. مدري ليه الولد هذا دخل قلبي وحرك شي فيني ماااات من زمان.. ما ادري وش يجيني اذا طاحت عيني عليه.!
سحر : بس يبه انت متأكد من اخلاقه لأني أمس حسيت انه متعنفق
ولا كأنه واحد بسيط يشتغل في أبسط وظيفة... يكلمني ولا كأني بنتك ..!!
ابوها ضحك عليها وما علق ..
وسحر كملت : يحترمني عالأقل... حسيته مو معطيني اهمية ..
ابوها وكمّل عليها : مين اللي يدفع له انا ولا انتي ههههههههههههههههههههه
انقهرت : يبببببببببببببببه !! لا بجد شكله يحترمك اما انا حاطني ورا ظهره..
ابوها : خلي عنك هالكلام اللي ماله فايدة.. الولد جدي في شغله
يبي يطور من نفسه مهوب مثلك ماكله نايمة ..
رجعت لقهوتها وهي تفكر..لا وليـد هذا محصل اعجاب ابوي..
بس ليش شكله مو طايقني ومو معطيني وجه!!
وشو ما يطيقك يا سحر وش هالكلام .. هو ما يعرفك ولا تعرفينه
عشان يطيقك أو ما يطيقك ...
شافت ابوها يقووم عشان يتحمم ويتجهز
لصلاة الجمعة ويحضر الخطبة كالعادة ..
ابوها : روحي صحي خالد عشان الصلاة ..
سحر وهي تقوم : ان شاءلله ..
طلعت فوق ودقت عليه غرفته ، شافته نااايم بعمق
شكله مارجع امس الا متأخر أكيد شي أخره بالمستشفى ..
راحت له وهزته : خاااااالد ... خالد خالد
فتح عيونه ويوم شاف انها هي غمضها من جديد وعطاها ظهره ..
سحر : قوم أذنوا للصلاة ..
خالد باقتضاب : زين ..
طلعت وهي تتذكر اللي سوته مشاعل امس.. الله يستر لا يكون معصب
ما تنسى النظرة اللي عطاها لها وهو داخل لمكتبه !!
ان شاءلله يكوووون نسى مافيني على محاضراته.. انا وش ذنبي
اذا كانت مشاعل ما تسمع لكلامي..البنت عنيدة ومو راضية تسمع لأحد..
رجعت لتحـت وطلبت من الخدامة تسوي قهوة تركية ثانية ..
وهي جالسة ترتشفها نزل عليها ابوها لابس ومتعطر يفوح منه
ريحة العـود كالعادة..
وقف يعدل شماغه قدام المراية ونزل خالد هو الثاني
متكشخ ومتعطر ومحلق ..راح لأبوه وحب راسه وصبح عليه
من غير لا يلتفت لسحر ولا كأنها موجودة...
خالد : يبه خلنا نطلع بسيارتي .. انا بسبقك..
وفتح الباب وطلع وسحر طالعت في ابوها شافته
ياخذ السجادة من الطاولة ويطلع ..
وعلامات التعجب كثيرة تأشر فوق راسها ..
بعد الصلاة مباشرة ..
خالد وابوه في السيارة راجعين للفيلا القصر..
دق جوال ابو خالد وطلعه من جيبه ..
ابو خالد : هلا وليد هلا ولدي....... اعذرني وانا ابوك راح من بالي امس عسى ما انتظرت واجد بس... يابوي اليوم اجازة خل عنك الشغل.. ههههههه والله على راحتك تبي تجي تعااال للبيت وبعطيك الأوراق
اللي تبيها... فمان الله ..
من جهة ثانية .. تركي وثامر بسيارة وحدة ..
نزل تركي الجوال والتفت لثامر : يلله نزلني عند بيتنا
باخذ سيارتي وبروح له..
ثامر : انت من جدك بتشتغل بيوم الاجازة..!؟
تركي : خلني اشتغل لين بكرة ..يوم الاجازة مارح يفيدني
لو جلست في البيت بجلس أرثي الحظ..
