توأم روحي أنا

٢

ياحنان يابت الجبنة وينا مالك بتتسكعي كده
انا قلت ليها: حبوبة انتي مالك شارباها حسي بتحميك الغدا نحن بقينا العصر، عاينت لي عين كده طوالي سكت وقعدت في مكاني، جات خالتو حنان بي الجبنة وختتا ليها وبعد شوية جا علي داخل قال السلام عليكم طوالي اتغير وشها وابتسمت وقالت :صلاة النبي تبارك الرحمن اهلا ياابوي تعال اتفضل، نحن ردينا السلام وهو خش سلم ليها في راسا وسلم على امو وجا قعد جمبي وقال لي نورهان باشا ازيك، حبوبة قالت لي هو دي انتي؟ انا ما بعرفكن كان انتي كان اختك وبعدين مافارقة ياكن نفس الخلقة، 😂 انا وعلي ضحكنا وخالتو حنان طبعا ابتسمت بس لو ضحكت حاتطلق باقي اليوم ده، انا زفوني لكن علي قالت ليهو خش ارتاح ياولدي قال ليها وانحرم من قعدتك ياحبوبة؟ مابقدر ، طبعا ابتسمت للضرس الورا، حناك ياعلي ياود ابوي 😁، بعد ساعة وصل البابا هاشم ومعاهو نهال اختي حبوبة قالت : غايتو يافريده ماكسبتي فينا خير بي البتين ديل بالله شوفتن تخوف 😒، بابا ضحك ونهال عاينت لي وهي بتتهز من الضحك داخليا لانو لو ضحكت جايز تبيت في المستشفى باقي اليوم ده، ممنوع الضحك على كلام بتقولو حبوبة  والا تبقى دي قلة ادب وعدم احترام.. يلا بابا قال ليها تعالي دايرك في موضوع وساقا ودخلو اوضتا ونحن الشمار حارقنا شديد، وبقينا نتلفت كلنا، المهم حسينا بي فك الحصار والعندو ضحكة كاتما طلعا بي استمتاع وبعد شوية نسمع ليك ايووووي  يوووووي يوووووووووي ، زغروده شقت سقف البيت..
بعد سمعنا الذغاريد بقينا نعاين لي بعض عرفنا في خبر اسعد حبوبة ياربي شنووو، علي قال لينا يابنات الا كان واحدة فيكم جاها عريس، نهال ابتسمت وقالت بكون انا كوني الكبيرة وكده قلت ليها ماتخجلي من اخوك القاعد ده شوية احترام يعني، علي ضحك وقال لي دي ترب حبوبة مابتحترم زول ، وبقينا نضحك التلاتة، خالتو حنان قالت لينا الله يستر ما يكون في كارثة وجايانا، وقامت تنادي خالتو عناية عشان يختو الغدا بعد ده وخالتو عناية اصلا جات براها الشمار جابا😁وسألت في شنو ان شاءالله خير، خالتو حنان قالت ليها بري ده هاشم جا وطبق امو وخشو جوه والحاجة بقت تزغرد، خالتو عناية عاينت ليها عيون زول مامطمن وفاتن المطبخ..
ماما جات داخلة علينا لقتنا  ملمومين واخواني التانين جو قعدو، قالت لي نهال ابوك جا قالت ليها ايوه وحاليا في اجتماع سري مع ع.. قربت تنطقا😂 قرصتها ليك لمن نطت وقالت ليها مع حبوبة حبوبة جوه
ماما قعدت ورفعت كتافينا بعدم اكتراث، اجي ياماما قالت ليك اجتماع مغلق معقول ماقلقانة؟ بري منها ماما دي عجيبة خلاص😂..
بعد قرابة الربع ساعة بابا وحبوبة جو مارقين والغدا اتختا وقعدنا، طبعا كل الاسرة السعيده دي بياكلو مع بعض بقيادة بابا وحبوبة، في التايم مظبوط عمو ياسر وصل واخد ليهو زفه من حبوبة على التأخير تقول شافع صغير.. بعد قعدنا كلنا بحمدالله حبوبة ادتنا الخبر الزين؛ بابا قرر يعرس للمره الرابعة😂
ياخ قربنا نضحك كلنا لكن كتمناها وبقينا نتبسم لي بعض وماما لوت خشما لي حنان وحنان نقلتا لي عناية اللي قالت بي دهشة: عرس تاني ياهاشم؟
حبوبة قالت ليها اكيييد انا ولدي سيد الرجال وكل النسوان يتمنوهو، بلعتا الغصة في حلقها😁..
