توأم روحي أنا

٥

مرض بابا خلاني نسيت إسلام واهدافي تجاهو مع اني كنت بمشي شغلي عادي لكن مابقعد لحظة بعد انتهي وطيران على المستشفى، الغريب انو الشي ده خدمني من غير قصد مني واسلام كان تعبان من تجاهلي ليهو وكل مايرسل لي في الواتس برد ليهو رد مختصر شديد، وهو بقى حاسس اني مهمة عندو شديد وانو بدا يحبني لكن بغالب في مشاعرو دي ومحتار انا مالي بقيت اتجاهلو كده وافتكرني بحاول اتهرب منو (ماعارف سجم رمادي واني حاباهو حتى النخاع😂) يلا الموضوع ماعجبو بي الطريقة دي وفي يوم وانا طالعة لقيتو برا جمب المدخل منتظرني واول ماقربت عليهو ندهني بي صوتو البحبو: نورهان
قلت ليهو :اهلا استاذ اسلام كيفك
قال لي: ازيك
قلت ليهو والله نحمدو
قال لي :ممكن اعزمك على شي نشربو عايز اتكلم معاك
افتكرتها قعداتو المامنها فايده وطربقة فارغة ساي قلت ليهو معليش خليها مرة تانية اصلي مستعجلة شوية
طبعا مسكو احباط شديد وانا جد كان فكري مشغول بي بابا ومرضو فما قريت تعابيرو كويس، هو غير لهجتو ورجع للجدية وقال لي خير يازولة، هو افتكرني بتغلى عليهو حركات بنات ساي وزعل،
انا مشيت اول مالمحتا الترحيل وصل وودعتو بي استعجال ومشيت حيرتو ليك في افكارو 😁
مشيت لي بابا في المستشفى لقيت معاهو حبوبة وعلي والباقين انطردو من حبوبة ورجعو البيت، مع دخلتي الدكتور داك جاهو سلم ودخل يعمل كشوفاتو ديك وحبوبة شغالة تستفسر منو عن حال بابا، ماعارفة لييه لكن حسيتو كل شوية بعاين لي ويبتسم ابتسامة خفية كده وانا ماختيت في بالي شي
قلت لي بابا: ارسن فينجر خلاص رسمياً ساب ارسنال الموسم الجديد مامعاهم
قال لي: خلاص كفاهو نشوف غيرو بعد ده
الدكتور ضحك غصبا عنو وحبوبة شاكلتني قالت بتعب بابا بي كترت الكلام  علي قال ليها معليش ياحبوبة سامحيها غايتو قدر عليها سكتا
قلت لي بابا ماعندك عشرة طلعتا، حسي نحن لي الان حزنانين انو السير اليكس اعتزل
علي قال لي : عاد لكن السير اليكس جاب كل الالقاب عكس ده
بابا قال ليهو سوق اختك وطيرو من خلقتي، ونحن ميتين بي الضحك وقمنا سمعنا كلامو ووقفنا برا، بعد شويه طلع الدكتور وطمنا، اسمو دكتور قصي😁 زكرني لعبة كنا بنلعبا زمان انا ونهال وبقيت اغني في سري دكتور قصي كشف علي لقاني مريضة وحنا علي😂 عارفاكم بتكونو غنيتو معاي..
المخوفني انو الدكتور ده ماكبير احتمال في بداية الثلاثينات وهو الحايعمل لي بابا العملية واااي كنت قلقانة من الحتة دي و كنت خايفة على بابا يروح تحت يدو عشان كده بقيت اسألو عن طبيعة العملية وحققتا معاهو تحقيق دقيق لمن علي اخوي زهج مني واتحرج لكن الدكتور كان كوول شديد وماانزعج مني نهائي وكان مبتسم لي اغلب الوقت لكن انا كنت لايوقة وحسستو اني ماواثقة فيهو وده خلاني افكر اني جد كنت بايخة خصوصا لما تحاول تثبط همة انسان في وظيفة حساسة متعلقة بي حياة الناس، اخر شي سكتا ولا قلت ليه حتى مجرد شكرا ليك 🙄..
