توأم روحي أنا

٤

طبعا متيين اطلع بيتنا فوق عشان احكي لي نهال بي شماري😁يلا انا وهي بنفهم بعض غير مانحتاج نتكلم، عندنا اشارات كده وحركات بسيطة بنتواصل بيها زي كود يعني، يلا مهدتا ليها للشمار بي طريقة الكود دي طوالي إبتسمت لي نظام حاتفكر في تصريفة لكن ماما الله يبارك لينا فيها حلتا بدون ماتنتبه وقالت لي قومي غيري هدومك ديل عاملة زي شفع المدرسة المابرضو يغيرو قومي يلااا
واتلفتت لي نهال  وقالت انتي قومي معاها امشي سوي الكيك لي الشاي بعدين
طيراااان اتخارجنا علي فوق لمن ماما استغربت في الطاعة البدون نقاش دي 😁
في باب الشقة نهال خلاص مااستحملت وقالت لي اها يابت امي وابوي غردي بي العندك
قلت ليها  اغرد هنا خلينا نخش اول، مشينا اوضتنا وقعدتا حكيت ليها كل الحصل😍 قالت لي  أمرُكِ ِعجيب ياإبنة ابي وامي كيف تخرجين معه بلا ظابط او رابط وتشربين الميلك شيك ايضا، فنيتا بي المخدة وقلتا  ليها ماطالبة معاك خفة دم 🤣
قالت لي الشمار الزيت عندي انا دي
قلت ليها احكي اصلا انتي شماراتي دايما مفشلاها لي😒
ضحكت وقالت لي هس ماتفصليني عليك الله، وبدت تحكي لي وقالت: اتعرفت على واحد اسمو مهند وهو صحي مهند طول وعرض وانييق 😍
قلت ليها بالله ماتسرحي بي مواصفاتك دي انا متأكده مافي في السودان ده😁
قالت لي بس انا لقيتو ياخ مالك انتي
قلت ليها ولميتي فيهو وين مهند ده، النبي فيك صوريهو نعرضو في صفحات الانستجرام الوهمية ديك ونقول زرع بلدنا😂
اخدتا لبعة جامده طبعا بلعتني لساني عديل😅
قالت لي ده ابوهو شريك في الفندق البشتغل فيهو وهو جا اشتغل معانا في الفندق في قسم العلاقات العامة مع انو مامحتاج الشغل اساسا🙃 وطبعا شفنا بعض وبدت بي نظرة فإبتسامة فتعارف وصراحة زول جذاااب بي كل المقاييس😍
قلت ليها عجبني وسرا بالي ايوووووووي😁
ونحن في عز الضحك والمشاغلات نسمع ليك نهرة طايره في الجوو : بنااااااات الله يجازيكم ماسويتو حرف من القلتو ليكم 😡😡🔥🔥🔥
توت توت توت انقطع الارسال 😂😂😂
مر اسبوع ملان بي الاحداث العائلية الطريفة كالعادة وبعد الاسبوع ده بدا شغلي وبقيت كل يوم بمشي اصور حلقة جديدة من البرنامج اللي هو عبارة عن تقديم مواهب مختلفة للجمهور زي عرب قوت تالنت كده 😁 بس مافيهو حكام ولا بظ يضغطوهو، عبارة عن لقاءت مع مواهب شابة في مختلف نواحي الحياة، اول حلقة كانت مع مجموعة غنائية مكونة من اربعة اتنين بغنو واتنين بعزفو ليهم ، انا ونهال اختي كنا مفتونين بيهم شديد خصوصا انو طالعين في الكفر شديد، كنت مبسوطة انو لاقيتهم اخيرا وكانت حلقة ظريفة جدا، وفي وقت البريك اتونسنا وحكيت ليهم انو انا واختي بنقلدهم وحافظين اغانيهم بي نفس الحركات والتعابير، حنسوني الا اوريهم كيف، ضحكت وقلت ليهم لكن اختي مافي التقليد ببقى مامكتمل، يلا هم اسمهم علاء وايمن.. انا قلتا ليهم انا دايما بقلد ايمن واختي علاء بقو يضحكو حتى منى بقت تضحك، وبعد انتهت الحلقة حلفو علي الا اقلد ليهم ايمن وعلاء قال لي بغني معاك عليييييك الله، قمت اخيرا معاهو ووقفنا قدام المايكات حقاتهم واخترتا اغنية عاجبانا شديد انا ونهال وبدينا نغنيها بعد فتحوها في الخلفية، طبعا فاجأتهم بي اتقاني لي دور ايمن وايمن نفسو ضحك لمن دموعو سالت😂😂  وعلاء نفس الشي..
