مذكرات القدر

بارت التاسع عشر

بسرعه حضنتها
معقوله اكو حماة هيج بهالزمن هذا؟
معقوله اني لهالدرجه محظوظه حتى تصيرلي هيج حماية
مكاعده اصدك
اني اكثر شي جنت خايفه منو هو انو ام ايهم ماتتقبل حبنا
او تضوج مني او شي
او حتى ماتقبلني بحيات ابنها بسبب ديانة امي!
هواي اشياء جانت تجي ببالي
بس الي صار العكس
من صدك لسا الدنيا بخير مادام اكو من امثال ام ايهم

حضنتها حيييل
ام ايهم: اريدج توعديني بشي يايمه
وخرت من يمها وكعدت مقابيلها على ركبي
قدر: اي يمه بشنو
ام ايهم: اريدج دوم مهتما بأيهم هذا اول ولدي وفرحة عيني ماريدج تقهري او تغثي بشي صدكي شاف الويل حتى يصير بهذاك الجبل الي واكف كدامج ماشاف طفوله عدله يا يمه وجان دائما يخاف يحب اي وحده ويبعد عنه الكل بس حتى لايروح يختار اختيار خطأ جان دائما يكلي ماريد احب ولا اتزوج اخاف زوجتي تطلع مو خوش وتضوجج يمه لتشوفي مغرور او رافع خشمه تره والله كلبه نظيييف حيل وبساع ينقهر وبمعره ماأذه احد لتقهري عفيه بروح امج وابوج
قدر: يمه شكاعده تحجين من كل عقلج اضوجه او اغثه بشي اول حب بحياتي هو اول دقه لكلبي يمه وداعتج اني هم مشفت طفوله عدله
ام ايهم: من هيج احسكم راهمين لبعض حاولي تفهميه يا يمه تره هو مرات مزاجي يصير مايتحجه حاولي تتعاملين ويا صح هو مو عصبي بس مرات من ينكلب مزاجه مدري شون يصير
قدر: بعيوني اخليه يمه لتشيلين هم
ام ايهم: يمه فدوه اروح لچنتي هيج اشوفكم عرسان سوا وتملون البيت عليه جهال اويلييي منا المال ومنج العيال
قدر: هههههه تدللين بس بعد وكت على زواجنا
ام ايهم: ليش بعد وكت انتي وحطبين عمر ال18 وهو هم كبر ماكو بعد وكت ماتعبر هالسنه الا وهو خاطبج
قدر: اذا هيج براحتج
ام ايهم: اي اني ما احب السالفه الطويله يعرفج وتعرفي بعد شكو
قدر: براحتكم اني معندي مانع
ام ايهم: انتظري عليه جم اسبوع واخلي يروح يحجي ويا عمامج وحتى تصير الشغله رسمي

خجلت من حجيها هواي
ممصدكه الي كاعده اسمعه
يربي معقوله يجي هاليوم الي اصير زوجته
بس كلبي مقبوض من هالشغله مدري ليش
يعني ماحسه انو راح نزوج ونبقى ببيت واحد

بقينا اني وام ايهم نسولف بالمطبخ
شويه وطب علينه ايهم
بسرعه رحت خليت ايدي على جبينه اشوف حرارة جسمه

ام ايهم: ها يمه شون صرت
قدر: لا يمه صار زين حتى حرارته خفضت
ام ايهم: اي هو صار زين من شاف احباب كلبه كدامه

استحييت هواي من كالت هيج
بقيت اباوعله ومبتسملي
سحب كرسي وراح كعد
اجت فاطمه وبقينا نحضر بالغدا
واني وياهم
وهو كاعد ويانه كلما اندار اشوف عيونه عليه ومبتسملي 
يربي عالبشر غرييب احسه
شبسرعه حبني
شو مجنت احس بهالشي
مجان يبينلي انو يحبني ابد

بقيت عدهم للمغرب
اول مره اكون عدهم فرحانه هواي
جان ايهم ماخذ اجازه لان مريض بس طلع العصر للجم يتمرن