خلاص الاكل غلبنا و الكل بقو ينقدو بي طرف الاصابع وماما طبعا مابتهاب حبوبة وقالت لي بابا : العروس من وين المره دي عزلتا ليك خالتي قسمة؟
حبوبة ردت طوالي: برررري يختي جابا برااااهو الله يستر عارفاهو مابعرف يختار 😏
طاااااااخ قصف في منتصف الجبهة😂 كونو بابا اختار ماما براهو.. انا اللقمة شرقتني من كترت ماعصرت الضحك ونهال دموعا في طرف عيونا من عصرت الضحك وماصدقت اني شرقتا طوالي جرت تجيب موية، حبوبة اتحولت لي وقالت: انتي لوكي كويس مستعجلة فوق كم 😒
بابا وعلي ورامي وحتى عمو ياسر قر قر قر مافي زول بسألهم😤
بابا قال لي ماما انو اتعرف على العروس من فترة.. وطلعت العروس بت شابة عمرها30 سنه ده المفرح حبوبة قالت يجدد شبابو 😂 اجي يا شبابو؟ طيب وشبابو القاعدين ديل مااولى هم بي العرس ده؟ عمو ياسر السادين نفسو ده مانفسو يعرس؟ غايتو جنس شي..
بي الليل كنا فوق والليلة المفروض كانت ليلة ماما والمفروض بابا بجي ببيت معانا، ماما اتشيكت تمام واتعطرت وقعدت.. انا ماوصفتها ليكم لي ماما طبعا هي مهتمة بي روحا شديد وهي اصلا سمحة ومربوعة لكن جسما مكرب وكرش ماف وخصرها ولاخصر بت في العشرينات عاملة زي الممثلات اللبنانيات، يلا كانت لابسه ليها فستان قصة عش النمل ديك وعاملة ريحة النسوان السمحة ديك😍 ولامة شعرا كلو لي ورا، وجات قعدت معانا، كنا بنتونس وفاتحين التلفزيون لما بابا جا داخل وسلم، وقف عاين ليها بي اعجاب صريح  😂 قال ليها فريدة تعالي عايزك في كلمتين، نهال تشيل وترفرف لي بي حواجبا وانا ارفرف ليها، ماما صرت لينا وشها وطوالي مشت معاهو جوه وقالت لينا بي امر :امشو ختو العشا لحد مااجيكم
نهال قالت لي: حسي عليك الله راجلا ولا راجلنا نعشيهو نحن 😒
قلت ليها وانا بضحك : يابت عندهم كلام سر ماشين يفتوهو 😂
نهال: ماما شكلها ناوية ليهو انتي عارفاها وعارفة دراماتا وماتنسي خبر عرسو ده طين الجو زيادة..
مشينا المطبخ بدينا نخت في العشا وبعد 10 دقايق ماما ظهرت ومكشرة كشيرة العدو، نهال اشرت لي بي السكين على رقبتا يعني كان اتكلمنا بتتكينا وتضبحنا حسي ، المهم ختينا الاكل وبابا جا قعد وماما برضو اكلو في صمت رهيب دخلونا في ضفورنا عديل وبعدا بابا قام غسل وقال ليها تعالي لاحقاني بعد تخلصي، ماما قامت بعد شوية وقالت لينا لمو الاكل وعلى اوضتكم العدة زاتا ماتغسلوها، جيت ارد نهرتني: نورهان كلامي واضح افتكر، سكتا سااااي وعملت رايحة، ودخلنا اوضتنا ونهال قالت لي ماقلت ليك؟..    
