توأم روحي أنا

١٣

اتصل علي قصي طبعا😆 رديت ليهو بعد لعبتا بي اعصابو رديت بعد رن مسااافة وقلت الوو
قال لي والله حرام عليك يانورهان خافي الله فيني ياخي ماكده، ضحكتا ضحك وهو زاتو بقا يضحك معاي قال لي اضحكي ولا يهمك وانا ده لي الله وكسرة السوق، قلتا ليهو في دكتور بياكل كسرة؟ ضحك وقال لي اي الدكتور بشر برضو بياكل وبشرب، قلتا ليهو ماشابكننا ده بسمن وده بضعف وده بسد الشرايين وده برفع الكولسترول بقينا ماعارفين ناكل شنو، بس عداها لي ضحك قلتا ليهو قصدك شنو انا مسخرة هنا ولا شنو شابكني قرقرقر قال لي نورهان انا مابسيبك فاهماني؟ ياخ انا مفتون بيك، قلتا ليهو اعتقد انو قلتا حاتسد حنكك ده ومابتحنكني بي الكلام الحلو صاح؟ قال لي في مزيعة بتقول حنكك؟ قلتا ليهو المزيعة بشر برضو، وبقينا نضحك الاتنين، جد فرق علي ومن وقت طويل ماضحكتا من قلبي بي الطريقة دي❤️
بعد كده قمتا اختصرتو وقلتا ليهو تصبح على خير عايزة انوم ، قال لي نوم العوافي خلاص مع السلامه..
نمتا طوالي مافكرتا زاتو في شي..
الايام البعد العقد طقتني ليك ملاريا جهجهتني عديل لمن بهضرب يعني ازيدك ولا كفاك😆تعبتني شديد نسيت معاها اي شي، بقيت مابفكر الا في نفسي، اشتهيت العافية والله لقيت في الدنيا حاجات اهم من انو افتش للحب واحزن علي ماضاع، مافي احزن من انو تفقد صحتك وتبقى عالة على الاخريين😭..
قصي بقا يتصل علي كتير وبقيت بتونس معاهو وبغير لي مودي وبشجعني اتحمل رحلة العلاج وبنصحني، وتاني رجعت تجيني حالة قلق شديد وخفتا من البعمل فيهو واني بسرعة اتعودتا على قصي وكده خطر واقنعتا نفسي بي الهروب ، طوالي قفلتا تلفوني تماماً بقيت ماعايزه منو اتصالات ولا فيس ولا واتس وتاني رجعتا ابكي، في يوم جاتني حبوبة لقتني ببكي قعدت في قلب السرير وقالت لي عاد يابتي مشيتو المدارس وقريتو واتنورتو وبرضو مخكم فاضي، يابتي ده ابتلا من الله ما بتعرفي الابتلا؟ ده امتحان من الله عايزة تسقطي فيهو؟ مالك بتسوي سواتك دي راعي لي ابوك وامك ديل خايفين عليك والنوم مجافيهم، ابوك عامل عملية في قلبو مابتحمل الزعل، شدي حيلك وقومي اتنفضي واتحدي نفسك وقومي الرقاد ماشبهك ياالتومة طول عمرك زي عشوشة وودابرق مابتركزي في مكان، غايتو ضحكتني بي عشوشة وود ابرق ديل وهي زاتا ضحكت معاي😂😂.. قلتا ليها الله يخليك لي ياحبوبة ماقادرة اوصل ليك انا قدر شنو بحبك الله يديمك في راسنا ويديك الصحة وراحة البال، قالت لي انا بالي برتاح لمن اشوفكم كلكم مرتاحين ومبسوطين❤️❤️
حبوبة ادتني دفعة معنوية وبقيت عندي الرغبة اني اخف واقوم اتحرك وبقيت منظمة في العلاج الطبيعي اكتر من اول..