ثامر : كل ذا حمااس !!.. هذا هو قالك لا تتعب نفسك وتشتغل يوم الاجازة..روح لأهلك واجلس معهم من زمان عنهم ..
رح لاختك اللي اكيد فاقدتك..
تركي باقتضاب ما يبي يفتح موضوع اهله قبل لا يرجع لهم منتصر :
اختي عندها امي ..وبعدين اللي يسمعك يقول اني تاركهم..
ثامر : ما قلت تركتهم ..لكن شف نفسك حالتك صايره حالة
تصحى من فجر الله وما ترجع الا آخر الليل لا تشوفهم ولا يشوفونك..
يعني باختصار كأنك مسافر مو موجود..
تركي بضيق : ثامر قلت لك قفل السالفة..
انا لو بواجه ابوي بضعف وانا مابي اضعف
ثامر بجديــة وهو يناظر وجه تركي الصااد بعيد للشارع : انا متأكد ان نيتك ماهي فلوس وبس.. لأن مثل ما قلت لك انت عايش بعز
يضاهيـهم حتى..
لف له تركي وابتسم بنعومة لأن ثامر فاهمه ، وقال ببطء واضح :
صدقت انا نيتي الأولى والأخيرة من هذا كله مو فلوس...كل اللي ابيه يحسه هو احساس الخيــانة .. ابيه يحس باحساس خيانة الثقة ابيه يجرب هالشعوور.. انا يوم دخلت هاللعبة مابي فلوس لأني كرهتها عفتـها...
انا اخطط يا ثامر عالخيانة بس انتظر الوقت يجي عشان اخون الثقة وأخليه يعيش نار تحرقه مثل ما ابوي ذاقها .. وطبعا ما امانع لو كانت الفلوس وسيلة لهالغاية.. عشان اخون الثقة لازم اوصل فوق أول ،
وأتحول من اني مجرد موظف بسيط لشي اكبر..
ولو لقيت طريقة اسرع صدقني مارح أخليها مارح افلت أي فرصة من يدي..
ثامر ببطء وهدوء : تركي تعوذ من ابليس..
تركي طالعه بسخرية من نبرته المتوترة : ليه خايف ..
ثامر : لو قلت لي قصدك فلوس بعذرك ... لكن انت مستقصد
من هذا كله توصل لمشاعر وعواطف انسان وتتلاعب فيها
تركي ضحك : ههههههههههههه تصدق عاد .. المسألة ما خذت وقت كبير مثل ما انا متصور.. دخلت قلبه بسرعة انا ما تصورتها..
وبصراحة انا أطمع بأكثر
ثامر : اشوف الشيطان واقف فوق راسك..
هذا واحنا تونا طالعين من صلاة الجمعة
تركي : انا ماسويت شي غلط هذا دين ولازم ينرد......
الحين فضها سيرة لمتى بقعد اقولك واشرح لك .. ودني لسيارتي
ثامر ضحك يبي يغير الجو : ههههههههههه طيب خلني اوصلك لفيلتهم..
تركي : صاحي انت !!..لو يشوفوني نازل من سيارتك
بتتهدم الصورة اللي ابيهم ياخذونها عني..
ثامر : يمه منك .. طيب يابو المخططات الجهنمية بوصلك لسيارتك
واذا انتهيت دق علي اجي اخذك ..
تركي ابتسم : مااا تقصر يابو الذوق والواجب..
وصله لبيتهم الفيلا ونزل تركي ركب سيارته وحركها لفيلا ابو خالد ..
وقت وصوله عند مدخل الفيلا شاف سيارة خالد تدخل مع البوابة
وابو خالد جالس داخلها .. ابتسم لنفسه وضرب لهم بوري،
شاف ابو خالد يلتفت له ويفتح الشباك وهو يسلم : هلا ولدي وليد ..
تركي بالمقابل فتح الشباك : هلا عمي ..
