توأم روحي أنا

١

بحصل مرة انو بنقع في الحب لكن الحب بعمينا لي درجة انك بتتصرف بتهاون مع نفسك وبتجي على نفسك كتير عشان البتحبو بتتحمل عشانو مهما كان، بتبلع منو الاهانات عشان تحافظ على شعورك تجاهو ومابتسمع من اقرب الناس ليك  عشان تثبت لي نفسك انو الحب بنتصر ،لكن السؤال المهم هو ربنا مخبي ليك شنو في الغيييب..
انا منو؟ انا نورهان هاشم مزيعة مغمورة لسه في اول الدرب واتخرجت الحمدلله  واستلمت شهادتي وقاعدة في البيت مالقيت شغل لسة، عمري23 سنة انا فرد في عصابة مكونة من فردين نورهان ال هي انا ونهال  اختي التوأم وهي اكبر مني ب5دقايق بس لكن عاملة نفسا اكبر مني بي 5 سنين عديل بتقودني في اي شي، نحن ماعصابة عصابة يعني لكن دي تسمية ماما لينا  ليه مابعرف لكن دايما بتقول اننا قرفناها في عيشتا😂 ماما خلقها ضيق شديد مع انها طيوبة في بعض الاحيان..نهال درست فندقة وسياحة اظن اسمها كده🤔 وغايتو يادوب اشتغلت ليها في فندق 5 نجوم ليها شهرين وقاداني وماعطاني بي حكاوي الفندق وبي سامي الشغال معاها، الاخت معجبة بيهو التقول وديناها تحب مش تشتغل، ماما اسمها فريدة وهي فعلا فريدة من نوعا، جميلة جدا جدا على قول بابا ونحن وارثين بعض علامات الجمال منها لكن هي كاسحانا في السماحة وورثنا منها اللون الاسمر الفاتح ومن بابا الطول، احب احكي ليكم عن حياتنا ونشأتنا شوية،  ماما  فريدة اتزوجت من بابا هاشم زواج تقليدي لكن بعد الزواج حبو بعض بس كان في عقبة، هم سكنو مع ناس امو بعد الزواج وهنا كانت الكارثة، حبوبتي واسمها قسمة هي الكارثة نفسها كانت نعم النسيبة النجاضة، لكن زي ماقلت ليكم ماما خلقها ضيق ومامن النوع البسكت لي زول واتخيلو المعارك الطاحنة الكانت دايرة بيناتهم، ماما بعد تلاتة شهور من الزواج حملت فينا واستمرت في مشاكلا مع حبوبة طول فترة الحمل دي ولما ماما ولدتنا بي السلامة حبوبتي قالت لي بابا يسمينا هو وقالت يسمينا صفا ومروة تيمنا بي الجبلين  لكن ماما قطعتو معاهم شديد وبابا ماحب يزعل ماما عشان لسة والده وهو بحبها وسمتنا ماما نهال و نورهان، بعد تمينا شهرين  حبوبة اخترعت ليها عركة بينا وبين ماما وماراعت لي انها والده وقسمت و اتحلفت الا بابا يطلق ماما عشان مابتحترما وبابا طبعا كان بكبر دماغو وماشغال بيهم الاتنين لكن المرة دي عرضتو حبوبة لي عدم عفوها لو ماحصل الطلاق ولم عصرت عليهو طلق ماما بعد مارفضت تعتزر لي حبوبة لانها حسب قولا ماغلطانة..  ماما لملمت عزالا ورجعت بيت اهلا وكان فيهو جدي ومرتو مرت  ابوها يعني، يلا امها حبوبتي ماتت الله يرحما من هي صغيرة وخلتا هي واخوها الاصغر خالو فارس في رعاية ابوهم وهم صغار وتاني ماعرس الا لما ماما خشت الجامعة واصرت عليهو يعرس وعرس مرا طيبة بنقول ليها نحن خالتي سارة زي ماما مابتقول ليها.
