توأم روحي أنا

١١

طلع وخلاني براي، بقيت افكر لييه هو مصر يجي كل مره وإسلام حبيبي وروحي مافكر بس يطلني مره ليييه الغريب يحن والقريب يضن، تاني فكرتا هل إسلام هو القريب فعلاً ؟ ولا انا الختيتو في المكانة دي وهو اصلا مافيها وعمرو ماكان قريب؟ نفسي اشوفو واطمن عليهو نفسي نفسي😢حاولت انوم ماعرفتا، بقيت بعاين لي نفسي ككل، ختيت يدي في راسي وكان ملفوف كلو بي الشاش رجليني الاتنين في الجبص مجبرات يدي فيها الدرب مركب في الفراشة يدي التانية مبقعة لون بنفسجي من الضربات، صعبت علي حالتي شديد وبكيت تاني.. كان نفسي اشوف وشي في المراية عامل كيف، مافي اي مراية هنا؟ طال الوقت وحسيت بي الملل وانا براي وماف موضوع غير اني ابكي واتحسر على نفسي، ماما لما جات لقتني في حالة كربة عيوني ملانة دموع وانفي سايل😄 وببكي لمن بنهج.. جات علي ملهوفة وقالت لي نورهان حبيبتي ده شنو مالك بتبكي كده في شي واجعك؟ انادي الدكتور ولا الممرضة؟ مارديت الا بعد مسافة قلتا ليها حايعملو لي شنو حايطلعوني من الحالة الانا فيها؟ 😭، شالت طرف توبا وقشقشت لي وشي وانفي وهببتني شوية وقالت لي نورهان انتي بت عاقلة وكبيرة ومسؤولة، ده امر الله ومافيهو رجوع قولي اللهم لا أسألك رد القضاء ولكن أسألك اللطف فيه، شده وحاتزول يابتي ماتعملي عمايلك دي وإلا حا أزعل منك..
مشت نادت الممرضة جات  معاها وادتني مسكنات وقالت لي حاولي نومي وفعلا غمضتا مساااافة ورحت في النوم.. الكوابيس عزبتني عزاب مانمتا نوم مريح ابداََ😞..
الايام التلت كنت في حال كعبة شديد خصوصاً انو ناس القناة اقالوني كمان عشان حالتي مطولة وماحاأرجع لي حياتي بسرعة وماحابين يصرفو لي مرتبي في الفاضي من غير شغل😭😭، تخيلو في لحظة انا فقدتا كل شي فقدتا حبيبي وشغلي واتكسرتا وماحا أمشي قريب تاني وفلستا بي اهلي..
بقيت صامتة اغلب الوقت دموعي زاتا بقت مابتنزل لكن إكتأبتا شديد ونفسياتي محطمة، زلفى ود. قصي طوالي بزوروني ومرات خالتو يسرية معاهم، زلفى صاحبت نهال شديد وبقو قراب مننا..
د. قصي بعرف متين انا بكون براي وبجيني وبقعد يتكلم معاي كتير وانا مابستجيب كنت بزهج منو وكتير بقول ليهو ماتجيني تاني خلاص عملتا العليك بقول لي ماعلى كيفك طبعاً بجي يعني بجي🙂 ماقادرة افهم داير مني شنو الغياظ ده..
حالتي كل يوم بتسوء وحزني ماقل ولو شوية، عملو لي اول عملية في رجليني الاتنين وتعبتا شديد ماكانت ساهلة،  رجعوني العناية المركزة تاني لأنو ضغطي كان نازل شديد وحالتي ساءت خصوصا اني ماكنت باكل وجسمي ضعيف.. قعدوني يومين بعدين طلعوني غرفتي.. كنت واصلة اقصى درجات اليأس كنت حاسة انو حياتي حاتصعب وحااعزب اهلي بي سببي كتير ده انا احتمال ابقى معاقة ومااخف تاني😢.. حالتي ماكانت اعتراض على حكم ربنا قدر ماكانت حزن عميق..
في مرة كان بابا معاي وكنت مغمضة عاملة فيها نايمة عشان مااتكلم معاهو واشيلو الهم، جانا علي داخل وقال لي بابا بعد اطمن اني نايمة انو لقى في زول دفع حق شهر اقامة في المستشفى ورفضو يوروهو اسمو منو،بابا قال ليهو زول؟ فاعل خير يعني ولاشنو مافاهم، علي قال ليهو مااظن شكلو زول عارفنا كويس بس ماعايز يظهر في الصورة، بابا قال ليهو يبقى كتر خيرو شال مننا الكتير.. حسيت قدر شنو بابا محمول وقلبي اتقطع عليهو  وبقيت اتسائل منو الدفع حق اقامتي لي مدة شهر كامل🤔..