ابو خالد : اسف نسيتك امس.. راح من بالي وانا ابوك
تركي : لا عمي عادي ما نقدر نقول شي.. لا تشيل هم حصل خير
ابو خالد : تفضل وانا ابوك غداك عندنا اليوم..
تركي بحرج مزعـوم : لا عمي ابي الورقتين اللي قلت لي وبتوكل ..
ابو خالد : خل عنك الشغل الكل في اجازة الحين وين تبي تروح..
ادخل وعن كثر الهذرة
وما عطاه فرصة يعارض سكر الشباك ودخلوا بالسيارة داخل الفيلا..
شاف تركي ابو خالد يطلع له يده من برا الشباك ويأشر له يدخل بسيارته ...
ضحك تركي هههههههههه وين تبي تدخل هالخرابة..
بس حس بالمتعة ! الموضوع كل ماله يزيد حماس وإثارة مع الوقت ،،
دخل فيها ووقفها ورا سيارة خالد قدام مدخل الفيلا الداخلي ..
واول ما نزل طاحت عينه على خالد ..ضاقت عيووونه
معقوولة يكون هالشاب هو نفسه ذاك الطفل ابو نظارات ؟؟؟
ابو خالد : خالد هذا وليد يشتغل معنا ..
خالد قرب وهو مبتسم : هلا بك..
قرب تركي وصافحه وابو خالد يأشر على ولده : هذا ولدي خالد دكتورالحين الله يحفظه ويخليه لي ذخر
تركي : ما شاء الله.. والله شي يخجل انا وشو بينكم يا عمي أجل..
ابو خالد وهو يربت على كتفه : انت ما عليك خوف تقدر تكبر
نفسك بنفسك ما عليك من الدنيا وما عليك من كلام الناس..
انا اشهد لك
تركي : والله مافي شي يداوي القلب غير كلامك وتشجيعك طال عمرك... مادامني خذيت الشهادة منك أجل المعنويات بتكون فوق
ابو خالد ضحك : تفضل لا تستحي البيت بيتك .. تغدى الحين وعين من الله خير وبعدين تبي تكمل شغلك ماني برادك..
دخل ابو خالد وخالد وراه .. الا سحر جالسة بالصالة لحالها ..
ابو خالد : يبه روحي للصالة الثانية معنا رجـال..
سحر : من ؟؟؟
أشر لها ابوها تقوم نطت وراحت للصالة الثانية .. ووقفت قريب وهي تسمع صوت ابوها يرحب : حيا الله وليييد تو مانور البيت ..
ولـيــــد ؟؟؟؟؟؟؟؟؟
فتحت عيونها ورجعت صورته الفقير المزيون في بالها..وش جابه لبيتنا ليش جاي؟؟؟
سمعت صوته العذااااااااب : يحييك ويبقيك طال عمرك ..
عمي والله اني مستحي انا مو من مقامكم لا تحرجني اكثر..!
سمعت ابوها يعاتبه : الله يصلحك وش الفرق يعني ..لا اسمعك
تقول هالكلام مرة ثانية لا تزعلني.... القهوووة يااااا سحــر..
فززت سحر وشوووووو !! وشو قهوته أنا وش دخلني...
شي يقهر اكتشفت ان وليد هذا ذوق ولسانه يقطر عسل مع ابوها ..
عكس ذاك الاسلوب اللي تعامل معها فيه..
راحت ودقت عالمطبخ وقالت لهم يجهزون قهوة..
ورجعت تتسمع سوالفهم.. حفظت نبرة صوته من جد عذااااب ،
" بس مسكين الله يعينه ".. قالتها وهي تتذكر كلام ابوها عنه
وعن حالته الفقيرة التعيسة..
فتحت التلفزيون الموجود بهالصالة وجلست..
بس عالأقل وليد هذا غير الناااس عاملها من غير أي مجاملة مثل المجاملات
اللي تواجهها باليوم عشرات المرات.. معظم اللي تقابلهم أو الموظفين
اللي يردون عليها بالتلفون اذا دقت على ابوها بالشركه ..
