توأم روحي أنا

١٦

عملنا حنة ظاابطة لكن فيها الرجال بس اعمامي واخواني وخالي فارس واولادو 😘 وجيرانا لكن عزمنا نسوان كتاار اشكال الوان اهل ومعارف، كعادتنا في حفلاتنا بتطلع طاعمة والهجيج في العلالي🤣 قصي جا طبعاً وقاعد يكشف لي من بعيد وانا برقص وطبعاً عملتا شوو بي عصايتي عجب عجب😂، لما جيت قعدتا جمبو قال لي لقيتك معلمة لكن 😍الرقيص ده كلو تعيديهو لي بعد نعرس ونبقى برانا لازم كل يوم على الاقل نص ساعة هجيج😂 ضحكتا  وقلتا ليهو علم وينفذ ياافندم🙂..
الدخلة كانت قمة في الحلاوة، خالو جاب طه سليمان😍 هدية لي نهال 😘.. نحن مفلسين مابنقدر على مبالغ زي دي😂، انا طبعا بحب طه حب شديد وكنت فرحانة فرح 😍..
ريم ورؤي الشباين ولابسين ابيض زي نهال واكليل ورد في راسهم، تقول شفع بس😂لكن حلااتهم مزز طالعين سمحات زي خالتو عناية والجسم تبارك الخلاق، الزفة كانت سودانية والزغاريد والبخور عامل شغل، انا مادخلتا معاهم جيت وراهم انا وعمو ياسر وقصي ومهرة،  طبعا مارقصو اسلو لأنو عادل زول هادي وبخجل من جنس ده😂..
قلتا لي قصي انا وانت نرقص اسلو قال لي يسلسل شعراتك ديل ماتخجلي يابت حبة🤣قلتا ليهو مع راجلي البخجلني شنو كمان 😳
جد قصي بقى حاجة مهمة في حياتي وحسيتو جد شريك حياتي الربنا قسمو لي..❤
طول الحفلة لاصقة تحت المسرح ومهججة مع طه وهو ماقصر معانا والله نزل تحت ورقص معاي انا وعلي ورامي ورؤى وريم، قصي غاير وزعلان اني برقص مع طه خصوصاً اني قلتا ليهو اني بحبو شديد قال لي وانا منو بحبني شديد كده 😒😂..
انتهت الحفلة وعملنا الجرتق وجبنا فنانة صاعدة من المغمورات ديلك، عملت لينا حفلة ظريفة اغلبا اغاني  انصاف مدني 😘😘..
انتهى العرس بحمدالله ونهال وعادل سافرو الصباح بدري مشو اسمرا🛫🛫🛫 قلتا لي قصي انا توديني اسطنبول ولا انسى موضوع العرس كلو، قال لي هين يابت هاشم كلو ببقى اها شوفي ليك عزر تاني😄 مجنناهو جن ياحليلو..
بعد رقنا من تعب العرس وانا رقدتا اسبوع منهارة، تاني جاني من إسلام تلفون برضو مارديت والمرة دي حظرتو نهائي، ماكنتا عايزة اسمع ولا كلمة منو ولا عايزة ارجعو في حياتي، قصي بستاهل مني اكون مسؤولة ومامتهورة..
رجعتا انا اقدم لي شغل جديد والحمدلله اتقبلتا فوراً.. ركعتين شكر لي ربي الحمدلله مارد دعاي ووقف معاي😍..
وصدقو اولا تصدقو جاني كمان عرض تمثيل في تمثيلية والدور حلوو جداً، شاورتا قصي طبعاً اذا بقبل قال لي ماعندي مانع دي حياتك العملية وشوفي البناسبك واعملي😚
انبسطتا كتير من موقفو وقمتا المسا كده رسلتا ليهو في الواتس مقطع من غنية بتاعت جنات لأني حسيتا بتناسب حالتنا انا وهو(انت اللي معاه حبيبي بعيش حياتي  وعمر تاني جديد، وبفكر فيك وبحلم بيك وعارفة ان انت بالتحديد اللي اتمنيتو واللي انا ايامي تحلو بيه وياحلم لقيتو وسنين من عمري بستني فيه❤️❤️)
ماردا لي وبعد ساعة لقيتو جانا في البيت عديل🤣🤣 استقبلوهو طبعاً وجيتو انا بعد نص ساعة يمكن لأني كنت علي حالة كربة وجريت استحميت وغيرتا واتمسحتا😄..
