حكمـة ذئب

الحكمة الثاني والعشرون

صباح الورد احبتي ❤
(22)
#حكمـة_ذئب
#بقلم_شمس_السعدي

أبت الاحزان أن لاتفارقنـا !!

تسودنت من شفت جدي وگع بالگاع صحت بصوت مخنوگ وركضتلة شلت راسه من الگاع وافرك بوجهة وايده مااعرف شسوي ..
حكمت ركض يدور سيارة بالشارع هو ورزاق .. عمذ دنگ يحجي وياه يابة يابة گوم ..
دخل حكمت .. يلة رزاق وينك تعال عواني ..
شالوه ركضت وراه ..
- خلوني امشي وياكم ..
اشرلي حكمت :
يمة انتي ابقي هنا .
رجعت واسمع عمي صالح يهدد بعمتي لميعة .
- اذا اجيت ولگيتج بالبيت ماتلومين الا نفسج .. لمي غراضج وروحي لبيت اخوج ..
عمتي هم ماحجت لمت غراضها واشرت الصدام يلم هدومة ..
حجت سداد :
يمة وين ترحين وتعوفيني وحدي
ردت عليها : شني زعطوطة عمرج بالثلاثين ابقي هنا يم فروخ اخوج ..
بجت سداد .. لشوكت ابقى خدامة الولد اخوي والكم تعبت والله ماقبلتي تنطيني الراكان بحجة بعيدة وأكراد اني راضيه شعليكم انتو خلوني اولي من مشاكلكم كل البيوت مرتاحة الا احنة ..

كسرت گلبي حقها العمر يركض وهي محتاجة تعيش وتكون بيت وعائله ..
طلعت عمتي ومااخذت بس صدام وياها ..
سداد دخلت الغرفه تبجي وسدت الباب وراها ..
مابقى بس اني وجهال مهدي ..
منا حمودي يكسر الگلب يصيح جوعان ومنا بسمة تبجي وتگول وديني لأهلي ..

رحت للمطبخ وبالي يم جدي .. گمت ادعي يرجع بالسلامة .. ردت اخابر عمتي وتراجعت هي وين واني ازيد همومها ..
اتنهدت : ااااه يعمة جنتي شايلة هموم البيت كلها ابد ماجنت احس بشي بوجودج رغم المصايب الي تكومن عليه بس جنت مرتاحة لان انتي يمي احجيلج وافرغ همومي وانتي تواسيني وتريحين گلبي ..

فزيت على صوت بسمة بطولي رغم صغرها بس ماخذة طولها من مهدي عائلتنا كلها طوال حتى حكمت ورث الطول منهم ..

تفرك بيدها وتگلي : خالة تعرفين امي ؟
هزيت راسي اي
جا طرشيلي الها گليلها بسومة تبجي عليج ..
عاينت بوجهها ومااعرف شحجي ..
سألتها : جوعانة
هزت راسها . اي جوعانة جوعانة بس مااكل لمن تجي امي ..
عمرها جبير بس الظاهر عقلها ماكامل ..
وبيها طبع تكرر الكلمة مرتين من تحجي ..

اشرتلها تگعد گعدت : مايصير تبقين بلا اكل تتمرضين
هزت راسها : مااتمرض مااتمرض اني زينة .

اوووف يربي شسوي هسا ..
گمت صبيت الغدا وحمودي يحب الدبس والراشي خبطت بماوعن اله ..
خليت الصينية بالمطبخ وصحت بشار سداد تعالوا اكلوا
اني مالي نفس اكل ..
بقيت اعاين على حمودي شلون ياكل .. تقربت الصينية
- اريد من هذا واشرت للدبس والراشي ..
خبطت الها ماعون وخليته گدامها ..
طلعت وسن من غرفتها وشايلة بنتها على خصرها ..
شو ماصحتينا ليش ؟؟

عاينت عليها : اني صبيت للجهال جواعه ليش هو منو اله نفس ياكل وبعدين هاي الگدور وصبي ..
ضحكت :
هاا يرضوة شو السانج طلع بس عليه مثل الدودة وي بتول ولميعه ..
صاحت بيها سداد من وراها :
- احترمي نفسج شني لميعة لو راحت امي وخلالج الجو عبالج تسيطرين .
لاعيني انسي انتي حيا الله جنة بالبيت .. احنة امهات البيت