توأم روحي أنا

١٤

تلفوني ضرب لقيتو قصي، حسيت اني عايزة افضفض ليهو لأنو كلامو بريحني قد اكون انانية نسبة لي انو بقول انو بحبني بس تفكيري ماكان سليم، طوالي رديت ليهو وانا لسة ببكي، قال لي بي قلق مالك يابت، قلتا ليهو قصي لو كلمتك مالي  حاتفهمني لو شكيت ليك؟ انا مافي زول حاسس بي ولا بي حالتي الانا فيها انا متضايقة شديد  ياقصي اكتر مما تتصور😭
قال لي قولي لي وانا بسمعك بس تقبلي كلامي البقولو ليك بي صدر رحب بعد اسمعك، قلتا ليهو طيب بس ماتقاطعني لو سمحتا، ياقصي انا حالتي كعبة شديد، انا مكتأبة وفي حالة ماقادرة استوعب اي كلام ولا نصايح، انا فقدتا إسلام ياقصي خلاص عرس، عرس ونساني انا فقدتو للأبد😭، أنا فقدتا كل شي شغلي فقدتا نفسي فقدتا شغفي انا بقيت في الحضيض، نفسيتي متأزمة، مافي معني حقيقي لي حياتي 😭 انا فقدتا الثقة في نفسي تماماً حتى في الحوالي، نورهان الزمان بح راحت خلاص بقت منها نورهان المشوهة المنكسرة..
ورجعتا ابكي تاني😢، سكت مسااافة وتاني قال لي ماتبكي حتى لو حاسة بي كل القلتيهو ده، قشي دموعك يانورهان وماتستجيبي للشيطان، نورهان 
ماتستسلمي لي اليأس في ناس حالهم اصعب منك كتير في ناس في الحوادث بتشلو بفقدو طرف بفقدو عين بتشوهو او بفقدو حياتهم عديل، انتي الله نجاك من كذا موقف صعب حقو تفرحي وتشكريهو على انو انعم عليك، اما عن إسلام مابقدر افتيك ولا بقول ليك ماتزعلي لأنو من حقك تزعلي لكن اخدي مع نفسك وقفة وفكري هل إسلام كان بالجد معاك قلباً وقالباً؟ هل بستحق دموعك الغاليين؟ لو بستحق ابكي واحزني لأنو الفقد صعب ولو نورهان بتستحق منك توجعيها وتألميها بي اوهام برضو اعملي البرضيك، اما لو انتي زولة حربية ومقاتلة الضربة الما بتموتك بتقويك ومافي بشر بقدر يكسرك تاني..
فجأة شعرت بي استكانة عجيبة وسكتا مسااافة،قال لي فكري في كل الكلام ده وقرري انتي عايزة شنو ،يلا تصبحي على خير يا منيتي💞
بعرف متين يتكلم متين يسكت وبعرف كيف يغير حالتي بي كلمتين😇
قفلنا وانا ختيت التلفون ودموعي ماوقفت بس حسيت بي راحة، مابقول ليكم اني بطلتا زعلي على إسلام لكن بطلتا استسلم لي اليأس والوسواس من تاني..
في ايامي التلت فقتا لي نفسي، اولا صالحتا نهال ووعدتها ارجع زي أول، وبقيت مجتهدة في اني اركز نفسي كمزيعة وبقيت بتفاعل مع الجمهور من خلال صفحاتي في السوشيل ميديا والناس اتفاعلو معاي .. عملت لايفات كم مرة وخصوصاً بعد مامثلتا بقيت مشهورة والناس عرفوني ومتابعيني كل يوم في ذيادة..
ابتديت احب نفسي حسيت اني ممكن اكون مفيدة ممكن اكون انسانة ناجحة وعندي حاجة اقدما للمجتمع، استفدتا من كوني رغاية زي صابون فيري وعملتا لايفات ونسة مع الناس واتناقشتا معاهم في دوري في المسلسل والنقد كان جيد مع وجود بعض الناس بكسرو مجاديفك بي الكلام الشين لكن ولا مرا اهنت زول ومابرد اصلا كأني ماقريت..