  بابا كان بحب ماما شديد وبعد فترة ندم وحاول يرجعا لكن ماما قفلت الباب ده تماما وابت ترجع ليهو. بعد تمينا 4شهور حبوبتي تاني اتحزمت وقسمت وعرست لي بابا واحدة بي معرفتا وكانت حنان 😍 حنان دي اطيب مخلوق على وجه الارض اصغر من ماما بي بي شويه كده، والمسكينة عرسوها وسكنت مع حبوبتي برضو وديك واصلت معاها مسلسل درامات النسيبة نجضتا على الحامي والبارد لمن استوت جوه وبرا زي اللحمة الاستيك، ماما لمن عرسو حنان اشفقت عليها ماغارت منها وكان توقعا صاح وحبوبة حتتو معاها، يلا حنان جابت الولد وحبوبة سمتو علي على جدو ابو بابا، وده ماشفع لي حنان ابدا عند حبوبة وكرهتا عيشتا نظام هي مابتعرف تربي ولدهم براها وهي اعرف منها كونها والده تلاتة اولاد، عندي عمين غير بابا وهو كان الكبير وبعدو عمو قاسم وده  مفتح  عرف الرصة من زواج بابا وخاض التجربة كلها معاهو فلما عرس سكن بعيد من امو وبالتالي تم السخط عليهو وسمتو حبوبة دلدول مرتو 😂 لكن مرتو والله مظلومة هي برضو طيوبة خالتو مها اسمها، وعمو ياسر ده اخر واحد حاليا عمرو تم ال40 ولسة مااتزوج شكلو اتعقد من الحاصل في بيتهم، في بداية عمرنا كان بابا بزورنا هو ويطلنا ومرات بتجي معاهو حبوبة كوننا لسه صغار وماعندهم زول يمسكنا في بيتهم وخالتو حنان ولدا صغير مابتقدر على تلاتة فما بدينا نمشي ليهم برانا الا لما تمينا 4سنين بقينا نمشي يوم الخميس المسا ونبيت للجمعة ونقيل ونرجع لي ماما المسا وطبعا حبوبة بتفحصنا فحص دقيق عشان نفسها تمسك على ماما اي غلطة وتنبزها وتقول لي بابا مهملة في البنات.
يلا خالتو حنان تاني ماولدت غير علي علوش اخونا الحبيب، ياحليلا جاها تكيس في المبايض واتعالجت فترة بدون فايده اظنو تكيس شديد، انا ونهال بعد كبرنا حللنا الموضوع ده انو ناتج عن حبوبة قسمة اذ انها تسببت ليها في كده بكترة الزعل والمسكينة بدل تجيها غدة جاها تكيس مبايض😁 المهم بعد اربعة سنين انتظار تم اعلان استنفار عام من حبوبة واصرت والحت وبكت وعزت وكربت نصها كأنها في حالة حداد على ميت وحلفت على ابوي الا يعرس تاني 😂 احلف ليكم حنان زغردت عديل، اي حبوبة اصلا خلتهم بفرحو لما يلقو زول يقاسمهم المعاناة والله، انا ماجبت ليكم سيرة جدو يلا هو عايش لكن عيان الله يشفيهو وراقد عديل، كان تاجر كبير في السوق وعندو دكاكين جملة وحاليا ماسكا بابا بحكم انو الكبير واعمامي الوسطاني شغال في مجال الالمنيوم المطابخ والذي منو الطالعة في الكفر دي  وفي الاول كان مع بابا، عمو ياسر شغال دكتور ماشاءالله، دكتور اسنان.. كده وقع ليكم انو حبوبة هي الصوت الآمر في البيت مرا مشلخة شلوخ ناس زمان ومرا طويلة وضعيفة حطبة بس زي القناية وفيها سماحة تزكر وشعرا طوال  وغزيير  😁، نرجع لي موضوع العرس المهم نقت في بابا وعرست ليهو بي حجت انو ماناجح في زيجاتو واولادو قلال وقامت عرست ليهو من بلدهم بت صغيرة وسمحة ونوع العندها جمبات ديك وحبوبة قالت دي رحما  كبير وشيال 😂 اظن عندها اشعة سينية في عيونا ولا شنو ماعارفة، وفعلا تم الزواج وبرضو جابوها في البيت الكبير   واسمها عناية بت صغيرة ياحليلا ويلا حاولت تعامل حبوبة بي اسلوب الظرافة وسمعان الكلام لكن هيهات  قالت ليها كان غيرك اشطر لكن خالتو عناية ضربت الطناش ومابتعبرا كتير ولا كأنو  بتتكلم معاها وطبعا الشكاوي لي ابوي زي المطر لكن هو عارف انو زوجاتو ماعندهم ذنب لكن مابحب يزعل امو ماهي امو برضو، يلا عناية ولدت ماقصرت جابتهم تلاته ورا بعض ولد وبتين رامي وريم ورؤى، انا ونهال البنات الكبار في القافلة دي نحن اكبر من علي بي سنه وشهرين وهو اكبر من رامي بي اربعة سنين والبتين الصغار رامي اكبر من ريم بي سنة وشهرين وريم اكبر من رؤى ذي سنة وشهر كده.. يلا نحن كل خميس وجمعة معاهم لانو حبوبة قالت لي بابا لازم بناتك يكبرن قدام عينك، اجي؟ طيب مطلقاهو من امهم مالك من الاول ومشردة الاسرة السعيدة، وطبعا هي مابتحب البنات ابدا بتحب علي ورامي ونحن البنات الاربعة مابتريدنا شديد عادي يعني واما اولاد عمو قاسم عندو علي برضو وعماد وشيراز وطبعا شيراز معانا في فريق البنات غير المرغوب بهم  ، وحبوبة مابتنادينا انا واختي غير التومة والتومات فقط قالت اسامينا صعبة، اجي ياكده غايتو حقارة خلاص وانا كرهتي اسم التومة ده بحسسني بعدم الشخصية وانو انا من اختي مافارقة، انا ونهال طبعا توأم متطابق بنشبه بعض شديد ومابفرقونا الا بي الحلق الملون الملبسانا ليهو ماما انا حلق احمر واختي اخضر وحبوبة قسمة اصلا مافارق معاها تميزنا بس مكتفية بي التومة التومة دي😒 هذه هي اسرتنا السعيدة اسرة الحاج علي الزين وحرمو المصون قسمة 😅😅.
بعد تمينا نحن 10 سنين جدو ابو ماما اتوفى الله يرحمو جدو عبدالحميد كان راجل فاضل زول شيخ كده ووقور بتزكر دقنو الكثيفة البيضا وخالتي سارة ماقصرت قعدت معانا 5سنين لمن امها مرضت شديد رجعت لي اهلا عشان تفضل معاها ونحن كنا بنزورهم على الدوام كأنهم اهلنا دم ولحم.. بعد ال5سنة  كده جدو علي اتوفى الله يرحمهم الاتنين ويكرم مثواهم.. في البكا كانت الدرامات مع حبوبة اشكال اللوان وطبعا خدمتنا قطعت نفسنا قالت بنات على شنو نحن واقفين في الشاي والقهوة انا ونهال واخواتنا الصغار في قديم الموية غايتو قعدنا اسبوع معاهم وامي ماعارضت رغم زعلنا ونقنقتنا، كنا بنحب جدو وحزنا على فراقو لكن عنتر دي مابتنطاق (انا ونهال قليلات الادب ديل سمينا حبوبة عنتر لقوتها الرهيبة وصوتها البتسمع اخر الفريق اذا انفتحت في زول) المهم قعدنا الاسبوع واندرشنا درش عجيييب وانا كرهت حاجة اسمها قش الحيشان طبعا البيت فيهو حوشين كبااار وكمية من الغرف تقول متاهة وفي برندتين كبار ومطبخين واحد لي خدمة البيت وواحد للمناسبات وفيهم كترت عدة 😢😢 يلا بعد كل ساعتين بتخلينا نقش الحيشان ونفرش الملايات ونلملم العدة ونغسلا مادايره عدة وسخانة قالت، عدة الاكل الحمدلله جابو ليها مرا تغسلا لانو ابوي قال البنات صغار عليها غايتو قربت ارقص رغم انو الجو حزين.. وبعد انتهى العزا بحمدالله بدأت مرحلة تانية من مهاترات حبوبة، المرا راجلا مات ومحبوسة مفروض تقابل مصحفا وسبحتا وتدعي ليهو لكن لأ قاعدة تعزب في حنان وعناية واحفادا عزاب  لاينتهي، ومعاهم خالتو مها مرت عمو قاسم الفرضت عليها تجي كل يوم عشان النسوان البجو يعزو 😁 هم يضحك والله..