في يوم كان المسا ونهال اطوعت تبيت معاي ولما بقينا برانا بعد زمن جو د. قصي وزلفى ودي ساقت نهال برا قالت ليها عايزاك تعالي وفاتو خلوهو معاي، عاينت ليهو وقلتا مقصودة صاح؟ ضحك وقال لي اي لأني محتاج اقعد معاك بدون مايرخو اضانهم معانا، قلتا ليهو على فكرة انت زول اوفر شديد كلمتك اني ماعايزاك تزورني ماعايز تفهم لييه😕 قال لي يابت انتي مجنونة؟ ده انا شحدتا الله ياما يديني الفرصة دي عايزاني اضيعا؟ طبعاً لأ، قلتا ليهو فرصة شنو دي، قال لي انا ماصدقتا انو ربنا اتاح لي الفرصة تاني بعد ايقنت اني فقدتك بعد مااتخطبتي، بقيت اعاين ليهو بي اندهاش😮قال لي لما عرفتا انك اتخطبتي ايام عرس عمك ياسر احبطا شديد لأني كنت ناوي اصارحك بي شعوري وماكنت عارف انو في زول تاني في الخط ولقيت انو الباب اتقفل وسكتا وكتمتا جواي وبعد الحادث عرفتا انو اتفسخت الخطوبة وحسي لقيت الطريق سالك فكرك اخش ولا اسكت تاني واضيع فرصتي؟ سكتا طبعا قفلتا خشمي بعد كان فاتح زي باب القراش😁 ماعرفتا اقول شنو، قال لي مابقول ليك كده عشان ازعجك لكن لازم تعرفي انا بحس بي شنو تجاهك، طبعاً فاكرة اول مره شفتك فيها لما جيت اشيك على ابوكي وكنتي بتشاغليهو بي الكورة وميسي وبرشلونة، ابتسمت من جواي واتلفتا وشفتك، كنتي بالضبط القلبي بفتش عنها من سنين طويلة، انا عمري ماكان عندي علاقات ولا بعرف اتكلم مع بت، كنت خاتي في نفسي صفة واااحدة لي القلبي ممكن يدق ليها انو ماليها مثيل وانو من تقع عليها عيني قلبي بفر مني ويمشي ليها  وعيني وقعت عليك انتي، لقيت نفسي بقول دي هي ياها هي🙂 تاني مره شفتا نهال حسيت بي الفرح لكن لما قربت عرفتا انها ماانتي لأني شفت فيك حاجة مافيها هي حاجة مابتتوصف حاجة ماملموسة بس محسوسة، عرفتا وقتها انو انتو توأم متطابق لكن كنت قادر اعرفك بي سهولة كل مره بشوفك فيها..
هو بحكي وانا مزهولة لأنو كان بحكي عن نفس شعوري لما شفتا إسلام 😢معقول الشخص الوحيد الممكن يفهمني في الحتة دي يكون بحسها تجاهي انا؟ دي وقعت شنو دي..
قال لي انقهرتا لمن عرفتا انك اتخطبتي وانقهرتا اكتر لما شفت قدر شنو انتي بتحبيهو، اتمنيتك ترجعي لي وتبقي حقتي انا ودعيت انو ياربي انا بستحقها اكتر منو رجعا لي، قلتا كده لأني ماشفتا في عيونو حب قدر العندي تجاهك، قد اكون اناني لكن الانانية في الحب انا بشوفا مبررة، بعد قال كده سكت كأنو مستني اني ارد بس انا فضلتا ساكتة، حااقول شنو ولو انتو في مكاني بجيكم رد؟ بعد مده من الصمت رجع اتكلم قال لي نورهان انا بحبك ومامستني منك تبادليني الشعور وعارف انو صعب تتخذي قرار في ظل الظروف دي، ماطالب منك اي شي ولا بسألك تاني بس كان لازم اتكلم واعبر عشان تعرفي انا بكن ليك شنو جواي، وبكده تعرفي اني حاافضل ازورك واطمن عليك عشاني عشان اكون مرتاح وانا شايفك بتتحسني..
كلامو ذاد المي اكتر واكتر وفضلت صورة إسلام حاجز جواي، غمضتا عيوني ومااتكلمتا، قال لي كفاية عليك كده حاامشي واجي مره تانية، مافتحتا عيوني وبعد مسافة بسيطة سمعتا الباب بقفل، فتحت عيوني ودموعي جرو طوالي، ياخ دموع الحزن دي جد حارة بتحرق في الوش 😣بعد شوية جات نهال داخلة لقتني ببكي قالت لي اها قصي قال ليك شنوو بكاك😄صريت ليها وشي وقلتا ليها اخ ياسوسة عاملة علي رباطية انتي وصحبتك واخوها؟ 😒قالت لي يابت الزول ده شوية ويجن بي وراك، انا كنت شاكة فيهو زمان لكن زلفى اكدت لي شعوري ده لأنها راقبتو كتير وفهمت الحاصل والاكد ليها هي حالتو وانتي بتصارعي الموت وغايبة عن الدنيا، دي حتى خالتو يسرية فهمت الشي ده 😄،طبعا نهال خلعتني بي خالتو يسرية دي كمان😮 عاينت ليها بي ذهول وهي بقت تضحك فيني وقالت لي اي والله زلفى قالت لي انو هي كلمتا بي الحاساهو وقالت ليها اظن اخوك حابي بت الناس ياحليلو، وطبعا هو مافط يوم طول الاسبوعين الرقدتيهم في العناية المركزة كل يوم بجي وكل يوم بجيب امو واختو معاهو مازي ناس😒..