تاني يوم من الكلام ده انا مامشيت المستشفى كنت مشغولة ونهال الكانت هناك
بعد المغرب نهال جات راجعة البيت واتلاقينا وانا كنت ماشة المستشفى معاي ماما، كنت بلبس في اوضتنا جاتني وهي بتتبسم قلت ليها مالك خير قالت لي قبيل في المستشفى قابلتا دكتور قصي وماشفتيهو فرح لما شافني كيف لكن لما قرب علي حسيت بيهو انصدم واملو خاب  سلم علينا انا وخالتو حنان وطمنا على بابا وكان بعاين لي عين زول مستغرب يبدو انو انتبه يادوب انو في شخصين بحملو نفس الملامح ههههههه والحيرني قدر يفرز انو انا ماانتي وانتي ماانا
قلت ليها عادي ماكل الناس بندهشو اول مره وتاني عادي
قالت لي لأ يابت شكلو كان فاكرني اني انتي لما شافني  قلت ليها برضو عادي جايز ماكان فاكر انو عندي تومة واول مرة دخل الاوضة ماانتبه لينا لانو كل واحدة واقفة في مكان
قالت لي ياخ انتي لمن تتبالدي بتوصلي قمت البلادة قلت ليها نهال انا طالعة ماتأخريني ياخ وبعدين الفي بالك ده افكار نسجا مخك التخين ده
قالت لي : طيييب براك حاتشوفي افكاري صاح كيف، قلت ليها وافرض صاح اها انا ماشايفة غير إسلام
قالت لي بتحاكي فيني: ماشايفة غير إسلام ، تقول إسلام معبرك اصلاً
لذيتا وطلعتا خليتا تضحك وتضحك قلت ليها قبال امشي: هبلة دي امشي اتشطري انتي وخليني في حالي
مشينا بعد داك انا وماما، طبعا حبوبة ام راس ناشف مابترضي ترجع البيت الا اخر الليل قالت مابتفوت ولدا وراها وبابا حنسا انو تنوم في بيتا عشان يكون مرتاح ومطمن عليها لو ماكده كانت نامت معاهو في المستشفى كل يوم
مالقينا الدكتور قالو مر قبل نص ساعة ومشا، بقيت اشاغل في بابا كالعادة وماما تشيل وتحدر لي وحبوبة اخر شي قربت تضربني بي عصايتا قمتا احترمت نفسي وطلعت منهم قلت ماشة اشوف الدكتور وين وراجعة
واول مامرقتا برا تلفوني ضرب عاينت لقيتو إسلام قربتا اوقع التلفون 😅 ياخ مشاعري بتتلخبط بي طريقة عجيبة، المهم اخدتا شهيق وزفير عشان اهدى ورديت : الو
جاني صوتو الكسار: نورهان ازيك
رديت ليه بي جدية وانا اصلا نفسي اقول ليهو حبيب نورهان والجابو نورهان😅 قلت ليهو اهلا استاذ اسلام، قال لي لسه مصرة تناديني بي استاذ دي؟ قلت ليهو من باب الاحترام مااكتر ماانت زول قامة ومقامك كبير (غايتو جنس كسير تلج) حسيت بيهو ابتسم ماعارفة ليه ورجع قال لي: عرفت انو الوالد عيان الف سلامة عليهو  وانا اخر من يعلم والله ماكنت عارف معليش اعفي لي اني ماكفرت ليك قبل اليوم
قلت ليه: ماف اشكال وبشكرك كتير على ذوقك
قال لي ابوك مالو ان شاءالله بسيطة قلت ليهو عندو ضيق في الشرايين ومحتاج عملية قسطرة عاجلة
قال لي ربنا يشفيهو ويعافيهو انا رديت امييين يارب 😍 جد ارتحتا لمن اتكلمنا سوا وفضل يتكلم معاي اكتر من نص ساعة وبعدين ودعني وقفلنا، رجعت الاوضة استلمتني ماما وبهدلتني وحبوبة قالت لي طرتي وين يابت غايتو ناس بفصلوك من السعادة بي كلمة😒 يلا زاتو ناس المستشفى طردونا قالو مواعيد الزيارة انتهت في اللحظة دي علي اخوي اتصل وقال لي انا تحت انزلو سريع بوصلكم عشان اجي راجع لي ابوي
نزلنا كلنا ورجعنا معاهو وكان صابح بكرة الخميس العملية الساعة11 صباحاً..