بعد سنة كده تغيرت الاحداث وخالو فارس سافر ابوظبي وبقينا برانا، بابا لقاها فرصة وبقى يزن في ماما الا يرجعا تاني وهي ابت بقى يحنس ويترجى وعشان خاطر البنات ومصلحة البنات وا وا وا، ماما قالت ليهو انا اصلا كارهاك واخاف ان لا اقيم حدود الله لو عرستك وربنا يغضب علي 😂😂 انا على ثقة انو اقتبستا من فيلم محامي خلع بتاع هاني رمزي وداليا البحيري😜 المهم في الاخير وافقت لما قال ليها خلاص مابضغط عليك الا اذا عايزاني براك😂، لكن شرطت عليهو انها ماحاتقعد مع عنتر وانو يبني لينا شقة فوق البيت غير كده مافي رجوع، وافق ليها وقال ليها لحد مايخلص بنا الشقة لازم نستحمل ونقعد تحت مع ناس حبوبة عنتر، قالت ليهو لا والف لا، ماما اصلا عنتر مصغر من حبوبة فما بتعاشرن مهما حصل، المهم بابا رجع ماما بي عقد جديد وبقى ينوم معانا في البيت كل يوم لحد ماخلصو بنا الشقة لكن بقضي يومو كلو بعد الشغل في بيت حبوبة لحد وقت النوم وطبعا حبوبة كانت مولعة نار قالت ليهو كاتباك فريده الله يازاها انا مابريحا بت الكلب.. بابا مل طبعا من كلاما لكن يسوي شنو امو وكبرت وعجزت وكلاما كتر اكتر من اول لكن الله بسألو منها، قال ليها بناتي اسيبهم براهم بدون راجل؟ ابقى انا ماولدك الربيتيهو يكون راجل وسيد الرجال قامت سكتت عرف ليها غايتو 😂
.. بعد مده ماهينة تمت الشقة واتفرشت  بي زوق ماما رغم تدخلات عنتر الكتيرة  ورحلنا بحمدالله وحاليا مازلنا الى الان عايشين في البيت الكبير مع عنتر حبوبة قسمة وزوجات بابا واخواني واخواتي والعرض مستمر 💖💖❤️
  .. في الحاضر ..
انا طول عمري نفسي ابقى مزيعة وكنت طول اليوم شايلة فرشة ماما المدورة بتاعت الاستشوار  وعاملاها ميكروفون لمن ماما قنعت منها وخلتا لي وجابت غيرا 😅 وعندي عشق تاني ورثتو من بابا وهو حب الكورة😍 اي الكورة ودايما بحضر معاهو وبعرف معلومات كروية كتيرة لكن مابحضر كورة محلية لانو في معتقداتي الخاصة انو الكورة متعة ومع ديل مافي متعة، عشان ماتقولو ماوطنية وكده ماكلنا عندنا تحفظات على حاجات في البلد دي جات على الكورة يعني 🙄 بابا بعشق برشلونة وبتابع الدوري الاسباني والانجليزي وانا معاهو لكن انا بشجع الريال مكاوة لي بابا بس لكن انا بحب مانشستر يونايتد الانجليزي   وبابا بشجع ارسنال وانا بسخر منو لانو ارسنال مابشيل الدوري مهما حاول لكن هو عندو امل  وهو لسة على حالو وبابا مابقبل نقاش في الموضوع ده، ولما يبدا دوري ابطال اوربا بنبقى الشحمة والنار خصوصا انو في السنين الاخيره الريال هو البشيل اللقب وبابا بحاربني عديل في الموضوع ده😂 ماما طبعا فاقعة مرارتا بي الموضوع ده قالت لي كورة شنو وزفت شنو المبارياها مع ابوك😒 يلا هي بتغير لما بتحس اني مايلة لي بابا كانت عايزانا نحبها هي اكتر كونها ربتنا هي اكتر من بابا وياما حكت لينا بي تاريخا الحافل مع بابا وامو المصون قسمة او عنتر..
يلا انا قدمت في كم محطة تلفزيونية ومستنية الرد وقاعدة في بيتنا مرخمة وحلمي اشتغل في قنوات be in sports القطرية 😍 المهم بس اخش في مجال الكورة زي المزيعة ميرفت في قناة النيل الازرق 😙.
