توأم روحي أنا

١٢

طلع خلاني في حالة مايعلم بيها الا الله، بكييييت لحد ماالبكا بقا ماليهو معنى وبعدين استغفرتا في الاخير ودعيت ربي يطلع حبو من جواي دعيت اني استرجع حياتي القديمة وانسى كل شي حصل لي..
فتحتا الفيس وكتبتا بوست، عارفني طبعا عندي لي كل موقف مقطع بغنيهو 🙂 كتبت مقطع من التتر بتاع مسلسل عشم، كتبتا( تايهين نفتش في السراب المنية بس نصبح قراب).. بعد 10 دقايق بالضبط لقيت تعليق من قصي كاتب لي(عايشين حياتنا وبي الامل للفرحة نفتح الف باب) 😮 وااااي من الزول ده اي شي جايب خبرو؟ فهمتا قاصد شنو وابتسمتا ، ماقريت باقي التعليقات وقفلتا الفيس، جاني تلفون بعد شوية رديت قلتا الو، جاني صوتو طوالي عرفتو ده قصي واكييد قشار نهال ادتو الرقم، حيوانة خلاص عايزة تلصقو لي لصيق😆.. قال لي الو يابتنا ازيك
قلتا ليهو كويسة الحمدلله ،قال لي  عرفتيني؟ كذبتا وقلتا ليهو لأ ماعرفتك منو انت🤭
قال لي انا زول بريدك، بس خليني زي الدم الفي وريدك اجري في عروقك اروي جسمك وانعشو 😮 الود شاعر اظنو.. قلتا ليهو ماعرفتك برضو ،قال لي انا الشافك فقد احساسو بي الحواليهو نسا نفسو ، قلتا ليهو انت شكلك زول رايق وعايز تمطني بس، قال لي عارفك عرفتيني لكن الدلال عنوانك، قلتا ليهو اي عرفتك خلاص؟ قال لي لأول مره تقولي الحق في انو جارية ورا السراب، سكتا مسافة وقلتا ليهو ماشايف انك حشري زيادة؟ اعتقد اتناقشنا قبل كده مالك مصر انت، سكت شوية وقال لي ماعارف انا زاتي جبتا الجرأة دي من وين صدقيني انا اصلاً ماكده ولا عمري مريت بي كده اعرفي انو انتي السبب وده تأثيرك عليا، قلتا ليهو ابعد عني وانت تلقى نفسك رجعتا لنفسك، قال لي تفتكري؟ قلتا ليهو جرب وشوف، قال لي خلاص تصبحي على الخير ومع السلامة..
ماعارفة لكن ماكنت بفكر الفترة دي وبشوت الكلام شوت..
فعلا قصي بِعد ووقف جيتو لي ووقف رسايلو كمان، وانا كنت مشغولة مع احزاني وحالتي ومااهتميت..
تاني يوم فعلا بدا عرض المسلسل والناس حضرت اول حلقة وجاتني كمية من التلفونات من قرايبنا واصحابنا بهنوني والمستغربين مايدوك الدرب😄 مكتوب اسمي واضح الوجه الجديد نورهان هاشم😍.. شوية اتحمستا لكن طبعا احزاني اتجددت مع الزكريات بيني وبين إسلام واتزكرتا ايام التصوير وكنا قراب جداً، وجعني اني ماقدرت محيت الاسمها جود من حياتو ووجعني انو ماصارحني بي دواخلو وده اكد انو مشاعرو تجاها ماخمدت، فكرتا كتير انو كده احسن لي وانو سبنا بعض ونحن على البر بس قلبي ماراضي يستكيين😢
مرت الايام وكملتا الشهر وعملو لي العملية التانية ورقدتا ٥يوم وبعدها طلعوني البيت وبقيت قاعدة في غرفة جمب غرفة حبوبة تحت ونهال رحلت معاي عديل.. المسلسل عامل ضجة والفيس كلو بتكلم عنو واتزكر بعضهم انو انا عملتا الحادث واختفيت من القناة وكتار دعو لي بي الشفا العاجل.. حسيت بي فراغ بعد طلعتا البيت والكتب خلصتها وقصي طبعا مابقدر يجي البيت جا مرة واحدة وسأل مني لكن مالاقاني لأنو ملتزم بي موضوع البعاد واتكسفتا اطلب منو كتب تاني، لكن زلفى كل يومين جايانا ومقيلة يا تجي المسا، حسيت بي فرقة قصي ماعارفة لييه مابقول شعوري تجاهو اتغير لكن فقدتو برضو..