💞💞💖💗💓💞💕💔❤️💕💞💓❤️💔
في يوم كنا قاعدين نتونس بابا وحبوبة وأنا، قلتا لي بابا انا حصيلة شغلي في القناة 7الف جنيه (مليون سابقاً 🙂) واخدتا عن دوري في المسلسل 10الف جنية كدور رئيسي وعايزاك تشيلهم كلهم
قال لي يابتي ده تعبك وكدك اشيلهم انا كيف
قلتا ليهو انت صرفتا كتير ومحتاج ليهم اكتر مني، انا بعد كلفتكم فوق طاقتكم ببقى انانية لو ماعوضتك ولو جزو بسيط
حبوبة قالت لي الله يباركك يابتي ويديك الفي مرادك، بي قلبي قلتا ليها مرادي خلاص شالو غيري واتهنى بيهو😔.. المهم اصريت على بابا وقبل في الاخير لأنو انا متأكده انو محتاج لي سيولة في اليومين ديل..
خالو فارس رسل لي زيارة اجي اغير جوو معاهم هناك في الإمارات ، طبعا هو متزوج اجنبية لكن مسلمة وعندو منها ولدين، السفر لي انا ونهال لكن نهال ماقدرت تسافر قام حول الزيارة لي علي اخوي😍شهر كامل برا السودان😎
نفس يوم القرار ده بالمسا اتصل بي قصي وبلغتو بي الخبر، قال لي حسي كان وافقتي بي كان سفرتك شهر عسل ماكان افضل؟ 😄 غايتو لايوق خلاص ، قلتا ليهو ابيييت ماموافقة قلتا ليك مالك ماعايز تقتنع انت، قال لي انا وراك يامنيتي مابستسلم
قلتا ليهو شكلك جد عبيط لكن 😝قال لي ابدا والله بس صدمني لوري هواك دشدشني مليون حتة، قلتا ليهو لوري؟ انت من زمن اللواري😂 قال لي مالك انتي انا زول قديم من ثمانينات القرن الماضي🤣نحن ناس لواري وقندراني وكارو بي حصان😛 انتو ناس مامي ودادي وياي وهاي، ياخ ضحكني ضحك لمن بطني وجعتني، قال لي لو عرستيني بضحكك كل يوم وببقى ليك اهبل وعوير واي شي دايراهو اها قلتي شنو ، قلتا ليهو قلتا تصبح على خير، قال لي يازاهية قلبي الشلتي جيبي يا لاهية عبثك بي لو سبتي😯طلع بقتبس من الاغاني زيي🤣قلتا ليهو انا حرامية قصدك، قال لي حرامي القلوب تلب 😂😂قلتا ليهو تلب كيف لكن وهو رجلينو مكسرة، قال لي قلب هوبا🤣 قلتا ليهو ياخ انت ماظريف ماتتظارف كتير بالله، قال لي انا؟ الله لي انا، انا المسكين وحيد من دون حبيبي هداك شايفو ومابي حتى يشوف عيوني الطششهم إعصار هواهو الهب شال عرش القلب الكان خفيف زي القصب طار لي بعيد، حبيبي رافض يستمع لي عزف مزامير الغرام الضاجة في قلبي الكبير، يوم طل بس كل المشاعر زغردن قالن هداك، ياقصي افرح ونط زي الطفل افرح وطير زي الفراش لي وردة حلوة عبيرا فاح..
اقسم بالله قلبي بقى مامستقر في محلو😍ياخ بالجد الزول ده كساااار وحناك وبعرف يقلب الموود في ثواني😚💞
قال لي يلا مع السلامة اشوفك على خير وودعيني قبال تسافري، قلتا ليهو طيب ان شاء الله..
قفلتا وانا نفسيتي فل 500 %☺️، جات نهال داخلة لي لقتني بتبسم براي قالت لي ايوا ايوا الله يذيدو من نعيمو الدخل البسمة في شفايفك ده، وغمزت لي🙂سوووسة البت دي كاشفاني الحيوانة...
في ظرف عشرة أيام ظبطنا امورنا وسافرنا أنا وعلوش اخوي الى الإمارات، ومانسيت اودع قصي طبعاً.. بقيت احن ليهو واحس انو بدخل البهجة في قلبي دايماً، مع ذلك كنت حريصة انو اواصل في رفضي ليهو مااضعف، صعب انو انقل من زول لي زول تاني حتى لو كان التاني جد بتحب😣..