في يوم كنت نايمة امي جات صحتني وقالت لي خالتي سارة امها اتوفت ولازم نمشي نعزي، كان الوقت الضهر كده ونهال في شغلها مافيشة طلعنا انا وهي مشينا ليهم وطبعا مايفوتكم حبوبة لمحتنا ونادتني بي صوتا الرهيب : التومة
طبعا بلعت غضبي  من هذه التسمية البكرها وماما ولا وقفت ليها وانا اتلفتا ليها وقلت: نعم ياحبوبة
قالت لي بي كل بساطة: النعامة التزوزي بيك
انا كان وشي كده🙄 وقلت ليها : اتفضلي آمري ياحبوبة
قالت لي: ماشين وين انتي وامك من طلعة النهار
قلت ليها: خالتي سارة مرت جدو  حميد امها اتوفت وماشين نعزي
عوجت لي خشما وقالت: قال يعني بتعرفن الواجب
حبوبة دي غايتو خايفة ليها من عزاب الاخرة والله😁حسي نحن سألناها؟ بس بتحب تغتنم الفرص عشان تهزأنا كلنا..
المهم مشينا وياحليلا خالتي ساره باكية بكا شديد عزينا وقعدنا معاها نواسيها، بعد ساعة نهال جات عزت لكن ماقعدت كتير رجعت شغلا تاني، المغرب كده بابا قال لينا اطلعو لي بره جا يعزي خالتي سارة ويسوقنا، المرا واقفة تشيل معاهو في الفاتحة وامي معاهم وانا واقفة اتلفت زي الهبلة وبس شفتو قاعد هناااك😍 ماعارفة اوصفو ليكم كيف اللهم بس انو بخش القلب طوالي توووش، الجلابية البيج والملفحة والطاقية المزخرفة ومركوب النمر التقول جاي عقد مابكا، يلا اصلا الرجال رفعو في نفس اليوم عشان كده معظمهم متشييكين، زولكم قاعد بي كل جلال وعظمة وقعدتو قعدة وزرا ولا سفرا اللهم شي كده عالي المقام، نظرتو جذابة بمعنى الكلمة وتعابيرو مبهمة كده ماتعرفوهو متضايق من شي ولا هو اصلا سحنتو كده لكن بي الرغم من ده كلو اتكسرت فيهو شديد 😍 هو منو والله ماعارفة وفجأة كده ابوي لفتني لقاني سارحة 😁 قال لي تعالي امك دخلت جوة تجيب حاجة يلا نتدقم ليها.. مشينا سوا والرجال بدو يتحركو معظمهم ماشين، وقفنا على جمبة وبابا قال لي الليلة الكلاسيكو ياحلوة استعدي قلت ليهو: استعد ليه هو انا حالعب ضمن التشكيلة ولا شنو، قال لي ههههه دمك خفيف لكن لامفر ميسي الليلة حايفرج فيكم العالم، قلت ليهو اصلا ميسي ده مابزعلو منو لو جاب مليون هدف😍 قال لي هوي المفروض انو ميسي عدوكم ماتحبيهو ده تبعنا نحن
قلت ليهو وانا بضحك  ياحاج اعصابك محسسني انك رئيس النادي وكده وبعدين انتو لو ماميسي والله خشمكم يبقى ملح ملح وبعدين بتتفاصح مالك دوري الابطال الفات بي ميسي تبعك ده اتخارجتو ياحبيب ونحن الشلنا الكاس فماتتفلهم فيني 😁 وانا بضحك اتلفتا بي حركة تلقائية وعيني تجي في المجهول الرهيب😍 واقف قريب لينا وبعاين لي وهو مستغرب شكلو سمع الاستديو التحليلي العاملنو انا وبابا😁، وبابا مواصل: المهم الكلاسيكو ده حقنا
رجعت ليهو وانا منفعلة وقلت ليهو : يازول نحن شفت بي بنزيمة بنغلبكم ماف كلام خلي كريستيانو وبتشوف 😁 وفجأة احس ليك بي يد ماما في راسي من ورا طاااخ هجمتني هجمة وقالت لي : ماقلت ليك كلام الكورة ده بطليهو يابت هاشم، وانت كمان ياهاشم موافقا في عمايلا؟
بابا قال ليها : مالك بيها بتي وطالعة لي
ماما لوت خشما وقالت ليهو: عندك ولدين غيرا شابك فيها هي لييه
بابا قال ليها: هم بحبو الكوره اي لكن  هي افهم منهم في الكورة
ياخ طرت من الفرح التقول ادوني وسام  والله، تاني اتلفت شفتو لسه بعاين لي وفي ابتسامة في عيونو ، المهم كشحتو ليك بي ابتسامة مماثلة وانا محرجة لانو شكلي زي الرجال وانا بتناقش مع بابا. اتحركنا ماشين نحن التلاتة وجينا بي اتجاهو كان معاهو نفرين وشكلو على مشية، امي لمن بقينا في وشهم عديل قالت لي نورهان اتزكرت معليش ارجعي لي خالتي سارة قولي ليها......
