كون إن دكتور التغذيه قالي إني مينفعش أكل بعد الساعة ثمانية بليل غير حاجة خفيفة ده ميمنعش ابداً ان برضو هاكل بطاطس محمرة الساعة تلاتة الفجر.... و ده مش عدم سمعان كلام خالص و الله.. ده عِند و تمسك بما اُحب, اصل انا و الأكل تجمعنا قصة حب اقوي من روميو و جوليت و مش هسمح لأي غريب يدخل مابينا.
أظن إنه قد حان موعد المقدمة المعتادة اللي إتهرسِت في ألاف الروايات و القصص... أنا عمرو, شاب زي القمر, عندي 26 سنة وبشتغل مصور.. بعشق الموسيقي و القراية و يا سلام لو بعمل الحاجتين دول في وقت واحد.. مش هعوز حاجة تانية من الدنيا. أعزب.. مع إن محاولات أمي أنها تجبلي عروسة مستمرة بقالها حبة حلوين.. مشاء الله الحاجة بالها طويل.. بس انا من الاخر لسه مالقتش فتاة احلامي... أنا مش رومانسي و كده خالص والله بس مش أي واحدة كده هتجوزها.. لازم اختار اللي هتنكد عليا بقيت حياتي بعناية شديدة
