فراغ ملاه بحبه لهجة عراقية وتتوفر فصحى على منتدى روايتي قلوب احلام

الفصل التاسع

#فراغ_ملأه_بحبه

النسخة العامية

كتابة رؤى صباح مهدي

الفصل –9

وصلت نهلة لبيت افخم من القبلة. واجهة 10 متر دبل فوليوم عالي باعمدة طويلة وفخمة وشبابيك جبيرة جامها يلمع والطرمة نصها كاشي فاخر ونصها تراب مزروع بي أشجار وورد وكراج بي سيارة فخمة لونها ابيض نظيفة تلمع. طببتها ام ماجد للبيت وطبت وياها والبيت جان بي بنات بس اقل من البيت الأول وانظف هواي منهن. مبينات مغيرات بشكلهن يعني عمليات نفخ وشفط وشعرهن مبين مصبوغ ومرتب واظافيرهن اكرلك وبي شوارفسكي لماع وملابسهن مبينة كلها من المنصور والكرادة بالوان شيك وبلا ترتر . شي كاعدات على القنفات وشي يطلعن من غرف ويطبن بغرف ونهلة ظلت صافنة ومرعوبة من المنظر. ام ماجد كلتلها:

"شبيك جنج ماشايفة ناس. تعالي عندي عميل مهم باجر ولازم احضرج "

جفلت نهلة من سمعت هالجملة. صاحت بام ماجد:

"شنو عميل مال شنو؟"

صرخت ام ماجد:

"عميل ما شنو؟ باجر تعرفين "

بعدين صاحت وهي تباوع على الحديقة الظاهر اكو سيارة جتي ورا سيارتها:

"نسمة؟؟؟ وين صرتي "

جتي نسمة تركض والظاهر نسمة المساعدة الخاصة لام ماجد والمدربة للبنات الجدد. باوعت نسمة لنهلة بنص عين وام ماجد انطت أوامر لنسمة:

"وديها لغرفتها الجديدة وبيها الملابس والحاجات الضرورية وشرحيلها طبيعه شغلنا وشنسوي باللي ميجر عدل ويانا... العميل باجر يجي وماريد خرابيط ترة هذا اهم عميل عدنا تعرفين أبو احمد بعد ... "

بهتت نهلة وعرفت من كلام ام ماجد ان النهاية قربت وان ام ماجد راح تستغل نهلة بشغل لا أخلاقي وطبعا هي بنية صغيرة وهواي يفضلون هذا العمر والله اعلم شراح يصير بيها باجر... باوعت على الباب تريد تشرد وام ماجد لمحتها تباوع علي الباب وصاحت بيها:

"ديري بالج تفكرين تشردين... الحيطان كلها كزازو الباب مقفولة واذا عديتي الباب والحيطان فالحارس ابسط شي يحط طلقة براسج ويعوفج للجلاب تاكلج"

بلعت نهلة ريقها وكامت ترجف. كالت لام ماجد وصوتها بالكوة يطلع:

"الله يخليج ام ماجد ترة اني بنت ناس واهلي معروفين ... كل اللي ردتة ابتعد عن بيتنا وابدي حياة جديدة بعيد عن مشاكل امي وابوية .... بس هذا اللي دتكولي مو ثوبي"

اقتربت منها ام ماجد وعصبت وشبكت حواجبها وبلا أي مقدمات صفكتها براجدي طيرتها لذاك الصوب. كالت الها ورة ما ضربتها:

"نفسج ما اسمعه... نسمة اخذيها وسوي اللي كتلج علي وبلا دوخة راس ترة ما فارغتلجن"

اخذتها نسمة لغرفة بالطابق العلوي صغيرة مبين قاسميها من الغرفة البصفها وبيها نفس اللي بالغرفة السابقة دولاب صغير ومن فتحته نهلة ورة ما نسمة راحت لكت بي ملابس الوان حلوة وراقية بس فصالات فاضحة كلها دلع وخفيفة وبلا ردان وبيها ملابس داخلية حمرة وبيها ريش واحذية كعب عالي سدت الدولاب مصدومة . كعدت على فراشها وصار ميز التواليت كدامها علي مكياج كلة ماركات ماك وشانيل وديور كلشي ممكن ينحط على الجسد وعطور فرنسية .. شهكت نهلة وعرفت الورطة اللي ورطت نفسها بيها وهسة ماكو أي خلاص. محد يعرف بيها هي وين عدا مينا ومينا اكيد من ورطتها جانت تعرف اللي راح يصير بيها وهي دافنته وية ام ماجد. كطعت عليها نسمة حبل افكارها السوداوية ودخلت بيدها لاب توب صغير. كالت لنهلة: