(ذهب)

البارت التاسع عشر

وصايرة بمحلهه ملامح شابة بالغة وحلوة بنفس الوكت

صفنت بوجهه ونسيت روحي بس دموعهه الي نزلت صحتني ونبهتني

حيدر: ليش تبجين

حجت بصوت مبحوح: شتريد منك

حيدر: لا تهتمين

قطعنه دخلة رشا وعبرت من يمنه باوعتلنه ودارت وجهه دخلت بغرفة الحجية

تينة

جنت نازلة حته اشوفنه وين صار

دخلت للمطبخ ورفعت البردة واشوفن سيارته طبگت بالگراج

جنت اريدن اطلع حته اتلگا ويشوفني بشكلي الجديد
بس سبگتني رشا الجانت متانيته بالحديقة

وگفت تحجي ويا يم باب الهول وانه اشوفنهم بس ما سمعهم شيگولون

بقيت واگفة واشوفنهه تگربت عليه وباسته

شفتهه هيج سوت لو اهيس روحي تسودنت وجسمي كله ضل يرجف

بقيت واكفة عله اعصابي واشوفنه هوه اعصاب وينتر عليهه لحدما شفته طگاهه ودخل

ادري بي هوه مو مال هاي السوالف ومايريدهه بس گلبي موجر نار ومامرتاحة

احسنهه تريد تاخذة مني

ذهب
رجعت لغرفتي والشيخ بعده ما جاي

وگفت بالنص حايرة منين ابدي

بعدين شمرت الغراض البيدي بالگاع وگعدت

ماراح اعزل شي عناد خلي يجي ويشوف شسوت

ضليت گاعدة شويه ودخل هاشم
ضل واگف بالباب يباوع للهوسة وانه گاعدة بنصهه

دخل للغرفة يمشي ويتلفت ويتعثر ويدفر بالغراض برجله

وصل يمي وحجه: هاي شني.. تسودنتي شمالج شمسوية

گمت عله حيلي ووگفت گباله: انه تسودنت لو العجوز المخرفة وبناتهه

ضيگ عيونه وحجه: ام عباس

ذهب: اكو غيرهه

هاشم: هي مسوية هذا كله

ذهب: اي.. واكثر بعد شوف هدومي كلهه مشگگه مامخليتلي شي ليش هيج ليش بس گلي شهالحقد هذا

اندار وعافني وطلع

طلعت ورا واشوفنه راح لغرفة ام عباس ودگ الباب

هاشم بصوت: ام عبااااس ام عبااااس

طلعت نازعة شيلتهه وتعدل بشعرهه من شافت الشيخ

ام عباس: هلا هلا يبعد طوايفي آمر

تگرب عليهه وگضبههه من دشداشتهه

هاشم: جا وصلت بيج المواصيل تدشين الحجرتي وتفرتشينه

ام عباس: يااا يااا شيخ شجاك جا شگلتلك هاي العرمة وگلبتك عليه.. الله لا يطيج كونج تردين تهجمين بيتي