طبعا نحن صورنا البرومو مع إسلام لكن اخراج البرنامج كان مع مخرج تاني اسمو ابوبكر عشان كده إسلام ماكان موجود وانتباهي ماكان مشتت الحمدلله..
الفترة دي بقيت مشغولة وطوالي وقتي ملان واما حبي لي إسلام كل مره ماشي زايد اكتر واكتر، طوالي لما الاقيهو قلبي بضرب وبعرق ليه مابعرف، حقيقة اظني نوع الناس البعرقو في الهينة والقاسية 😁 إسلام نفسو كان تعاملو معاي عادي لكن بفاجأني مرات بي عزومات ظريفة، وفي مرة عزمني وكنت مبسوطة شديد ولما مشيت عشان اركب معاهو اتفاجأ ليك بي علوية معدة البرامج ديك وين قداام قاعدة ومحكرة وتتبسم لي اتاريهو عزما كمان🗡️🗡️🗡️🗡️تيييت تييت تييت 😡😡😡
معليش اتهورتا ونبزتها في سري ماقدرتا اقولو ليكم
المهم ركبتا وش مبتسم زي الايموجي ومشيت ركبتا ورا، وصلنا المطعم وطلبنا اكل والاخت ماسكة المنبر هي، 😒 شغالة تخطب وتحكي وتقص وترص وإسلام مبسوط وبضحك وانا مع صحني اكلتو كلو بي المغصة مالحقتا اعمل حنكوشة واسيب شوية في الصحن 😭 المهم علوية وجدتها فرصة وقالت لي شكلك جعانة كنتي نطلب ليك شي تاني؟
اتمنيت زي حركة المسلسلات ديك اقوم وامعط قصتا المارقاها برا الطرحة دي وانتف شعرا واعضيها في جضوما السمينة دي👿👿 غايتو مااستفدتا من الطلعة دي خالص غير حرقت لي دمي بس، ابتسمت ليها ابتسامة صفرا تدل على غضب بارد وقلت ليها رسولنا الكريم قال احسنو الماعون، قتلتا الفرحة في عيونا لما إسلام قال عليه الصلاة والسلام صاح كلامك والله مامفروض نهدر الاكل، دننننننننننن 😂 انني حفيدة عنتر  لو سمحتي اجري العبي بعيد.. يلا اتحرقت شديد وعملت حركة بايخة وقالت انا لازم امشي بعد ده خليتكم بي عافية، كانت قاصده تقومنا الفقرية وطبعا إسلام قال ليها نقوم كلنا واوصلكم في طريقي، اظنها حافظاهو عشان كده عارفة كيف تحنكو، شفت ضحكة خفية في عيونا خصوصا لما قلت ليهم امشو براكم انا بركب تكسي😞 البت دي مااا ظنيتا صاحبتو وبس اظنها رامية لي بعيد يرميها البلا يخمها لابعد مكان 😭 ده حبيبي انا ابعدي مخالبك الطويلة عنو لو سمحتي ياهناية..
طلعنا كلنا وانا مشيت في اتجاه وهم في اتجاه، انا طول الطريق كنت مدبرسة وحاسة بي غيظ شديد ، يعني يوم مااتنيل احب البحبو يكون عندو واحدة تانية في الخط؟ دي وقعة شنو دي بس، من اليوم داك قررت اتحاشى إسلام مابقدر انا على المهاترات دي وبعدين واضح انو بعتبرنى صديقة برضو زي الست علوية 😏 وفعلا في الايام التانية عملت كده فعلا واتحاشيت الاحتكاك بيهو تماما الا فيما يخص العمل، لكن ماقدرت والله ابعد كتير قلبي مااتحمل ورجعتا تاني اهتم بيهو 😍 لكن غيرت السياسة تماما قررت انو امشي بي المثل المصري الرهيب شوأ ولا تدوأ(شوق ولا تضوق) 😂😂 وبقيت كل ماالاقيهو اقابلو بي صورة حلوة تحسسو اني مهتمة بيهو واول مايرخي معاي اسيبو وامشي وكنت برفض عزايمو دايما، ومرات بتحاشاهو وما بعبرو وبكون بتونس مع زملا تانين، تمينا اسبوعين بي الطريقة دي ولاحظت قدر شنو هو متأزم ومافاهم شي🤣..