عيونو بقت في عيوني وشكلو انبسط انو عرف اسمي منو وانا اتحرقت انو ليه يعرفو وانا مااعرف اسمو كمان.. المهم رجعت تاني وهم مشو ركبو العربية وبابا قال لي تعالي العربية طوالي ماتتأخري.
بعد جيت تاني ماشه على العربية مالقيت زولي شكلو مشا ☹️ومالحقت حتى اشوفو تاني..
المسا في البيت حضرت مع بابا الكورة وفازو برشلونة وعمل لي عمل التقول مدخلهم هو الاهداف دي، انا بفرح لي فرحو والله وبكون مبسوطة، طبعا علي اخوي مع الريال ورامي برشلونة مع ابوي وبجو عندنا فوق في الشقة نحضر كلنا سوا وطبعا مائدة الرحمن بختها ليهم الفشار والمكسرات والتسالي والبيبسي الحجم الكبير ورامي بجيب كورة كبيره فيها بطاطس ليز ذي الدعايات، الليلة مااتعاركت مع بابا ورامي زي كل مبارة عقلي مشغول في الجندي المجهول، الحاجة الفكرت ليها انو الزول ده معدي ال30 سنة لكن وااااو عجبني يااخ وشغالة اتزكر فيهو وابتسم وابوي يقول لي مغلوبين وفرحانة؟ قلت ليهو اي انت دخلك شنو 😁.. في الكورة بنسى انو ابوي مرات،
بالليل بعد رقدنا جاتني الفرصة وقديت نهال ومعطها بي سيرتو زي مابتعمل لي هي، قالت لي : شكلو كيف
قلت ليها: هو وشو شين بس الشنا البتتحب ديك يعني ماحمضان
نهال ادردقت بي السرير من الضحك وقالت لي: يافالحة اصلا حاتلاقيهو وين تاني شين ولا حمضان خلاص فكي السيرة دي وخليني انوم
انا كشرت وقلت ليها : اصلك كده مابتدعميني التقول مانصي التاني
اتثائبت وقالت لي: يانور ياحبي ادعمك اقول ليك شنو امشي فتشيهو تاني عند ناس خالتي سارة وهو يمكن عابر سبيل عزا وفات وخلاص؟ يعني مامن اهلهم
قلت ليها بي حزن: على قولك، لكن بس انا مايعجبني يعني الا زول مجهول الهوية؟ انا الناس البعرفهم ماشايلاهم اهيء اهيء
نهال قعدت في نص السرير وقالت لي: اجي يا اهيء اهيء عرفت من متين ماياها نظره ماغيرا
انا بي عيون سرحانة: عشقتو من نظرة
نهال قالت لي: نور نومي الله يرضى عليك
قلت ليها: بنوم اها اتخمدي يابايخة لازم تفصليني يعني؟
قالت لي وهي بتتغطي ونتقلب للجه التانية: اي عشان ماتحلمي احلام اليقظة كتير
استسلمت ورقدت واتغطيت وطفينا نور الاوضة الكان جمب سرايرنا عشان مانتعب ونقوم كل مرة، لكن مانمت بقيت سرحانة في العيون الخطفت قلبي وخلتني مامتلمية على نفسي وقلت في تساؤل عميق: انت منو يافارسي المجهول وكيف القاك تاني!!
مر شهر على  الكلام ده، ودايما بخطر على بالي خيال الجندي المجهول وبتحسر اني ضيعتو مني..