يعاملونها ويحترمونها لأنها بنت السفير والمدير العام ابو خالد..
مو لأنها سحر حتى الناس اللي تقابلهم برا الشركه نفس الشي ..
لكن وليد الغريب الفقير هذا طلع غير !... عاملها بصورة منطقية..
لا هو اهتم بأعطائها فوق قدرها ولا احتقرها لذيك الدرجة..
عاملها وكأنها مو شخص ضروري بالنسبة له... لأن اللي يدفع له واللي يعيله على قولة ابوها هو ابو خالد مو سحر..
فليش يعيرها اهتمام مبالغ وهي مارح تنفعه بفلس واحد..
مع هاللي توصلت له سحر مع كذا انقهرت ..
رغم انه انسان اقل من بسيط الا انه خالف الناس..!!!
يااااربي .. من أول تلفون بينا وفيني حرة منه... ليش مو معطيني اعتبار
حتى اسمه مو متكلف يعلمني اياه.. مهما كنت انا بنت ابو خالد
عالاقل يقووولي طال عمرك مثل ما يقولها لأبوي
ومثل ما كل اللي يشتغلون مع ابوي يقولونها اذا كلموني !!
على انها تتمنى معاملة حلوة لشخصها هي مو لأسمها أو لاسم ابوها ،
ورغم انها تعاني من هالشي بحياتها ..
الا ان هالتصرف من هالمتعنفق ما عجبها..
رمت بجسمها عالكنبة وهي تزفرر.. وش فيك انتي
شايله على هالفقير المسكين اللي بس يدور لقمة عيشه..
من القهر وهي تتذكر ذيك الصبحية اللي تأمر فيها عليها وقالها تقصر من صوت الاغاني ، قامت و شغلت الإف ام وحطت على اغنية وطوولت على الصوت على آخر شي بتهوور وطيش ..
وكل قصدها انها تبيه يسمع وتعلمه انها تسوي اللي تبي،
ومافي شي يمنعها وان مو أي احد يقدر يجي ويعطيها أوامر...
صوت الأغاني وصل لهم ..
ابو خالد عقد حواجبه مستغرب ليش الصوت عالي كذا ..
التفت لتركي "وليد" شافه منزل عينه لفنجاله ومبتسم ..
<< يقال منحرج..
التفت لخالد بسرعة : رح شف وش سالفة الاغاني اكيد اختك ..
خالد : ان شاءلله
وقام بسرعة وراح لقا الآنسة سحر متمددة عالكنب
ومسوية حاااالها بريئة ومو مسوية شي غلط ..
وتغني بصوتها المبحوح الناعم من غير نقاش راح للتلفزيون نفسه وقصر منه ..
خالد : ما قلنالك فيه رجال..
سحر تدعي البراءة : يوه نسيت خذاني الجو ..
خالد : وبعدين لزوم تحطين الصوت عالأخير ؟؟
سحر : ما ادخل جو الا كذا..
خالد : المهم لا تنسين الرجال نفسه انحرج..
سحر ببرود : ليش لهالدرجة الضيف مهم ..
خالد : مهم مو مهم .. الضيف يظل ضيف..
وراح وتركها.. يلله أهم شي وصلت له رسالتها ، وخل عنفقته تنفعه ..
رجع خالد وجلس : سحر مشغلتها وناسيه ..
ابو خالد : الله يصلحها من بنت ..هي تدري ان فيه رجال..
تركي يسمعهم وهو يدوّر الفنجال بيده مبتسم ،
تدخل بلطف : ما عليه طال عمرك.. انا مين عشان تتضايقون..
ابو خالد بعتـاب : وليد اترك عنك هالسيرة..
تركي وهو ينزل راسه : آسف حقك علي ..
ابو خالد : فنجالك وانا ابوك..
++++++++++++++++++++