ماكان في احداث مهمة تتحكي والايام ماشة والعلاج مستمر واغلبو صعب جداً ووجع قلبي على إسلام ماخف وبسأل من اخبارو من حمادة من الشمارات البسمعا في القناة، مرت الشهور شهر ورا التاني لحد ماتميت 6 شهور وقصي بِعد وشبه انقطع عني لأن في الستة شهور دي شفتو مرتين فقط وواحدة فيهم صدفة كانت واتلاقينا في المستشفى.. بقيت اتحرك بي الكرسي المتحرك ،صدقوني احساس العجز ده اصعب شعور وبحيي اي زول قاعد على الكرسي طول عمرو لكن راضي بي امر الله والحياة في عيونو جميلة..
بعد طولنا في الملل ده والهدوء  جاتنا خالتو سارة بعد فترة في موضوع بتاع عريس لي نهال😄 قريب راجل اختا باش مهندس مدني وزول وظيفتو كبيرة وبصرف مرتب مغري، خلاف المواصفات دي كان راجل محترم شديد وبحلفو بي حياتو في أسرتهم..
نهال كانت مهجومة هجمة العدو😮😂 ضحكتا فيها ضحك انا وماكانت في يدها غير تقرصني بس، بابا رحب وقال يتفضلو والفيها خير ربنا يسويها..
اخر الاسبوع جا هو وامو وابوهو ومعاهم خالتو سارة واختا خالتو باسمة😊اسما عاجبني طبعاً..
حبوبة اترأست المجلس وطبعا كل الاسرة الكريمة موجودة، في الاول افتكرونا لملمنا ليهم ناسنا واتفاجأو انو ديل امات نهال برضو 😂،العريس اسمو عادل الانصاري😄، انا طبعاً مالاقيتهم لكن امو لما عرفت انو اخت نهال عاملة حادث قبال يمشو دخلت كفرت لي، لقت شبه نهال زاتا راقدة مكسرة في السرير، لكن خالتو سارة كانت مكلماها انو نهال تومة فما استغربت كتير، امو ظريفة غايتو اتأثرت لي شديد واتمنت لي اشفا سريع، نهال اسبوع مافاهمة شي مقهية ليل ونهار وخجلانة جادة😂لما اتصل بيها عادل اول مرة خجل شديد تقول مااتكلمت قبل كدة مع شاب😒😄، لكن يمكن لمن الموضوع بكون جادي بحصل كده والبت لمن تتكلم مع جكس عادي بكون في شعور دفين انو مامن قسمتا، شعور هي نفسها مابتكون فاكرة ليهو عشان كده مابتخجل منو وبتنداح وبتتونس لكن سيد القسمة بخجلو منو😁.. ماعلينا، في ظرف اسبوعين سألو منهم وفلفلوهم بعدهم بابا وافق ليهم بعد شاور نهال، عادل قال يعقدو ليهو لكن بابا ابا قال مافي لزوم للعجلة، لكن الود طلع عبيط نق في بابا لمن وافق مع انو نهال ابت وخافت غايتو الناس كلها وافقت في الاخير حتى حبوبة وقررو العرس خلال 5شهور ، والعقد خلال 10 يوم، نهال قالت ليهو مابعرفك كويس والعقد ده خطوة حساسة قال ليها خير البر عاجله وان شاءالله ماحتندمي ابدا وده وعد مني امام الله وبعد الله مافي شي، نهال بعد الكلام ده اطمنت واستكانت لكن قالت مابتعرس الا انا ارجع اقيف على رجولي واقيف جمبها وعادل قال ماف اي اشكال العايزاهو هو البكون😍عادل السرووور زول جنتل لأبعد حد واتصاحبنا انا وهو وطوالي بجي يزورني.. أو يزور نهال بحجتي انا🤣الود حرام مكسر ونهولتي تعجبكم وناسة وحناكة من زمان🤭..
انا بديت العلاج الطبيعي من فترة مع دكتورة اسمها وفاء، كانت النوع السكوت كلاما قليل وانا طبعا بتململ وقدر مافتحتا معاها مواضيع ماجارتني اخر شي سكتا والاكولة في لساني 😛 😄..
جا يوم العقد والبيت فاير فورة السنيين، نهال مشت الكوفير مع زلفى وكانت مكسورة الخاطر بسببي لكن طمنتها وقلتا ليها الليلة ليلتك انسيني وماتزعلي انا معاك بي قلبي وروحي وهدي معاك زلفى مابتحوجك لي وبتسد الفرقة، والله هي وزلفى بكن زيين لكن شاكلتهم وطردتهم في الاخير..