قلتا ليهو الجابك شنو فجأة كده، قال لي ترسلي لي رسالتك دي وعايزاني مااجي😁 يابت انا كلامك ده خلاني قربتا اغشى المأذون في طريقي😄 قال الجابك شنو قال، بقيت اضحك فيهو وهو يفرك في يدينو ومبتسم😊، قلتا ليهو انت عمري الجديد والقديم راح في حال سبيلو وعايزة اكون معاك قلباً وقالباً، قال لي بعد سكت مسافة كنت متمني اللحظة البتحسي فيها انك متقبلاني ومامفروض عليك، نورهان انتي سبب سعادتي وحلمي الجديد الاتمنيتو يتحقق لي، كنت بحس دايماً انو انتي الربنا خلقا من ضلعي وانتي انسب واحدة لي في الكون كلو 😇😇 قلتا ليهو ابو ام الرومانسية زاتا😆 طوالي شال  الجداعة وضربني بيها وهو بضحك🙄 اكيد نهال حرشتو وورتو على السلاح السري حقنا الا وهو المخدة😂😂..
اخيرا اتشجعتا وسبتا العصاية وبقيت اعتب لكن بقدر امشي براي ونزلتا شغلي بداية الاسبوع وكانو ناس القناة لطيفيين واتعودتا على الجو بسرعة، قدمتا في برنامج الصباح اول وبعدين قدمتا برنامج سياسي تخيلو😳 بقيت بتكلم في السياسة وبقيت زات رأي كمان🤣..
الحمدلله مالقيت امثال علوية في المكان😅 كنت جد مبسوطة ومرتاحة..
المرة دي اتعرفتا اكتر وبقيت اتنوع في البرامج وذادت خبرتي الحمد لله
نهال وعادل قعدو اسبوع في اسمرا واسبوع في مصر وجو السودان مشو كسلا قعدو عشرة يوم وطبعاً ختموها في الخرطوم😆 وماجونا الكلاب قالو ماخلص شهر العسل🤣..
بعد جو بدت الاحتفالات من جديد الضبايح والشيات😋😋 قلتا ليهم بسمن الله يجازيكم ياخ😄 ونهال جات وشها ناير من الفرح، حكت لي عن عادل وقدر شنو حنين وفاهم وقلبو كبير وماشاءالله معلوماتو واسعة وكان ليها دليل سياحي🙂..
خلاص انتهت السنة 💔 سنة مرهقة للاعصاب واحداثا كتيرة ،انتهت بي خيرا وشرها 😪 سنة علمتني الكتير وكبرتني اكبر من عمري كتير، بالجد الانسان مسير مامخير الا في سلوكياتو لكن شكل حياتو كلو مسطر، أنت تريد و أنا اريد والله يفعل مايريد😇، حبيت واتحبيت اشتغلتا وخسرتا شغلي لكن كسبتا نفسي واشتغلتا من جديد ولقيت رجل المستحيل رجل احلامي😍..
قصي مسافر كندا لي مدة اربعة شهور ماشي يدرس كورس مهم جداً،  كان ماعايز يبعد مني وانا كمان حزنت لي سفرو، قال لي نتزوج بعد ارجع من هناك كفاية انتظار اكتر، شاور بابا ووافق ليهو قال ليهو على بركة الله..
سافر قصي ومشيت ودعتو للمطار وبقينا نبكي انا وخالة يسرية وزلفى كأنو مهاجر وماراجع تاني😂 قال لينا مالكم بتفولو علي كأني ماشي وماجايي تاني..
