«لـــو!»✔️⁩

"١٠.حادثة. "

عدا أسبوعين .. زيـن مبيفتحش إلا فين و فين ، ورد امتحاناتها قرّبت ..

و كسرتـها بتكبر مع تجاهله ليها .. هي متخيلتش ده يحصل .. مفكرتش تسأله السؤال ده قبل كده ..

جايز مكنتش اتعشمت فيه كده !
جايز مكنتش اتوجعت منه كده !
جايز مكنتش اتكسرت كده !
جايز و جايز و جايـز ..

و ياريـتها .. ياريتها قفلت ع نفسها الباب من الأول ، ياريتها ما اتعلقت ..

مبتآكلش .. مبتشربش .. مبتنامش .. مبتذاكرش ، عقلها مبيبطلش تفكير ، جسمها خسّ ، وشها بقا أصفر من قلة الأكل و كُتر التفكير ، مامتها بتعافر معاها عشان تتكلم ولا تفضفض بس هي متحججة إنها خايفة من الامتحانات ..

فتحت الشات بتاعهم بعد ما عدّى عليها هي و هو أكتر من أسبوعين مش بيتكلموا .. إزاي ؟

ده مكنش بيستحمل يقعد يومين منغير ما يسمع صوتها !!

قعدت تقرأ فيه ، دموعها بتنزل في صمت و عيونها و جفونها بقوا بيحرقوها من كتر العياط ..

_ متتأسفيش يا بابا ..💙
_ متزعليش بقا يا ورد ، خلاص معتش هضايقك💙
_ يا بنتي اضحكي .. ضحكتك دي بحسها نور بينوّر في وشي 💙
_ انزلي .. هعطيكِ هديتك و أمشي💙
_ خدي بوسة ..💙
_ شششش ، أنا بحبـك ، سلام 💙
_ يا شيخة بطلي مُحن بقا و احكي .. مالك ؟🌚💙
_ هكتب المرة دي عشانك ..💙💙
_ معتش بتخنق لما بتكلم معاكِ💙💙
_ إياك تنامي إلا أما أكلمك ..💙💙
_ عايز صورة ليكِ و إنتِ بتضحكي ..💙
_ أنا هآجي لك بُكره ..💙
_ هعدي عليكِ بعد بُكره ..💙
_ انزلي خدي الشوكولاتة بتاعتك و عروستك ، و بُوكس عيد ميلادك ده عشان أمشي ..🐸💙
_ ي بنتي افتحي قلقتي اللي خلفوني !

بـ تعيّط لحد ما صوت شهقاتها علـي ، مامتها دخلت عليها و هي قلقانة و بتقول بـ توجس و خوف :

_ استر يارب استر ! ، مالك يا حبيبتي ؟ ، فيكِ إيه يا ضنايا ؟

_ وحشـني .. وحشنـي أوي يا ماما .. أوووي ..

قالت و رمت نفسها في حُضن مامتها ، و هي بتكرر نفس الجُملة و مامتها بتربت على رأسها بتحاول تهدّيها .. هي عارفة إنه زيـن ، من أول ما عرفته و هي حسّت إنه وجوده في حياة بنتها مش هيعدي كده بالساهل .. بس متخيلتش ده يحصل أبداً !!

فضلت تمسح على رأسها و هي بترقيها ، لحد ما هديت و نامت أخيراً ..

غطتها كويس و خدت رقمه من تليفونها و رنّت عليه ..

_______

كان شايف الصُبح وهو بيشقشق بعد ما خلّص سهرته مع داليا ..

يقدر يقول إن من يوم ما رجعوا لـبعض وهو كل اللي بيعمله معاها بيسهر ويسكر ويعمل كل حاجة وحشة، الصلاة دي معادش بيقرّب لها، ولا المُصحف عاد بيفتحه ..

فونه بقى مليان أغاني ومهرجانات هابطة لناس ميصحش نصنفهم مُطربين، كل اللي داليا عملته من يومها إنها خرجته عن طوره، خلّته واحد تاني، أو هو اللي سابها ..

كان كل ما يبص لها يشوف فيها خيانتها ليه، وطول الطريق وهو ماشي حاطط الهاندفري بيسمع الفيڤ بتاعته في البلاي ليست، جات وراها ' لو' !

وحشته اللي بعتتها له في يوم أوي، من قد إيه مكلمهاش ولا زارها ولا سأل عليها !

بقى له ييجي أكتر من شهرين مفتحش حتى شافها باعتة له ماسدچ ولا أي حاجة !!

وأخيراً فتح الشات وكتب " أنا آسف على غيبتي الطويلة، وآسـ .."

" حاااااسب يا كابتنن" سمع زين صوت الصريخ ده ويدوب رفع رأسه، كانت العربية داخلة فيه بـ سُرعتها، وحسّ إنه وقع في بير إسود ملوش قرار وفقد وعيه، صاحب العربية نزل بيجري، وطلب الإسعاف من تلفونه، ولقي فون زين، زين ماسكه في إيده بقوة، كأنه بيستمد منه قوته ..

مسكه الراجل وفتح قائمة الاتصالات وضغط اتصال على آخر رقم واللي زين مسجله "Love♥️"

فتحت داليا الخط بصوت بيتأرجح بين الوعي واللاوعي" في ايه يا زين ؟، مش مرضتش تسهر وتشرب النهارده وسيبتني ومشيت؟، بترن ليه؟"

" حضرتك أنا مش زين، صاحب الموب عمل حادثة والإسعاف في طريقها، مُمكن .."

وقبل حتى ما الراجل يتكلم صرخت داليا بغضب" وأنا مالي بيه أنا !، يعني هو يبوظ عليا السهرة من أولها لآخرها ؟!، ما يتخبط ولا يولع، خلفته ونسيته !!" وقفلت السكة في وشه ..

" اسفوخس على ده لاڤ يا جدع !!" قال الراجل بضيق، وبيدور ملقيش غير رقم كمان بس "ورد💙🌸"

ضغط اتصال، ثانية، اتنين، تلاتة، أربعة، خمسـ ..

" ألو ؟" سمع صوت نعسان جداً ومُجهد ..

" إنتِ ورد ؟"

ورد اتنفضت من سريرها بـ خوف، محدش بيقول لها ورد غير زين ووالدته بس، مين ده اللي يعرفها وبيرن عليها من رقمه في وقت زي ده !!

" معلش يا بنتي صحيتك، صاحب الموب ده عمل حادثة والإسعاف وصل، و .."

" أرجوك قل لي انتوا فين ولا هتروحوا فين وأنا خمس دقايق وهكون عندكوا، أرجوك " صرخت ورد بتوسل وبُكا، الراجل رد عليها وبعت لها اللوكيشن، وفي ظرف فعلاً أقل من 10 دقايق ورد كانت عنده وهم بيركبوا الإسعاف ركبت معاه ومسكت إيده اللي مليانة دم، زي بقية جسمه !

_____
بتاريخ :23 مايو 2020 .
______
سي يو ما ليتل آنجلز💙

كـراميـل ..🌻