زواجك بالاكراه وعلاجك قدري ( صكر الصخرة)

الفصل السادس والعشرون

ماهي الحياة ؟
عباره عن مكان كبير جدا مكون من الالم
...............

جانت بالتسعه الصبح لما حست فرحه على صوت هند وهي بالحمام داتقيئ ..
فرحه مجانت نايمه طول الليل بسبب شبل كلشويه يكعد .. فنامت الفجر على نومته وماصحت من وكت ..لكن من سمعت صوت هند .. كبل فزت وركضت عليها ..
جانت كاعده على ارضيه الحمام ..وقريبه من التواليت داتستفرغ .
اجت يمها فرحه وكالت

فرحه .. اسم الله عليج خيه شبيج .. شوفي وجهج شلون اصفر ..كومي .. غسلي وروحي اتمددي لو اخابرلج صكر يجي يوديج للدكتور .

هند كبل هزت بايدها لا .. وكالت
هند .. لالا .ماريد .. هسى اصير زينه .. مو فد مشكله جبيره ..لاتكولين لاحد ..

باوعت بيها فرحه وكالت .. هننننند ..معقوله حامل
هند مجاوبتها .. وراحت تغسل وجها .. فرحه اهنا فهمت ..انه فعلا حامل .. باوعت بيها والابتسامه على وجه وكالت

فرحه ِ... الله يسامحج هيج تخفين علينا ومتكولين .. ومن يمتى تعرفين .. لاتكوليلي يوم الي جنت مريضه .. والله عيب عليج ..هيج اتسوين ..كلنا حنفرح ..

اندارت هند عليها وكالت ... ماردت احد يعرف هسى .. وخاصه بوجود هلكد مشاكل بيني وبين صكر .. وجماله اجا العزا همين .. والناس التهت .واني ماردت احجي هالشي بهالوقت.

فرحه .... بس على الاقل ام صكر ..جان فرحت مداتشوفيها شلونها تعبانه .. يكفي كل الناس داتتهمها بالي صار كله هي وصكر .. على الاقل هيج خبر يرفع من معنوياتها ..

هند ... والله ماادري شكلج .. جنت داافكر بالانفصال من صكر ..تعبت ..لااكدر اعيش وياه ولااكدر انفصل عنا .. وكل ماداتجيلها حياتنا داتعقد اكثر ..

فرحه.... تدرين ..انتو مثل الاسود والابيض. . معاكسين لاخر حد ..لكن متناسقين لاخر حد .. فكري بهاي الطريقه ..وراح تتغير نظرتج .

هند .. شنو قصدج ..مافهمت .. شتتغير .. اخاف تتغير واتغير وياها واصير مثله .. هو ديسحبني من نفسي .. صرت اخاف من روحي حتى ..

فرحه ... محد غيرج يفيده .. محد غيرج راح يعالجه انت بيدج انه تحييه من تحت الركام الي عايش بيه .. انت بيديج راح تخيطين كل جروحاته لاتستسلمين. ..

هند ..والله ماادري شكلج .. بس اني تعبت ..

حظنتها فرحه وكالت .. اليوم ماترحين للمستشفى ..صار كم يوم مرحتي ..

هند .. بلي مو كمت ابدل حتى اروح ولعبت نفسي . لعد خلي اكوم اغير ملابسي واطلع

فرحه ... ماتتريكين بالاول

هند ..لا مااشتهي ..ومعدتي داتوجع باكي اكل اهناك ..

فرحه .. براحتج .. اروح اشوف شبل لايكون صحى .. بما انه ماكو احد يعني طالعين من وكت رايحين لبيت الشيخ