توأم روحي أنا

٣

ناداني بي صوتو خلاني ابتسم: نورهان!
اتلفتا ليهو وابتسمت تاني وقلت ليهو: ناديتني؟
اتحرك من وقفتو وجا ناحيتي ووقف وعاين لي مسافة وماقدرت اقرا تعابير وشو وراها شنو، قال لي: ماشة بي شنو لو مامعاك عربية تعالي اوصلك في طريقي
قلت ليهو: بشكرك كتير معاي عربية
واشرت ناحية عربية ابوي الكان راكب فيها علي اخوي، عاين هناك مسافة وقال لي بي سرعة بي طريقة حيرتني: ده منو
وقام اتنحنح وقال لي: اسف مامن حقي اسألك
سكتا مسافة وقلت ليهو : ده علي اخوي
وابتسمت وقلت ليهو مع السلامة يااستاذ
ومشيت ركبت مع علي، علوش بشاغل فيني قال لي متين جيتي وكونتي صداقات 😁
قلت ليهو انت عارفني ظريفة ومحبوبة وكده
قال لي ده منو الكنتي واقفة معاهو
قلتا ليهو ده مخرج البرامج
قال لي طبقتي المخرج شخصياً 😄
قلت ليهو كويس اتحرك يلا انت حاتقعد تحبني كده كتير؟
بقى يضحك وقال لي اهاااا خايفة ناس القناة يقولو انا حبيبك؟
قلت ليهو تحبك حبوبتي قسمة
اتحرك وقال لي اصلا بتحبني😜
غايتو غياظ خلاص مابراعي المشاعر 😂..
رجعنا البيت وانا الطريق كلو اتزكر فيهو وفي مناداتو لي نورهان نورهان نورهان 😍 ابتديت احب اسمي خلاص اكتر من اول..
علي شغال يقول لي خلاص حاتبقي مزيعة مشهورة وصورك تتنشر وتظهر صورك القديمة ويعملو مقارنة ويقولو مع تايد للغسيل😂
قلت ليهو وانا لاوية خشمي اطمن انا بستحمى بي تايد لي سنين تحسبا لليوم ده ومابلقو اي فرق😜
بقى يضحك بي اعلى صوت قرب يقلبنا ود هاشم المانصيح وكنت حااطلع من الدنيا قبل ماامسك المايك ياخ😬..
وصلنا لقينا الكل قاعد وبتونسو يمكن لحد رجعت بابا البيت، وقفنا سلمنا عليهم وبشرتهم بي انو الامور تمام لحد الان وغالبا يشغلوني 🎉🎊
حبوبة انعدلت في قعدتا واتمحنت وقالت لي: يعني ياالتومة دحين تاني نفتح التلفزيون نشوفك؟ قادر الله عاد تاني الجيران بعملو لي كينونة ماانا حبوبة المزيعة
واخدت ليها ضحكة كده هي وعلوش 😁، يعني انا ابقى مزيعة ومشهورة والناس يعملو ليها هي الكينونه؟ ☹️ والناس لما تشوفني يقولو دي حفيدت قسمة؟ 😁يلا مامشكلة المهم في النهاية يعرفوني..
قبل المغرب بعد بابا جا ختو الغدا والكل قعد وقالت كده حبوبة فكت لينا النبأ السعيد، الليلة المسا ماشه هي وبابا يتقدمو للعروس الجديدة، عاينت لي ماما لقيت وشها عادي مااهتمت وانا افتكرتها حاتزعل كونو بابا مااشتغل بي كلاما، عاينت لي خالتو حنان وخالتو عناية لقيتهم عاديين،  🙄 الراجل جايب الرابعة مازعلانين؟ شكلهم مااتفرجو في عائلة الحاج متولي كويس تلاتة على واحد يادوب اربعة على واحد حراااام🤔 تبادلنا انا ونهال النظرات بيننا وبين جميع الاخوان وكانت النتيجة شلل رعاش لانو ماقادرين نضحك بي صوت عالي، المهم حبوبة عاينت لي جميع الاطراف المعنية ولقت عدم اهتمام فمات الانتصار في عيونا، وبابا سعيييد تقول ود 20 سنه واول مره يعرس، ياخ اسره تجيب الجلطة فصلوني من احلام اليقظة ونسيت لحظتا إسلام  والجابو إسلام ..
المسا جا وحبوبة قشرت على سنجة عشرة قشرة تفهم بيها العروس و تقول على الطريقة التركية القديمة انا هنا السلطانة الام وبدير الحرملك كلو وولدي بكون السلطان هاشم 😁 وانتي مجرد حرمة من حريمو..
