طلعوا مع بعض وركبوا السيارة ..وهم راجعين خذاهم بندر
لطريق غير عن طريقهم ،، ماعرفوا وين رايح بس سحر
حست وعرفت وين رايح..
سحر بقلق : بندر سلامات ؟؟
ابتسم لها بالمراية لأنه حس انها عرفت : الله يسلمك ..
مشاعل : وش السالفة على وين رايح بندر..؟
بندر : المستشفى ..
مشاعل بخوف : ليش لهالدرجة ما تقدر تتحمل...
بندر : لا مافي شي كبير..تدرين ان معي فقر دم
والفيتامينات اللي عندي خلصت امس..
ومابي اخذ جديدة من غير تشخيص..
دخلوا بوابة المستشفى ووقف بندر السيارة ،
ويوم نزل التفت لهم : شوي وراجع ماراح اتأخر..
شادن بعطف يجاري عطف الأم أحيانا :
خذ وقتك بندر .. بننتظر لو ساعتين ما ورانا شي
ابتسم بندر لهالانسانة اللي مافي مثلها بالوجود ..
انسانة راقية عطوفة بكل ما تحمل الكلمة من معنى ..
قال بكلمات واضحة مو قادر يخفيها : نفسي يوم اشوفك قاسية..
انقلب وجه شادن مو فاهمه..حتى سحر ومشاعل ما فهموا ..
وبندر كمل بابتسامة وهو ماسك الباب :
ما ادري اذا عمر يستاهلك بحق ولالا..هو فيه أحد يستاهلك يا شادن ؟؟؟
احمررر وجهها من طاريه ، وبندر من رمى هالكلمتين سكر الباب
وراح داخل المستشفى... حطت شادن يدها على صدرها
من طاري هالاسم... له تأثيييير عجيب عليها
مشاعل : يا حبي له بندوره.. اذا صار حنون مافي مثله يصير..
سحر طالعت شادن وشافتها ساكتة ومنزله راسها..
شادن من جهة سررحت والظاهر انها بدت تفكر في عمر..
مر عشر دقايق ومشاعل تتأمل بالمستشفى ،
سألت بابتسامة : اذا ما غلطت يا سحر هذا هو المستشفى
اللي يشتغل فيه خالد !؟
سحر بابتسامة : ايوه هو..
لانت ملامح مشاعل ، وفجأة فتحت الباب ونزلت ..
سحر : وين رايحة يا خبلة ؟؟
مشاعل : ودي ادخل اشوف المستشفى من داخل...
ومرة وحدة تسلمين على خالد..
سحر : وقت شغل الحين مو فاضي لنا يسلم...
تلقينه في غرفة العمليات ولا معه مواعيد مع المرضى..
مشاعل ما اهتمت مدت يدها وسحبت سحر : تعااالي اقولك ..
شادن من قدام : مشاعل على وين ان شاءلله..؟
مشاعل وزااادت حماس : دقااايق وراجعين مارح نتأخر..
خلي بيان عندك أوكي؟؟؟
وسكرت الباب بقوة وسحبت سحر معها .. دخلوا المستشفى ،
كان راقي بصراااحة وبااارد ...
مشاعل : اجل دكتور حياااتي يشتغل بهالمكااان الراقي...
اكيد الراقي للراقي واللي مثله هذا مكانه << تكلم نفسها..
بندر طلع من المصعد للدور الثاني ومشى لين وصل لوحدة
من الأبواب المسكرة.. دقه بهدووء وفتحه ،وطل براسه
وشافه منزل راسه يقرأ بوحدة من الملفات...
بندر : سلام يا دكتور ..!
رفع خالد راسه وابتسم بحلااوة : بندر! هلااا والله ...
قرب بندر وجلس عالكرسي .. وخالد بخبرة الطبيب لاحظ ان وجهه
مو طبيعي : بندر ؟... شكلك مو طبيعي ؟
بندر بابتسامة عذبة : ما يفوت عليك..
خالد : اكيد انت ناسي اني دكتور..اعرف ان فيك شي من نظرة وحدة..
بندر : ابد يا ولد عمي .. ابي تشخص لي أدوية لفقر الدم..