كل يوم من سافر قصي بنتكلم في الواتس وكل يوم بمشي افقد خالة يسرية وزلفى وعلاقتي بيهم قوت، زلفى طبعاً ركبتا الغيرة مني عشان شاركتها في اخوها وعزبتني عزاب قال شنو وضرب متين وجايب ليك شنو وكده🤣 امو اللي هو وحيدا ماشغالة بي الموضوع وبتدعي لي ربنا يذيدني من نعيمو كوني ريحتا واسعدتا ولدا الوحيد..
في يوم من الايام عزموني لي حفلة في بيت شخصية فنية معروفة ومشيت، لاقيت إسلام هناك وعملتا نفسي طوالي ماشايفاهو، اتخطيتو لكن هو ماسابني في حالي وجا سلم علي وقعد معاي كمان😒، قال لي بعد سكت مسافة مبرووك، حمادة قال لي انك اتخطبتي، قلتا ليهو الله يبارك فيك،
كنت هادية ماصريت في وشو ولا عاملتو كعب عشان مايقول مغيوظة منو للان ، قال لي اسمو قصي؟ قلتا ليهو دكتور قصي احمد النذير
قال لي بعد سكت مسافة ماشايفة انك اتسرعتي؟ عاينتا ليهو بي استغراب ومارديت،. قال لي انتي كنتي بتحبيني ومااظن مسحتيني من حياتك سريع كده وقرارك ده هروب مني ما اكتر، ماعارفة لكن على قدر ماكنت بحبو احتقرتو في اللحظة دي، شنو الغرور والجبروت ده كلو، طلع نوع الناس البستمتع بي انو يكون قاهر قلوب العذارى، رديت عليهو رد واحد بس، إن الله لا يحب كل مختالٍ فخور..
قصي علمني انو القرآن فيهو كل الردود المناسبة لي كل حالة بتواجهنا في حياتنا  وفعلا صاح كلامو ، إسلام كان فخور بي نفسو وفاكر انو مثبتني وانو لسه في واحدة معزبة بي وراهو ، وندمانة اني كنت كده فعلاً معزبة بي وراهو ومتأزمة..
قمتا من جمبو ومشيت اندمجتا وسط المعازيم..
لما اتونستا بالليل انا وقصي وريتو الحصل وحكيت ليهو اني ندمانة على اي لحظة بكيت فيها عشانو واي لحظة اتحسرتا فيها على فقدانو، وغيرنا الموضوع وحكا لي عن كندا والاجواء العامة وانو حب الشغل هناك شديد والامكانيات كبيرة ومتوفرة..
في يوم من الدغش صحوني قالو مهرة ودوها المستشفى للولادة، كلنا مشينا ليها بي ربطة المعلم، ولدت طبيعي لكن اتأخرت شديد واتعسرت لكن الله فرجا في الاخير وولدت أخيراً ❤️
جابت لينا فرح💋💋 فرح احسن اسم في الاحداث المرت علينا، سماها ابوها😍 ياخ كلبوشة كيف ووشها مدور وعيونا صغار😆😚 فرح ياسر الزين..
عمت الافراح من جديد وكلنا كنا مغرمين بي فروح وعملنا السماية الما خمج ووزعنا في المساجد وفي الشوارع واي زول بلاقينا بنفرحو معانا😍..
مرت الايام والشغل ماشي تمام  وبديت اجهز نفسي للعرس واشتري مستلزماتي الشخصية وقصي قال انو بشتري لي من هناك برضو..
بعد مرا شهر نهال طلعت حامل القاهر الحيوانة😂 غايتو استمتعتا فيها ودرتها دوير لمن كرهتني 😆 قلتا ليها لو بت تسميها نورهان غصبا عنك ولو ولد قصي😚 قالت لي انتي وكمان خطيبك؟ غايتو عذاب السواد ده، على قول عنتر بِس 😆 وقالت لي ماتقابليني بي وشك ده عشان مااتوحم عليك والبت تطلع شبهك قلتا ليها شبهي ماياهو شبهك ياخلف قالت لي صدقي نسيت وبقينا نضحك ونتضارب بي المخدات زي العادة وماما طبعاً جات زفتنا وحبوبة كمان😅 قالت حركات الشفع دي خلاص انسوها يا الطرورات بقيتن نسوان، انا قلتا ليها عفوا انا لسه انسة قامت عليا الا تدقني بي عصايتا  وانا جريت😂..