قصي بقى منقطع مني لأني مابفتح تلفوني قريب الاسبوع مابعرف عنو شي لحد ما في يوم لقيتهم جونا هو وامو وزلفى اختو، دخلوهم لي في الاوضة واتونسو معانا قريب ساعتين، كان بعاين لي بي نظرات عتاب كل شوية والتانية وانا ركبتا وش الغباء وعملت مافاهمة شي وزلفى ونهال يتوسوسو ويقرقرو برااحة ،عرفتها ادتا شمار قصي وجاني فضول اعرف قالو شنو😆.. بعد قامو خلاص ودعوني وطلعو قصي كان اخر واحد واتجرأ وماطلع معاهم بقا واقف في وشي نظام بستفسر العلاج كيف ماشي، الماعارفو هو انو قروب النسوان الطلع قدامو ده مفتحيين وطلعو مخصوص عشانو😂 غايتو الرجال ديل مساكين فاكرين انهم مقطعين السمكة ماعارفين انو نحن اسياد الرصة وواقعة لينا من يومنا😂.. المهم فاتو وهو عاين لي بي تأنيب وقال:  معقول كده؟ بتبالغي يانورهان بتبالغي
قلتا ليهو مالي
قال لي ليه قفلتي التلفون
قلتا ليهو ماشايف انك بتتحشر كتير
قال لي سألت ليه قافلة تلفونك
قلتا ليهو تلفوني وانا حرة ماعايزة افتحو
قال لي يعني افهم انك بتهربي مني؟
قلتا ليهو كأنو ماعندي غيرك يعني؟
ندمتا لأني قلتا كده الصراحة وحسيتو زعل من كلامي، سكت مسافة وقال لي خير يابت الحلال اهم شي راحتك وانا مابفرض نفسي عليك اكتر وازعجك، قال لي مع السلامة وربنا يشفيك تمام الشفا، لف وطلع وانا مديت يدي كأني عايزة اوقفو بس سكتا وماقلتا شي، خلااااص دبرس بي دبرسة وكرهتا نفسي شديد انا مالي بقيت لئيمة كده مع انو لما إسلام كان بشاكلني او بسمعني كلام مهين مابرد وبفتش العذر ليهو، قصي انسان مزوق شديد ماعارفة ليه بعاملو كده، ليه اصلا انا عايزة اطفشو والزيو بقو نادريين😢..
عدو كم يوم وبرضو مافتحتا تلفوني كبريائي مانعني طبعاً..
أخيراً العلاج نتايجو ظهرت وبقيت اقدر امشي علي عكازين بدل الكرسي لحد مارجليني يتعودو من جديد..
نهال زاتا خلتني من سيرة قصي وانشغلت في سيرة عادل😆عادل قال عادل سوا وعادل عادل، الله يعين عادل على نهال البلوة..
في يوم كنت راقدة قلبي عصرني قلتا افتح التلفون والبعمل فيهو ده تخلف مني والظاهر الضربة الفي راسي سببت لي تخلف عقلي😪، المهم فتحتو وجاتني كمية من رسايل هذا الرقم اتصل بك، اتزكرتا كان عندي رصيد قمتا فعلتا النت وفتحتا الداتا ورسايل الواتس طبعا تعجبكم قطر خاشة خصوصا القروبات، بعد وقفت فتشتا لي رسايل قصي بين الرسايل وكانو رسالتين بس، نورهان وينك، نورهان انتي كويسة؟ وطبعا التاريخ طول😢لقيتو خاتي صورة توأم بنات حلااااتهم 😍😍ومن غير وعي فتحتا الدردشة وفتحت الحالة عايزة اتشمشر كاتب شنو لقيتو كاتب الجملة دي( توأم روحك أنا لي بتعاين لي بعيد) بقيت افكر بتكلم عني ولا ده كلام في غنية عجبو، تاني قلتا في نفسي انتي انانية يانورهان عايزة اهتمامو لكن ماعايزاهو وانبتا نفسي كتير وقفلت بروفايلو وقفلتا الواتس ماقريت باقي الرسايل زاتو وفتحت الفيس 80 اشعار و6رسايل  😪 مامهم ولافتحتا الاشعارات لا الرسايل