في يوم رجعت مع مواعيد الغدا وحسيت قدر شنو اللمة دي انا بحبها خصوصا انها منبر للاخبار، وكان الخبر المرة دي برضو زواج لكن لي منووووو، تخيلو عمو ياسر عايز يعرس اخيييييرا💘💘 اخيرا الشرك قبضو، والعجيب انو حبوبة ماعندها اعتراض كونو جابا براهو، اتاري العروس دكتورة برضو وحبوبة تموت في البرستيج والمنجهة😂 والمرة دي قررت حبوبة تسوق بابا وماما وانا ونهال اختي 😁 ياحليلا ماعندها بنات يشدو أذرها في لحظات زي دي 😞وقررت تسوق ماما كونها الزوجة الكبيرة وكده ونحن برضو زيادة عدد بس 🤣..
المعاد كان تاني يوم ولما اليوم التاني كنت مخلصة شغلي الساعة 6 ورجعت البيت طيرااان، وصلت طلعت استحميت واكلت شي خفيف وبدينا نجهز للطلعة وبعد صلينا المغرب طلعنا، عمو جاب علبتين ماكنتوش كبار وبابا جاب بكاتين بارد قالو مانخش يدنا فاضية، حبوبة اثنت عليهم اصلها بتحب تكون زولة واجب، يلا مشينا للناس واستقبلونا احسن استقبال واكرمونا اخر كرم وطلعو ناس ظريفين والاظرف انو كمان عندهم مرا كبيرة حبوبة العروس ام امها وطبعا حبوبة تعجبكم طبقت المرا في عبها، بعد ضيفونا جات العروس سلمت 😍 ياخ سبحان الله الزولة دي تقول فصلوها لي عمو ياسر تفصيل مباااالغة، قالو في طير اسمو شلنكح بطير وبقول يارامي الاشكال على بعضها😂 بس شكلو كلامو جا مع عمو ياسر في جرح، اللهم مافي شلنكح لي انا ينادي يمكن ربنا يستجيب؟ ههههه خرافات بس حلوة ياخ😁
العروس اسمها مهرة😍اسم جمييل وغريب ماكتير، انا اعاين لي حبوبة القاها مبتسمة لي ضروسا الورا، شكلو الموضوع عاجبا شديد غايتو ربنا ده كريم على عبادو وعمو نال الرضا منها، الا بابا المسكين مااتهنى بي زيجاتو التلاتة 😂والرابعة طرشقتا ليهو، الله يحفظا لينا عنتوري جد بنحبها من جوة القلب 😍..
كانت احلى قعدة وانا اخدتا فكرة عن شكل قعدات التعارف كيف بتكون، طبعا مايفوتكم انا ونهال عملنا جو بي شبهنا الخرافي ده 🤣، حبينا العروس بي الاجماع وهنينا عمو على زوقو بعد مرقنا منهم..
والفي البيت ماصدقو رجعنا منتظرين الشمارات
قعدنا وحبوبة قعدت واتحكرت وبدت تحكي ليهم عاد شكرت الناس شكر لمن شكيت فيها مالا الليلة..
خالتو حنان وخالتو عناية الاتنين زغردن زغاريد عالية وباركو لي حبوبة ولي عمو ياسر الكان فرحان شديد وقالو لينا عقبالكم يابنات، ماما قالت ليهم عقبال على ورامي  حتى المفعوصات الصغار عقبالهم  بقينا نضحك كلنا، جد بحب البيت ده والاسرة المجنونة دي..
تاني يوم كان جمعة وناس عمو قاسم جونا عشان يباركو، عادتا هم بجو السبت اما الخميس والجمعة عند اهل خالتو مها لكن غيرو البرنامج وجو يباركو..
