فراغ ملاه بحبه لهجة عراقية وتتوفر فصحى على منتدى روايتي قلوب احلام

الجزء الخامس

#فراغ_ملأه_بحبه

النسخة العامية

كتابة رؤى صباح مهدي

الفصل -5

جان البيت طول النهار مكلوب الكل يدور على محبس جدو صافي.. نظفت جنان الغرفة مرتين وما لكته. ظل صافي متكدر طول الوقت لان هذا المحبس اله معزة خاصة بقلبة. ورثة عن أبو ومقري علي ايات قرانية وأبو صافي يعني جد عتاب جان لابسه من حج بيت الله وصافي نفس الشي.. الكل ظل يدور و نهلة جانت متوترة طول النهار. ورة اللي صار بيها بالليل زادت حالتها النفسية سوء وطك براسها تعوف بيت جدها ترجع لبيتهم. هناك على الأقل بس أمها وامها مكدور عليها. من ناحية ثانية مينا اتصلت عليها... ترددت بالجواب لان الصراحة ماجان عدها مزاج تجاوب.. بس مجبورة. صاحت:

"هلو مينا... اسمعي.."

قاطعتها مينا :

"راح يجي اليوم واحد عليج يأخذ منج الفلوس حضرتيهن مو؟"

جاوبت نهلة:

"اسمعي ... فلوس مالكيت بس محبس جدي اخذي وبيعي واني متاكدة يجيب فلوس هواي لان اصلي مو مقلد"

سكتت مينا شوية وجاوبتها:

"اوكي هسة راح اقبل بهذا بس لان الظروف مالتج موزينة بس من ترجعين ماكو هيج شي ... سمعتيني؟"

جاوبتها نهلة :

"أي افتهمت"

شرحت مينا مواصفات الولد اللي راح يجي عليها... هو بالحقيقة حبيبها صلاح ... مينا وصلاح التقوا ببيت ام ماجد هو يشتغل يمها مثل الفتوة ومينا وصلاح صارت بيناتهم مشاعر وبعدين راد يخطبها. أبو مينا رفض من اول زيارة وطرد صلاح ... عصافير الحب قرروا يشردون للبنان او للامارات وهناك يتزوجون بس ام ماجد من افتهمت ظلت تضغط على مينا وتهددها حتى تجيب الها فلوس وتبيع الها الحشيش وكلما تقصر شوية تذكرها بموضوع السفر... وهاي كل القصة... هسة صلاح هو نفسه راح يجي على نهلة يأخذ منها المحبس اللي نهلة باكته من جدها. هو عبالة فلوس ولو عارف من البداية محبس جان ما قبل يروح...

اتفقت نهلة وية مينا ينتظرها صلاح يم الشارع الرئيسي اليربط المبلط بالمامبلط .... كلتلها هناك ينتظر وليخلي احد يشوفة. هي راح تلبس عباية سودة وشال احمر حتى يعرفها... مجرد ما تنطي المحبس ترجع بلا كلام اوشي حتى محد يشوفها...

--

ظل عدنان طول اليوم مو على بعضه. الأفكار اكلت مخه. من جهة يتذكر الليل ومن جهة يفكر بنهلة وتصرفها... اخر شي قرر ان المواجهة احسن حل. يروح ويحجي وياها ويفتهم منها كلشي وهو أصلا جدة طلب منه يدير باله عليها.. اليوم كلة جان مشحون بالشغل وكلما يريد يرجع للبيت بلكي يشوفها ويحجي وياها تطلعله شغله صفح ...