وبقيت اتصفح في الحائط وبفتش عن قصي وأخيراً لقيت اخر بوست منزلو قبل 7ساعات كاتب فيهو(لا سلام منك وما منك تحية للوراك خليتو عايش في الاسية ماحرام ياالفنجري ماتسيب وصية) تاني بقيت اسأل هل بقصدني ولا لأ😞 بقيت ماعارفة انا مالي ولي هاميني قدر ده واقنعتا نفسي اني غلطانة في حقو ولازم اعتزر🙂المهم لقيت عزر اقدر ارسل ليهو بيهو رسالة🤭 وبسرعة فتحت الماسنجر لقيتو اخر ظهور قبل 10دقايق طوالي كتبتا الرسالة( سلامات د. قصي اخبارك، كنت حابة اعتزر عن بياختي في اخر مرة اتقابلنا فيها ومعليش ماكان قصدي سامحني لو ضايقتك) وبعد اترسلت قلبي بقى يسوي بم بم بم انا ده شنو السويتو ده كده بفتح ليهو مجال انو يأمل فيني من جديد، بسرعة قفلتا الداتا وختيت التلفون
وبقيت متوترة نفسي يتصل ماعارفة لييه بقيت مترقبة يمكن نص ساعة وكل شوية اعاين للتلفون لحد ماخمدت اللهفة ونسيت الموضوع خصوصا لما جاني علوش يطلني ووقف يتونس من جمب الباب لأنو قال طالع وبكده نسيت قلقي.. طلع علي مني وانا غمضتا قلتا انوم شوية بس التلفون ضرب بالله لمن نطيت وشلتا التلفون وقع مني مرتين بي الربكة😂😂 في الاخير لقيتا نهال اختي قربت انبذا في الخلعة الدخلتا فيني دي فتحت ليها رغت معاي شوية عن عادل كالعادة وقفلت، قبل مااخت التلفون من يدي ضرب تاني ولقيتو قصي قلبي قال شح😁 رديت طوالي قال لي في زول برسل رسالة ويطلع قبال يجيهو الرد؟ حسي يمكن ماارضى اسامحك، قلتا ليهو وانت تطول يادكتور، قال لي مشكلتي معاك عويصة يابت هاشم مصيبتي خلتني احبك اسوي شنو لكن، سكتا مارديت قال لي للدرجة دي كلامي ماظريف؟ نفسي ترضي عني حبة بس قلتا ليهو ليه بتقول كده محسسني اني ملكة سبأ مثلاً قال لي انتي ملكة قلبي انا، اعلنتا استسلامي لهذا الشخص الخورافي😍 خووورافي اي كتبتها قاصدة ماتراجعو وراي 😝والله العظيم كسرني ياخ زول لطيف بشكل، قال لي ملكة في قلبي ونفسي تبقي ملكة في بيتي، قلتا ليهو قصي انتو عندكم اصول فرنسية او من اي دولة اوروبية؟ بقى يضحك قال لي لييه قلتا ليهو كلامك ده مااا كلام محلي 😆قال لي لييه نحن السودانيين اسياد الحنية والكلام السمح قلتا ليهو دقيقة دقيقة قلتا لي الرجل السوداني حنيين؟ والله الا كان مع اولادو🙂بقى يضحك ضحك هستيري ياحليلو، قال لي حلفتا يانورهان الا ماتبقى مرتي مابرضى زول تاني يتحصل عليك يامنيتي ورجع يضحك تاني، قلتا ليهو الا كان تخطفني لكن واعية كده مااظن، قال لي ابوك صحبي وعمك صحبي وحبوبتك صحبتي ونهال فردتي عديل وامك بتريدني وراي الاغلبية هو البمشي رايك مامهم بعد ده، قلتا ليهو افكر طيب قال لي محتاجة زمن قدر شنو قلتا ليهو اممممم يعني زي سنتين كده، قال لي سنتين ماكتار فكري براحتك، قلتا ليهو انت مالك لايوق كده مابتحس ؟