بقالي يومين في البيت, رافض تماماً الخروج, و بحاول اتصل بعمار دة من ساعتها بس موبيله مغلق... بس انا زهقت و لازم انزل خصوصاً ان شغلي بيضطرني لكده, و بما إن في كتب كتاب النهاردة بالليل مطلوب مني اصوره فبقالي يومين بدعي ربنا يصبرني علي كل الافكار اللي هسمعها النهارده ..
قررت اني هبدأ يومي في ستاربكس و كان لسة قدامي وقت قبل كتب الكتاب فقررت اقعد استمتع بقهوتي و اقرا كتاب.. بس طبعاً ده كان مستحيل بكمية الافكار اللي انا سامعها.. بس في حاجة سمعتها شدت اهتمامي جداً: "يا تري لو رحت سألته عن رأيه في الكتاب هيحرجني و يفهمني غلط؟"
بصيت حولي بحاول اعرف ده تفكير مين... اكيد مش الولد اللي قاعد مع حبيبته و مش عارف يخلع منها إزاي..و اكيد مش صوت حبيبته اللي فاكرة انه نصها التاني و يا حرام مش فاهمة اللي فيها.. و اكيد مش صوت علي الكاشير...
لفت نظري بنت جميلة, مش احلي واحدة شوفتها في حياتي بس جمالها كان غريب..اكيد هي لأني اول ما بصيت ليها بصت الناحية التانية... خلبوصة. معرفش ليه و ازاي بس لقيتني قايم من مكاني و رايح اكلمها..
- مساء الخير, انا عمرو و مش بعاكس خالص و الله و عارف ان دي الجملة اللي بيقلها شاب بيكون بيعاكس و انا معرفش ليه متوتر كدة و معرفش ليه بفكر بصوت عالي كده..بس هو انا ممكن اخذ من وقتك 5 دقائق؟
ضحكت ضحكة رقيقة جداً و ساعتها دماغي قررت تشغل "ضحكت يعني قلبها مال"...انا بجد مش فاهم ايه اللي بعمله ده
- اتفضل بس 5 دقائق بس لأني عندي مناسبة و لازم امشي
- انا كمان..انا مصور و عندي كتب كتاب مفروض اصوره
- هممم طب خير..في حاجة
- اخدت بالي انك كنتي مركزة علي الكتاب اللي بقرأه فا جيت اشوف يمكن حضرتك عايزة تسأليني عنه بس محرجة او حاجه
- اه انا فعلاً بصراحة كان عندي فضول اعرف رأيك
- بصي انا الكاتبة دي اول مرة اقرأ ليها حاجة, و بصراحة ماظنش اني هكمل الرواية
- ليه؟
- بصراحة حاسسها عايشة الوهم, مفيش قصص حب كدة دلوقتي.. وسعت منها شوية او يمكن كل الكاتبات الستات اوفر شوية
و في وسط الاصوات الكتير اللي سامعها في دماغي, سمعت:
"انت اصلاً معندكش ذوق و انا اللي قلت شكلك مثقف و بتفهم"
- هو انتي قولتي حاجة؟
- لا خالص انا متشكرة بس لازم اقوم
"قبل ما ارمي القهوة في وشك"
- ايه!!!؟
- ايه يا استاذ بقولك لازم امشي.. و علي فكرة, انا اللي عايشة في الوهم
- يعني ايه؟
- يعني انا اللي كاتبة الرواية
و قبل ما الحق افكر في كلام انقذ بيه الموقف كانت مشيت... انا عرفت انا مش موفق مع البنات ليه.. دبش!
و اخذت حاجتي انا كمان و اتجهت لكتب الكتاب