تاني يوم من الصباح الباكر حبوبة داقة جرس وينكم اصحو انسلو ياعديمين الاحساس قومو اتحركو ياسجم الله يجازيكم الراجل مجدوع هناك براهو مستنيكم يااسرة السجم والرماد ووووووب علي انا منكم ماانتو السديتو شراينو ومصارينو الله ينتقم منكم وكيت كيت كيت ماخلت لي زول صفحة يرقد عليها والكلام ده كان الساعة6 صباحاً، شرايينو دي فهمناها لكن مصارينو مالهم كمان غايتو حبوبة دي مضحكة خلاص..
الساعة8ونص كنا في المستشفى ومادخلونا اساسا الباب قالو بفتح9 ونص😒 يعني حبوبة دي غايتو تعشق عزابنا زي عيونا، ناس البوابة ادوها كرسي مشكورين ونحن واقفين 😅..
اخيرا بعد سلو روحنا فتحو الباب ودخلنا وطبعا قالو العملية الساعة11 وانتظرنا لي 12ونص عشان دكتور التخدير حضرتو ماجا، اخيرا اتكرمو وجهزو بابا ودخلوهو غرفة العمليات، جا دكتور قصي ماشي على غرفة العمليات ومعاهو دكتور تاني ماشين وبتكلمو الدكتور المعاهو دخل وهو وقف يسلم على حبوبة وطمنا على بابا، عينو جات علينا انا ونهال عشان كنا واقفين سوا وشفت نظرة استغراب في عيونو عشان التطابق البيني وبين نهال  وابتسم لينا ولي انا بالتحديد حيرني في راسي ونهال لكزتني نظام قلت ليك بعرف يفرزك من بيناتنا، بعد داك واصل طريقو ودخل، كان نفسي ادخل وراهو عشان اشوف بعملو شنو في بابا المسكين، حاولت ادفر الباب براحة ولما فتح عاينت مالقيت شي لقيت ممر طويل واخرو في باب وفي باب ناحية اليمين قفلت الباب ورجعت مكاني، رامي قال لي كنت فاكرة حاتلقي غرفة العمليات؟ قايلاها سايبة كده؟ وممكن يخلوك تقيفي جمبها وتفتحي بابا كمان؟ حبوبة قالت ليهو خليها دي غبيانة 😒
مرت نص ساعة حتى ظهر عمو قاسم واسرتو وطبعا حبوبة ذلتو ذلة الكلاب كيييف يتأخر ومايشوف اخوهو قبال يخش للعملية الحياة من الموت مامعروفة وانت وانت وانت، لمن زهج ومرتو خالتو مها تلولو في خشما 😁
انتهت العملية ودكتور قصي طلع وبشرنا انها نجحت وحبوبة شكرتو وادتو علبة حلاوة كاملة ماكنتوش كمان🤣 مشا مننا وانا بعد شوية لحقتو ووقفتو: دكتور قصي لو سمحت
اتلفت لي وابتسم وقال لي: اتفضلي
قلت ليهو: شكرا ليك
قال لي: ياانسة نورهان ده واجبنا مابنشكر عليهو
اتفاجأتا طبعا وهو ابتسم لما شاف دهشتي وقال: بقدر اعرفك انا كويس ماتندهشي.. مشا خلاني في وقفتي ماوعيت الا ونهال بتقول لي واقفة مالك زي الهبلة متنحة براك قلت ليها مافي شي قالت لي بابا طلعوهو لكن ماخلو زول يدخل قالو ممنوع حتى حبوبة حانرجع البيت كلنا ونجي المسا دي اوامر الدكتور بس حايقعد علي تحسبا لي اي طاريء، بعدها مشينا كلنا مع بعض..