وصلنا الإمارات تاتاتااااا، عالم تاني 😧المطار براهو جاب لي النفسيات، نحن ليه ماعندنا مطار زي ده😭😭 ده حال اي زول بسافر للمرة الاولى خارج الوطن الحبيب😃 الطريق كلو اعاين واقارن بين هنا وهناك، طبعا جينا بي مطار دبي وخالو في ابوظبي، طريق سفر تاني لكن قسما بالله ماحسيت، وين الدقداق، وين العربات النص عمر🤔وين وين ياحبي حارمني ليك يوميين ياحبي😂لازم اغني ليكم شوية طبعا، المهم فاتحة خشمي تلات ارباع المسافة وخالو شغال يوصف لينا ويحكي ويفتي، غايتو انا ماراجعة تاني😄 اي قولو ماوطنية مابهتم🤣وصلنا بعد رحلة طويلة وأخيراً قابلنا اولاد خالو ومرتو كيرا😇اولادو عفاريت صغار وشابكننا ليك انجليزي صرف غايتو الحمدلله بنعرف نتكلم معاهم والا كان منظرنا بيييش قدام الشفع ديل😂..
كيرا دي عالم براهو ياخ فاهمة فهم وانيقة اناقة وزوقا عالي😍طبعاً شغالة في بنك وبتصرف مرتب عالي🙄 وخالو مهندس طرق وكباري وشغلو تمام في البلد دي عايشين مرفهين، فسحونا فسح جميلة والله💞يلا كيرا اشترت لي ميك اب خيالي من سيفورا 😍ظريفة ياخ ماقصرت واصلا خالو اداها تشتري لي كمان اي شي انا عايزاهو حتى علي عزتو ☺️قالت لي انتي مزيعة ولازم تظهري بي مظهر حسن واهم شي البساطة خليك بسيطة لكن انيقة شديد، ظريفة ياخ حبيتا واتونسنا كتير، اشتريت هدوم من ريد تاق كنت بشوف سيرين عبدالنور ومريام فارس بعرضو ليهم 🙂عزيت نفسي واي شي اجيبو اصورو لي نهال واكاويها وهي تقول لي بالنص يعني بالنص🤣 ده غير هداياني طبعاً 🙄 غايتو لايوقة خلاص البت دي..
قصي كل يوم برسل لي في الواتس وبنتونس كتير، بقيت مهما احاول اتجنبو مابقدر، بحس انو يومي مابكمل الا لو اتكلمنا سوا، التعود مشكلة والله وانا لسه خايفة من كسرة جديدة، مامتحملة والله..
قصي جد غالي علي بقى وكنتا متمنياهو صديق اكتر من حبيب لكن هو ماقبلان ومصر يحنسني على انى اتزوجو، انا خلاص قفلتا باب الزواج والارتباط، عايزة اعيش حياتي وابدع في شغلي لو اشتغلتا من جديد ، عايزة يكون لي اسم معروف واكون محبوبة بين الناس، عايزة احقق ذاتي وطموحي، ماعايزة اكون اكبر همي اني احب واتزوج راجل، اقصى طموح يكون راجل؟، نوووو والف نووو ماممكن اسلم قلبي من تاني، من اليوم نورهان حاتحب نفسها اكتر وتثق في روحا وقدراتا، نورهان حاترفع سقف طموحا للسماء 😊😇..
  مع خالو فارس اتفسحنا إمارة إمارة أبوظبي العين الشارقة عجمان دبي😍 على قول الشاعر اموت واعرف في شنو في دبي 🤣 في كل خير ياأخوي خش بي رجلك اليمين ياكابتن😜 اتفسحنا في دبي فسحة عجب وأنا كالعادة فاتحة خشمي زي بوابة عبدالقيوم😲😅😂، ركبنا المترو وانا فرحانة زي الشفع لما يجربو شي جديد، علي قال لي الحالة التلفزيون ده فرجنا ونورنا كتير مالك مهجومة كده😄قلتا ليهو انا ماراجعة السودان حاأطلب لجوء 🤣🤣قال لي وتخلينا نحنا لمنو 😣قلتا ليهو حبوبتي قسمة في بتكفي وتوفي، وبقينا نضحك 😄😄، مشينا راس الخيمة والفجيرة، بعد رجعنا ابوظبي كيرا تطوعت وفسحتنا في الجزر الصناعية، اساميها براها تفرح، جزيرة السعديات، الماريا، الريم، جزيرة ياس😃 وحاجات تانية حامياني🤣المهم انا قلتا ليهم ماراجعة تااااااني😭
خلص الشهر زي القشاط جرا بسرعة وحان وقت العودة😣 في المطار جزمتي لاصقة في الارض قلتا ليهم شفتو؟حتى جزمي رافضة ترجع، بقو يضحكو فيني وخالو وعدني يجيبني تاني انا ونهال وماما..
