بعد ما تلاقينا 💔

الجزء 12

روايه #بعد_ما_تلاقينا

حلقه 12

جتني اضافه من ايميل مكتوب بالانجليزي مزغرف معرفتش نقراه فوته مبيتش ندوره 🤷🏻‍♀️🤷🏻‍♀️

شويه تانيه توصلني منه مسج عالخاص خشيت فتحتها نلقاه كاتبلي 😳
انت اروى والا ؟؟
انا : ان شاء الله 🤷🏻‍♀️ مني معاي ؟
المجهول : انا منعرفكش والا انت تعرفني بنقولك ديري بالك علي روحك بس وردي بالك كويس
كيف بنرد الايميل دارلي بلوك 😳😳
ضبحت علي ايه وايات وقتلهم تعالو شوفو 😳

انصل بيا علاء وقالي تعالي هدرزي كسدت 😫
انا : باهي اهو نازله اصلاً عندي شن بنوريك 🤷🏻‍♀️

نزلت لي علاء في شقته وهدرزتله الي صار بيني وبين انس كله وبالتفصيل الممل وهو كله ادان صاغيه 😌

علاء : تبي رأي انا 🤷🏻‍♀️
انا : مالا علاش نهدرزلك 😩
علاء : قوليله كانت تبيني وتحبني تزوجني 🤷🏻‍♀️
انا 😳: والله مانقدر نقولها 😳
علاء : انا ولد ونعرف الاولاد 😒 كان تبي تعرفي ميته وين تصب بجديات قوليله هكي 🤷🏻‍♀️
انا : كيف بنديرهاله باه 🤷🏻‍♀️
علاء : مش هو يحبك وميقدرش يخليك ويدير اي شي علي خاطرك خلاص قله منبيكش دير شي الا انك تجي تكلم بابا 🤷🏻‍♀️
انا قعدت حايره ومرديتش علي علاء
علاء : متفكريش هلبا ومدوخيش راسك ابعتيله توا وشوفي ردت فعله وانا علي اساسها نقولك شن 😌
انا : لا توا مش حنقدر نبعت خلي نفكر شويه فيها
علاء ؛ باهي ياستي زي ماتبي شن قلتي بتوريني حقا 😌
انا : شوف الايميل هدا 😳
علاء : هدا اسم بالفرنساوي 🤷🏻‍♀️
انا : شوف شن باعتلي 😳
علاء : تهديد هدا والا شن 😒 هاتي ندور عليه بايميلي ترا
خدي علاء وقالي الايميل فاضي مافيشي شي 🤷🏻‍♀️
انا : شني هدا زعمه 😫
علاء : منعرفش تو نزيد نتاكد منه ونقولك 🤷🏻‍♀️
انا : عندك الموضوع وانا خلي نروح خلاص بنطيح علي وجهي بنرقد 😩
علاء : باه من الصبح وانت لوك لوك محصلتش معاك كلمه 😒
انا : شن تبي تقول مبردك هدرز اهو نسمعلك 😫
علاء : بري درقي وجهك توا خلاص 😒
انا : ايااااه والله ماراكبتها لين تقول شن في 😒
علاء : نوضي ديريلي طاسه قهوه وتعالي قعمزي باش نهدرزلك ☺️😌
انا : نقوله ماعنديش جهد يقولي ديري قهوه 😒
علاء : نبيك ديري قهوه باش تفيقيلي ونعرف كيف نهدرزلك 😒
انا : باهي تعالي سايرني لي الكوجينه 😒
درت القهوه وقعمزنا
انا ؛:هيا ياسيدي احكي 😩
علاء : انا معجب بي بنت وهدا من النادر باش يصير 😫
انا : باهي كلمها 😳
علاء : منقدرش 🤷🏻‍♀️ نتحشم اول شي وتاني شي سكرته الموضوع من بعد هديكا القصه وخايف 😩
انا : نكلمهالك انا 😌☺️
علاء : عليك نووور نبيك تكوني وسيط ☺️
انا : باهي من هيا و وين عايشه وشن اسمها احكيلي عليها اكتر 😌
علاء : ماعندي مابنحكيلك عليها 😩
انا : علاش وكيف بنكلمها مالا
علاء : ماهو تعرفيها انت 😅
انا : من وين نعرفها 🤷🏻‍♀️
علاء : ايات ياوديي 😅
انا .: 😂😂😂😂😂😂😂 تبصر انت ، ايات نقولها في ولد يبي يكلمك لما تشد تعطيني طريحه 😒
علاء : وانا هدا علاش نبيها 🤷🏻‍♀️ انا نبيك تقلها حاجه بس كان نتقدملها توافق عليا والا لا  ؟؟ منبيش علاقه انا خاش بالحلال 😀
انا فرحت الحق علاء الف بنت تتمناه ولد عاقل ورزين و مش بتع دوه فاضيه و واضح عليه ولد ناس
انا : شن بنقولك انت تعرف ان مدا بيا بالنسبه ليا انا 😌 لكن نشوفها ونقولك من عيوني يابونسيب☺️😌
علاء : طول بونسيب 😂 غير شاوريها بعدين ساهل 😀
انا : توا نقدر نروح والا بنرقد عندك ويجو يشدوني يديرولك قضيه دعاره 😂😂😂
علاء : ميكتبهاش التاريخ عليا يامعفنه حتى يشدوك معاي يقولو شوره مسحور مش حيصدقو 😂😂😂
انا : هيا درق وجهك باي 💋
علاء : نبي نسمع حاجه تفرحني اه مش دوه وخلاص 😩 اقلبي وجهك اطلعي هي 😒