حكمـة ذئب

الحكمة الخامسة والعشرون

أسعد الله اوقاتكم بكل خير احبتي ❤
(25)
#حكمـة_ذئب
#بقلم_شمس_السعدي

الفراق حُزن كـ لهيب الشمس يُبَخر الذكريات من القلب ليسمو بها إلى عليائها .. فتُجيبه العيون بنثر مائها لتطفىء لهيب الذكريات !!

_____________________

نهاية سنة 98 وبداية 99…..

حمدية من لما رجع فارس ببداية سنة 97 وهي متأملة تخلص وياه العمر الي ضاع بأنتظاره ..
صلت وحمدت ربها ووفت كل نذر جانت ناذرته ..
من غير الي نستهن على گد مانذرت ..
بس جانت تعوضهن بصدقات للفقراء وتگول :

" ربي اعتبر هذي الصدقات بدل كل نذر ناسيته المهم تطيب فارس وترجعه الي مثل الاول "

لكن القدر دائما يمشي عكس هوانا  .. 17 سنة من الاسر والتعذيب والجوع والبرد .. مستحيل ماتظهر  نتائجه ولو بعد حين ..

واصلا فارس رجع مو ذاك فارس حبيبها وزوجها وفارس احلامها .. بآخر ايام جانت تندب حظها وتناجي ربها
" ربي العفو منك لو كلامي يجحد بنعمتك .. بس انت استجابيت دعائئ ورجعته الي .. جان رجعته طيب وبخير ولاراجعلي موات ويصير حزني عليه حزنين "

بعدها تستغفر ربها وتلعن الشيطان .. وتگوم تصلي وتدعي مرة ثانية الشفائه .. بس هو واصل المرحلة متأخرة بالمرض ومااكتشفوه الا متأخر ..
هالشي اثر بيها وبقت تلوم اهلة الي جانوا يگلولها
"مابي شي بس التهاب" ..

جانوا يدرون او لا الله اعلم .. بس هذا جان ردهم الها بكل مرة ياخذوه للطبيب .. الا ان فاض بيها وناشدت ابوها الحجي خضير وطلبت منه فلوس تاخذه البغداد
هناك يفتهمون اكثر ..

والحجي خضير ماقصر انطاها الي تريدة وزايد رغم تدهور احواله بهذه الفترة وخاصه بعد مااصدر برنامج
" النفط مقابل الغذاء " وهذا الي كان سبب بخفظ الانتاج الزراعي آنذاك ..

وگفت حمدية بوسط البيت وحجت وي حمويها :
" اني باجر غابشة بي البغداد اكو واحد بيكم يروح وياي البغداد لو اروح وحدي " ..

بقت تباوع على وجوههم وكملت كلامها :
" لاتخافون فلوس عندي مااكلف واحد بيكم بس اريد رجال وياي يروح "

عاد اتبرع حماها الصغير وراح وياها .. طلعوا البغداد وجانت فرحانة وكل ظنها راح يتعالج ويرجعلها احسن من قبل ..
بس بعد التحاليل الي استغرقت اسبوع يلة طلعت وبهالفترة الدكتور طلب دخوله المستشفى لان حالته مو مطمأنة وهو اول فحص اله خبرهم بشكوكة بأحتمال وجود مرض خبيث برئتيه ..

هالشي كان مثل الصدمة الحمدية الي وگعت من طولها اول ماسمعت الخبر ..

خلت حماها يم فارس وراحت تركض وماتعرف منين تصعد لو منين تأجر سيارة للامام الكاظم ..

اجرت تكسي ومن شاف حالتها رأف بحالها من نزلت نست تنطيه كروة وهو هم ماطالبها لان حالتها خلت الكل يرأف بيها ..