🛫🛫🛫🛫🛫🛫🛫
في الطيارة عزبتا علي بي النقة لحد مانعستا ونمتا خليتو😁..
🛬🛬🛬🛬🛬🛬🛬🛬
وصلنا بحمدالله ولقينا بابا ورامي منتظرين، اتسالمنا وانا شابطة في بابا شديد وشلنا عفشنا ومشينا البيت..
في البيت كان المنظر رهييب واقفين كلهم ماعرفتا ابدا بي منو لكن بديت بي كبيرتنا حبوبتي قسمة 😘
وتاني ماما ونهال سوا والخ الخ..
المهم اتسالمنا زييين وصوت البوس عامل شغل رهيب 😂.. وصلنا البيت العصرية كده ولقيناهم مجهزين الغدا وقعنا في سفرة الرحمن، والله المنبر ده واحشني بي شكل😁..
المسا خلاص انفض المولد وانا جيت رقدتا في الاوضة واتغاتتا على نهال حلفت ماافتح شنطة الهدايا الا بكرة الصباح ودقتني طبعا🤣وقعدت مطتني قريب ساعة عن عدولي، تلفوني ضرب لقيتو حمادة صاحبي الانتيم، عرفنا رجعتا من السفر وضرب يسلم وقال لي انو عرسو بعد اسبوعين ولااااااااااازم اجي، مطاها لي كده عشان مااخرخر وارفض، قلتا ليهو في نصكم ان شاءالله انت هين ولا لين يا يابا 😄،..
بعد رقدتا اخر الليل بقيت افكر، اكيد إسلام معزوم وحايجي😣ياربي حااقدر اشوفو وما أتأثر؟
تلفوني زنا مسافة قطع حبل افكاري، لقيتو قصي
تقول بحس، بس من افكر في إسلام بظهر لي هو🙄 رديت عليهو وطوالي كابسني وقال لي مشتاق ليييييييك شوق خيالي يامنيتي ياسبب هناي وسعادتي💞💞
قلتا ليهو يمكن ماحتصدق لأني انا كمان مامصدقة روحي لكن انا اشتقتا ليك انا كمان😍 قررتا في اللحظة دي افتح ليهو الباب عايزة اتقوى بيهو واحتمي فيهو..
قال لي بريد السبعة جارات اموت انا في الإمارات 😂😂جد ضحكتا من قلبي ياخ زول funny بشكل.، قلتا ليهو انت دكتور دكتور ولا شماسي وسط السوق😄 قال لي جد بحب الإمارات الخلتك تشتاقي لي يامنيتي
قلتا ليهو اي والله لأنها غيرت لي الموود ياخ انا حااقدم لجوؤ سياسي وراحلة الإمارات خلاص
قال لي خلاص اوعدك شهر العسل نمشي الإمارات، قلتا ليهو قلتا ليك اشتقتا ليك ماقلتا ليك وافقتا على العرس😄 قال لي مادي اول خطوة في درب الموافقة انا عارف 😍
اتونسنا قريب ساعتين لحد ماقلتا ليهو انت ماعندك شغل؟ حياة الناس دي ماغالية محتاجة تركيز ولا شنو، قال لي بتعرفي تفصليني لكن ، خلاص مامشكلة امشي نومي تنومي جمبي ان شاءالله قولي آمين، جد لايوق اكتر من ملاح الويكة لمن تكون جديدة😅..
