و بعد يوم طويل.. ملىْ بالزغاريط و "هترفع راسنا ولا ايه يا عريس".."هو البوفيه هيفتح إمتي".."حاسبي رجلك و سلك الكاميرا يا حاجة"..و وشوشة العريس و العروسة اللي لغاية يومنا هذا هموت و اعرف بيقولوا ايه فيها.. قررت انا و الشباب الإتجاه لقهوتنا المتواضعة... قهوة مشمش واللي محتضنانا من ايام ثانوي.
و كالعادة استقبلنا مرعي القهوجي.. اللي تقريباً بيشوفني اكثر من أمي...
- اهلاً يا باشاوات, انزل بالاربعة شيشية؟
- يا عم انت حافظ مش فاهم؟ ما انت شايفنا ثلاثة قدامك اهو!
- اه صحيح اومال فين مازن بيه
- اتجوز بعيد عنك...إنجزنا بقا
......
لقينا بيشوي بينده مرعي و بيوشوشه..هو ايه حكاية الوشوشة النهاردة
- هخليكوا تجربوا حاجة هتجيب معاكوا من الاخر
- لا ياعم انا مش طالبة معايا الليلة دي خالص
- بقولك ايه يا عم مالك إنت كل مرة بتقول نفس البُقين و بتدوس عادي
طبعاً انا سايبهم يتكلموا مع بعض و قاعد بفكر باقي الأكل اللي كان في البوفيه هيودوه فين..
.....
الحجر خلص والقعدة إنفضت و ركبت عربيتي و اتجهت للبيت بس العربية قررت تعملها معايا و تعطل, وبما إن الساعة ثلاثة و نص الفجر فا مفيش حد خالص دلوقتي يساعدني. إتمشيت شوية يمكن الاقي اي ميكانيكي بس ولا الهوا.
- إنت يا أخ
لفيت مالقتش حد في الشارع غير كلب واقف باصصلي, فا قلت اكيد بيتهيقلي.. كملت مشي في طريقي
- إنت يا عم هو انا مش بكلمك!
لفيت و بصيت للكلب:
- ايوة ايوة انا بكلمك, إنت تايه ولا ايه؟
و معرفش إزاي اخدت سبرينت و كل اللي في دماغي ساعتها: "الله يخرب بيتك يا بيشوي"
و صلت لحارة سد و وقفت اخد نفسي... لقيت ولد صغير بيقرب عليا
- مالك يا عمو
- مفيش يا حبيبي ماتعرفش ميكانيكي هنا؟
- لا مافيش حد فاتح دلوقتي
- و انت بتعمل ايه في الشارع لوحدك في الوقت دة
- مافيش بلعب بالبودرة السحرية بتاعتي
- طب يلا يا حبيبي رَوَح زمان ماما قلقانة عليك
وفجأة لقيتوا نفخ في وشي بودرة و طلع جري, و في لمح البصر كان اختفي.. ايه ياربي اليوم الاسود ده.... رجعت لعربيتي و فضلت احاول لغاية ما الحمد لله دارت و روحت بيتي نِمت زي القتيل.