الاهل والجيران مقيلين وماماتي على قدم وساق واقفين جهزو ضيافة العقد من الالف للياء وغدو الضيوف القاعدين ماخلو شي، اخواني وقفو في صيوان العقد والامور ماشة تمام، انا قاعدة وسط الناس وطبعا كلهم بعاينو لي بي اشفاق لمن زهجوني😪، جاني تلفون عاينتا لقيت رقم غريب مارديت تاني ضرب مارديت بعد ضرب للمره التالتة رديت لمن لقيت الإصرار ده كلو، رديت قلتا الوو
جاني صوت حريمي بقول السلام عليكم، 😮 عرفتها طوالي ماعارفة كيف لكن صوتا بعرفو كويس؟ طلعت علوية طبعاً، رديت السلام وهي سكتت مسافة وقالت لي كفارة وسلامتك عارفاها متأخرة لكن... قاطعتها وقلتا ليها كفر الله سيئاتك وتسلمي كلك زوق، استغربتا اتصالا الصراحة وحاسة بيها منحرجة شديد ، عزرتها لأنو صعبة انو تتنازل وتتصل علي هي، قالت لي معليش يانورهان لو لسه زعلانة مني انا عملتا العملتو وقلتا القلتو لأني كنت عايزة إسلام لي انا وانتي سحبتي مني في غمضة عين، عارفة حركات البنات انتي لكن صدقيني إسلام سابك بسبب جود مابسببي  وجود دي اصلاً، قاطعتها تاني وقلتا ليها عفا الله عما سلف وإسلام أصلا صفحة وانقلبت في كتاب حياتي، ونصيحة مني لوجه الله الراجل البغير ميولو منك معناها ماليك من البداية، قفلنا من بعد بعد اتوادعنا وفهمتا انها خافت من قصة النفاق دي بالجد وبحييها على قوتا لأنو الاتصال والاعتزار دي خطوة صعبة شديد.. رنت لي فجأة الجملة القلتها ليها دي الراجل البغير ميولو منك معناها ماليك من البداية😮 الكلام ده مفروض افهمو انا واعقلو كويس، حسيت انو ربنا بدبر اي شي بي فهم معين مابنفهمو نحن البشر، اتصال علوية ده كان عشان افوق لي نفسي وافهم اني وهمانة ونسجتا من الهوا حبال دايبة انقطعتا ووقعتا واتكسرتا في الاخير😯سبحان الله وبحمده سبحان الله العظيم ☺️..
جا المغرب وفجأة نورو الزينة والمنظر كان رووعة😍، بعد المغرب مباشرةً جو ناس العريس وتيت تيت تيت والزغاريد.. استقبلوهم والنسوان جو زي 15 مرة فقط والرجال مايدوك الدرب 🙂..
عقدو الرجال وضربو السلاح طاخ طاخ ونحن سويناها بكا الكل دموعو في عيونو واتصلتا على نهال كلمتها وباركتا ليها لقيتا جايين في الدرب.. طبعا ماعاملين حفلة عقد فقط والعروس لابسة بسيط والعريس جايي عشان يلبسو الدبل وبس..
جات نهال ومن الشارع استلما بابا ويبكي معاها مااول فرحتو 😢 وعلي واعمامي ورامي حاوطوها وجابوها داخلة ومعاهم نسيبا وولدو الاصغر.. ماشاءالله قمر وانتو عارفين العروس حواليها الملايكة بتطلع حلوة، الله يحرسا من العين جات وقعدوها في الكوشة الصغيرة العملوها اخواني وجوها حبوبة وامي واماتي التانيات وزغردن ليها وباركو ليها وجو نسيبتا وخالات العريس وعمتو باركن وزغردن 😍 لكن هي بي عيونا بتفتش انا ويين وانا شايفاها من بعيد واستنيت الناس تخف عشان اقدر اتحرك بي الكرسي😢 هي شافتني أخيراً ولما باركو ليها نسابتا جاتني هي لحد عندي ووطت فيني واتحاضنا زيين انا مابكيت ماحاولتا افسد لحظاتا الحلوة وباركتا ليها وشاغلتها وخليتا تضحك، لأول مرة احس انو جات لحظة الفراق وانها حاتبعد عني وقلبي وجعني شديييييد😢..