الصباح اصبح صحيت لقيت نهال مافي طلعتا برا لقيت ليك بابا يشرب في الشاي مع ماما واخر انبساط سلمت وقعدت معاهم قام هو قال نازل بعد ده عشان يشرب الجبنة مع حبوبة تحت، لازم والا حانلقاها علقت المشنقة، المهم بعد فات شاغلتا ماما زيين : ايوااا طبقتي الراجل زي الماحصل شي غايتو نسوان قادرة😂
زفتني وقالت لي : احترمي نفسك يابت احسن ليك
وبعدين راجلي حلالي انتي مالك اقدري وجيبي زيو
دنننننننننننن احرجتني شديد😀
قلت ليها من متين الكلام ده ماحارماهو منك 15 سنة حسي بقى راجلك ولا عشان داير يعرس عليكم بنية صغيرة
قالت لي : قايلاني سكتا ليهو؟ اديتو كلام في العضم وهو مارضى مني في الاول وقال دي غيره مني لكن فهمتو انو انا ماجريت وراهو بعد طلقني براهو جاني راجع  و افتكر ده كلام العقل وانو لو حابب يعرس احسن يختارا كويس غايتو رخى وشكلو حايفكر تاني..
بالرغم من انو حبوبة اختارت ليهو مرتين لكن كان نعم الاختيار لانو منو العاقلة البتعيش مع نسيبة زي قسمة دي لازم يختاروها بي الفرازة
قلت ليها : هو عرفا من وين زبونة ولا شنو
قالت لي وهي بتضحك ماحتصدقي 😂 قال انو اتعرف عليها في الفيس في قروب ودايما بتعلق في بوستاتو وقام اتعرف بيها ودردش معاها وبعد فتره فاتحا في العرس ، 😂😂 ضحكتا لمن ماما ضربتني، معقول بابا داخل الفيس وكمان عندو بوستات ومعجبات؟ دي فاتت نهال والله، قلت  ليها مالك شي مضحك مااضحك يعني؟
قالت لي : حسك عينك تفتحي السيرة دي قدام زول من ناس البيت حزااري ولا حتى نهال فاهمة؟ وماتبيني ليهو انك عارفة لي ابوك بتبرا منك واقول اتصنتي علينا
ماما هددتني بالله، صعبة خلاص ماما دي😅 قلت ليها اطمني مابفتح خشمي بي حرف..
  يلا اليوم ده مانزلتا تحت كنت زهجانة من قعدت البيت خللتا عديل، بس وكأنو ربنا استجاب لي دعاي المتواصل وجاني ايميل من واحدة من القنوات المعروفة ووروني اني مطلوب حضوري لي معاينة بعد يومين، طرتا من الفرح ياخ😍اخيرا نورهان هاشم حاتخطي خطوة في اتجاه حلم الطفولة..
بشرت ماما ونهال في الواتس ومامصدقة متين يجي المعاد..
يوم المعاد😍
قمت من الصباح عملت استنفار حمام وحكحكة شديده وختيت لبستي السمحة ديك وقعدت ظبطتا شعري، المعاد كان الساعة 12 الضهر، المهم اتشيكت تماام ومايفوتكم المكياج السمح حق المزيعات داك 😁 يلا خلاااص بقيت نورهان المزيعة بلافخر وطلعت طوالي واهم شي اللغة عطشت الجيم طوالي لأ جيم شنو انا عطشت كل الحروف عديل🤣 ، حنست بابا يجي يوصلني لزوم الفشخرة ماممكن قشرتي دي اركب بيها المواصلات ولا الامجاد ولا الركشة بتعرض للتحرش والله🙈، بابا جا وصلني ونزلت منو وانا بسمع في دعواتو الحلوة الله يخليهو لي، ودخلت.. يلا قابلت تلاتة مدير المحطة والاتنين التانين والله مابتزكر صفتهم شنو من كترت الاثارة الانا فيها، ماكنت خايفة لانو مافي وقت اخاف فيهو واتوتر وبعدين اتعلمتا انو البقيف قدام حبوبة بقدر يقيف قدام اي زول مافرقت 😅، كانو لطيفين معاي وكان الكلام معاهم ونسة اكتر منو معاينة، ده كلو مامهم المهم هو انا قابلت منو 😍 اخر حاجة كنت اتخيلا والله.. يلا ودوني عشان اعمل اختبار قدام الكاميرا مع مخرج حقيقي وعرفني بيهو المدير وقال اعرفك بي استاذنا ومخرجنا الشاب إسلام محمد زين العابدين، انا في اثناء المقدمة دي كنت بتجول بي نظري في المكان ومبسوطة ماعاينت للمخرج الا مع قولت المدير لي اسمو زي تقول نبهني😁 المهم لمن عاينت ليهو قربت اشهق وعرقتا وكان في احتمالية بتاعت فقدان وعي وقلبي بقا يدق على طريقة ناس توم وجيري حيث يطلع القلب ويرجع كم مرة في شكل ❤️ كده😂 كان ياهو، ياهو بي شحمو ولحمو فارسي الجندي المجهول زااااااتو، واسمو إسلام كمان؟ 