⚠️جميع المواقف و احداث هاد القصة هو من محض الخيال ، اي تشابه في الاسماء او اسماء الاحزاب او اسماء فالامااااكن ، سواءا -كانت على قيد الحياة او عداد الاموات - بينها و بين الواقع ، فهو بمحض الصدفة لا اكثر ⚠️
❌القصة ممنوعة من النشر او الاقتباس
...
سلطانة كانت ماشية و من وراها عرشية تاوقفت و دارت عندها : سمعي ا عرشية و حلي ودنيك هادشي لي شافت عينكم مبغيت نسمعو في دلقوش (فم ) شي خلق وصيي العبدات مزيان الى مشيت تاسمعت حس شي حرف غا يتقطع لجد بوهم اللسان وحدة بوحدة و نتيي كبيرتهم🌙حسناء القايد🌙 👑oumaima mega 👑 ⚡58⚡
هزت راسها عرشية بالسمع و الطاعة .... دارت سلطانة مشات و عرشية رجعت قاصدة باب الحمام ...غا دخلت لقات العبدات مبعديين على حسناء و هي واقفة تتعرج ...و تخرك في جلايلها ...مدوات حد ماكلماتو ... ضربت فيهم وزادت خرجت من الحمام تبكي و تمسح دموعها بكمها ...و نيفها حمار و فمها كيحبس البكيا لي مقدرتش تحبسها ...و غادا و تعرج قصحتها ...كتحس بالحكرة و الضلم سبوها في اصلها و شكو في عرضها و قلبوها قدام الصغير والكبير اشمن عيشة غا تزيد معاهم ولا طعام غاتشاركو معاهم ... بغات ترجع لدارهم و تلاح في حضن يماها ...و جلايل باها و تبكي و تشكي عليهم الضلم و الحكرة حتى يخليوها معاهم ...عرشية و العبدات تابعينها من وراها ...حتى وصلت لجناح ...و دارت شافتهم مخنزرة فيهم و سدت الباب في وجههم ....و مشات لسريرها تبكي و تهرنن ...عرشية تنهدات ...و دارت لعند العبدات و قصحت الصوت : سمعوني مزيان هادشي لي طرا و جرا مابغيتش نسمعو على طرف لسان شي خلق لا من عبيد لا من سياد و راكم عارفين و سامعين عقايب لي عصا الكلام ...كلهم سكتو و تحصنو و خافو و توحدة فيهم ماغتكلم ماغتهضر
~~~~~~~~~~~~حسناء في سريرها جالسة تكونت على راسها و جمعت رجيلاتها و متكية راسها و تبكي و تنحط ....بقات فحال هاكاك ماهيا ساعة ماهيا ساعتين ...تادموعها نشفو و فمها بياض بالجوع .... حتى دقو عليها الباب ...هزت راسها و قلبها تخلود شنو بغاو عندها تاني ...تفتح الباب بشوية كانت دادة عرشية داخلة و من وراها شافية هازا صينية مدهبة فيها الماكلة لي تشهها النفس و طاس فين تغسل يديها ...غا شافتهم حسناء و قلبت وجهها و دمع غا نازل كيف الشلال ....عرشية هزت فيها العين من لتحت ...و هزت الصينية حطتها ليها فوق الطبلة و جلست على ركابيها ...حسناء دارت تشوف فيها و تحلفي زينها من الحور العين ونزل لارض باش يتفتنو بيه العباد
عرشية : سمحيليا ا لالة على قبايلة ....هادشي لمسكينة لقات ماتقول ليها ...و شافية واقفة منزلة راسها ...هزت عرشية لقيمة (دغمة) بيدها و لقاتها لحسناء عند فمها ...حسناء مبغات تاكل مبغات تشرب و حشومة تعير مرا في سنها حدها دورات وجهها تبكي و تشكي لحيط باش تفهم راسها و تمشي فحالها ...عرشية قلبها القاصح بدا يلين و يرطاب من ناحية هاد البنية لمسكينة لي تتقطع في القلب ...و هي تجيها كيف التصرفيقة على خدها و قامت من مكانها مخلية الدغمة في الصينية ...مخصهاش تربي لكبدة على شي وحدة من نسا القايد ...حيت بلاصتها كيف الباطل ماديماش ...حدرت الراس : سمحيليا ا لالة عندي شي شغال هاهيا الماكلة قبالتك فاش تفتح ليك النفس والخاطر كوليها....و دارت خرجت فحالها مقصحة قلبها ... عارفها ضيفة يامها معدودة ماخصهاش تبغيها و لا تكرهها ...شافية شافت تاعيات في لالها بانت ليها ماغتاكلش و هي تخرج فحالها و سدت للباب و هي معندها حيلة ليها ... وحسناء بقات جالسة تما تبكي و تشكي و الضلام داير بيه ...لا خوامي مهزوزين لا ضواو شاعلين لا شمس داخلة عندها تزورها كلشي حزين معاها 🌙حسناء القايد🌙 👑oumaima mega 👑 ⚡59⚡