خالد وهو يسكر الملف وباهتمام : والأدوية والفيتامينات اللي عندك ؟
بندر : الفيتامينات انتهت.. وآخر موعد مع الدكتور حقي يقول ان كريات الدم عندي ارتفعت وتحسنت عن اول .. بس اليوم حاس اني تعبان..
خالد : يعني تبيني أكشف عليك ؟
بندر : انت دكتور وأخبر..
خالد : ما نمت البارحة ؟؟
بندر : تبي الصراحة خذيت لي كم ساعة نوم...
بس اضطريت ارجع للبيت لأن خواتي كانوا يبوني..فت نومي وجيتهم..
خالد بضيق : انت وش حادك جالس لحالك هناك محد حولك..
خلك مع اهلك لو صار لك شي يكونون جنبك
بندر : لا تكبر الموضوع كلها فقر دم وانا مداوم على ادويتي والحمدلله.. وآخر موعد مع دكتوري قالي اني متحسن بكثير ونسبة كريات الدم
مرتفعة بشكل كبير..
خالد : الحمدلله.. ليش جيتني اليوم وانت عندك دكتورك
اللي يعرف تفاصيل حالتك
بندر : يقولون ما خاب من استشار... وانت ولد عمي ومارح يضر
لو خذيت العلم منك... ومرة وحدة اجي اسلم عليك
ابتسم خالد وقام واقف وهو يحط السماعات حول رقبته : الله يعيني عليك
لا قمت تتدلع.. قم اشوف عالسرير بكشف عليك بس مو ببلاااش ها ...
بندر : هههههههههه الله يخسك ليش اجل ولد عمي .. ولد عمي عالفاضي..
خالد : وبعد المستشفى يا حبيبي مو ملكي.. اذا صار لي ذيك الساعة ابشر..
بندر وهو يقوم للسرير : هههههههههههههه اوكي لا تخاف حقك بيوصلك ..
مشاعل وسحر واقفين تحت عند الريسبشن بحيرة..
مشاعل بدت تتأمل وجوه الدكاترة اللي يمرون عليها
وأي واحد لابس البالطو الأبيض.. تتفرس فيهم واحد واحد لعل وعسى يكون خالد واحد منهم...
مشاعل بعد احباط لأنها ما لمحت خالد : سحور روحي اسألي عنه ..
حرام أوصل لهنا وما اشوفه..
سحر : مشاعل اندفاعك كذا بيتعبك.. خفي على نفسك الله يخليك
انتي اللي بالنهاية بتتعورين
مشاعل وهي مو راضية تسمع أي كلمة من هذي ، وبضيق :
كم مرة قلت لك لا تعيدين هالكلام...
ما اقدر يا سحر خالد ماخذني من أولي لآخري ..
سحر : انتي اللي معطيه لعواطفك الحرية انها تسترسل ..مو كابحتها
مشاعل : لو اكبحها خالد مارح يعرف ..
بس كذا يخليه يعرف وما اروح من باله ويكون عنده خبر انه يهمني..
( وهي تشوف سستر توقف عند الريسبشن تتكلم )..
روحي ارطني على هذي اسأليها عن خالد..
استسلمت سحر وراحت للريسبشن : اكسكيووز مي !
التفتت لها السستر : يس..
سحر : can you tell me where Dr.Khaled is ?
السستر ابتسمت حتى الموظفة اللي ورا الريسبشن ابتسمت..
الظااهر خاالد له مكانة وتقدير عندهم ..
السستر : in the second floor.. room n# 15
انشرحت مشاعل والتفتت لسحر : تقول بالغرفة رقم 15
سحر : ايه في الطابق الثاني..
في مكتب الدكتور خالد..
فتحت السيستر الستارة ونزل بندر من السرير..
وخالد راح لمكتبه وجلس وهو يطلع قلمه : كل شي فيك طبيعي
لو التعب اللي فيك بسبب فقر الدم كان نبضات القلب مو طبيعية ..
لكن الضغط طبيعي ، دقات القلب طبيعية ...اظن ان اللي فيك ارهاق
روح للبيت الحين وكل لك ملعقة عسل وحط راسك ونم
ومايكون فيك الا كل عافية..
بندر : ما احتاج لفحص الدم..
خالد : لا..اذا تبي جب لي نتايج فحوصاتك الأخيرة أشوفها... الحين خذ لك هالفيتامينات واستمر عالادوية اللي عطاها لك دكتورك..
