ناضت الصباح راحت الحفافة فطرت غير بسيف لبست و قعدت في الشمبرة و معاها نور و ياسمين لي كل دقيقة تعيطلها و تسقسيها جاو يديوها خرجت تحت يد باباها لي عينيه كانو معمرين دموع و هي غير تبكي و يماها كيفكيف راحو للدار دارو حفلة صغيرة بين العائلة ( حقا راحو عقدو تمتم و جاو و مصراو حتى احداث جديدة )
سامي جا مع الاخر شوية زعما كملو راحو الاوتال وتفاهمو باش يجيو يعيشو مع والديه يعني في دار فاطمة بحكم هو يطول في الخدمة ومنا و الين صغيرة باش متقعدش وحدها هذا حاليا منبعد منعرف
Elin ****
الطريق كاملة الصمت كان سيد الموقف وصلنا قدام الاوتال غير هبطت
سامي : ارفدي حوايجك منا
رحت رفدتهم اصلا معنديش طاقة باش باش نهدر راح و خلاني وحدي دخلت سقسيت على الشمبرة و طلعت ليها زعما هاذي هيا ليلة عرسي صح مكنتش مسنية منو يتقبل هاذ الزواج بسرعة مي على الاقل يحترمني رحت نحيت لروب لي كنت لابستها دوشت نحيت المكياج لبست بيجامتي صليت صلاتي و شديت بلاصة في البونك قاعدة نخمم فواش صرا واش راح يصرا حتى رقدت
........ الصباح *****
نضت صباح لقيت سامي راقد في الجيهة االاخرى تاع البونك كان يبان شباب و عاقل كنت راح نرمي يدي نمسو مي عاودت رجعتها ..... حسيت عليه بدا يتفاطن ناض ني سلام ني كلام ديراكت راح دوش حسيت بالاهانة بزاف هكذا شوية خرج من الدوش داير سربيتة غير من تحت و من الفوق يا قلبي الصغير لا يتحمل طابليطا شيكولا قعدت نخزر فيه بلا منفيق حتى نشوف فيه يهدر
سامي : غير الخير عجبتك نمدلك تصويرتي
الين : مافيك حتى حاجة تعجب باش تمدلي تصويرتك
شعل غارو و ريح قدامي
سامي : بون شوفي باش نتفاهمو نتي صح دوكا مرتي مي انا عمري ولا راح نحبك و لا نعاملك على اساس مرتي هذا الزواج قبلت بيه غير على جال ماني باش ميروحش مخك بعيد مالغري كنت نسناك ترفضي مي علبالي بلي البنات لي كيما نتي ميفوتوش فرص كيما هاذي
الين : واش قصدك من البنات .....
سامي ( بدا يعيط ) : ششششش كي نكون نهدر متقاطعينيش ..... المهم الزواج هذا جاز دوكا منهدروش على لي جاز نهدرو على لي جاي الزواج هذا محال يكمل قضية وقت ماني تسترجع صحتها و الحالة تكون هدات كل واحد يروح في طريق قال متفهمناش و خلاص مي دوكا كوم راكي رافدة اسمي راح تعيشي كيما نحب
1 هدرتي منعودهاش 2 متقطعيليش الهدرة 3 تحبي ترقدي في الارض في الفوتاي برا هاذي راجعتلك مكان مدخلني المهم منلقاكش قدامي ماشي كيما البارح دخلت لقيت لالا شادة بلاصتي 4 منسحقك دخلي روحك فيا ولا فخدمتي وين خرجت معامن خرجت هذوما خاطيينك 5 منسحقكش تشوهيلي اسمي راكي تقعدي مرتي في الورق يوليو يقولو مرت فلان و كذا
الين : قولي موتي وتهناي
سامي : ديري فيا مزية لوكان ديريها
ناض بدل حوايجو وخرج قالي نص ساعة نلقاك واجدة ؛ الجرح لي في قلبي نهار على نهار راهو يزيد يكبر جرحني بزاف وصلت معاه باش يقولي لوكان تموتي ديري فيا مزية لهاذ درجة يكرهني 😔
نضت لبست روبة غوز كلار مع فيستة تع الجين و باسكات مشطت شعري و حتى المكياج مورالي مكانش طالع باش نديرو سما حطيت غير شوية غلوس
هكذا شوية سمعت الباب نفتح
دخل سامي جا رفد تيليفوني كان مرمي فوق البونك عيط بتاعو و مركاهولي
سامي : هذا نيميرو تاعي منسحقش كل دقيقة تعيطيلي في التيليفون غير اذا حاجة اورجون
الين : كنت قادر تمدلي نيميرو انا نماركيه متزيدش تمسلي قشي
سامي : نمس و نخرب فيه و نتي مكان مدخلك
الين : هذا يسموه استعمار
سامي : سميه واش متحبي ايا نروحو
ركبنا في طونوبيل ورحنا للفيلا و واحد مهدر مع لوخر دخلنا للدار قابلونا بالفرحة و الضحكة في وجوهم كانو باينين بلي فرحانين سلمنا على ماني فاطمة و والديه و ياسمين و جواد و مرتو و بنته لي جاو يقعدو يامات مع العرس تاعنا المهم قسرنا شوية منبعد وراتلي ياسمين شمبرة كبيرة بزاف جوزت العشية نعاود نفرز في حوايجي
سامي باينة مكانشو في الخدمة هههه زعما حتى شهر العسل مكانش بسبة الخدمة كي كملت هبطت عندهم لقيتهم ملمومين في الصالون قعدت معاهم تعرفت على سلوى كثر ناس ملاح بلبزاف زادت هبطت ياسمين ايا تفاهمنا حنا البنات نوضو نطيبو العشاء و كيما كان الحال طيبنا شربة و حمرنا الجاج الله الله ههه و ياسمين دارت الديسار كي كملنا رحنا وجدنا الطابلة
فاطمة : بنتي عيطي لراجلك شوفي اذا يجي
الين : ايه
رفدت التيليفون باش نعيطلو وانا ميتة بالخلعة عيطت عيطت والو
الين : مراهوش يريبوندي ماني
فاطمة : انا كنت حابة نتعشاو كامل كيفكيف .... معليش
كملنا تعشينا وانا طلعت للشمبرة رحت لبست بيجاما شورت و قعدت في البونك قاعدة نكونيكتي حتى دخل المسيو سامي
سامي : ماشي قلت متعيطليش
الين : بففف انا معيطتلكش باسكو توحشتك مانك حوست عليك
سامي : هي لي تعيط ماشي نتي
الين : روح قولها هي ماشي انا
سامي : الين لسانك
نشوف فالعبد ينحي في حوايجو
الين : واش راك ديييير
سامي : واش راكي تشوفي راني نبدل في حوايجي
الين : اااهههه
شوية تفاعل نزيدلكم بارت
YOU ARE READING
زواج اجباري _ باللهجة الجزائرية _
Romanceسامي شخص لا يؤمن بالحب متكبر مغرور يدير شركات كبيرة ماذا سيحصل عند زواجه بالبنت التي ستغير حياته الين زواج ورق لمدة اشهر هل سيستطيع ان يحب كل شخص الطرف الاخر في هذه الفترة تابعو الكرونيك