دوزت وقتها تما و ماكلتها حداها و هي غاتلعب بخميستها في عنقها و متكية تحاجي لراسها على بنية سميتها حسناء كانت ضاوية و زاهية و طفاو ليها شمعتها ...تتعاودت الدقة في الدفة تاني شافت من تحت العين شكون بانت ليها شافية داخلة مسكينة و تسلت ...و هي ترجع دور راسها لهيه .... شافية دخلت و سدت وراها لباب بانت ليها الماكلة محطوطة ...و هي تمشى و جلست في لرض عند رجلين حسناء
شافية : عافاك ا لالة ماكولي راك من الصباح مادقتي النعمة حسناء معاندة راسها : مابغيت لا ماكلة لا شراب من عندكم شافية : عافاك ا لالة راني ماكليت ما دقتو منين حرمتي الدغمة على فمك حسناء دارت عندها : علاش ؟ غير سيري كولي و ماتسوقي لخباري شافية : قسمت ا لالة قسمت مانحط اللقمة في لساني تتكوني سبقيتيني ليها و انا دابا جاني الجوع كيقطع فيا ...حسناء شافتها كيف تطلبها و ترغبها بعينيها و ربطت قسمها معاها ...ماتقدرش تهز على كتافها عاتق شي وحدة و تجوع بسبابها ...نزلت عينها شافية تطل عليها : واش نجيب ليك الماكلة ا لالة ...حسناء ماتكلمت ماهزت لعين حركت ليها غير راسها بااه ...و ناضت شافية تجارا فرحانة هزت الصينية و جابتها حدا رجلها و هزت ديك لقيمة لي بقات تما ...و عطاتها ليها تاكلها حسناء خداتها من يدها ...و بقات تما توكلها و تجيب معاها و تدي في الهدرة تونسها ...تاسلات طبسيلها و حسناء غا ساكتة
شافية فرحانة غاطيير حطت الصينية تما و هي مربعة رجليها في لرض : صافي ا لالة لي خصاتك قوليها ليا نمشي درووك نقولها لدادة عرشية توجدها ليك ...حسناء عينيها عليها و بانت ليها بنت تأمن عليها هزت يدها و خطفت يد شافية زيرت عليهم و سرطت ريقها : بغيت نهرب من هنا ا شافية بغيت نمشي نخرج شافية شهقت : هاويليي ا لالة ميمكنش العسااا برااا ميخليو حد لا يخرج لا يدخل حسناء : عافاك عاونيني عملي شي حاجة بغيت نمشي عند مي و باااا نشوفهم شافية : اش بيدي منعمل ا لالة متقدري تشوفيهم الا بشوار سيدي حسناء كمشت وجهها : شوار سيدك ؟ (بان ليها كلشي هنا بشوارو تمن نفسها لا بغات تطلعها بشوارو رخات من يدها و حطت يدها على صدرها ) كنحس بالخنقة هنا ....و ناضت من مقامها غادا و تجري لباب جناحها و ناضت معاها شافية تويل ...و تابعاها ....خرجت حسناء من الجناح و مشات في طريق خرى ماشي طريق الدروج ...و شافية غا تابعها و تسول فيها فين ماشية ....حتى وصلو لوحد الدروج عراض و كبار و طلعة ديالهم الفوق حسناء وقفت تما هازة شوفة فيهم و شافية من وراها سخفانة تنهج حسناء : ديلاش هاد الدروج شافية تتنهج : تاع السطح ا لالة حسناء وسعت عينها : السطح ... تفكرت سطحهم و منين كانت تطل ...هزت جلايلها و طلعت فيهم شافية غوتت اغوتة : ا لالة راه ممنوع النسا طلع تما ا لالة ....و مشات تااابعاها تغوت
Oops! This image does not follow our content guidelines. To continue publishing, please remove it or upload a different image.