طبعا شيراز بت عمو قاسم بتحب علي اخوي من زماان ونحن انا ونهال فاقسنها وداسة الكلبة ماعايزة تبوح، المهم كانت متوترة وخجلانة لانو علي قاعد وانا ونهال شغالين نغني بي اعلى صوت علي ياابن عمي ياعلي ياللي بتجري في دمي ياعلي بتاعت كارول سماحة، وقلبنا على غنية الاقي زيك فين  ياعلي وانت في العين دي والعين دي ياعلي بتاعت صباح😂 طبعا شمتنا ليك شمة وعرفتنا نقشنا الفيلم
انتهت الجوطة دي ويوم السبت مشيت شغلي وانا كلي نشاط وفرح وكان إسلام واحشني شدييييد وكنت بشوفو لانو بخرج برنامج المساء البتزاع يومي، صورتا حلقة برنامجي وقعدت اتونس مع احمد المصور طبعا زول وناس وشمشار ماف شمار طاير هنا ماعارفو، هو مازول حشور لكن الاخبار بتجيهو في محلو، طبعا حكى لي عن علوية ولصقتا في إسلام وغيرتا حتى من الرجال وعاملة فيها صاحبتو وراجية اليوم البصارحا بي حبو، وحكى لي عن إسلام نفسو وانو زول منفتح واي زول بصاحبو بت ولد مافرقت وزول الناس بترتاح ليهو من كل النواحي، فرحني وضايقني في نفس ذات الوقت، فرحت انو زول حبوب وضايقني فيهو الانفتاحية الشديدة دي كده حااقابل كمية من العوراض😁 طبعا بتكلم كأنو خلاص ظبطتو وبقى حقي😬..
لاقيتو لي إسلام قبال اطلع امشي بيتنا ولقيت معاهو علوية😒 شلت تلفوني واخترعت لي مكالمة وبقيت اتكلم وماشة وعاملة ماشايفاهم، طبعا انتبهو لي وهو ناداني: نورهان
اتلفتا اتجاه الصوت وابتسمتا ليهم وشاورتا ليهم 👋👋 وواصلت طريقي مشيت.. زعلتا وانفقعت مرارتي وقررتا انسى موضوع إسلام خلاص البت يبدو لاصقة بي غراء
كنت واقفة في الباب بره منظرة بتاع الترحيل البقيت اترحل معاهو جديد، سمعت صوت إسلام من بعيد بناديني: استاذه نورهان
اتلفت ليهو لكن ماابتسمت ليهو ذي ماعودتو كنت عادية
قرب علي وسلم علي في يدي وقال لي شنو مالك مشيتي فيني من غير تسلمي منو شاغل بالك، كأنو كان عايز يقول منو شاغل بالك غيري بس حزف اخر كلمة..
قلت ليهو مع بتاع الترحيل عشان مستعجلة وعايزة امشي
قال لي طولنا ماقعدنا مع بعض ولا شنو
قلت ليهو الايام جاية كتير نعوضا ان شاءالله، وانا بي قلبي نفسي امسكو من يدو واقول ليهو نفسي اقعد معاك عمري كلو ياحبيبي😍 خفة شدييييده عارفة نفسي لكن اسوي شنو الحب غمرني ياجماعة😁
اعتزرتا منو ومشيت لما الترحيل جاني
في البيت وصلتا المغرب قعدتا مع ناس حبوبة شوية ومرتات بابا وطلعت علي فوق..
لقيت نهال محكرة في نص السرير وماسكة تلفونا وشغالة قرقر قر  تسكت شوية وتاني قرقرقر، عرفتها حابه 😁 رميت شنطتي في السرير لمن هجمتها وقعدتا اطلع في جزمي وهي شغالة تحدر لي وقبلت الناحية التانية، المحيرني كيف بتقدر تتكلم بي الهمس ده والزول بسمعا كيف في الطرف التاني، انا قدر مااتصنتا ماسمعتا شي 😂
بعد شوية قفلت وقبلت لقتني سابحة في سريري عديل كل يد في اتجاه وكل رجل في اتجاه ونااايمة، الساعة الما رمت فيني المخدة خلتني اقابض في الهوا من الخلعة وبقت تضحك، بعد استوعبتا الحاصل قمتا عليها ضربتها وبقت تلاوي فيني وتضحك..
