دائي و دوائي 🥀🖤 ( مكتملة )

الجمرة الحادية والعشرون

كالتله بخوف : شيل دشداشتك بسرعة ، اساور جيبي معجون بسرعة ، وهي تشيل بدشداشة حتى لا تلزك على الحرك ،،

حسن وهو اصلا عباله الجاي بارد ، بس من شالت الدشداشة عن رجل سجاد وشاف مكانهه احمر طفرله بسرعة : هاااااه ، هاي صدك وعلي عبالي الجاي بارد ردت بس ادمر دشداشتك ، تعال بسرعة خل اخذك للمستشفى لا تتلوث ،،

اساور وزهراء طفرن يمه ، واساور كامت تخليله معجون وزهراء تنفخ على رجله حتى لا يتأذة ،

سجاد يحس الحرك يسعر بكلبه ، ولا يكدر يصيح او يتألم كدامهن فحس كلبه يريد يطك ، ومن سمع حسن هيج يحجي حس بودة بس يريد يفرغ حركة كلبه باحد ، عاط بي بصوت مبين علي انو جاي يتألم : حسسسسن ، انت يمته تكبر يمته تبطل هاي سوالف الجهال مالتك ، يمته تكبر يا جاهل عبالك من نضحكلك على سوالفك يعني حلوة سوالفك ، شوية اكبر صير رجال الى متى تضل مثل الجهال بتصرفاتك وحجيييك يازعطووووط ، امشي منا كلشي ما اريد منك ، بس انكلع عن وجهي ، مااريد اشوفك ،،

حسسن ، كلام سجاااد اذى حيييييييييل ، وحسه شلون سجاجين وكل كلمه تطعن كلبه ، والاذى اكثر انو كام يصيح علي كدام البنات ، وهو ما جان قصدة انو يحركة بس راد يدمر ملابسة ،، ما تحمل يبقى واكف طلع بسرعة راح لغرفته بسرعة كعد على الجرباية وكام يتذكر بكلام سجاد ، ونزلت دموعة ،،

بالمطبخ ،، اساور من سمعت كلام سجاد عرفت انو قسى علي هواي لان هو حسن تدري كلش زين ما يكدر يأذي احد واكيد ما جان قصدة ،، وزهراء كذلك ضايجة حيل لان انتبهت شلون حسن بيين علي انو ضاج ،،

سجاد حس شوية الحرك هاد الالم مالته ، راح كعد على الكرسي حتى يمدهه ،،

اساور : ها شلونهه رجلك هسه ،،

سجاد ويحس الالم يلجم بكلبه ، لكن يكابر : لا يابة ما بيهه شي كله جاي ،،

نور بعصبيه : شنو كله جاي غير هستوني منزلته من النار ، واجه ذاك الزعطوط وكلبه عليك ،،

سجاد بعصبيه : نور احترمي نفسك ، لا تغلطين على حسن ،،

اسااور : سجاد انت تدري بنفسك قسيت على حسن بحجييك ، انت تدري كلش زين انو هو مو قصدة يذب الجاي وهو حار عليك ، وانت صيحت علي كدامنه ،،

سجاد هسه يلا حس على نفسه وانو شلون هيج حجة وي حسن ، تندم وكاللهه : اي والله صدك حجيبج يلا هسه اكوم اراضي ،،

كلمن رجع لشغله ، سجاد حس شوية الحرك مالته خف الالم مالته راد يكوم يصالح حسن ويراضي ،، دخل فيصل وهو عصبي : شني سالفتكم انتم من واحد يوديكم على شي ما ترجعون علي هاي انت وهاي حسن بالله حسن ما ينعتب علي انت شمالك ،، مو كتلك استعجلهن على الغدة ،،

سجاد كاله : على كيفك شبيك ، رجلي احتركت وما كدرت ارجلعكم ،

فيصل وهسه يلا انتبه لرجل سجاد اجاااه يركض وبخووف : هاي شحركك ، كوووم كوم بسرعة خل اخذك للمستشفى،،