قال لي انتي المابتحسي لو كنتي حسيسة كنتي تكوني راقدة جمبي حالياً ودبلتي في شمالك، قلتا ليهو لا انا بحب ارقد براي مابحب المشاركة، ضحك وقال لي سمح انتي وافقي وبجيب ليك سرير ملوكي بشيل تلاتة انفار تتدردقي فيهو بي راحتك وانا ده بنوم في الأرض 😂😂بقيت اضحك و خجلتا من نفسي عشان اتخيلتا المنظر🤭 قال مالك ضحكتي، قلتا ليهو ضحكت فيك، سكت شوية  حسيتو عرفني اتخيلتا منظرنا سوا، غير الموضوع وقال لي عرفتي الشمار؟ قلتا ليهو شمار شنو قال لي بعد المسلسل عمل ضجة خصوصا الحلقة الاخيرة قررت القناة تعيدو بي طلب من الجمهور، قلتا ليهو وانت عرفت كيف ماتكون شغال في القناة وانا ماعارفة، قال لي الفيس ده بجيب ليك اي خبر طاير، قلتا ليهو كويس والله، قال لي مالك بتقوليها ميتة كده يابت انتي ازهلتيني اقسم لك بالله ماشاءالله موهوبة بي الفطرة وعجبني دورك جداً خصوصا لما سحر قدرت تخدع سليمان وورطتو مع ناس موسى وعطا المجرمين واجبرتو يسلم نفسو للبوليس خوفاً منهم دي حلقة فظيعة كانت هههه، قلتا ليهو مزاكر كويس انت، قال لي مسلسل فيهو حبيبتي معقول مااشوفو ومااحفظ حلقاتو؟، قلتا ليهو نسيت وعدك لي؟ قال لي الوعد كسرتو لما انتي ما التزمتي وهربتي مني.. احرجني يااخ 😄..
كعادتي زغتا منو وقفلت الخط وختيت التلفون وانا مبسوووطة، ❤️ ❤️ اول مره احس بشعور زي ده بطريقة مختلفة عن اول مرة، شعور التعود والتعلق وده خلاني مقلقة، اتزكرتا حبي لي إسلام وخيبة أملي ورجع لي الخوف وشفتا في قصي خيبة جديدة ومعنوياتي هبطت😞
جاتني رسالة نصية عادية من قصي قال فيها(على فكرة ماناسي موضوع لحم الصيد وجبتو ليك والجمعة الجاية منظم رحلة ظريفة وعزمتا ياسر ومرتو ونهال وعادل وحاتجي زلفى اختي وعلي ورامي كمان وانتي طبعاً يامنيتي واهم زول في دنيتي بعد امي)..
فكرتا وقررتا ما أمشي، ماعايزة اشوف قصي ماعايزة اضعف، تاني فكرتا وقلتا بمشي لكن مابتجاوب معاهو لو حنكني زي عوايدو..
جات الجمعة وجهزنا للطلعة، لبستا بنطلون وتونك طويلة وظبطا طرحتي بطريقة تحفة عجبتني واتصورتا سلفي🤭 ونشرتها في صفحتي في انستجرام، شلتا عكازي وطلعتا، أخيراً اتخلصتا من عكاز وفضل التاني☺️جانا عادل ساقنا معاهو ياحليلو نهولة مانعنو منها مافي طلوع مع بعض براهم😄 في العربية قال لي شدي حيلك بسرعة مرتي دي لازم تكون في بيتي 😅 قلتا ليهو محتاجة عملية وقالو الا في القطب الشمالي ونحن مفلسين ادفع لي حق العملية وسوقا حلالاً بلالاََ 😄قال لي حقو اعمل بيك حادث تاني ياسوسة، كان بهظر وانا ضحكتا لكن قلبي غصاني لأنو استرجعتا شريط الحادث واللحظات المخيفة 😢.. علي ورامي جاهم عمو ياسر معاهو مهرة ومشو معاهم، اول ماوصلنا المكان صراحة عجبني شديد حتة كدة ظريفة مناسبة لي الرحل وقعدات المشاوي، وعيني جات في قصي جاي علينا، اندهشتا من شكلو شديد، لابس شورت مع الركبة لونو رمادي وتي شيرت بنفس اللون فيهو خطوط بي الاسود والابيض والشوز الاسبورت ولابس 🧢 كاب، كان شكلو مخلف تماماً ما ده قصي الدكتور ابو نضارات وهدوم منسقة ومتهندم😯 شكلو شاب عصري ولابس كاجوال ☺️..