لحد مافي يوم نهال عزمتني اجيها في الفندق كتغيير واتفرج على المكان، كان عندها نص ساعة استراحة قلنا نقضيها سوا.. اتشيكتا ولبستا بنطلون الجينز الماخمج وقميص طويل كاروهات ظريف كده ملون اصفر واخضر ولبست جزمتي الواطية نسبه لي طولي ولفيت طرحتي واتخارجتا وطبعا حبوبة كالعادة قطرتني وطبعا نفس النغمة: التومة
😅خايفة يوم انفعل فيها والله غايتو اتمالكت نفسي ومشيت ليها وسكتا عشان ماتزوزي بي  النعامة زي كل مرة تقول النعام ده فاكنو في الشارع ساي كده للمزازة، المهم سألتني ماشة وين قلت ليها ماشة لي مقابلة شغل، لوت لي خشما وسكتت طوالي شتات طلعتا منها، اقول ليها ماشه الفندق عشان تفضحني في الفريق؟ صعبة علي دي.
مشيت وصلت الفندق و اخ من الفخامة، بالله ياها دي الفنادق كده؟ 😍 حسيت اني عروس وجايه مع عريسي وقلبي دق واتزكرت الجندي المجهول وضحكت وخشيت اللوبي طبعا فتح لي الموظف بي لبستهم المميزه ديك وعاين لي مستغرب وتمتم مسافة عرفتو فاكرني نهال اختي 😂 ومشيت مكتب الاستعلامات لقيت ليك نهال واقفة مع واحد مع النزلاء بكمل في اجراءت الدخول، الحمد لله كان خلص خلاص وفات اتقدمتا منها وقلت: لو سمحتي في حجز بي اسم نورهان هاشم علي😊
عاينت لي ضاحكة وكان في واحد واقف معاها من الناحية التانية وعاين لي مخلوع طبعا شبهنا زي كل التوائم بحير الناس، طبعا ده سامي الكلمتكم عنو زول شكلو لطيف  ومكسر الاخت نهال 😂
قالت لي فاضل عشرة دقايق امشي اتجولي في اللوبي واتفرجي على المطعم واقعدي وانا بجي بعد شوية.
مشيت اتفرجت ماخليت وانبسطتا ورسمت وش واثق كده نظام انا نزيلة هنا وبعد شوية دخلت المطعم وقعدت، طوالي جاني الويتر وابتسم لي وقال : اتفضلي حضرتك حاتطلبي ؟ قلت ليهو معليش ممكن بعد شوية؟ منتظرة زول، ابتسم لي وقال : تمام
فات هو وانا بقيت اتجول بي عيوني لحد ماوقفت في طاولة معينة فيها نفرين، وشفتوو 😍 تاني شفتو قربت اجري عليهو واحضنو، كان هو نفسو لكن بي هيئة مختلفة، كان لابس بنطلون رمادي وقميص ازرق فاتح وشاكي القميص 😍انا كان نفسي اطلع ولد بس عشان الحركة دي شكة القميص والحزام الجلدي مع البنطلون بتكيفني شديد 😁  مابعرف لييه، المهم كان هو بشحمو ولحمو ونفس نظرتو الفيها شدة وصرة الحواجب، الزول ده قمة في الجدية لكن برضو بتحب.
هو ماشافني ولا انتبه لي وانا بس بتأمل فيهو وكل مايبتسم للمعاهو قلبي يعمل شححححح غايتو قلت اخير مااعاين ليهو مابضمن تصرفاتي. نهال جات تتقدل وهو رفع راسو صدفة شافا  جاية وباين عليهو افتكرا انا طبعا وعاين ليها بي اهتمام لحد ماقعدت كانت لابسة لبس موظفين الفندق عاين فيها مسافة وحول نظرو لي انا وطبعا لقى نفس الشكل مرتين واتحير شديد، انا بي غبطة كده قلت ليها لقيت الجندي المجهول يانهال، وقبل مااضيف حرف الاستاذ سامي جا  وراها وقعد في نصنا وابتسم لي وليها، نهال عرفتني اتخلعت ضحكت وقالت لي: ده سامي زميلي وصديق برضو، ودي ياسامي نورهان اختي التومة
عرفتها عايزة تكاويني من التومة دي
سامي قال لي : اهلا بيك، لكن صراحة شبهكم بخوف
قلت ليهو: ليه مالنا
قال لي : تخيلي انو في منك اتنين في الدنيا شي عجيب انا لو عندي شبيه زيكم كده كان قلبت الدنيا قلب
قلت ليهو : بركة الطلعت واحد وفريد من نوعك ماناقصين قلب في الدنيا
كنت بعاين ليهو بي كده 😬 ونهال ميته بي الضحك،
اتلفتا اشوف فارسي لقيتو مافي 😢 نفسياتي هبطت وماضقت لي الاكل طعم بعد جابوهو..
