زواجك بالاكراه وعلاجك قدري ( صكر الصخرة)

الفصل السابع عشر

خوف فقدك كان الاكثر رعبا وكان اكثر حزنا بما مررت به .. لاتعلمين كم اعشقك ياامرأة هزت كل كياني وعرشي
........................

وصلو لبغداد ..وصلها للمطار انطاها التكت والجواز جان يمى وكال

صكر .. يلا روحي .. وانت حره .. مثل مجنت تردين

هند .. بس مو هذا الي اريده .. اني ماريد اسافر

صكر ظل يباوع بيها ويحجي بقلبه ويكول .. ( روحي والا مراح اكدر اعوفج .ابتعدي احسن من ان اعذبج بحبي اتخلصي مني قبل مايدمرج عشقي )

اما هي فجانت اتردد بقلبها وتكول
( شلون اتعوفني واني اتعلقت بيك ِ.شلون تبعدني عنك واني الي جنت اعتقد اني اهرب منك طلعت اهرب لاحضانك ..جنت اعتقد انك تتبعني بكل خطوه اثاري جنت تتهرب مني .. شلون اتركك واني صار قلبي بين ايديك كيف هان عليك تكتب النهايه واحنا حتى البدايه ممكمليها )

عافها واندار ..وهي دخلت للمطار ..بيديها الجواز واتباوع على التكتات ..تلتفت خلفها متشوف صكر ..طلع صكر وابتعد عنها ..وهي واكفه ودموعها تجري ..الى اين المفر .

(فلاش باك ) قبل جم يوم من جان صكر ويا عمه بمكتب الشركه جانو دايحجون بخصوص اهواي اشياء وخاصه هند وعلاقه صكربيها ..
جاسم .. هند لازم اتعوفها ..اذا اتريد نبقى عائله متماسكه وتريد تبقى ليدي اليمين ..لازم اتعوفها عل. الاقل تطلعها من حياتنا .. وجتن دايضوجه بحجيه على زوجته وانه هي داتأثر بيه وتبعده عن اهله وهو غلط لما خلاها هلى قيد الحياة وماهددها بالقتل مثلا بعد مكشفته ..
كلام عما الاخير كلش ضوجه .. باوع بيه بنظره مخيفه جدا ..ومن يصير هيج محد يكدر يوكف بوجه ولايحجي وياه .. جان شادد على قبضة ايده كانه دايمنع نفسه من ارتكاب جريمة وكال ..

صكر .. راح اروح اشوف الشغل .. واشوفكم بالليل ..

وطلع .. من اهنا جاسم افتهم انه مستحيل صكر يعوف هند ..وهذا اكدله انه يحبها ..
وبهيج قرر يتخلص منها بطريقته الخاصه .. شال التلفون على سجاد .وكال

جاسم .. سجاد ..اذا اتريد اتصير فعلا ايدي اليمين اتسوي الي راح اكلك عليه ..

سجاد جاوب بحيل صدر وكال... امرني ياشيخ

جاسم .. لازم نتخلص من هند ..شوفلك طريقه وهاي راح اتكون فرصتك حتى تثبتلي نفسك اذا كد المسؤولية

ابتسم سجاد وكال .. اسمع اخبارها قريبا ..

وسد التلفون .. وبدا سجاد يخطط وينفذ خطته ..جانت كالتالي .. انه يراقبون هتد خطوه بخطوه .. لكن بشرط ميحس عليهم صكر لان بهالسوالف محد يلحكه .. وبس تكون وحدها اما يخطفوها او اذا كدرو يقتلوها بعد احسن .. لكن ماحالفهم الحظ ابدا والسبب الحراسه الدائمه لصكر على هند ..
اما اليوم فجان غير شكل ..
طلعت سياره صكر من الصبح وياه هند ..وجانت السياره الي تراقبهم خاتله ومن طلع صكر بالسياره طلعو وراه .. لحد ما وصلها لمطلر بغداد وهما وراه .. بالطريق اتصلو بسجاد .. وانطاهم معلومات بانهم ينفذون الخطه وهيج جان افضل على الاقل هي مو بالصخره ..
سد التلفون وياهم .. ونزل من غرفته بسرعه يوصل الاخبار لابوه .. جان كاعد بالصاله ..