بديت مشروع كده كان في مخي من زمان وقلتا ليهم الا اتعلم رقيص العروس💃🤣 وناوية ارقص، امي قالت لي يابت انتي مانصيحة انتي يادوب رجلينك ديل اتعدلن مالك عايزة تلولويهم تاني😂 اصرييت والحيت وكمان كلمتا قصي😅 ضحك فيني وقال طوالي ارقصي لكن فساتين طوال لو سمحتي🤣 حبوبة قالت لي وينو هو الجسم المقسم البرقصو بيهو 😪ياخ بفصلوني في لحظة العيلة دي😒 برضو ركبتا راسي وجبتا لي علامة لقتا لي منى صحبتي قالت علمت بت عمها وماشاءالله رقصت حلو، العلامة اسمها لولة 😍 بت شابة وظريييفة مضحكة خلاص، كل يوم يجو يتكومو لي ناس البيت ويحضرو التعليمة ولا كمان زلفى في نصهم😂 شاكلتها قلتا ليها تكلمي قصي بي الحاصل بغتالك وهي تضحك قالت لي انا في حزب العروس😆 قررتا ارقص بي تلاتة فساتين وكل فستان عشرة رقصات😳 دي رياضة عديل 😆
يلا مايفوتكم اخترعتا رقصة مع لولة وقلتا ليها الغنية تكون دكتور قصي كشف علي لقاني مريضة وحنا علي ، دكتور قصي كشف علي لقاني وحيدة وقرب لي، دكتور قصي كشف علي لقاني بريدو وغالي علي وغالي علي يلا غالي علي الصفقة  فوق وغالي علي 😂 والاخيرات ديل فيها ترترة💃..
ظبطنا الرقصات ولولة اثنت علي وقالت انا ماشترا بتعلم سريع😚..
جابو لي الشيلة وحبوبة بدت لي برنامج الحبس وانا بتزاوغ بي هنا وهناك لمن هرشتني ليك هرشة محترمة واجبرتني امشي على البرنامج، ونهال ردت لي العملتو فيها ايام عرسا وضحكت فيني وكاوتني، قلتا ليها كان مانورهان في بطنك كان تفيتك تف رهيب😂 قالت لي ماشايلة نورهان ده ولد 😏 قلتا ليها يبقى قصي قالت لي ابيييت مابسميكم نهائي، قلتا ليها انا زاتي ماعايزاك تكوني امي😝..
امي قالت لينا عمركم ماحاتعقلو ابدا مهما كبرتو😁😁..
علي اخوي مشا الإمارات مع خالو فارس الفتش ليهو شغل معاهو هناك، خالتو حنان بكت زييين لكن نحن طمناها وطمناهو عليها وقلنا ليها كلنا اولادك ودايما جمبك ان شاءالله..
طبعاً علي قال عايز شيراز بت عمو قاسم وامها ابت نهائي وقالت دايرها ود خالتا وحرشت شيراز انها ترفض وللاسف مشت ورا كلام امها ونست حبها لي علي😒 ولما علي سافر الإمارات ندمو اشد الندم اتاريها خالتو مها نوع البفتشو محل الراحات وين لكن علي قفل الباب ده خلاص..
أخيراً مشت الايام وقصي رجع بالسلامة سمين وأمين 😂 وجاني طاير في البيت وطبعاً منعوني قالو مافي طريقة للشوفة لكن اصرييت الا اشوفو ولبستا عباية واتبلمتا بي الطرحة السودا ومشيت ليهو، طبعا عداها ضحك فيني وانا زعلتا منو لكن اول مامد لي كيس بتاع هدايا صغير كده هديت وجريت واطي طوالي😂 فتحتو لقيتو تلفون جديد جالكسي نوت 7 😍 قال لي الايفون قلتي مابتحبيهو، ياخ قربتا احضنو عديل 😆 قلتا ليهو بحبك انا قصي ياود النذير قال لي وانا بعشقك يابت ناس الزين😂 من اللحظة ديك بقينا ننادي بعض بي الاسماء دي ود  احمد النذير وبت هاشم الزين😁..
