مذكرات القدر

البارت الثاني

بسرعه رحت وحضنتها اول مره احس بحضنها دافي وحنون وهاي اول مره تحضني دائما جانت تضوج مني بسبب ماما ومجنت اصلا اتقرب يمها
بستها وطلعت من يمها واني فرحانه حسيت وصية بابا انو اكمل دراسه ولازم انفذ وصيته

صار المغرب التمينا كلنا عالعشى لاول مره شفت بيبي تبتسملي جنت كاعده بعيد عنها بطرف السفره
اجو كلهم
من طبعنا انو لمن نجي ناكل محد يحجي جدو يضوج لازم نبقى ساكتين ومنتقشمر ونسوي حركات سخيفه
بقينا ساكتين وبس صوت الخواشيك ترن
شويه وحجت بيبي
سعاد: اكوول يا ابو كريم عندي موضوع وطالبته منك
حسين: كولي ياام كريم شني الموضوع
سعاد: ماريد أي معارضه
حسين: اي اذا شي معقول تأمرين امر
سعاد: مايأمر عليك ظالم ياابو كريم بس رايده منك هالطفله بنت محمد تكمل
حسين: شتكمل؟؟؟
سعاد: اريدها تكمل تعليمها
كريم: شنو يمممه شكاعده تحجين
سعاد: اي اريدها تكمل تعلميها شكو بيها
كريم: يمه تدرين بناتنه احنا من السادس ابتدائي ويبطلن اذا مامشو بالدراسه وهياته كدام عينج رسبت
سعاد: شكو بيها جانت ضروفها صعبه ومامشت
كريم: لااا يمه لاا هيان نص بناتنه مطلناهم من السادس لان مامشو شني نسوي تفرقه بينهم
فردوس: تريديها تكمل وتصير من بنات الجامعه ناقصها بنت عذراء أفندي
طيبه: خيه ام نور شهل حجي عيب
فردوس: ليش شكلت قابل مو امها اسمها عذراء اصلا زين من عدنا مبقييها يمنا ماذبيناها ببيت جدها

الدمعه اجت بطارف عيني انحمست اهواي دائنا يسموني بنت عذراء وادري بيهم كاعدين يستهزئون
نزلت راسي عالصحن حتى لايبين دابجي حسيت بيبي داتباوع عليه
وحجت بس بصوت اشبه بالعصبيه
سعاد: لج فردووووس احترمي روووحج لا وحق الله هاي النعمه الي دتاكليها هسه اطلعها عامص لامص من خشمج افتهمتي هذااا بيت جدها من يكون بيتج وكتلها احكي منو يبقى ومنو يروح منه افتمهتييي مدامني اني وجدها موجودين وعايشين معناها محد اله حكم بهالبيت غيرنه من نموت وكتها تصرفو بكيفكم
احمد: بيعد الشر عنكم يمه شهل حجي
كريم: يمه شبيج كبيتي عليها هيج تره محجت شي غلط
فردوس: لااا شووون صارت حبيبة كلبها بنت عذراااء بنت الرااهبه
سعاد: لج فردووووس كتلللج احترمي روووحج لا اتصرف غييير تصررف وياااج
كريم: يممه شجااج ليش هيج تحجين وياااهااا
سعاد: ضب مررتك احسن ما اني اضبها

تعصبت خاله فردوس وكامت بسرعه من السفره كام لحكها عمي كريم
حسين: يا ام كريم حجيهم صح تره احنا من زمان كايلين الي ميمشي بالدراسه يبطل لو جان صف سادس ثانوي وهيان حفيدتج نور بطلناها من هيا وصغيره وكبرت شنو هيج نسوي تفرقه بينهم
سعاد: بس قدر صارلها ضروف ومكدرت تدرس زين خلي ببالكم هالشي انو طفله وفقدت ابوها وامهغ شون تريدها تعرف تدرس
حسين: والله مادري شكلج
سعاد: لدكول شي اني البارحه شفت محمد وليدي بالحلم وموصيني عليها ومستعده اني ادير بالي عليها واربيها
احمد: مادام يابوي خويي المرحوم موصي امي عليها لعد نتوكل بالله ونفذ وصيته
حسين: تمام لعد اني موافق تكمل بس بشرط انو تمشي بالدراسه يعني مو تتعلم عالرسوب والكسل
طيبه: لالا قدوره شاطره وحتمشي بالمدرسه عمي لتشيل هم مو هيج قدر