ولا تصير موسوس مافيك شي
بندر : هههههههههههههههه ادري ما فيني شي...
بس تدري ما جيت اليوم الا اني مشتاق لك..
خالد طالعه بنظرة : المهم مثل ما قلت لك استمر عالفيتامينات
اذا تبي تسترد صحتك ويروح فقر الدم..
بندر : ان شاءلله يا دكتوووور ..
قام بندر وطلع وراح للمصاعد وضغط عليها .. فتح المصعد ودخل ،
بالوقت اللي طلعوا فيه سحر ومشاعل من المصعد اللي جنبه ..
مشاعل : روم 15.. روم 15 .. روم15 ..
راحوا للجهة المعاكسة .. مشاعل وهي تقرا : غرفة 17.. غرفة 18... غرفة 19 .. غرفة 20
تنطق بكل رقم وهي تتلفت يمين ويسار...
سحر : مو هنا.. شكل 15 من الجهة الثانية مشاعل...
التفتت مشاعل وتوهم بيمشون الا وقف قلبها وهي تشوف انسان لابس الأبيض يطلع من وحدة من الغرف وهو معطيهم قفاه ..!!
يشبه خالد من ورا..!
سحر : مو كأنه خالد ؟؟
مشاعل : قلبي يقوله..
شافوه يروح قدام ، تمنت مشاعل لو يغير طريقه ويمشي ناحيتهم
عالأقل تكحل عيونها من شوفته.. شافت وحدة من الدكتورات
تطلع من وحدة من الغرف.. وتناديه باسمه : " دكتور خالد "
وقف خالد لها وهي قربت منه تبتسم ..
شببببت مشااااعل خييييير مين هذي...
د.خالد : هلا دكتورة..
مشاعل أي شعور داخلها ما اقدر اوصفه.. شعور قاتل يعذب !!
يسيطر على كل ذرة فيها .. الشي اللي يقهر اكثر شي هو قربها الشديد
من خالد وابتسامتها القوية بوجهه ، وبنطلونها الضيق...
خير يا عالم وين احنا فيه !!!
ودها تعرف وش يسولفون فيه ، ليش هالضحكات المتتالية ،،
لا يكون خالد قاعد ينكت...!
سحر حست بعصبية مشاعل :
مشاعل خلينا نرجع أكيد بندر راح للسيارة..
مشاعل : ماني رايحة قبل لا أفقع عيون هالوقحة..
سحر : الحمدلله وشو تفقعين عيونها.. هذي دكتورة وبينهم زمالة اكيد..
مشاعل : ليش تضحك بوجهه كذا..
سحر : من وشو غيرانة يا خبلة..خالد مو راعي هالحركات تعرفينه ..
طالت وقفتهم ومشاعل مو راضيه ترجع قبل لا تروح
هالدكتورة وتفارق عنه.. بس طال وقوفهم والظاهر ان السوالف خذتهم ..
مشاعل بمثل هاللحظات تنسى عمرها وما يهمها شي..
قامت ونادته : خاااااااااالد...
خالد وهو يسمع للدكتورة عقد حواجبه والتفت لورا شاف
بنتين واقفات شكلهم يطالعونه ،
مشاعل دفت سحر قدامها وهي تهمس : روحي سوي نفسك
انتي اللي ناديتيه..
سحر : وربي انك مجنونة ...( رفعت عينها لأخوها )خالــد...
خالد باستغراب : سحر؟؟؟
قربت سحر منه ومشاعل وراها عيونها عالدكتورة تفصفصها
من فوق لتحت بنظرات نارية .. وخالد قرب منهم باستغراب : سحر؟؟
سحر : ايه.. شخبارك ؟
خالد مستغرب : بخير.. ليش جاية فيك شي...( تذكر)مريضة؟؟..
سحر : لا مافيني شي... بس مريت عشان اشوفك
خالد : تشوفيني ؟
سحر تلعثمت بأي مبرر الحين تبرر له.. واضح لها انه متضايق من جيتهم .. طبيعي الوقت وقت شغل مو فاضي لها : آآآ... تبي الصدق كنا جايين
مع بندر ومرة وحدة قلت اجي اشوفك..
رفع خالد عينه وعرف ان هذي مشاعل : هلا مشاعل ..
مشاعل ابتسمت : هلا .. اخبارك دكتور خالد ..