بعد اسبوع من جيتو ابتدت المراسم، انا ابيت اعمل  حفلت حنة وفي اليوم ده عقدو لينا فيهو وقصي الليل كلو مساهر بي في التلفون مرتي مرتي قلتا ليهو اخر شي طلقني ياخ نعستا عايزة انوم😂😂
وقصي عملو ليهو حفلتين حنة😂 طبعاً ناس بيتنا كلهم ماعدا امي وحبوبة مشو الحنن حقاتو، حبوبتي قالت ام العروس بتبقى رزينة ومابتحضر حنن نسيبا😂 حبوبة العادات والتقاليد عندها مقدسة شديد..
نهال صورت لي قصي من كل الزوايا وكان طالع ناااير ماشاءالله 😘
يوم الدخلة من الصباح طلعنا انا ومعاي منى، صحبتي ياخ❤️ بت حربية ومامنها اتنين، نهال حامل وحاتلبس في البيت بأمر من ماما ومنى شافت ليها بت تجي تمكيجا لي نهال وتظبط ليها شعرها.. فستاني كان مخصر و بوف من تحت زي فساتين الاميرات الخياليات ناس سنو وايت وسندريلا، شعري مرفوع فوق ومن قدام تاج ابيض عالي😍 وقلتا لي الارتست تعمل لي اي شادو اخضر زرعي لأني بعشق اللون ده ووافقت لي.. طلعتا كما احب واشتهي ونفس الكنت بحلم بيهو من سنين🤗..
الساعة 5 كنتا جاهزة وقصي جاني عشان نمشي لي تصوير الاوت دور outdoor كان لابس البدلة السودا والقميص الابيض والصديري الاسود والكرافيت الاحمر🙂قلنا مانغير ونكون تقليديين، قلتا ليهو طالع رهيب تشيل بصر العين 😄 قال لي وانا اقول شنو طيب 😍😍 ما عارف اوصف شعوري حالياً يابت هاشم الزين💞
بقيت اتثائب طول الطريق وهو يقرص فيني من حسي حاتنومي ولا شنو قلتا ليهو هي شيل ايدك انا بت ناس والشرف غالي😂 هجمتو طبعاً واتأكد اني عندي سلك حرقان في مخي😅
وصلنا المكان ولاقينا المصور اسمو اسامة، قلتا ليهو يااسامة ابعدني من حركات حضني وبستو دي😅 الزول ده مابهبشني وريتك انا، الراجل يضحك قريب 10 دقايق وقصي معاهو، قال لي مش راجلك قلتا ليهو مامعناها يمسكني شوف لينا لقطات فنانة كده اظهر فيها انا اكتر 😂 قصي قال لي وين الاسلو الكنتي عايزاهو قلتا ليهو عشان ابيتو مابخليك تحضني في الصور😝 غايتو قضيناها عوارة وضحك.. خلصنا ومشينا القاعة ووصلنا بدري مااتأخرنا الحمدلله💞💞
الزفة كانت ظريفة ومارقصنا الإسلوو لأنو قصي قال نرقص برانا لأنو ناوي على حركات نص كم عيب نسويها قدام الناس🙄 غايتو بايخ خلاص شميتو طبعاً 😑لكن قطعنا الكيك وانا لطختو بي الكريمة كيه فيهو بس😝 قال لي اصبري بردها ليك قريب خوفني طبعاً 😅خالو كمان ماقصر معاي وجاب لي فنان غالي انا كمان وعزلتا حسين الصادق😝 وقصي حماني ارقص معاهو 😪..
انا وقصي رقصنا رقيص جد واهلو كلهم متمحنين قالو قصي ده طول عمرو هادي مابتاع هجيج قلتا ليهم هدت فيهو بت هاشم الزين😂..
