صحيت من النوم علي صوت خبط و ترزيع علي الباب مبالغ فيه, و في الافلام عادةً صوت الخبط علي الباب بالشكل ده بيتبعه اقتحام بوليس الأداب او مكافحة المخدرات, ايهما اقرب..او الزوجة بتخش تقفش جوزها بيخونها. رُحت افتح الباب و اتفاجأت بست الحبايب
- ايه يا واد انت مختفي فين! بقالي ثلاث اسابيع بكلمك و مش بترد عليَ ولا علي حد و اكلم عم سعد يقولي انه مشافكش من ثلاث اسابيع هو كمان, ده حتي كان فاكرك سافرت
- هو في ايه؟ثلاث اسابيع ايه بس يا ماما إذا كان انا لسه مصطبح بوشه امبارح و بعدين دا انا سايبلك إسكندرية كلها بسبب طريقة تعاملك مع الباب, جايالي لغاية القاهرة كمان!
- ماتغيرش الموضوع, كنت فين طول الفترة دي.. والله لولا امتحانات اختك كنت جيتلك من بدري
- يا حاجة ثرية ما انا كنت في فرح مازن امبارح و كلمتك من قلب الحدث
- انت شارب ايه يا ولا؟ ما فرح مازن كان من ثلاث اسابيع!
- ازاي يعني!؟
جريت ابص في موبايلي اشوف التاريخ لقيت إن امي كلامها صح و أمة لا إله إلا الله حاولت تكلمني ... ازاي؟ انا نمت كل ده؟ انا مش فاهم حاجة!
- والله ما اعرف يا ماما ايه اللي حصل
- خلاص بركة اني اطمنت عليك, انا حطيتلك اكل في الثلاجة خلي بالك من روحك و انا يادوبك ازور خالتك و ارجع إسكندرية
نزلت مع ماما اوصلها و بالمرة اشوف لو جالي اي حاجة في صندوق البريد...جو قديم بس اتعودت عليه من صغري... لقيت ظرف مش مكتوب عليه اي حاجة, و فتحته و لقيت ورقة مكتوب فيها "كلمني اما تفوق" و نمرة تليفون..طلعت البيت, واخذت دش سخن و دماغي مش قادرة تلاقي تفسير للبيحصل. كلمت مالك, بما إن هو العاقل فينا و نزلنا اتقابلنا و حكيت له اللي حصل و كان شايف اني اتصل بالرقم الموجود في الظرف بس اخذ احتياطاتي لأني معرفش مين اللي بعتلي الجواب ده ولا اعرف هو يعرفني منين ولا حته يعرف اللي حصل لي ازاي!
روحت و قررت اني هسيب الحوار دلوقتي و اركز في الشغل المتراكم عليَ.. اتغديت و عملت كباية الشاي المعتبرة و قعدت اشتغل, بس طبعاً دماغي كانت بتجيبني و توديني, هموت و افهم ايه بيحصل.. بعد مرور ساعات طويلة قررت انني هكلم النمرة
- الو, انا لقيت ظرف فيه النمرة دي, انت مين؟
- يا صباح الورد, نمت كويس؟
- ممكن افهم انت مين و ايه بيحصل بظبط؟
- مهو انا مش هينفع افهمك في التليفون لازم اقابلك
اتفقت معاه اقابله في القهوة اهو برضو اكون في منطقتي, نزلت و وصلت القهوة وقعدت و مفيش دقيقتين لاقيت واحد عنده حوالي حاجة و ثلاثين سنة, لابس نضارة و قميص و شكله مش وش قهاوي خالص, شكله واحد من الناس اللي كاننوا بيخلصوا اكلهم كله عشان مايجريش وراهم يوم القيامة وبيطلعوا من الاوائل كل سنة... و لقيته جه قعد و بيسلم عليا
- مساء الخير يا استاذ عمرو, انا اللي كنت بكلمك في التليفون
- ايوة انت مين و تعرفني منين؟
- انا عمار, عالِم و بعمل ابحاث ممكن في يوم من الايام تخدم البشرية
- تعرفني منين برضو!؟
- من ثلاث اسابيع حضرتك عربيتك كانت عطلانة و في ولد رش في وشك بودرة مش كدة؟
- ايوة حصل
- الولد دة ابن اختي, دخل المختبر بتاعي و خد من العينة اللي كنت شغال عليها و نزل جري مني و انا شوفت و هو بيرشها في وشك و للاسف مالحقتش امنعه
- و عرفت مكان بيتي منين و ايه العينة دي اصلاً
- انا يوميها مشيت وراك لغاية ما عرفت بيتك و عرفت اسمك من البواب فا سبتلك الظرف ده... اما بالنسبة للعينة فهي مشروع انا شغال عليه و بعد ابحاث كثير قدرت اخترع البودرة دي, انت في البداية بتنام مدة طويلة زي ما حصلك كدة و بعد 24 ساعة من اول ما بتصحي البودرة مفعولها بيشتغل و بيبقي عندك القدرة علي سماع افكار الناس
- اه انت شكلك عبيط بقي
- انا عارف انك مستحيل تصدقني غير لما مفعولها يبتدي..عموماً رقمي معاك, ابقي كلمني اما تصدق
و سابني و مشى و انا فاقد القدرة علي الاستيعاب