خالد : تمام... بندر له وقت طالع من عندي..
جت الدكتوورة وسألت : معارفك يا دكتور ؟
خالد : ايه اختي سحر وبنت عمي مشاعل ..
الدكتورة : ما شاءالله ... يلله عقبال ما تصيرون دكتورات عندنا،
بس بشطارة الدكتور خالد اكيد..
مشاعل وهي ودها تخفس عيونها ،
ردت بجرأة من غير اهتمام بوجود خالد : ايه ان شاءلله..
مين مايبي يصير مثل الدكتور خالد...
خالد تنهد وفرك عيووونه من هالبنت العنيدة اللي قدامه
ومن مغزى كلامها الخفي... لمتى يا مشاعل لمتى ؟؟
اما الدكتورة ضحكت : ههههههههه أوه أتاري يا دكتور المعجبات كثار..
مشاعل جت بترد ولأن خالد عارف لسانها وتصرفاتها اللا مسؤولة قاطعها :مشاعل بس...روحوا الحين بندر اكيد ينتظركم...
سحر عرفت ان خالد منزعج فالتفتت لمشاعل : خلينا نطلع ..
مشاعل طالعت خالد اللي كان صاد عنها .. واستدارت رايحة،
والتفتت لسحر وهي تمشي وقالت بصوت مسموع عشان يسمعه خالد :
هذا اللي تقولين وقت شغل وهو داق سوالف مع هالاشكال..
سحر بعصبية : اووص لا يسمعك ..
مشاعل : خليه يسمع.. عاجبته يعني هالاشكال ما يخاف اهله ياخذون عنه فكرة غلط اذا شافوه يضحك ويسولف مع هالاشكال الواطية
خالد من ورا كان يسمع وهو مغمض عيونه بحلم ،
كلامها أحرجه قدام الدكتورة..
اما الدكتورة تضحك عاااادي : هههههههههههه
اوه يا دكتور لا يكون البنت تغار..
خالد ابتسم يلطف الجو : هالبنت طايشة يا دكتورة لا تاخذين في بالك..
سمعتهم مشاعل وصدت بترد .. فيها عصبية ، البراكين داخلها ثة ..
لكن سحر ما سمحت لها سحبتها وهي تصر على اسنانها : مشيعل بسسسسسس.. ترا خالد للحين وماسك أعصابه..
خالد التفت للدكتورة : عن اذنك...
التفتت سحر ورا شافت خالد يرجع لمكتبه بعد ما عطاها نظرة صنمتها .. رجعت لمشاعل مفولة : يا حمارة خالد معصب..
مشاعل : يعصب بالطقاق.. أجل ما يخاف على سمعته ..
سحر : مشييعل انتي عارفه انه المستشفيات مليانة بهالناس..
وكونه يكلم دكتورة مافيها شي زميلته بالمستشفى
احتكاكهم مع بعض شي طبيعي ..
مشاعل بقهر : يتكلم ويناقش اوكي لكنه يضحك وينكت مع هالاشكال...
سحر : اقووول مشيعل اذا تبين خالد لازم تتقبلين حاله..
ولا عمرك ما بتحصلينه
طلعوا من المصعد الا شافوا بندر واقف عند البوابة ويطالعهم معصب ..
بندر : خير ان شاءلله انا انزل وانتوا تطلعون فوق .. وين ذالفين؟؟
مشاعل بلا مبالاة .. بعذرها الصورة اللي شافتها فوق راسخة في بالها :
كنا خايفين عليك لحقناك نبي نعرف وش فيك..
بندر : يلله قدامي .. لو متأخرين دقيقة كان رحت..
××××××××××××××××××
بطريــق الرجعة ولأن زحمة الرياض بيوم الخميس لا توصف..
هدا الجوو في السيارة وسكن.. بيان حطت راسها على رجل سحر وناااامت.. ومشاعل شكلها تعبت بعد حطت راسها على النافذة
وشكلها غافية.. سحر اسندت راسها للمسند وراها وما تسمع
غير صوت شادن تسولف مع بندر... صارت الساعة 11 ..
أخيرا وصلوا لبيت ابو خالد ..وهناك شافت سحر من بعيد
سيارة غريبة وانسان غريب واقف عند الباب..