مشت قعدت وانا مشيت وبقيت قاعدة جمبها والمضحك انو اخترنا نفس الالوان في الفستان والميك أب مع انو هي مكياجا حق خبرا بس انا ماهينة برضو🙄😁.. وطبعا شبهنا كالعادة كان سبب في شوو رهيب، وجا العريس بي الجلابية وملفح بي ملفحة زي ناس البطانة وقاااشر ماشاءالله، جا قعد وعاين لي وليها وقال وينا نهال مرتي فيكم، بقينا نضحك التلاتة وقلتا ليهو معليش ياعدولي امس كنت ماشة وانزلقتا وقعتا وقعدوني في كرسي عشان ضهري واجعني بقا يضحك ونهال قالت لي هوي اما ما مسمياهو عدولي اصلا🤭 قال خلاص مامشكلة بعرس دي سنة ودي سنة رايكم شنو، قلتا ليهو دي فتوة من عندك ولا شنو
نهال: هس هس خالتو روضة جات هس
وبقينا نضحك🤣
لبسوهم الدبل وكان الجو مليان فرح وزغاريد..
انفض المولد وعادل مارجع قعد يتونس مع نهال قبال اسيبا قرصتها قلتا ليها اتأدبي اوووعك ترخي ليهو اضانك سامعة😉 بقيت تضحك ضحك قالت لي ثمح ياحبوبة😆..
بعد ماما رقدتني في سريري واطمنت انو كل شي تمام مشت مني، فتحتا تلفوني لقيت رسايل في الواتس، لفت نظري اسمd. Qusay، ياااه زمن من اسمو في الدردشات، فتحت الرسالة لقيت فيها مبروك لي نهولا يارب تتهنى في حياتا
رديت ليهو الله يبارك في ايامك
مع ارسال الرسالة دخل اون لاين وتووش مشت ليهو طوالي رد لي جيت العقد قبيل وانا الضربت السلاح، رسلت ليهو الوش ده😳، ضحك وقال لي دي بندقية صيد حقت خالي وفيها طلق ماحية جبتها بطلب من ياسر
قلت ليهو بتعرف تصطاد انت؟
قال لي اكيييد ، حصل ضقتي لحم الصيد
قلت ليهو لا والله ماحصل
قال لي نحن طوالي بنصطاد، خلاص عازمكم رحلة نشوي ونغير جوو وبجيب ليكم تضوقو لحم الصيد
قلتا ليهو ياسلام شكرا بالجد الواحد محتاج للتغير بين فترة والتانية
رسل لي بعد دقيقتين وقال نورهان انا والله ماقادر على بعادي عنك انا بالجد بحبك واتأكدتا من شعوري بعد بعدتا واخدتا فاصل
اتوترتا انا وقريت الرسالة كم مرة وحسيت بي قلبي بدق، ليه مصر يختني في حتة ضيقة
رسل لي تاني وقال نورهان انتي العايز اكمل بيها نص ديني ارجوك اديني فرصة ارجووك
رسلتا ليهو بعد صراع مع نفسي وقلتا ليهو قصي انت فاهم انا مريت بي شنو لو قلتا ليك موافقة وجاريتك حااظلمك والله، انا مابفكر في إسلام حاليا وخلاص راح في حال سبيلو لكن الموضوع ده حايفضل عائق لي قدام وماحتثق فيني والشك بغزو قلبك من فترة لي فترة هل حاتتحمل كده؟ انت انسان اكتر من رايع وماتستاهل تعب القلب
كتب وقال لي نورهان انا زول كبير وصدقيني انا واعي لي الصورة ككل وفكرتا في كلامك ده قبال تقوليهو لكن عندي قناعة انو الوقت كفيل يخليك تتقبليني في حياتك ولو سمحتي لي حا أعلمك كيف بكون الحب الحقيقي الحب الصحيح والصحي لأنو الحب مابوجع الحب بسعد القلب وبكبر الامل وياستي مابطالبك بي اي شي خلي علاقتنا عادية حتى مابقول ليك اي كلام رومانسي خليني بس اكون قريب ليك
في اللحظة دي صحت فيني روح المغامرة وقلبي عمل بم بم بم واتنحنحتا وكتبتا ليهو طيب تمام
رسل لي سريع يعني شنو
قلتا ليهو طيب تمام حاضر اووكي🙂
رسل لي 😳😳😳
رسلتا ليهو وقلتا يلا سلام.....
قفلت النت وختيت التلفون وفجأة التلفون ضرب....
يتبع......