قلتا ليها مابنفع يانهال انا قلبي مشغول بي غيرو مامن الساهل انساهو انا بحبو بجنون😢قالت لي الجن الكلكي بتعرفي؟ قلتا ليها يكلكلوك من اباطاتك🤣🤣بقينا نضحك لمن حسيت بي وجع قمتا سكتا وقلتا ليها هس ياخ ماتضحكيني،قالت لي انا عايزاك تضحكي دايما حتى لو اتوجعتي البكا والدموع مالايقات عليك😊..
قلتا ليها د. قصي انسان كويس انا مابنفعو ماعايزاهو يأمل في الفاضي، قالت لي يعني لو قلتي ليهو ماتأمل فيني حايسمع كلامك؟ ماظنيت،
الزول ده شارييييك افهمي ،قلتا ليها انا لكن مابحس تجاهو بي اي شعور لي اكذب علي نفسي وعليهو، قالت لي هو فاهم الحتة دي اعتقد لكن ماظنيتو يستسلم، قلتا ليها انتي بس ماتساعديهو ولا تديهو المجال فاهمة؟ عارفاك انا حيوانة، قالت لي الله نجدك من المخدة ياكريهة وإلا كنت جلدتك بيها جلد نضيف😄قلتا ليها ماتضحكيني ياكلبة هس وطيري اتخمدي ومن بكرة ماما ترجع انتي مالازماني نوهائي قالت لي نوهائي نوهائي؟ قلتا ليها نوهاااااائي..
وطبعا مامحتاجة اقول ليكم انو قصي او د. قصي بتصيد الفرص كل يوم وبجيني وبقول ليهو ماعايزه اشوفك ماتجي ارجوك بقعد يضحك وفي مره قال لي وافوت علي المنظر ده؟ لايمكن ده انا حتى مفكر اصورك وانشر الصورة عشان الناس تشوف نورهان المزة بقت كيف😆 قلتا ليهو ماتحترم نفسك مزة دي شنو😒قال لي ماانا القلتا الناس هم البقولو كده.. في مره كان فيها معاي عاين لي بي حزم و قال لي انتي عاملة مندبة وحزينة عشان شنو والانتي بتفكري فيهو مابستاهل منك دقيقة تحزني فيها، قلتا ليهو انت مافاهم شي رغم انك بتقول بتحب مفروض تحس بي الانا حاساهو أنا حبيتو بدون شروط زيك تمام وانت أدرى انو مامن الساهل اشيلو من حياتي، قال لي انا عرفت الحصل كلو وشايف انو ماكان في حياتك من الأساس،قلتا ليهو وعرفتا من نهال ولا عمو ياسر😣 هم مافي نفس موقعي في القصة، اتجاهل كلامي وواصل كلامو وقال لي نورهان صدقيني لو قعدتي تندبي وتحزني حاتضيعي لحظات من عمرك مابترجع تاني فوقي لنفسك، مابقول كده عشان تحبيني أنا، انا ده انسيني حالياً بس فكري في نفسك، قلتا ليهو انا افكر في شنو ولي شنو انا بقيت بقايا انسانة ماأكتر الدنيا ادتني ضهرا، قال لي اديها ضهرك انتي كمان ماتعبريها وبراها حاتجر واطي معاك، كنت بتغاظ من كلامو وبزهج وهو بنبسط لما يشوفني مزعوجة منو، زول غريب اغرب من غريب🙂.. لقيت نفسي بحكي ليهو كل الحكاية من الاول من ايام كان إسلام الجندي المجهول، كان بسمعني ومابزهج مع اني حبيت اطفشو بي الطريقة دي لكن مابعد، كان عارفني مكتأبة ووضعي صعب، قال بي انتي محتاجة شي ينسيك الانتي فيهو ويغير ليك الموود حبتين، وفي الزيارة الجاية جاب لي كتب قال لي اتسلي اقري وكبري ثقافتك يامزيعتنا، قلتا ليهو مزيعة بدون شغل😢 قال لي بكرة تخفي والقنوات تتهافت عليك خصوصاً انك موسوعة كروية😆 ضحكتا غصبا عني وهو ابتسم وقال لي بس ياها دي نورهان الاصلية اطردي نورهان النكدية البكاية دي من جواك..