بعد هدينا قعدتا اتشمشر منها عن الحبيب الجديد قالت لي حبيب شنو نحن لسه بنتعرف قلت ليها القرقر السمعتها دي ماضحكة تعارف اعترفي احسن ليك
قالت لي اعمل شنو هو ظريف بضحكني مااكتر ، لكن خليك مني انتي وينو زولك داك حتى ماشال رقم تلفونك يااخت
اتزكرتا الموضوع ده وجاني احباط شديد  وقلت ليها لسه بستوي على نار هادية انتظري وشوفي
قالت لي والله ده حب وهمي ساي من طرفك انتي بس شكلو مامعبرك أساساً
كلاما حمسني وخلاني اشعر بروح التحدي وقلت ليها بجييب راسو وحاتشوفي
الساعة ماما ماهجمتنا لمن قالت راس منو يابت منك ليها 😂 الاتنين نطينا من مكاناتنا وانا قلت ليها راس الشاحن ياماما الشاحن
ضحكت ضحكة استفزازية وقالت : تعالي قشي لي الريالة السايلة دي
نهال قالت ليها : انتي اصلا بتتصنطي مالك ياماما دي الحالة انتي قدوتنا ماكنتا قايلاك كده
حدرت لينا شديد وفاتت😂 ونجونا بأعجوبة..
تم اليوم على خير وبدا يوم تاني جديد وكان عندي تصوير الضهر، قعدتا اتحكحكتا زيين وعملتا شعري  وسرحتو ومرقتا لبستي وبديت البس واتشيكتا تمااام ومرقتا بعد جاني بتاع الترحيل
قررتا الليلة دي لازم اخلي اسلام يطلب مني الرقم بتاعي واثبت لي نهال اني قادرة😚
من دخلتا لفتا الانظار، انا اصلا من جيت عملتا جو والكل بعرفوني وبتكيفولي شديد، من مادخلتا وانا اشاغل في دي واكلم في داك واضحك دي واتونس مع داك لمن اتقابلتا مع إسلام ولما شافني جا يسلم وطبعا انا لما لمحتو من بعيد مسكتا تلفوني وبقيت اتكلم عشان الفت نظرو  وقدرت اعمل كده وطوالي جا علي وباين في وشو ملامح كده مافهمتها شنو ، بقيت اقول : يعني هو طلب رقمك؟ مافيها شي مش قلتي اصدقاء ؟ اكيد بكون عايز يتونس معاك من وقت للتاني، اديهو ليهو هو باين زول محترم مابتاع شبك
يلا عملتا نفسي يادوب لمحتو اشرت ليهو بي يدي👋 نظام بسلم وقلت في التلفون :خلاص يلا سلام ووريني اخر التطورات في شغلك ماشة كيف
قفلت التلفون وعاينت ليهو بي نص ابتسامة وقلت: ازيك مخرجنا العظيم اتفضل😊
عاين لي مسافة كده نظرة حسيتا فيها حب استطلاع وتاني قال لي: بقيتي غالية علينا
قلت ليهو لا ابدا ياخ وانا لاقياك وين لكن انت الغالي علينا
ياخ قربت انتحر انا خشمي ده بتكلم براهو مرات 😅 نفسي اكون رزينة ماارمي الكلام كده زي الدراب😂
هو ضحك وقال لي : انا كلي ليك ياخ العفو
ماعارفة اذا سمعتو صاح او كان بتهيأ لي ماقادرة احدد صراحة😍 جاتني لحظة خيال الكرتون ديك وقمت حضنتو شديييد وهو حضني وبعد لحظة فوقني من خيالاتي لمن قال لي : نحن ماشلنا ارقام بعض عشان كده
قلت ليهو اكتب عندك 09265.... اها طبعا عايزني اتمو صاح؟ عشان الشباب يضربو لي كل شوية لأ سوري انا بتاعت إسلام فقط سوري شباب😂
وهو ملاني رقمو وسيفنا الارقام وجا قعد جمبي وبقينا نتونس وتاني سألني حبي للكورة جا من وين، حشري خلاص 😁 انا طبعا جني كلام بس زول يمسكني طرف موضوع تاني يحلو الحلا بله، قلت ليهو من بابا مع انو ماما بتشاكلني دايما لكن مابقدر مااتفرج مع بابا، تاني اتزكر يوم شافني في الفندق وقال لي انتي تومة؟ طبعا قربت الطشو كف لكن تاني اتزكرتا انو لازم يقول تومة اذا عايز يسأل من موضوع الشبه بيني وبين نهال قمت استغفرتا وسكتا وهزيت بي راسي ايوة
