فات اسبوعين من غير ما اعرف حاجة عن مريم و كانت بتتجاهل كل مكالماتي و رسايلي.. و في السبوعين دول ابتديت اكتشف قد ايه الموضوع لعنة اكثر من ما هو مفيد.....بصراحة قررت اني مش نازل من البيت النهاردة غير للضرورة لأني ببساطة شديدة عايز افصل من كل حاجة , بس في وسط ما انا مستمتع بكوباية الشاي باللبن مع اغاني هادية تليفوني رن و تجاهلته في الاول بس المُتصل كان حد زنان...
- الو, مين؟
- انا عمار...محتاج اقابلك ضروري
- في جديد؟
- اما اشوفك
- تمام هبعتلك عنواني في مسدج و هستناك
- تمام
و فعلاً معداش نص ساعة و كان وصل..وبعد التحيات المعتادة و تقديم الواجب:
- بص يا استاذ عمرو انا مقدرتش اوصل لعلاج بس وصلت لحل تاني
- ابهرني
- انا وصلت لحاجة تديك القدرة علي التحكم في الحوار يعني زي زرار النور كدة تشغله و تطفيه وقت ما تحب
- طب ما اطفيه و مشغلوش تاني بقي فرقت في ايه
- لأ ما انت الشرط الوحيد انك تستخدم القدرة اللي عندك مرة في اليوم علي الاقل..يأما العلاج هيأثر عليك بشكل سلبي و ساعتها مضمنش اللي ممكن يحصل
- يعني انا هعيش بقيت حياتي بالحوار ده؟ ده كان السبب اني اخسر حد مهم جداً في حياتي!
- انا اسف يا استاذ عمرو فعلاً..بس انا عملت اللي اقدر عليه و اوعدك اني احاول تاني بس انا اكثر حاجة اقدر اعملها دلوقتي اني اخليك تتحكم في الوضوع و تستخدمه وقت ما تحب بس بكدة انت هتكون المسؤول عن اي فكرة هتسمعها لأنك كان عندك اختيار انك ماتسمعهاش
و فضل عمار يشرحلي ازاي هتحكم في الحوار و بصراحة كدة احسن بدل ما انا ماشي اسمع افكار غريبة طول الوقت..قعدت كام يوم عقبال ما اتعودت اتحكم في الموضوع... و في يوم لاقيت موبايلي بيرن و اتصدمت جداً لما لقيت مريم هي اللي بتكلمني و مفكرتش ثانية و رديت علي طول:
- مريم!
- ازيك يا عمرو؟
- وحشتيني
- ممكن اقابلك؟
- اكيد ياريت...
- خلاص لو فاضي ممكن تقابلني كمان ساعة في ستاربكس؟
- تمام
و دخلت لبست وانا برقص و بغني و طاير من الفرحة و اتشيكت ولا كأني عندي ميعاد مع ابوها...اتجهت لستاربكس و كنت قررت اني مش عايز اسمع افكارها لأني بصراحة كنت خايف اعرف هي شيفاني ازاي دلوقتي. اول ما دخلت عيني وقعت عليها علي طول..يخربيت حلاوتها!
- ازيك يا مريم
- انا اسفة..انت طلع عندك حق..مدحت دة حيوان
- ايه حصل؟
- شوفتوا معاها..مش عايزة احكي تفاصيل لو سمحت و خلاص فسخت الخطوبة
- انا اسف انه عمل فيكي كدة
- ممكن اسألك سؤال؟
- اكيد
- انت كان قصدك ايه اما قلت انك بتحبني..
- قصدي اني بحبك..معرفش امتي و ازاي بس انا حبيتك
- بص يا عمرو هبقي كدابة لو قلت اني مش مشدوده ليك وماكنتش حاسه بأي حاجة غير اول اما شوفت مدحت معاها و كنت هموت و اجري عليك انت من بين كل الناس.. بس مش هينفع دلوقتي احب حد او ارتبط.. انا محتاجة وقتي و برضو محتاجة اقرب حد ليا جنبي
- مش هضغط عليكي و بعدين يا باشا كفاية عليا اكون جمبك بأي شكل من الاشكال
- هو انت سامع افكاري دلوقتي؟ انا بحاول اتحكم فيهم من ساعة ما جيت
- لأ ما انا هفهمك كل حاجة بقي...
.................
صحيت من النوم علي صوت رنة تليفوني
- ايه يا مازن بتصحيني ليه
- يا عم قوم بقي مي عمالة تقولي شوف عمرو فين شوف عمرو فين
- وهي مي هانم عايزة مني ايه
- معلش يا باشا اصل فرحنا النهاردة و انت المصور و كدة...قوم ياض بطل استهبال
- فرح ايه ياعم انتوا بتتجوزوا تاني؟
- انت بتشرب حاجة و انت نايم ولا ايه..بقولك ايه فوق و اخلص و تعلالي علي الاوتيل
.....
اتصلت بمالك و انا بجد مش فاهم حاجة
- ايه يا مالك انت فين
- رايح الاوتيل اهو
- انتوا بتشتغلوني يا جدعان هما مش اتجوزوا من اكثر من شهرين
- انت بتقول ايه؟
- مالك مش انا بقرا الافكار؟
- انت عبيط يلا؟
- طب استني مش انا بحب مريم و عرفت ان خطيبها بيخونها؟
- مريم مين يابني.... بقولك ايه انجزو تعالي الاوتيل و ابقي اتغطي كويس وانت نايم وبطل اكل حاجات تقيلة قبل ماتنام!
يعني ايه يعني؟؟؟
النهاية