مشو هي وبابا وودعناهم كلنا بي عيون مبتسمة، مرقتهم بي هنا الخشوم اشتغلت بقينا نتراشق بي الكلام زي سهام الحروب القديمة كلام ماشي وكلام جاي🔁 ومابتسمعو شي اساسا 😁 غايتو كانو زعلانين من البحصل ده وخالتو عناية لحقتهم كم دعوة كده كارباااات..
بقينا قاعدين نتونس لي فترة طوييلة وخالتو حنان سوت شاي بي لبن معاهو بسكويت وماما كانت عاملة كيكة جابتا لينا وقعدنا وبقيت احكي ليهم بي يومي في القناة كان كيف وعملت شنو وجبت سيرة تقرير الكورة وماما قالت لي مابسألك مابسألك فايقة ورايقة وكلهم ضحكو علي😅
الساعة 9 ونص رجعو بابا وحبوبة واستغربنا هم اصلا طلعو 7 ونص🤔مالهم جو سرعة زي القشاط(في الهوكي الهوائي) جات حبوبة وعاينت لينا متجمعين وكانت لاوية بوزا يمكن واصل اضانا عديل، وشها مابتفسر وجات مرقت توبا وجدعتو لي نهال عشان تطبقو وقالت ليها طبقيهو ياالتومة سريع، وقعدت وعيونا بقدحو شرار، بابا وقف العربية وجا سلم والساعة مااستلمتو ليك: تعال اقعد لي هنا قدام عيالك ونسوانك ديل، انا الحاجة قسمة مرت الحاج علي على سن ورمح توديني لي واحدة متل دي؟ لا وكمان مطلقة؟ خلاص عدمن النسوان؟ كملو خلاص؟
خالتو عناية قالت ليها بي هجمة : مطلقة؟
ردت حبوبة بي غيظ:  وكمان عندها 3 شفع، بالله تربي العندك ديل ولا تجيب ليك شفع راجل تاني تربيهم ليهو؟ ،اخدت ليها نفس كده وقالت تاني بِس عليها خفة ولفة انت عارفني جني وجن المرا البتتخفف وتعمل ظريفة بِس وتاني بِس😒
خالتو حنان وخالتو عناية وحتى ماما فقعو الضحكة بي اعلى صوت والعجيب انو حبوبة ضحكت معاهم  وبابا زعل شديد وقال ليها: المشكلة شنو يعني كانت في تجربة وفشلت فيها خلاص بقت جريمة؟ حبوبة: هي فشلت بي قولك تاني البنجحا شنو ومعاك انت؟ لي قايل نفسك هارون الرشيد؟ شيل الموضوع ده من راسك قسمت بي الله تاني خشمك ماتفتحو وانسى المرا دي احسن ليك ولينا
طوالي بابا قام دخل جوة في اتجاه اوضت عمو ياسر وهو زعلان لمن متنفش، الليلة شكلو حايغضب على الثلاثي المرح وماحايمشي لي اي واحده فيهم😂.
حبوبة قعدت قصت ورصت من دخلو لمن مرقو والحصل شنو هناك ونحن قرقر كل شوية.. بعد داك طلعنا انا ونهال الشقة وانا جري مشيت رقدتا تعبانة كنت لكن نهال ماخلتني الا احكي ليها بي إسلام ، المشكلة احكي ليها شنو؟ ماقدرت اتغزل فيهو لانو ما شبه الهنود شبه ناس كده خلينا منهم عارفنهم انتو ، المهم حكيت ليها مقتطفات عنو وخلاص
اما هي حكت لي عن زولا داك وانو لما ليهو في خواجايا حنكا وعرسا عشان تديهو الجواز الايطالي، وجع قدمني ورجع😂غايتو الرجال ديل مرض بس علة فاقده الدوا، والغايظني انو نهال ماهاميها الحصل قالت لي في ستين الخلقو خلق غيرو، انا قلت ليها لو إسلام عرس اجنبية بسوي بيت بكا عديل والفراش اسبوع والحداد 6شهور، نهال قالت لي انتي يانورهان طرورة ساكت ماعندك شغلة قال بيت بكا قال😏 قلت ليها مالك انتي عشان ماحبيتي زول زي إسلام كده😍 قشطتني بي المخدة كم مره الحيوانة😒..