اهلي حسو بي اهتمامو بي واتاريهو كلم عمو ياسر انو دايرني وعمو كلم بابا وماما وحبوبة كمان😮 انبسطو شديد ماهو حبيب العيلة بقى، لكن مافيهم زول جاب لي سيرة سكتو وكفو على  الخبر وابور.. زول حاسب خطواتو كويس وعارف هو عايز شنو..
رجعتا استخدم تلفوني وخشيت الفيس من تاني، لقيت منو طلب قبلتو مابعرف ليه مع اني كنت ماطايقاهو بس بحب كلامو بخدر علي كتير..
خشيت بروفايلو وشفت بوستاتو وصورو وحتى اصدقائو، بقيت الوم نفسي انا ليه حشرية كده واصلا انا ماعايزة افكر فيهو🙄.. بالليل رسل لي مسج في الماسنجر بشكرني انو قبلتو ،قريتا لكن مارديت وعارفة انو عرفني قريتا وعارفني متصلة حالياً بس ماذاد كلامو معاي،  لقيتو نزل بوست كاتب فيهو : أطلت في سماي نجمة بريقها الساطع عاد من جديد فما اسعد قلبي بها..
قلبت في القروبات شوية ويدي اكلتني رجعتا اشوف التعليقات على البوست حقو، عبارة عن تشغيلات لأنو المعنى واضح اظن يعنى انا حابي جديد 😄، قفلت الفيس عشان مايشوفني داخلة وختيت التلفون بقيت اقلب في الكتب عايزة اختار واحد اقراهو، عاينت لي ماما لقيتا نامت، بديت اقرا في الكتاب وشداني لي درجة اني صحيت لي قريب الفجر وتاني غلبني النوم نمتا.. ماصحيت اصلو من التعب ولا شفت الجا منو ولا القاعد منو ماصحاني الا آذان الضهر.. صحيت مالقيت زول اظن ماما مشت تصلي، اتمنيت اني افضل نايمة علي طول ماعايزة افكر بقيت، الالم براهو مشكلة والله واكتر شي زاعجني عدم الحركة كل البقدر اسويهو انو يردفو لي المخدات عشان اكون قاعدة😢..
مرت الايام بي الطريقة دي والكتب بقت تفرق علي وبخش الفيس اتصفحو وبصادف بوستات قصي واقراها من غير مااعلق ولا حتى لايك 😆حقارة انا عارفة، ونهال جابت لي ذاكرة تلفون فيها قرآن عشان اسمعو مدام انا مابقدر اقرا من الكتاب لأني ماعلى طهارة..
وبعد طول غياب نزلتا بوست وطمنتا ناسي علي صحتي وشكرتا كل السأل مني وفقدني..
وفي ليلة من الليالي ماكان معاي زول ماما ماجات من البيت لسه، كنت بقرا في كتاب لما الباب دق وافتكرتو قصي جايني وجايب الكتب الجديدة، قلتا اتفضل وانفتح الباب ودخل منو إسلام 😮😮....
بعد فقدتا الأمل من شوفتو جا وهدا واقف قدامي، الغريب اني مافرحتا ماسبقتني اللهفة زي ماكنت متخيلة، اتقدم براحة وقال لي السلام عليكم
أنا :عليكم السلام
إسلام : الف سلامة عليك
أنا :الله يسلمك
إسلام: كيف بقيتي
أنا : زي ماشايف لكن الحمدلله على كل حال من الأحوال
إسلام : ماقدرتا اجي قبل اليوم، ماقدرتا استوعب الحصل للان، بعتزر عن الحصل ليك ماكان قصدي
أنا.........
إسلام : جيت الليلة عشان عايز ارمي كل شي ورا ضهري واقلب الصفحة دي من حياتي، جيت اقول ليك اعفي لي وانسي الحصل كلو وشيليني من حياتك يانورهان
أنا : لييه سبتني وحيده اواجه الالم والحسرة
إسلام: انا حاأتزوج جود وحابب انك تعرفي مني انا اول زول عشان مااطلع ندل وقليل الأصل..
انا ماقلتا ليهو اي كلام زيادة صدمتا الصراحة ده ماسمع تأنيبي ليهو، قال لي مع السلامة يانورهان وارجو انك تخفي وتبلغي تمام الصحة، وقبل ماامشي عايز اقول ليك المسلسل حايتعرض بكرة في القناة، مبروك 🙂، مارديت ليهو وهو إبتسم إبتسامة هزيلة وقبل علي الباب وطلع فات😭😭😭😭😭😭😭😭😭😭😭😭😭
يعني جا عشان يريح ضميرو ويأكد لي نفسو انو ماغلطان، مااستوعب لومي ليهو
يتبع.....