تركي التفت للسيارة وهي توقف عند البوابة،،
صحّت سحر بيان وعطتها حوض السمك ونزلوا...
شافته يلتفت لها لحظة ويرجع يدق الجرس ..
على انها ما تعرف ملامحه الا انها عرفت انه هو نفسه
اللي شافته عند ال قبل اسبوع..
سحر وهي ماسكة يد اختها الصغيرة : نعم..؟
تركي وهو يطالع باب البيت العريييض : أبي ابو خالد..هو طالب يشوفني ..
سحر طالعته من فوق لتحت بسرعة.. ما تدري وش شعورها هاللحظة
رجع احساس الغرابة يعتليها الرجال شكله أكثر فقر من ما تصورت !،
حتى بالليل كان لابس نفس الكاب اللي كان لابسه ذاك اليوم ..
وهيئته تبعث عالعطف.. بس ليش تحس ان فيه شي يناااقض
هالذل والبسااطة..!
ملامح وجهه مو واضحه رغم الإضاءة القوية بهالحي الا ان الكاب
كان راسم ظلااال على وجهه... فضوول في سحر ودها تعرفه..
مرتين شافته لكنها للحين ما قدرت تميز ملامحه..
سحر : تبي منه شي؟؟
تركي وهو يطالع في بيان اللي كانت نعسانة ومايلة بوقفتها على اختها :
هو اللي يبيني ..
سحر وجتها الفرصة عشان تعرف اسمه : مين أقوله ...
رفع عينه لها بنظرة شمووخ ما يقدر يخفيه ،
ونطق حروف الاسم بثبات ووضووح : ولـيـد..!
رسخ الاسم في بالها على طول وكررته.. "وليـد ؟؟"...
أول مرة تسمع بهالاسم يشتغل عند ابوها
تركي يوم لاحظ انها طولت بوقفتها .. قال بهدوء : بتطلبينه لي ولا أرجع..؟
سحر استوعبت وتحركت للبوابة : ما عندك تلفون ؟..
عليه أهون من انك تنتظره
تركي وشكله قرفاااان يبي يرتااح طول النهار وهو يلف :
هي كلمة ورد غطاها.. بتنادينه ولا اروح اشوف شغلي...
رفعت حاجب وش هالنفس المعفنة !!
ناظرته باستغراب هذا جزاي اللي ما أبيه ينتظر..
اسلوبه يأكد انه نفسه اللي فيها ذاك اليوم،
من يحسبني هذا بأي حق يكلمني كذا..
اذا ما تعرفني ترا انا بنت ابو خالد ولي نعمتك يالمنتف !!!
استغربت من نفسه القرفااانة والواضح انها واصله لـ خشمه..
بس على طول عذرته وهي تشوف التعب واضح عليه وعلى هيئته :
أنا اقصد عشان ما تتعب من الانتظار ..لأن الوالد الحين يمكن يكون نام
شافته يرفع يده ويناظر ساعته : خلاص اجل عطيه خبر اني مريت عليه..
وبكل بساطة التف حول سيارته وركبها واختفى من عينها ...
غريبة أنواع البشر يا ناس..!!
من يكوون ؟؟؟؟
وليد ؟؟... أي بشر هذا اللي يشيل هالاسم ؟؟
بيان وتعبت من الوقوف : سحر ابي اناااام..
وعت من سرحانها ودخلت البيت.. ودت اختها لغرفتها عشان تنام
وعقب ما لحفتها وغطتها طلعت لغرفتها عشان تغير ملابسها..
اخيرا عرفت اسمه .. هالانسان الغريب اللي مو معطي اعتبار لها
انها بنت ابو خالد ، واضح عليه انه يحترم ابوها
من مكالماته وطريقة سؤاله عنه..
قررت تسأل ابوها عنه بأقرب فرصة.. سؤااال واحد تبي تعرف جوابه !!
هالانسان البسيط اللي الفقر يشع من كل شي فيه .. وش جابه لأبوها
وش قصته؟؟.. فضولها يقول لها ان وراه قصـة ومو أي قصة...
×× ×× ×× ×× ×× ×× ×× ×× ××
الى هنـــآ انتهى الجـــزء
الحين لا تبخلون علي بانطباعاتكم عن هالبارت ^.^
حبي للجميــع ..!
"بليز عندي فضول اعرف كم اعماركم اشبعو فضولي♡"
