حب من فجوة الضلمات

البارت الخامس والثلاثون

مر اسبوع وماكو شي جديد كل يوم ايهم يخابر صح صار عندي عادي احجي ويا بس لسه ماعندي اي شي اتجاهه اجه مره وحده بس من طلعتله رجعت الرجفه بيه وجسمي ثكل مع انو لابسه الحرز لمن راح رجعت طبيعيه

ويوم يجر يوم الحد مصارن شهر كامل كل مايجي ايهم كمت بس اسلم واطب من اكعد يمهه اتخربط حيل جسمي يكوم ينغزني وكلبي يوجعني حيل

رجعنه مثل اول يوم خطوبه النه والبارحه جانت دورت سنه بابه مرت سنه كامله من حياتي من اصعب سنين عمري جانت سنه ٢٠١٧ كد مااحاول انسه الصار بيههه بس مستحيل انسه

اليوم ايهم اجه وكعد ويه عمامي واافقو الخميس الجاي هوه العرس صار كلشي بسرعه بسرعه
ماافتهمت اي شي امي تطلع جهزني وكل ماتكلي كومي وياي ارفض كل مايجي طاري العرس تصير غصه بكلبي

مر الاسبوع بسرعه واليوم اربعاء الحنه مالتي نفسي مااعرف شلون مرت الايام بس خوفي جانت خاف تنعاد كسرتي ومثل قبل افرح بس الفرح يتضاعف الاحزان

كلهه جانت فرحانه اله اني شكلي تعبان حيل كعدت والهوسه بالبيت الجهال صوتهه لوين واصل اول ماطلعت من غرفه بيبتي الكل اجتمعن عليه صارت الساعه ب٢ كالو هم يالله ترحين للصالون

اخذني مريم وامي تقى امهه ماخلتهه تجي وغدير رجلهه ماراضي لان حامل رجعت ذاكرتي بيه اليوم حنتي من كرار هم جنت بهاذه المكان وكلهه فرحانه

نزلت دمعتي هم راح يجي يوم واكدر اتجاوز العشته بهاي السنه الكامله هم راح اذكر هاي الايام واكول فتره وعدت كل هاي الافكار وجانت ام الصالون مبلشه بيه

صارت بالاربعه خلصت اجه عمي صادق اخذنه كل هاذه الصار وهوه ماتغير اخذنه من الصالون وهوه ينتر علينه اريد اصعد مااكدر عتني حيل وطببني شكد نهضمت من هاي حركته

بمكان ما يكون مكان ابويه ويحسسني انو هوه ابويه جان معتبرتي من اكبر اعداءه وصلنه للبيت وصاير هوسه طببوني وكامن البنات يركصن وبده حجي النسوان الي مايرحم

بس اكثر حجايه غثتني جانت من وحده تكول الله اعلم يجوز من جانت مزوجه وهيه تعرفه لهاذه رجلهه هل اول ماترملت اخذهه

اجه ايهم حناني بس من صار قريب مني حسيت روحي تنذبح من جوه بس اريده يخلص ويطلع ايدي كامت ترجف حيل واحس كلبي يريد يوكف انتبه عليه

ايهم:- شبيج جوري مضايقه من شي

جوري:- لا لا ماكو شي

ايهم:- شبيج ترجفين بيج شي مريضه

جوري:- لا بس راسي كام يوجعني من الهوسه بس

سكت بس حسيته مامقتنع بلي حجيته بقه شويه وطلع وره كم ساعه خلصت الحنه الي بقو يمنه وباتو والي رجعو لبيوتهم

اني ماعولت تخلص علمود اروح الغرفه بيبي اريد ارتاح حيل تعبانه طبيت الغرفه بيبي بدلت ونمت كعدت عله صوت بيبي تصحي بيه