قال لي انا شفتك قبل فترة معاك تومتك واستغربتا الشبه شديد ، انا طبعا ماصدقتا وبقيت احكي ليهو عن مغامراتنا والمقالب البنعملا مستعينين بي الشبة المطابق ده وبقيت احكي واحكي ومندااااحة لحد ماظهرت علوية الفقرية😂😂انا سميتا كده، طوالي جات سلمت علي وهاتك يابوس امح امح كيفك حبيبتي امح امح اخبارك امح امح، قددت لي جضومي من الغيظ، اول ماقعدت كده قلت ليهم اسمحو لي وقت التصوير جا واتخارجتا بي كل كبرياء، وانا بي قلبي بدعي تجي حافلة ولاباص سفري يخمها يطيرا اخر الكرة الارضية😂 احي ياإسلام خليتني اظهر نورهان الشريرة من القمقم بتاعا مالك علي
بعد خلصتا فتحتا تلفوني لقيت رسالة في الواتس من إسلام بقول فيها(طالعة حلوة الليلة شديد)
قربتا اكورك واقول يااااااهوووو لكن احترمتا نفسي وسكتا😅 خلاااص تاني الرسالة دي حاتكون مقدسة عندي للابد، رديت ليهو (اهلا إسلام ، اشكرك على زوقك)
وانا مبتسمة كده جاني تلفون لقيتو علي اخوي قال لي بابا تعب شديد وودهو المستشفى انا الفيني كلها راحت نسيت انا وين واتلجمتا قلت ليهو بي لهفة: وين انتو ومتين ده حصل ولي ساكتين من قبيل
قال لي حيلك يابت مامن قبيل قبل نص ساعة وحسي نحن في....
وصف لي المكان وطوالي شلتا شنطتي وجري مرقتا ماسمعتا إسلام الكان بنادي فيني وجريت وقفتا في الظلط وربنا اكرمني وجا تكسي ماري وقفتو وركبتا واديتو العنوان..
وصلتا المستشفى لقيت ناس البيت كلهم واقفين مرصرصين وحبوبة تبكي بكا شديد وعمو ياسر بهدي فيها جريت عليهم وانا بنادي وينو بابا وينو حبيبي حصل ليهو شنو ومسكتا حبوبة وبكيت معاها عمو نهرنا وقال: مالكم بتبكو كده شده وتزول بتقدرو البلا قبل وقوعو مالكم بس اسكتو خلاص، لقيت نهال جمب ماما بتبكي بي صمت مشيت ليهم واتماسكنا وبقينا ندعي الله يحفظو لينا، عرفتا انو تعب شديد وغلبو يتنفس وفي النهاية  مع الفحوصات عرفنا انو عندو شريانين مسدودات وانو لازمو عملية قسطرة..
بعد زمن طويل رقدوهو في الغرفة وسمحو لينا نخش بي الدور ، دخلتا انا وماما ونهال بعد حبوبة وعمو ياسر، من شفتو بقيت اشاغل فيهو ماعايزة ابكي ليهو وازعجو : سلامتك ياحجوج شنو الدلع ده شكلك هارب من الثلاثي المرح قلتا تمرض ليك يومين 😂
ماما ونهال ضحكو وهو حاول يضحك براحة وقال لي الوحيدة الفاهماني
في اللحظة دي جا الدكتور داخل دكتور حليوة كده ولابس نضارات، انا طبعا بحب الناس البلبسو نضارات طبية ديل بحسهم ناس كسر وقراية وناس هيبة كده😁 سلم علينا وقرب من بابا وبقا يفحص في النبض ويتفقد الدربات وحاجات تانية مابعرفا، انا ماركزتا معاهو شديد كنت بعاين لي بابا، قال ليهو سلامات ياحاج بسيطة ان شاءالله
بابا قال ليهو الحمدلله على كل حال،. انا طبعا عارفني بجدع الكلام ساي وبقابض قلت لي بابا: مالك يابابا ناس برشلونة باعو ميسي ولاشنو تعبتا كده، ماما كعادتا خبطتني في راسي من ورا وقالت هو بلا الكورة دي شي تاعبو مافي
الدكتور عاين لي وابتسم وقال ليهو الحاج برشلوني ولا شنو، بابا ابتسم بي كل فخر وقال ليهو على السكين😂 ورجع قال لي تفي من خشمك ماتفولي في وشي بقينا نضحك كلنا وودعناهو وطلعنا عشان الباقين يخشو ليهو
يتبع....