انتهت الحفلة وقصي قايل انو انا ماشة معاهو 😄 زفيت ليهو النبأ الحزين انو ممنووع الا بكره بعد الرقيص والجرتق يخلصو😝 قرب يحلف علي ماارقص لكن اكلا في حنانو 😂.. لكن اتونسنا كتير في البيت لحد ماطردوهو قالو لازم ارتاح عشان بكرة اكون مرتاحة لأنو البرنامج ببدا بعد صلاة الضهر..
جا تاني يوم ورقصتا احلى رقيص وختمتا في الاخير بي الفستان الاحمر بي الدهبي عشان الجرتق بعد الرقيص وختمتا بي رقصة دكتور قصي😂 طبعاً الناس تكووورك معانا ويضحكو وهو يبشر مبسوط وطبعا رقص معاي كل الرقصات والمتفرجيين هايجيين قالو غطاهم 😂😂 ولمن انتهينا وقعدونا للجرتق بقى جمبي وهمس لي في اضاني تعيدي لي رقصتي الظريفة دي برانا وقعد يدندن دكتور قصي كشف علي😂
قلتا ليهو حرم انت فيك عرق شماشة لكن ناكر ياود احمد النذير قال دكتور قال🤣🤣..
انتهت المراسم وغيرنا ومشينا نلف ونتفسح..
وقفنا جمب بعض وبديت اغني ليهو بقيت لي روحي تؤم روح بقيت لي روحي روح الروح💞 باس يدي وقال لي كنت مستني اللحظة الحاتعرفي فيها انو توأم روحك أنا 💗💗💗
مشينا بتنا  في بيتهم بالليل والسفر بكره الصباح، حقق رغبتي وموديني تركيا لكن عشرة يوم فقط قال لي انا فلستا خلاص 😂 قلتا ليهو ثمح..
في بيتهم دخلنا الاوضة حقتو واتعرفتا على المكان العاش ونام وقرا وساهر فيهو 😍 قلتا ليهو بعد قعدتا في السرير وانا قلقانة عندي سر لازم اصارحك بيهو مابقدر ادس منك اكتر😔 طبعا وشو اتغير خالص وبقى مكفهر وحسيتو اتوتر شديد ماحسبتها كويس اظني😅، قال لي بكل صعوبة في شنو، قلتا ليهو انا ببول في السرير واحسن ماننوم جمب بعض، فجأة الود هجم علي وشال المخدة وخبطني بيها وهو بضحك قال لي ياكلبة قطعتي قلبي ياحيوانة وطاخ طاخ وانا اكورك ااي اي حرام عليك ياقصي ياااخي 😂.. قال لي خلعتيني افتكرتك فرطتي في نفسك 😁 قلتا ليهو هييي وتاني هيي انا رباية فريدة وحبوبتي قسمة وابوي هاشم فشرتا 🤬🤭 غايتو بديناها بي خلعة من اولا 😁😁..
عشنا انا وهو احلى شهر عسل ولما رجعنا اجرنا شقة وسكنا برانا امو قالت البعد محنة😄 ظريفة خالتو يسرية وبعتبرا زي ماما وماما كمان اصعب منها🤭..
اول ايام لسه كنا معسلين وبعد نزل الشغل وانا كمان نزلتا رجعنا لي سياق الحياة العادي..
مع الايام بقى من يجي من شغلو ينووم وراحت ايام الحب والكبكبة، قال لي الحب في القلب موجود😏😂..
نهال تمت اياما وولدت بي السلامة وجابت قصي😜 اقصد سموهو عمرو على اخو عادل الاتوفى زمان 💞💞 طبعاً مستلماهو انا كليا💋 هو وفرح  وفروح بتحبني شديد انا ونهال فاكرانا نفس الشخص ولمن نقيف ليها الاتنين بتحتار كيف صحبتا بقت اتنين😂
مرت الايام وكنا انا وقصي زي توم وجيري طوالي في حالة سك سك وطبعا سنة اولى زواج اغلبا حجج ونقاشات حتى لو بين الاحباب..
