النصيب❥

النصيب❥

مجتمعنا مجتمع حظ ونصيب ..
فكره زواج الحب فكره مستحيله ..
البنت تعشق واحد وتاخذ غريب ...
والولد ياخذ حبيبه شخص غيره ...

البارت الاول ...

كان جالس مع ابوه في مجلس الرجل .. يشيش ويشوف له : الان يبه متى ناوي تزوج هيام ؟
زياد كلمني يشتي يتزوج ؟ بنعلق الرجال او كيف ؟
شاف له بهدوء: انت عارف اختك مش موافقه واي حد يجي بترجعه ؟
يوسف: كل الناس عارفين انها مخطوبه ل زياد
ابن عمها وسندها ومحد بينفعها غيره ! والولد منتظر او ناوي تزوجها غيره ي حاج ؟
ابو يوسف: اكيد ما بتروح لغير ابن عمها لكن انت مش فاهم ابوك ي ولدي ؟ اختك محد للان دخل راسها وانا اشتي اعرف من الذي بيخليها توافق عليه ؟
يوسف: كيف يعني ؟
ابو يوسف: اكيد ان في براسها احد ! خليه يجي ونشوف من هو ونرفضه وتشوف انه خلاص مافيش مهرب من ابن عمها ..
يوسف:حرام ل اكسر راسها هي وهو !
ابوه مسك يده: مش هكذا الامور تمشي ب السياسه ...
يوسف: لو تموت ما تتزوج غير زياد !!
اكرم اخوه اللي اصغر منه : طيب بتقول ما تشتيش حرام تغصبوها
يوسف شاف له بنظره حاده: قوم قوم بتمشي كلامها علينا بنت اقول قوم من وجههي فارح لي ب الكتب الذي بين اديه
.......
كانت هي بغرفتها وبتراجع كتبها تبع المعهد
وفجاءه تركتهم وهي سرحانه ورجعت اخذت التلفون اتصلت
: سلام
صديقتها دينا: هلا هيام
هيام : كيفك
دينا: الحمد لله وانتي
هيام: انا تمام .. بس يعني كنت بسالك يعني
دنيا: هههههه تكلمي
هيام وهي تلعب ب اضافيرها : بسالك انه اليوم ماشفت الاستاذ ايمن يعني ما***
دنيا قاطعتها بضحك: هههههه وانا قول ليش تتصلي لي ع العموم ايمن بخير بس معه اختبارت ب الجامعه ماعاد داوم
هيام: اهااا
دنيا : اشتقتي له
هيام: ليش اشتاق له وهو مش معبرني
دنيا: ههههه هيام ي مجنونه انتي عارفه انه بيدرس ب المعهد خصيصا عشانك وعشان يشوفك كيف تقولي ما يعبرك والا هو متى كان يداوم بالمعهد الا من حين دخلتي
هيام ابتسمت: لا مش عشاني بيدرس
دنيا: وعشان من عشان الكراسي ههههه انتي عارفه انه يحبك بطلي دلع عليه
ابتسمت بصمت :..
دنيا سمعت صوت البلب : ابن الحلال عن ذكره يبان  هذا هو جاء بروح اسوي له عشاء مع السلامه
هيام: مع السلامه
غلقت وهي مبتسمه وتتذكر كلام دنيا* انتي عارفه انه بيدرس بالمعهد خصيصا عشانك وعشان يشوفك *

خرجت وهو ب الصاله ابتسم لها : مساء النور
احمد فين ؟
دنيا: ب المجلس داخل ادخل حياك
بيدخل وهو يتكلم: اسف قطعت اتصالك
بس  وقف عندما قالت: لا  عادي كانت  هيام قد قفلت
ايمن التفتت لها: هيام ؟ ايش تشتي
دنيا ضحكت ودخلت المطبخ: بتسال عليك
وقف بالصاله شوي ورجع دخل بعدها وهو مبتسم: بتسال علي
دينا: ايوه قالت ليش ما داومت اليوم اشتقت لك قلت لها معه اختبارت ب الجامعه
قاطعها: قالت اشتاقت لي او من عندك؟
دينا: ههههه لا واضح اشتاقت لك قلت لها مشتاقه له وهي ضحكت
ابتسم :....
دنيا ضحكت: ادخل الان احمد منتظرك داخل لما اجهز العشاء
.........
اليوم الثاني ..
وصلت المعهد وكانت واقفه مع صديقاتها ..
سمر ولينا
وهي بتتكلم قاطعتهت سمر: هيام شوفي من بيشوف لك من اول جالس في الاداره
هيام التفتت تشوف وكان هو وتوترت لما شافته ورده ظهرها وشافت لهن: ييييييي هذا ايمن مش قالت دينا معه اختبارات
لينا: شكله جاء عشانك
هيام: اووف البنات مليان حوله ومعه الف بنت غيري بجي يداوم عشاني ؟؟
سمر: انتي عمياء ي هيام والله انه يحبك
لينا: مش عمياء بس تحب تتدلع هي عارفه انه بيحبها وهي بتحبه
هيام: ايوه انا احبه بس هو بيترك اللي حوله كلهم ويشوف لي انا لا ويداوم عشاني ؟؟
سمر: هو بيعرفك من قبل ما بيدرس هنا انتو كنتو جيران وانتي عارفه انه بيحبك من زمان
هيام: خلاص انا كملت الثانويه ليش ما يجي يخطبني
لينا: هذا اللي مزعلك هههههه! مدري يمكن ناوي لشي بس اكيد بيحبك
سمر: يالله بندخل الكلاس
هيام: لا بنمشي من عند الاداره استحي منه
سمر وقفت وسحبتها وضحكت: تعالي تعالي حرام انك تموتي وتتكلمي معه