كرونيك بعنوان 😈😈#احببت_من_قالوا_عنها_اختي

36

36 فات النهار في دقيقة ليث تعب و هو يحوس و والو جا رايح للبار مبعد تفكر بلي وعد يماه يبات عندهم نسف بقوا وراح مابغاش يبات لثم بغا يبات وين كان عايش مع صغرونتو احلى ايام حياتهم ، بصح حتى والديه لازم يطل عليهم قصر في حقهم بزاف عاش 15 سنة بعيد عليهم و دوك عايش قدامهم و حارمهم من روحو ، دخل لقاهم يسناو فيه باه يتعشى معاهم و يماه فرحانة الدنيا ماش سايعتها ، سلم عليهم و قعد ياكل معاهم مصطفى : مكان حتى جديد على ايلول ؟؟ ليث : مكانش قلبت الدنيا و مالقيتها مصطفى :وين عندها تروح الطفلة صغيرة ماتقدرش حتى تسافر وحدها ليث : ماعلاباليش بصح انا لي محيرني شكون لي حكالها شكووون صح ماكنتش رح نخبي عليها بصح كنت نسنى فالوقت المناسب باه نقولها هوما يحكيو ولالة فاطمة تشوف معاهم و ابتسامة على وجها و ساكتة ، بعد ماكملو العشا فاطمة : يا وليدي راك تكون تعبت روح لشامبرتك ترقد راهي مزالت كيما هي و غدوة الصباح زيد افطر معانا باه نحكيو كثر و نملي عيني بيك شوي ليث : ههه ادلل يما ماعليش غدوة نزيد نفطر معاكم هيا دوك تصبحو على خير طلع ليث بصح قبل مايروح لشامبرتو راح لشامبرتها دخل لقاها كيما خلاها ريحتها مالية الشمبرة حل خزانتها جبد قشها يتلمس فيه هز تصويرتها لي فوق بيروها كي كانت صغيرة طبع عليها بوسة نزلت معاها دمعة زرب مسحها و تاض هز تريكو تاعها و خرج رايح لشامبرتو ، حل الباب و دخل حتى هي مزالت كيما خلاها سكر الباب دار يتأمل فيها مبعد لفت انتباهو عبد راقد في سريرو و متغطي راح يشوف شكون قاعد يقرب بالشوي و قلبو راح يحبس من الاحساس لي حاس بيه احساس عندو 3 شهر ماحسوش ريحتها ايه هاذي ريحتها لي ماشية و تقوا يمشي و كل مايقرب الصورة توضاح اكثر ماوش مصدق بلي راهي قدامو صغرونتو قدامو بشحمها و لحمها راقدة كي الملايكة و ماش حاسة بيه ماش حاسة بالنار لي شاعلة فيه نار الحب الشوق الرغبة كلش تخلط عليه معادش فاهم اذا هي صح ولا راهو يتوهم ، وقف قدامها هز يدو يمشي ويقربها لوجها يقرب فيها و متردد فرد وقت خاف لايكون هذا حلم خاف تكون سراب و دوك تختفي كيما كل ليلة ، نبضات قلبو ولات مسموعة انفاسو ماشية و تعلى رعشة سرات في جسمو كي حط يدو على وجها ماهوش مصدق بلي ماختافاتش و مزالت راقدة قدامو ، قاعد يحاول يتمالك اعصابو و مايتلاحش عليها دوك يدخلها بين ضلوعو و يسكر عليها ، دموعو نزلو ايه ليث بكا مرة اخرى علاجال نفس الانسان علاجال حبيبتو لي هي الوحيدة لي شافت دموعو قاعد يبكي من قوة المشاعر لي راهو يحس بيهم