في مرة الحجة بيناتنا ربطت واتناقشنا وكل زول بقول هو الصاح ولحد مانادينا ماما وخالة يسرية يحكمو بيناتنا وجو الاتنين قعدو ونحن بقينا نتناقش وانا اقول ليهو على اي اساس اسمع كلامك وهو يقول لي ماتنسى انا راجلك ياهانم وانا اقول ليهو انا هانم وست الهوانم😂، ماما والخالة يتلفتو بيناتنا وساكتين قام قصي قال ليهم قولو حاجة، ماما قالت مابدخل انا بكرة تتصالحو وابقى انا النسيبة الكعبة😏 خالة يسرية قالت ليهو انا ابوك واهلو نجضوني بي المشاكل وماصدقتا ارتحتا من المشاكل دي ماتدخلوني بيناتكم، قلتا ليهو شفتا اصلا ماقادرين يقولو ليك انت الغلطان، وتاني دورنا الحجة😂😂 ماما قالت لي خالة يسرية الليلة حنان ظابطة لينا خدرة مفروكة بي الكسرة وشطة خدرا  تستاهلك ارح اتغدي معانا ونضرب لي بتك في الدرب تجي معانا، قامو خلونا في حجتنا قمنا سكتنا وبيقينا نعاين لي بعض وليهم وهم طالعين، صبرنا شوية وقصي قال لي خدرة مفروكة؟ انا قلتا ليهو وبي كسرة وشطة؟ قال لي ومافي زول عزمنا😮
انا جريت لفحتا عبايتي من الشماعة وقصي جرا يلحقهم وهو بنادي يما يااميييي  استنو ياخالة فريداااا 😂😂 نسينا الشكلة من الاساس قدام الاكلة الرهيبة..
حملتا بعد ستة شهور وعشتا اجمل 9شهور في انتظار اول بختي وقصي دلعني دلع شديد، ولدتا بي عملية و جبتا منذر قصي النذير  نسخة مصغرة من قصي 😔 وكمان شايل من كل زول في الاسرة حاجة، بكاااي ومابصبر ابدا لو جاع بعمل كارثة زي التقول ضربوهو😁 في مرة كنت بعيدة منو وهو بقى يكووورك ابوهو ناداني ولما رضعتو بقى يرضع وهو صاري وشو وبهرج بي صوت مضحك 😂 قلتا لي قصي ونحن بنضحك اخلاقو ضيقة زي حبوبتي قسمة🤣.......
انا نورهان هاشم اتعلقتا بي سراب وكنت حااخرب حياتي عشان اوهام في راسي فكرتا انو الحب اهم مافي حياتي وبعدو انا انتهيت، ماصبرتا على مصابي لكن الحمدلله فقتا لي نفسي ورجعتا لي حياتي، ربي اكرمني بي قصي رغم اني ابيتو في الاول ومااديتو فرصة وكنت حاأكف سعدي بي غباي، لازم نفهم كلنا اولاد وبنات انو حياتنا مقسومة ومسطرة، الرزق الزواج الولاده حتى الحياة والموت، حتى المقام ناس فوق وناس تحت بأمر رب العالمين لافلاحة لا شطارة، نعيش ونحب مالو لكن مانمنح قلوبنا خالصة الا لله وحدو ومايبقى لينا اي بشر محور الكون، وللبنات بقول نحن نصف المجتمع ونحن البنعمر وبنربي اجيال لازم نهتم بي مستقبلنا في المقام الاول ونحترم انفسنا ونجبر غيرنا يحترمنا، اياك يبقى محور حياتك بدور حول ولد بتحبيهو جايز مايكون من قسمتك فما تتهوري ماتقللي من قدرك قدامو اوقدام اي زول، قد تلقي زول يحبك ويحترمك وقد ماتلقي وده مااخر المطاف، انجحي وابني حياتك وحبي قرايتك ماتبقي ماشة جاية بدون هدف، واعرفي انو الحياة اغلى من انو نهدرا في الفاضي كوني اهم زول في حياتك  عشان تكوني قادرة تمنحي الحواليك المحبة والاهتمام وان شاءالله تلقى من الله احسن عوض..
في الختام احب اشكر كل فنان الهمني في كل حالالتي المفرحة والمحزنة والرومانسية😂
مع حبي نورهان هاشم المزيعة ومحبة كرة القدم😘😘

النهاية........