جا علينا مرحب وسلم على عادل بي الكتف وسلم على نهال وجا سلم علي انا كنت مانزلتا لسه من العربية مستنية نهال تسندني، جاني بي ورا وقال لي دعيت كتير انك ماتتعززي وترفضي تجي كان يومي حايكون ناقص، نهال جات تتنحنح بي وراهو ، اتلفت ليها وابتسم وغمز ليها وفات يشيل مع عادل الحاجات الجابا معاهو، قالت لي احم احم سنة يا أنا، قلتا ليها ماكلو منك انتي والسوسة زلفى😏 نزلتني وهي بتضحك وبقيت منسندة على عكازي ومشينا محل مجهزين القعدة وقابلتنا زلفى بي السلامات والبوسات😁 ولقيت قصي مجهز لي كرسي بتاع رحلات عشان اكون مرتاحة وهم فرشو فرشات في الارض وجايبين مساند ومسافة وصلو ناس عمو ياسر كانو عادل وقصي ولعو الفحم وجهزو اللحوم للشوي وقال لينا قصي حابدي ليكم بي لحم الصيد عشان وعدتا نورهان اضوقا منو 😍، مهرة قالت عملت لينا الشطة الخضرة بي الفول المسحون(الدكوة) ، وعجبتني اللحمة وطلع قصي معلم في الشية😂 وعزاني عزة بحجت اني عيانة🤣والكل يتغامزو ويضحكو فيهو، غايتو ناس مزعجين بشكل😤😤..
خلصنا اكل وجا وقت الونسات الجانبية😂..
عادل قال لي نهال تعالي نتمشى شوية و نهضم،
عاينت لي نهال اياااك تتهوري😂فاتت القاهر مااشتغلت بي.. ياسر ومرتو حاكوهم وقال مرتي حامل لازم تريض رجلينا 😁فاتوو وخلونا نحن الخمسة علوش ورامي وانا وزلفي وقصي، رامي طلع الكشتينة وقال دور ١٤ منو يلعب، انا شبيت وقلتا طبعا أنا وزلفى قالت الله لي سنين مالعبتا عالي قال ماشي يشرب سجارة وعندو تلفون ضروري، انسحب الحيوان 😄 بقينا نلعب نحن الاربعة وكانت احلى اوقات، انا غلبتهم عشرتين ورا بعض🙂قصي حلف الا يغلبني ورامي ميت بي الضحك وزلفي مافاهمة شي شغالة تلعب بس واتغلبت في كل الادوار😂..
بعد انتهينا زلفي قالت دايرة الحمام رامي قال ليها ارح نفتشو وفاتو، بقى قصي مقابلني قلتا ليهو ماعندك مشوار هنا ولا هنا قال لي واسيب منيتي براها ماممكن ده☺️طبعاً كان بقول لي كده بي اسلوب كوميدي عشان يضحكني، بالجد كان زول حريف بالنسبة لي واحد قال ماعندو علاقات ولا حصل اتعامل كده مع بت😅بقيت اقول ليهو شكلك بتاع امور انت ياقصي، هجمني وقال الله😍الله أخيراً قلتي اسمي حاف ياربي ثبت قلبي خايف اتهور واخطفا واجري بيها اقرب مأذون، وانا دي ضحكت لمن دموعي جرو وبقول ليهو اسكت ياخ هس خلاص ماتضحكني اكتر 😂..
سكتا بي اعجوبة لأني لمن اخش في نوبة ضحك مابقيف تاني😆..
جو الباقين راجعين وبقينا نتونس وانا ونهال غنينا ليهم وعملنا فيها ثنائي النغم🤣🤣، جد انبسطا شديد ونفسياتي انتعشت شديد ، انتهت اللمة ورجعنا بيوتنا وماكنت عارفة انو راجياني صدمة جديدة..