😍لااااا كده اوفر شديد، يلا هو سلم علي سلام جادي كده والمدير قال ليهو دي مزيعتنا الواعدة نورهان هاشم، حسيتو عايز يقول ليهو عارفا 😅 المهم انا قلت لايمكن اضيع الفرصة دي مني لازم يقبلوني معاهم وإلا حايضيع مني إسلام مره تالتة😢.. يلا حضروني وقعدت قدام الكاميرا وطبعا قدمت المحتوى الطلبوهو مني بي كل احترافية، يلا انا من حبي للمهنة دي كتير بتدرب وخشيت دورات تثقيفية على النت كتير، إسلام طلب مني اقدم نشرة رياضية😂 ود ال... عايز يقول لي سمعتك انتي وابوكي ياالسمحة ام عيون.. غايتو ابتسمت ليهو ابتسامة عزبة وبديت النشرة: اعرب نادي مانشستر سيتي الانجليزي عن جاهزية  لاعبه الارجنتيني سيرجيو اغويرو لخوض المبارة القادمة ضد نادي ليفربول مؤكدين ان الاطباء لايشكون في قدرته على اللعب، وصرح المدرب بيب جوارديولا ان اغويرو  سيكون على رأس التشكيل وان الفريق على اتم الاستعداد للمبارة القادمة على ارضه في ملعب الاتحاد..
والكلام ده قلتو ليهم من راسي  وكل الموجودين عاينو لي مزهولين وصفقو لي صفيق😁، يااخوانا انا بت الحاج هاشم مرضان كورة بتلعبو ولا إيه 😂..
بعد النشرة دي اظنهم قبلوني خلاص نظام البت متمكنة وكده، انا ماهماني اي شي في اللحظة دي بس هاميني حبيبي العرفت اسمو اخيرا إسلام😍
اي حبيبي ماقلت ليكم حبيتو من اول نظرة بل عشقتهو عديل ياخ ولي علمكم انو ماوجيه ولاعريض المنكبين ولا حتى عندو وجنات عشان تقولو كسرتني سماحتو لأ حبيت شخصيتو وتفاصيلو الصغيرة، هو طبعا كان اكتر من عادي ولا كأني قدامو كان بارد زي لوح التلج حق المناسبات، الزول التاني الدخل قلبي وبقى فيما بعد اعز صديق لي كان احمد الشهير بي حمادة مصور الكاميرا رقم واحد.. ده اظرف زول ممكن تلاقو في حياتكم، كان اليوم ظريف شديد واتعرفت على عدد من الزملا والزميلات، اي بقيت عندي زملاء رغم اني لسة ماسمعتا الموافقة بي اضاني😁، وكان احلى يوم عشان شفت إسلام والقدر لماني بيهو تاني، ياخ مهما احكي ليكم عنو مابعرف حااقول شنو زول كده واو رزييييين درجة اولى يمكن زول غيري يشوفو دمو تقيل، عندو نظرة زي نظرة النسور والصقور لما يصوروها من قريب 🦅، رغم كده قريت في عيونو اهتمامو بي ولا بتوارا لي ماعارفة، طبعا شخصيتي قدر ماحاولت اخفيها ماقدرتا، حاولت اكون واحدة كده راكزة لكن ماقدرتا عملتها كلها ونسة وضحك مع كل الناس وكنت خايفة من نظرة إسلام لي تكون مازي ماعايزاها تكون😬، واخيرا ودعتا الناس وطلعتا ماشة البيت، في الباب بره لمحتو واقف ومتكل على ضهرو في الحيطة وخاتي يدينو في جيوبو، وقفت زول منتظر ليهو زول
مريت جمبو وقلت ليهو مع السلامة يااستاذ وابتسمت ليهو ومشيت، سمعت صوتو 😍 ناداني : نورهان انتظري..
يتبع....