بحمد الله خليت العصاية الكبيرة وبقيت بتكل على عصاية صغيرة زي حقت الرجال ديك😁 بديت استنفار عام عشان اجهز لي عرس حمادة، ده اول ظهور لي حايكون واكيد بلاقي وشوش مألوفة وناس القناة اغلبهم حايجو اكيد، وكنت محتاجة انو إسلام يشوفني قوية وماهاميني فراقو زي ماهو ماهاميهو، لكن انا ضعيفة قدامو عارفة نفسي، بتمنى اكون هادية ومستكينة، خلاص دخلتا في حالة من القلق وبقيت افكر في المواجهة بيناتنا وانا جد خايفة، إسلام خش قلبي بقوة فهل الطلعة ساهلة كده؟ مااظن ياخ☹️ خلاص احسن ماامشي العرس😣 لأ امشي أحسن لكن مااقعد😧.. حالة صعبة جد خشيت فيها.. كمان من رجعتا وقصي محاصرني بي طلب الزواج، اعرسو وانا بفكر في غيرو؟ ماحركة ظريفة ، رميتا ليهو في وشو وبرضو مامقتنع، تاني رجعتا اقفل منو واهرب بس مااستسلم ياخ🙄
في يوم طلب من نهال واتفق معاها تجيبني عندو من غير ماأحس أنا.. نهال قالت لي ارح معاي المستشفى عم عادل عيان، قلتا ليها سوقي ماما بقت تتعابط قلتا ليها طيب.. مرقنا وقالت لي ماما ماشين لي زلفى عازمانا في الكافي 😁، مشينا بي تكسي وانا مامركزة في الطريق ماعارفاهو مودينا وين، وهي وصفت ركبت قدام ووصفت ليهو براحة وعارفاني طاشة شبكة، المهم مشينا ليهو في عيادة كانت حقت عمو دكتور قلبية برضو ومرات قصي بسد ليهو لو مسافر او عندو ظرف، الوقت ده مافي عيانين وفي فرقة عشان كده خطط ودبر مع نهال..
بعد وصلنا لاحظتا أخيراً انو ده مجمع بتاع عيادات مامستشفى، زرزرتها لكن قالت لي عادل قال يلاقوهو هنا عند صاحبو دكتور ونمشي المستشفى سوا، سكتا وسلمتا بي الامر  ودخلنا، قابلنا البت البتحجز التزاكر، نهال سألتا الدكتور موجود؟ عاينت لينا بي اسف مفتكرانا واحدة فينا عيانة بي القلب😄 قالت ليها انتي نهال؟ قالت ليها ايوة انا نهال، قالت البت اتفضلو الدكتور على وصول، وقامت فتحت لينا العيادة ودخلنا قعدنا، قالت لي نهال انا طالعة احول رصيد من البقالة القدام المجمع دي وبجي عايزة اضرب لي عادل، قلتا ليها يلا نمشي سوا ،قالت لي لا ماتتعبي نفسك مابتأخر، قلتا ليها لو الدكتور جا طيب، قالت لي قولي ليهو انا من طرف عادل، قامت بي سرعة فاتت وانا بقيت مامرتاحة للوضع عادل جايبنا هنا ليه وممكن كان ننتظرو جمب المستشفى🤔 بعد شوية اظن دقيقة كده انفتح الباب ودخل منو قصي😧 مبتسم ابتسامة اعرض من خط الاستواء😊، انا قمتا على حيلي طوالي وانا مهجومة وقلتا ليهو قصي؟
قال لي منيتي🙂 اتقدم وجا وقف قدامي وقال لي وحشتني العيون الحلوة دي
طوالي فهمتا الحاصل وصريت وشي بي غضب واتحركتا ماشه على الباب، ماوقفني وانا وصلتا الباب وحاولتا افتحو مافتح اتلفتا ليهو لقيتو جايي علي وبقول الباب مقفول، وقفتا وضهري على الباب وانا مفزوعة😨 جاني قرييب ووقف يعاين لي وختا اصبعو تحت حنكي وقال لي بي رومانسية ماتتصوري حالي عامل كيف خلاااص غالبني انتظر مشتاق ليك والله😳 خلاص قلتا ده داير يغتصبني ، كل الروايات القريتا وفيها اغتصاب بتقول انو حايغتصبني😱معقول نهال اتغشت بالطريقة دي وحاتضيعني😣 الليلة يانورهان حايغتصبوكي يابت امي 😭 حس بي مرتبكة بقا يضحك ويضحك ود ال.... ، خفتا اكتر من الاول
قال لي معقول يامنيتي دايماً ظالماني كده؟ تفتكري انا ممكن اعمل شي يضرك ياهبلة؟ انا ربنا استجاب لي دعاي كيف ارد جميلو بي المعصية واحاول اغضبو، ابقى جاحد وكافر لو عملتها..
انا فجأة ارتحتا وبقيت اضحك اضحك بي هستريا 😂😂😂😂😂😂
يتبع.....