#فراغ_ملأه_بحبه
النسخة العامية
كتابة رؤى صباح مهدي
الفصل -3
باوعت عليها عتاب مفروسة من تصرفاتها. سكتت ما حجت وعدنان كللها لنهلة:
"ديلة لعد روحي بدلي لبسي ملابس شوية ..."
واشر على ملابسها لان جانت لابسة تي شيرت نص ردن وتنورة طويلة سودة وحاطة شال لو تشيلة احسن. كلتله :
"شبيها هاي الملابس؟"
جاوبها :
"متعجبني اوكي... بت عمتي كدام الناس تطلع نص ردن وملابس ضيقة؟ ميصرف هذا الحجي هنا واذا تريدين تطلعين, ملابسج لازم تكون مثل اللي نلبسنها هنا"
سألته وجدو صافي يباوع على عدنان وعليها:
"واذا ما قبلت ابدل شتسوي؟"
ضحك عدنان وجابها بكل اريحية:
"بكيفج لتبدلين ... بس قرري بسرعه لان اريد اروح اذا متريدين تجين حتى اطلع"
افتهمت من كلامه اذا متروح تبدل ماراح ياخذها ويا... باوعت على عتاب وفكرت اذا ما راحت راح يصير اللي أمها كالت علي وهي تريد تعاندها باي وسيلة. كالت اخرشي:
"اوكي بس ما اعتقد عندي شي مناسب"
جاوبها:
"انتظري هسة اخابر جنان دتجيبلج شي"
خابر جنان كللها على الملابس وورة دقيقتين جتي بيدها ملابس فضفاضة وعباية سودة أطول من نهلة. باوعت نهلة على الملابس وعدنان كللها:
"يلة 5 دقايق واروح شوية بسرعه "
راحت نهلة بيدها الملابس وبقوا عتاب وجدو صافي وعدنان وجنان بالحديقة. عتاب كالت وهي فد مرة ضايجة:
"هاي لو اني كايلتها روحي جان كالت اوووووووع"
وطولت بالكلمة وهي تقلد بتها فضحكوا كلهم وجاوبها صافي:
"دتعاند وياج. شفتها اني"
بعدين باوع على عدنان وكال:
"عدنان بوية دير بالك عليها وجنان روحي وياهم "
هزت جنان راسها فرحانة وعدنان واعد جدة يدير باله على بنت عمته.
جتي نهلة لابسه الملابس اللي نطتها الها جنان وتسحسل بالعباية لان جبيرة عليها. تبسم عدنان من شافها. شكلها حلو كلش بالعباية والشال اللي لابسته جواها بين دورة وجهها ولون عيونها. كال:
"يلة اذا جاهزات"
باوعت نهلة على جنان وافتهمت هي راح تجي وياهم. كلشي ما علقت على الموضوع. من طلعوا عدنان كللهم:
YOU ARE READING
فراغ ملاه بحبه لهجة عراقية وتتوفر فصحى على منتدى روايتي قلوب احلام
Romanceنهلة فتاة جامحة وعدنان شاب غيور.. من تريد نهلة تنحرف شلون راح يتصرف عدنان وية جنون المراهقة وهل يقدر يرجعها للطريق لو لا. هذه القصة باللهجة العراقية