خلصت القعدة ولفيت مع نهال شوية في الفندق وودعتها ومشيت، وانا ماشه اركب شفت الراجل الكان قاعد مع فارسي المجهول ماشي يركب في عربيتو وكان سايق برادو عاينت ليهو مسافة وماعارفة ليه اتزكرت طه سليمان لما قال ياالسايق البرادو ماتجيب القلبي رادو 😁 لكن وقت الحوجة المخ ببدع، وقربت امشي اقولا ليهو احتمال يحن علي ويوريني هو منو والقاهو وين، ضحكت مع نفسي ومشيت وقفت لي ركشة والى البيت، وانا حزينة للغاية اني ضيعت حبيب روحي مره تانية، اي حبيتو من اول نظرة ما اعجاب انا متأكده من شعوري ده حب وحب جارف كمان لكن سيد ريدي مجهول الهوية..
رجعت البيت لقيت حبوبة شغالة تدي اوامر لي خالتو حنان عايزه منها شنو مافهمت غايتو شايفة خالتو  عناية من بعيد تضحك لكن يافرحة ماتمت لانو عنتر ندهتا بي كل حزم وقوة وصوت جهور عنااااية يابت وينك😂 ياحليلا قربت تقع على وشها وهي جاية بي سرعة، اتسحبت سريع سريع قبال تلمحني وطلعت فوق، لقيت ماما متشيكة ومريحة قالت ماشة ناس خالتو سارة قربت اتشبك فيها زي الشافعة الصغيرة لكن خفت تلطشني كف وتقول لي جنك حوامة، ماما مشت وانا دخلت استحميت ولبست لي بجامة ونزلت تحت.. حبوبة لقيتا قاعدة، غايتو عندها موقع استراتيجي بتشوف فيهو كل البيت الداخل والمارق ويستحيل تقدر تدخل حاجة من بره هي ماتعرفا يعني بابا لايمكن يقدر يهادي زوجاتو بي شي غير هي ماتعرفو 😁، في شي ماوضحتو ليكم عنها، هي رغم عمايلا محبوبة كل البيت بعشقا عاملة لينا جو كده وزوجات بابا اتعودو عليها ورادوها لكن هي مابتريد الا اولادا فقط يعني لو بابا بس قال مصدع خلاااص كأنو على فراش الموت تملى البيت نواح ياحليلك انت يايابا الوجعو راسك وكملو عمرك بنات الحرام الله يجازيكن مالاقي راحتو عندكن واولادك المسلطين زي المناشير دايرين دايرين كر علي يايابا 😂، ومره عمي قاسم جاتو ملاريا اتهمو خالتو مها وسففوها التراب تقول هي الباعوضة الشايلة المرض فبقو قدر المستطاع بخبو المرض منها، اولادا ديل مقدسييييين خط احمر.. يلا نزلت لقيتا عاينت لي مستغربة وقالت التومة جيتي متين ماشفتك انا لييه
قلت ليها كنتي بتصلي قالت لي لأ مااظن ولا كنت بحس بيك، اجي انتي مابتخشعي ولا شنو حتى في الصلاة حواسك منتبهه😦، المهم قصرت الكلام وقالت لي خشي جيبي لي مصحفي من جوه نسيتو ، مشيت جبتو ليها وجيت ، قالت لي لو وسختي الواطه الله قال بي قولك، قلت ليها حبوبة ملصتا شبشبي برا ودخلت، وبدون سابق انزار كوركت ياحنااان انا لمن نطيت من الخلعة والله صوتا بخوف صدقوني لمن تنادي زول، قالت ليها ياحنان يابت الجبنة
يتبع.....