حكمـة ذئب

الحكمـة الاولـى

عدنا والعودة احمدُ .. شلونكم حبايب ❤
(1)
#حكمـة_ذئب
#بقلم_شمس_السعدي

ربما يروني قاسي الملامح بعيون حاده..
ربما يرون قسوة الماضي ظلال تلاحقني...
ربما يروني ذئب اقاتل كي أعيش

لكن لا يعلمون ماهي
حكمة ذئب
فهي
لا تأتي من فراغ
من الم وجروح
من عدة طعنات
تأذيت وحدي
سقطت وحدي
وصنعت عالمـي وحدي ..

گاعدة تتأمل ابنها من الشباك ..
ابنها الي انولد بسبب غلطة لم تغتفر الى الان ..
غلطة هي مالها ذنب بيها ..
انحرمت من امها وماتعرف الصح من الغلط ..
مراهقة وفتحت عيونها على ابن عمها وذنبها الوحيد وثقت بي وصدگتة ..
كلما تتذكر ذيج الايام تحس سجينة وتطعن بداخلها ..
گلبها مجروح والناس ماترحم ولاتسمحلها تطيب جروحها ..
اخذت نفس وهي تتنهد بحسرة قوية ..
فجأة سمعت صراخ ابنها ركضت الة شافتة واگع من البايسكل والجهال تضحك عليه ..
رفعتة من الگاع وتمسح ملابسة من غبار حظها العاثر الي انتقل لوحيدها ..

باوعلها بنظرات حادة وراد يخفف عنها خوفها والمها..
- مابية شي يمة لاتخافين ..
ومسح دموعها من عينيها ..
- ااااه يبعد امك مكتوبلك تتعذب بسببي ..

باوعتلهم بقهر ..
- ليش وياه هيج مو اخوكم ..
ردوا عليها ..
- ابن العايبة مو اخونا ومانريدة يلعب ويانا امنا ماتقبل .

صرخ بوجههم ذلك الذئب الغاضب ..
- امي مو عايبة والله اموتكم اذا تحجون عليها ..

انقهرت عليه وهي تشوفة بين ثعالب ماكرة تحاول تقهرة وتجرحة بكل لحظة ..
-گوم يمة خلينا ندخل غرفتنا .. الله قبيلهم وياخذلنا حقنا منهم ..

اخذته ودخلت الغرفة الي صارت ملاذها الوحيد من كلام ونظرات المبغضين والحاقدين .

نظفت جرحة الي بركبتة وهي تنفخ عليه بدفو گلبها وحنانها ..
وبقت تمسد على راسة وتمسح دموعها الي ترست وجناتها ..
وبدأت تسترجع ذكرياتها وشلون كبرت بسرعة وهي بعدهي بعمر الورود ..
الي بعمرها يدرسن ويروحن للمدرسة ..
وهي بعمر 14 صار عندها طفل تربيه لاام ولاابو عندها يعينها ..

رجعت رضاء الذاك اليوم وبالتحديد لنهاية السبعينات ..
جان عمرها 12 سنة ..
سنة تسعه وسبعين أنتصار الثورة الاسلامية بايران...وبسبب هذه الثورة تأزمت العلاقات بين البلدين
الي جان نظام البعث والجهات الي خلفه والداعمه اله وعلى رأسها دول الخليج متخوفة من الثورة لأن العراق هو بودقة العرب وبوابة الخليج...فأي حدث يصير بلعراق الوطن العربي يتأثر ..

وبالمقابل .. كانت إيران ايضا ترصد بخوف وصول صدام حسين للسلطة في العراق عام تسعة وسبعين بعد الرئيس أحمد حسن البكر.

زادت المخاوف الإيرانية مع توقيعه ميثاق الدفاع العربي في شهر شباط عام ثمانين .. الي اعتبرته إيران عمل عدائي يستهدفها ويُجيش دول المنطقة ضدها في صراعٍ حدودي ..