حكمـة ذئب

الحكمة الثامنة

مساء الورد حبايب ❤ اعتذر عن التنزيل البارحة لان كنت مريضة بس جبرت نفسي وكتبت ونزلتلكم قبل لااروح للدكتورة .. احبكم ❤
(8)
#حكمـة_ذئب
#بقلم_شمس_السعدي

‏لا بأس من أن يكون ماضينا أفضل من حاضرنا. و لكن الشقاء الكامل أن يكون حاضرُنا أفضل من غدنا. يا لهاويتنا كم هي واسعة!

- محمود درويش

ساعات مرت وهي بعدهي راكعة فوق سجادتها وتشعر بالندم والالم ..
فكلما تتوقف انفاسها وتتغلل ذرات الرعب الداخلها ويمتلأ قلبها خوفا من هذا الانسان الظالم ..
تعود لتسجد بخنوع ..
تطلب من الله عز وجل .. ان يقصي ذلك الضيق بعيدا
وينير لها قبساً يريحها من هذا التخبط في العتمة ..
كانت تتصور هذا الزواج سينهي سلسلة عذاباتها وبداية جديدة الحياتها ..
لكن سرعان ماحاصرها الندم .. بجيوش غابرة والسن لاتسكت كأنها اسلحة فتاكة ..

من جهة تعتذر الربها وتطلب الغفران ومن جهة ثانية تتوسل وتطلب الرحمة والخلاص ..
هذا اليوم الي فاتها وبتعمد من مهدي خلاها تحس بندم وخوف من رب العالمين .. طبيعتها نقية و تربت ع الفطرة بين يد جدها وامها الي من صغرها فهمتها الصلاة حرام تتنترك والصوم يوم واحد اذا فاتنا اله ذنب كبير ولازم ندفع كفارة وامور طويلة ..
جانت تتذكر كلام امها لكن جهلة رحمة الله وغفرانه العبادة وخاصة هالشي كان من غير ارادتها ..

اول صباح برمضان كان يوم جمعة بشهر الخامس.. الجو معتدل .. وحتى العصافير جانت تزقزق وفرحانة بمجيئ هالشهر .. بعد اذان الفجر تبقى اغلب الناس تقرأ قرآن الى شروق الشمس وبعدها اكو الي يطلع الشغله والي تنام كم ساعة وتصحى حتى تكمل تحضيرات اليوم وتجهيزات الفطور ..

رضاء .. بعد ماشبعت بجي ع السجادة بقيت للصبح اقرأ قرآن واستغفر ماحسيت على روحي الا واني غافية بمكاني .. ساعة تسعة حسيت بحكمت گعد ويجر بالغطا يغطيني .. فتحت عيني شفت ضحكته گبالي ..
- ليش ماگعدتيني اتسحر واصوم ..
سحبته وحضنته .. گام .. يمة ليش ماگعدتيني س
سمعت جدي يگول حرام واحد مايصوم الا اذا جان مريض او يسافر ..

ابتسمت.. بس انت صغير وماكو حرام عليك .. تذكرت مهدي وشلون خرب صيامه علمود غريزته ودنيته ومافكر بآخرته ..

- هو وين جدي . اريد اسأله.
- يعني ماتصدگ بيه ..
- لا محشومة يمة بس جدي شيخ ويعرف ..
- خوش انت اكل اليوم واذا گال جدك يصير يصوم من باجر تصوم ويانا..
- لا مااكل لمن يجي جدي الظهر واسألنه ..

وصدگ مارضا ياكل ابد .. اني وعمتي نتوسل وحضرنا الريوگ وماكو .. عاينت ماشفت عمتي لميعة وبتول نايمة هي والبنات ..
سألت عمتي .. جا عمتي نعيمة نايمة لسا ..
- لا اجه صالح اخذها للمستشفى كونها مريضة وبالليل متخربطة مووو..
ابتسمت .. اي وسويت الها نومي بصرة .
عمتي جانت تلگط تمن ولابسة نظراتها من الخياط وشغل الحصران والبجي فوگاهن ضعف نظرها ..
سحبت النظارة لگدام وتعاين من فوگ ..
ها ولج رضوة شو تضحكين شبيج . تذكرت مهدي وصيامي ضجت ..
عمة اريد اسألج .. اذا واحد صار شي غصب عنه وبطل صيامة حرام لو شلون يعني يبقى صايم لو يفطر ..