في الايام التلت الحكاية دي عينوني في المحطة أخيراً، بقيت امشي المحطة عشان البرومو بتاع البرنامج الحااقدمو انا ومعاي مزيعة تانية اسمها منى، واتعرفت بي معدة البرنامج اسمها علوية، ونستا كلها إسلام إسلام لمن قربت اسب ليها لكن مسكتا لساني، والغاظني انو قالت شنو؟ انهم اصحاب من زمان😠جد زعلتني، إسلام عندو صديقات كمان.. دي وقعت شنو دي بس ياربي😭 يلا زهجتني ليك زهج نظام بتخت في خطوط حمر تحت إسلام وعايزة توريني انو مافي لي😒، يلا صورنا البرومو بي إشراف إسلام وكانت احلى لحظات، كان دايما بحاوطني بي نظراتو وانا كنت بحس بي وجودو قبل لحظة دخولو علينا وقلبي بعمل بم بم بم، كان كلامو معاي قليل لكن نظراتو لي كانت كافية تطيرني فوق السحاب ، احساس صعب اوصفو لانو مابتقال والله، وفي يوم كنت طالعة خلاص لقيتو فجأة ماشي جمبي ظهر من وين ماعارفة😁 وقال لي : على مشية؟ قلت ليهو اي والله
قال لي: ممكن اوصلك؟
قلت ليهو مافي داعي تعزب نفسك
فاجأني وقال لي بي سرعة : في دواعي ماداعي واحد
ابتسمت ليهو وقلت : جد مافي داعي ياإسلام
مابعرف الخلاني اقول اسمو حاف شنو لكن تأثيرو كان عليهو رهيب وقال لي بي نفس سرعتو المعهودة: عازمك علي الغدا ممكن؟
طرقت راسي لي تحت واترددت وقلت ليهو: غدا برا البيت مابقدر لانو متعودين نتلم كل البيت علي سفرة واحدة، ممكن تخليها عصير؟
قال لي : زي ماتحبي
عارفة نفسي بينت خفيفة وماصدقتا لكن غلبني ارفضو يااخ😍
مشينا سوا وركبت جنبو وانا في قمة ساعدتي وبتبسم براي زي التقول مارقة مع خطيبي😁
مشينا كافي كده لذيييذ وتصميو جميل خلاص، قعدنا وطلب لي عصير مشكل قلت ليهو مابحبو ضحك وقال لي ميلك شيك طيب
قلت لي الويتر ميلك شيك فراولة وكتر الفراولة لو سمحت، ضحك تاني فيني وانا منحرجة من صراحتي الشديدة، غايتو انا نورهان دي ماعندي اي كنترول غبية وهبلة عارفة نفسي وكنت دايما بسأل نفسي ياربي حاانجح في قصة المزيعة دي؟ 🤔 العارفاهو انو المهنة دي محتاجة كياسه ولباقة وطريقة تعامل معينة وانا الحمدلله متسرعة شديد وصبيانية التصرفات😅
المهم قعدنا سوا وحاولت اكون هادية ومستكينة قدر المستطاع وبذلت مجهود في كده لمن عرقت والله لكن البركة في مزيل العرق حقي ماخلا ريحتي تفوح😂..
إسلام كمان حسيتو منفعل وفي صراع الجبابرة لاعب جواتو ياحليلو، اتونسنا ونسه عامة بعيده عن حركات عرفيني عليك ديك وبتحبي شنو وبتكرهي شنو ، هو اصلا عرفني خلاص بحب الكورة وبكره المشكل😂 مايفوتكم طبعا اتونسنا في الكوره وطلع بشجع السيتي🙄 يعني الديربي محمدنا محمدنا، ماانا بشجع مانشستر يونايتد!
بقينا نتناقش في مستويات اللعيبة 🙈 هو قال بعجبو حارسنا ديفيد ديخيا 😍 بي قلبي قلت ليهو لو النادي حقي والله اديكم ليهو مجاني عديل 😁 غايتو يانورهان شلاقة عدوك..
انا اصلا مافكرت سبب العزومة دي شنو وانا عادتا برتاب كتير، لكن قدام طلبو مااهتميت كتير وطوالي وافقتا.. خفة وشعري لكن ماتفة
بعد اتونسنا وشربنا العصير اكتشفتا انو الوقت اتأخر واني حتى مااعتزرت لي ناس بيتنا اني حاأتأخر 😬 سجمك يانورهان باري لي الغرام وحاتلقي قسمة واقفة ليك قدام، طوالي اتنحنحت وقلت ليهو لازم امشي بعد ده
قال لي ماف مشكلة يلا اوصلك قلت ليهو لأ بركب اي شي وخلاص انا اهلي مابرضو وممكن يزعلو لو وصلتني
قال لي اوكي طيب وطلع معاي ووقف لي تكسي ودعتو وشكرتو وركبتا مشيت.
الطريق كلو خايفة من الزفة 🙈 وقلبي يضرب، تقاليد العيلة مهمة عندنا شديد، وصلت ولقيتهم اتغدو وبشربو في الشاي ولي دهشتي الشديده مافي زول سألني ولا حتى حبوبة🤔اتضح انو عازرني عشان بقيت في شغل ماعندو زمن للرجعة، قلبي مااتحمل من الفرحة ولقيتهم خلو لي نصيبي وشكرتهم ومشيت المطبخ اكلت ومليت بطني وجيت راجعة لحقتا الشاي  وباقي الونسة.....
يتبع..