حكمـة ذئب

الحكمة الخامسة والثلاثون

ابتسمت امي " الله يخليك الي "

گامت الامي الغرفتها ضاجت بيبيتي من رد امي ..
گمت وراها ..
جانت تفرش بالگاع وبسمة تنوم بفرحة متعودات ينامن من وكت ..
دخلت عاينت عليه امي وكملت فرش ..
سحبت الفراش منها وگعدنا ..

اتنهدت وگالت " حكمت اعرف شتريد تحجي ؟"
رديت بأبتسامة " يانور عين حكمت يااميرة حكمت وملكته .. ماتلوگلج العصبية .. تعودت على ضحكتج الي تتلگاني دوم "

ابتسمت " بغداد علمتك تصير حيال لو شنهي "

ضحكت " لا ابد بس من اشوفج اعاين على اظافري گبل اگول لااحسدج .. اصلا الدكتور يگلي علم اختك على الدوة هم خاف انت ما موجود..  يعني عباله انتي اختي "

بقت تضحك وغطت وجهها بالحجاب ..
لزمت ايدها وبستهن " انتي ام گلب الطيب الي ياما داسوا بگلبج واذوج حرموج من الفرح مثل الناس وماحجيتي ولاحقدتي .. جنت اضوج من اشوفج ساكته ومتحمله
بس من كبرت افتخرت بيج لما جنتي تگليلي سلم امرك لله يمة هو الياخذ حقنا ..
بس هسا الوضع مختلف هاي امج تعرفين شنو امج .. اشوف لهفتها عليج وعيونها الي تدور عليج بكل مكان من تحجين من تضحكين من تشتغلين هي ماتشيل عينها عنج ..

انتي مو تلوميها لان راحت عنج .. بس هي راحت الاجل امها .. امها هم ربت وتعبت والها حق عليها

وعافتج يم ابوج واهلج .. شمدريها يصير كل هذا وتتغير حياتج ..
شمدريها هيج تبقى بعيدة عنج سنين طويلة ..
كم يوم ويرحون واذا راحوا ماراح تشتاقين لو تتندمين لان ماحضنتيها وشبعتي منها "

بجت وردت " ليش هي كم يوم تكفي حتى اشبع منها بعد ماانحرمت منها سنين طويلة .. ماحسيتها راجعه الي جن جايه خطار وتروح .. الام الي تعيش وي بنتها لحظة لحظة من صغرها لين ما تكبر.. هسا لا اني اعرف شتحب وشتكره ولاهي تعرف طبعي وحياتي "

رفعت راسها بيدي ومسحت دموعها " هذا الحجي كله احجيه الها وواجههيها وعاتبيها وجها لوجه بس فراغي همج كله وبعدها حضنيها واشبعي منها راح لحظة وحدة بحضنها تعوضج عن كل ذيج السنين مثل ماعوضني حضنج سنين السجن والعذاب "

گمت من مكاني اشرت البسمة نطلع لان جانت گاعدة وبس فرحة نايمة ..

طلعت للاستقبال صحتلها " بيبي تگدرين ترحين يم امي بالغرفه "
انخطف لونها وردت " شبيها ؟"
رديت " مابيها بس لازم تگعدن وحدجن وتذوبن الجليد الي بينجن "

ابتسمت وخنگتها عبرتها تقربت مني حضنتني حيل وشكرتني ..
ضحكت عمتي ونبراس " عفية عليك كافي زعل الفات مات "

ابتسم خالي عطاء " امي كانت تحجيلي عن جدي خضير وقوته وحكمته وطيبته .. وبكل مرة تگول ماكو واحد من ولده طلع مثله بس ابوك وهم مو مثله "

بس من اجيت لسا واني اراقبك اتذكر كلام امي واتخيل كأنه هالكلام كانت تقصدك بي مو الجدي "