حبوبة الطريق كلو تهتف كيييف يحموها تحرس ولدا 😁 حاولنا كلنا نهديها وطبعا فشلنا، في عز الهرجي ده تلفوني ضرب عاينت للتلفون  لقيتو إسلام خفتا خوف وعرقتا وبلعت ريقي وصمتا التلفون، خفت يفكرو لي وماحبيت ارد وسط الزوبعة الحاصلة دي، بس دعيت متين نوصل البيت عشان اتكلم معاهو بي راحتي 😍
وصلنا اخيرا وانا نزلت سريع من العربية وفريرة جريت بيتنا فوق ماانتظرتهم، واول ماخشيت التلفون ضرب للمرة الخامسة وهنا رديت طوالي وقلت : الوو!
رد عليا بي صوت قلقان: نورهان وينك
قلت ليهو : اهلا استاذ كيفك
قال لي : ممكن تبطلي الكلمة دي؟
قلت ليهو كلمة شنو قال لي : استاذ دي قولي لي إسلام وبس ممكن؟
ضحكت في سري وتاني قلت ليهو حاضر
قال لي وين كنتي لي مابتردي
قلت ليهو الليلة كانت عملية بابا وماكنت خاتة بالي للتلفون
قال لي كفارة وحمدلله على سلامتو
قلت الله يسلمك قال لي ان شاء الله ماتعب
قلت لا الحمدلله مرت على خير
وبدون مقدمات قال لي قلقتيني عليك، ياخ انا قربت اخش بي التلفون واحضنو غايتو قلة ادب شديدة عارفة لكن للقلب احكام وفي الحقيقة لساني اتلجم وغلبني ارد قام هو واصل وقال لي بقيتي مهمة في حياتي يانورهان وعايزك تكوني قدام عيني على الدوام
قبل مااقول شي قاطعتني نهال ولقيتا فجأة لاصقة اضانا في تلفوني جات من وين مابعرف وطبعا سمعت الكلام وبقت تتبسم، لذيتا بعيد ورديت ليهو بي كل ادب الكون😁 كلامك اعتز بيهو شديد يااا
قال لي يامنووو😁احرجني لكن انا اصلا كايساها من زمان فقلت ليهو نظام خجلانة يا إسلام
ضحك ضحكة كسارة كده وقال لي برافو عليك إسلام وبس طيب؟ قلت ليهو إسلام وبس
ماقدرت انداح معاهو خارجتو سريع سريع وجاتني نهال تضحك وتقول إسلام وبس هااا؟
ومسكتها من رقبتا وبقينا نتعارك 😂😂 لحد ما ماما ندهت علينا : يابنات بطلو حركات الشفع دي وتعالو هنا دايراكم..
بابا رقد 6 يوم في المستشفى لحد مااطمنو تماما على صحتو وفي الايام دي قابلت دكتور قصي كم مرة وفي مرة قال لي منتظرك تعتزري لي لكن يبدو ماهاميك، قلت ليهو اعتزر؟ عشان شنو؟ قال لي عشان شككتي فيني واني ماكفء عشان اعمل العملية، قلت ليهو بس انا ماقلت كده قال لي: بس كان واضح انو ده رايك فيني، طبعا شميتو وزهجت منو وقلت ليهو مابعتزر على مجرد احساس وصل ليك مااكتر، كان بتبسم بي طريقة غياظة وانا تاني ماوقفت اكتر ومشيت منو..
يتبع.....