صلينا المغرب في البيت لأنو اذن لينا في الطريق ونحن راجعين، قعدنا نشرب شاي المغرب وونسناهم بي الرحلة كلها وريم ورؤى زعلانات عشان ماسقناهم لأنو رامي حمامهم وقال الناس الماشين كلهم كبار
تاني انا حسيت اني تعبانة شديد لأني من فترة طويلة ماقعدتا كل المسافة دي واغلب الوقت بكون راقدة، استأذنتا منهم ومشيت الاوضة رقدتا طوالي ،شلتا تلفوني فتحتا بيانات الهاتف طوالي نزلت رسايل الواتس واشعارات ورسايل الفيس وخمسمية شي في بعض اي برنامج عندي رسل لي اشعار 🤯🤪، كالعادة فتشت لو قصي مرسل شي، لقيتو رسل لي في الواتس (وصلتي كيف) وتاني(كان احلي يوم من ايامي الحلوة ياريت نكررا ونطلع بس بدون مرافقين 🙂)، ابتسمتا وقلتا بيني وبين نفسي فايق ورايق، قفلتا من الواتس وفتحتا الانستجرام، كمية من اللايفات مدورة واغلبا فارغة مافيها عقاد نافع😄، انا بحب طبعا أقلب في الإكسبلور واشوف اخر الشمارات، وانا بقلب قلبي عمل شح😯شفتو، شفتا صورتو 😭
إسلام بي البدلة الفضية والحنة في يدينو وحاضن عروسو😭
دموعي طوالي رقرقو في عيوني، اتأملتا عروسو مسااافة واتأملتا السعادة الفي عيونو، ياها دي جود؟ياها دي الفضلا علي؟ دي الحاول يتجاوزا من خلالي وفشل؟ اللقطة ظاهر فيها حاضنا من خصرها وبعاين ليها وهي بتعاين للكاميرا، حسيتا بتقول لي شوفي يانورهان ده حقي انا وانتي مافي ليك😭، رميت التلفون جمبي وبقيت ببكي ،حاولتا مااطلع صوت لكن ماقدرتا كنت ببكي بحرقة شديدة، نهال جات عشان تنوم معاي لقتني عاملة مناحة وببكي،جاتني مخلوعة بتقول لي مالك؟ فيكي شي حاسة بشي؟
قلتا ليها من بين دموعي حاسة بي القهر يانهال قلبي محروق يانهال 😭
قالت لي بسم الله مالك ردي يابت
انا بقيت زي المجنونة بقول ليها عرس خلاص يانهال خلاص انكسر اي طريق للرجعة، عرس ونساني عرس ونسى نورهان الموتا الف مرة واخرتا اتسبب ليها في إعاقة 😭
فهمت اني بتكلم عن إسلام قالت لي نورهان قولي بسم الله الرحمن الرحيم، استغفري ياخ ده شنو الانتي فيهو ده، إسلام اختار طريقو واتجاوزك حقو تتجاوزيهو انتي كمان
رفعتا ليها التلفون وقلتا شوفيهو وشوفي جود السرقتو مني شوفيها شوفيها هدي😭 ، شالت التلفون مني وختتو وحضنتني وقالت لي احزني لكن ماتنهاري كده وبعدين إعاقة شنو الانتي فيها اي نعم مكسورة لكن كسرك جبر ومسألت وقت وحاتقدري تواصلي حياتك من محل ماسبتيها، بكيت تاني وقلتا ليها حياتي انتهت، فقدتا شغلي البحبو وفقدتا اي شي حتي إسلام انا عايشة لي شنو تاني 😭، فجأة نهال قشطتني كف لمن يدها وجعتا، خلعتني طبعاً وهي قالت لي لو حاتكون دي حياتك لي قدام انسي انك اختي وتومتي انا اختي فرفوشة وبتحب الحياة والناس، لمن ترجعي نورهان هاشم تومتي بعدها يمكن اتكلم معاك..
قامت خلتني وفاتت، كرهتها في اللحظة دي، لي ماحاسة بي النار الجواي لي مابتقيف معاي ودايما ضدي..
يتبع....